Nghena endzeni

Hundzela eka leswi nga endzeni

Hlayisani “Vukwetsimi Hi Ku Chava Xikwembu”

Hlayisani “Vukwetsimi Hi Ku Chava Xikwembu”

 Hlayisani “Vukwetsimi Hi Ku Chava Xikwembu”

LOKO Bibele yi hlamusela leswaku Yehovha Xikwembu hi yena la kwetsimaka hi ku helela, yi ri: “Wa kwetsima, wa kwetsima, wa kwetsima Yehovha.” (Esa. 6:3; Nhlav. 4:8) Rito ra Xiheveru ni ra Xigriki leri nge “vukwetsimi” ri vula ku tenga kumbe ku basa evukhongerini, ku nga nyamisiwi. Ku kwetsima ka Xikwembu ku hlamuseriwa tanihi ku va ni mahanyelo lama baseke hi ku helela.

Xana Yehovha Xikwembu lexi kwetsimaka a nge languteli leswaku lava n’wi gandzelaka va kwetsima, va basa emirini xikan’we ni le mahanyelweni na hi tlhelo ra moya? Handle ko ba mariri, Bibele yi kombisa leswaku Yehovha u lava leswaku vanhu va yena va kwetsima. Ha hlaya eka 1 Petro 1:16: “Mi fanele mi kwetsima, hikuva mina ndza kwetsima.” Xana vanhu lava nga hetisekangiki va nga swi kota ku tekelela vukwetsimi bya Yehovha? Ina, hambileswi va nga ta ka va nga swi koti ku n’wi tekelela hi ku hetiseka. Xikwembu xi nga hi teka hi ri lava kwetsimaka loko hi xi gandzela hi ri eka xiyimo lexi tengeke kutani hi va ni vuxaka lebyikulu na xona.

Kutani, xana hi nga tshamisa ku yini hi ri lava baseke emisaveni leyi nga ni mahanyelo lama thyakeke? I mikhuva yihi leyi hi faneleke hi yi papalata? I mavulavulelo ni ku tikhoma kwihi leswi hi faneleke hi swi tshika? A hi voneni leswi hi nga swi dyondzaka emhakeni leyi eka leswi Xikwembu xi swi laveke eka Vayuda loko va huma eBabilona hi 537 B.C.E. va tlhelela etikweni ra rikwavo.

‘Ku Ta Va Ni Ndlela Ya Vukwetsimi’

Yehovha u profete leswaku vanhu va yena lava a va ri evuhlongeni eBabilona a va ta tlheriseriwa etikweni ra rikwavo. Vuprofeta lebyi vulavulaka hi ku tlheriseriwa ka vona etikweni ra rikwavo a byi ri ni xitiyisekiso lexi: “Kona ku ta va ni gondzo lerikulu, ni ndlela; naswona yi ta vitaniwa Ndlela ya Vukwetsimi.” (Esa. 35:8a) Marito lawa ma kombisa leswaku Yehovha a nga va pfulelanga ndlela yo tlhelela ekaya ntsena Vayuda kambe u va tiyisekisile leswaku u ta va sirhelela loko va ri endleleni va tlhelela ekaya.

Eka malandza ya yena ya manguva lawa ya laha misaveni, Yehovha u pfule “Ndlela ya Vukwetsimi” leyi va humaka ha yona eka Babilona Lonkulu, loyi a nga mfumo wa misava wa vukhongeri bya mavunwa. Hi 1919 u ntshunxe Vakreste lava totiweke evuhlongeni bya moya bya vukhongeri bya mavunwa, kutani va hambete va basisa vukhongeri bya vona eka tidyondzo hinkwato ta mavunwa. Vandlha ra vagandzeri va Yehovha namuntlha ri basile naswona ri rhurile naswona hi gandzela Yehovha hi tlhela hi va ni vuxaka lebyinene na yena swin’we ni vanhu-kulorhi.

 Swirho swa “ntlhambinyana” swa Vakreste lava totiweke swin’we ni swa “ntshungu lowukulu” lowu andzaka wa “tinyimpfu tin’wana” swi hlawule ku famba endleleni leyi kwetsimaka naswona swi rhamba van’wana leswaku va famba na swona. (Luka 12:32; Nhlav. 7:9; Yoh. 10:16) “Ndlela ya Vukwetsimi” yi pfulekele hinkwavo lava tsakelaka ku “nyikela mimiri ya [vona] yi va xitlhavelo lexi hanyaka, xo kwetsima ni lexi amukelekaka eka Xikwembu.”—Rhom. 12:1.

“Loyi A Nga Basangiki A Nge Fambi Ha Yona”

Hi 537 B.C.E., Vayuda lava tlhelelaka etikweni ra rikwavo a va fanele va fikelela xilaveko xin’wana xa nkoka. Malunghana ni lava fanelekaka ku famba ‘eNdleleni ya Vukwetsimi,’ Esaya 35:8b yi ri: “Loyi a nga basangiki a nge fambi ha yona. Yi ta va ya loyi a fambaka endleleni, naswona swiphukuphuku a swi nge tsendzeleki eka yona.” Leswi xikongomelo xa Vayuda xo tlhelela eYerusalema a ku ri ku vuyetela vugandzeri byo tenga, a ku ri hava ndhawu ya lava nga ni vutianakanyi, lava nga swi xiximiki swilo swo kwetsima, kumbe va nga basangiki hi tlhelo ra moya. Lava vuyeke a va fanele va hanya hi milawu leyi tlakukeke ya Yehovha. Lava tsakelaka ku amukeriwa hi Xikwembu namuntlha va fanele va fikelela xilaveko lexi fanaka. Va fanele va hlayisa “vukwetsimi hi ku chava Xikwembu.” (2 Kor. 7:1) Kutani, hi swihi swiendlo leswi hi faneleke hi swi papalata?

Muapostola Pawulo u tsarile a ku: “Mintirho ya nyama ya vonaka, yona i vumbhisa, thyaka, ku tikhoma ko biha.” (Gal. 5:19) Vumbhisa i ku endla rimbewu leswi katsaka ku tirhisa swirho swa rimbewu ni munhu loyi u nga tekanangiki na yena. Ku tikhoma loko biha ku katsa “vudlakuta; mahanyelo lama thyakeke; mahanyelo lama nyumisaka.” Vuoswi ni ku tikhoma loko biha swi lwisana swinene ni vukwetsimi bya Yehovha. Hikwalaho, lava hambetaka va hanya hi swilo leswi a va pfumeleriwi ku va swirho swa vandlha ra Vukreste kumbe va susiwa eka rona. Swi tano ni hi lava va hanyaka hi xidyoho lexikulu, ku nga “thyaka hinkwaro hi makwanga.”—Efe. 4:19.

“Thyaka” i rito leri katsaka mixaka yo tala ya swidyoho. Rito ra kona ra Xigriki ri kombetela eka thyaka ra muxaka wihi na wihi—ra ku tikhoma, ku vulavula ni loko munhu a va munghana ni lava nga riki vapfumeri. Ri katsa mahanyelo lama katsaka thyaka ro karhi leri nga laviki leswaku munhu a tekeriwa goza hi komiti ya vuavanyisi. * Kambe, xana lava hanyaka hi thyaka ro tano va hlayisa ndlela ya vukwetsimi?

A hi nge Mukreste u sungula ku hlalela swifaniso swo navetisa rimbewu exihundleni. Hakatsongo-ntsongo loko ku navela loku thyakeke ku kula, ku tiyimisela ka yena ku tshama a basile emahlweni ka Yehovha ka tsana. Ku tikhoma ka yena ku nga ha va ku nga si biha lerova ku va xidyoho lexikulu, kambe a nga ha hambeti a kambisisa ntsena ‘swilo swin’wana ni swin’wana swo tenga, leswi ku vulavuriwaka kahle ha swona, swa vunene ni leswi dzunekaka.’ (Filp. 4:8) Swifaniso swo navetisa rimbewu a swi basanga naswona swi onha vuxaka lebyi munhu a nga na byona na Xikwembu. Thyaka rin’wana ni rin’wana a ri fanelanga ri vuriwa exikarhi ka hina.—Efe. 5:3.

Xiya xikombiso xin’wana. A hi nge Mukreste u tlangisa swirho swa mbeleko—ku tinyanyula hi vomu leswaku a titwa a enerisekile hi tlhelo ra  rimbewu—ku nga khathariseki leswaku leswi swi fambisana ni swifaniso swo navetisa rimbewu kumbe a swi fambisani na swona. Hambileswi xiga lexi nge “ku tlangisa swirho swa mbeleko” xi nga humeleriki eBibeleni, xana a hi ntiyiso leswaku mukhuva lowu wu nyamisa mianakanyo ni mintlhaveko? Xana loko munhu a hambeta a tinyamisa hi ndlela leyi a nge onhi vuxaka bya yena na Yehovha kutani sweswo swi endla leswaku a va la thyakeke emahlweni ka Xikwembu? A hi xi tekeleni enhlokweni xitsundzuxo xa muapostola Pawulo xa leswaku hi ‘tibasisa eka swilo hinkwaswo leswi nyamisaka nyama ni moya,’ kutani hi ‘dlaya swirho swa miri wa hina leswi nga emisaveni malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa.’—2 Kor. 7:1; Kol. 3:5.

Misava leyi, leyi fumiwaka hi Sathana yi pfumelela mahanyelo lama thyakeke, hambi ku ri ku ma khutaza. Swi nga ha tika swinene ku lwisana ni ndzingo wo hlanganyela eka mahanyelo yo biha. Kambe Vakreste va ntiyiso va fanele va “nga ha fambi hilaha matiko ma fambaka hakona hi mianakanyo ya wona leyi nga pfuniki.” (Efe. 4:17) Yehovha u ta hi pfumelela leswaku hi famba ‘eNdleleni ya Vukwetsimi’ loko hi papalata ku tikhoma loko biha, exihundleni kumbe erivaleni.

“A Ku Nge Vi Na Nghala”

Leswaku munhu a tsakeriwa hi Yehovha Xikwembu loyi a kwetsimaka, swi nga ha lava leswaku a cinca swinene eka ndlela leyi a tikhomaka ha yona ni le ka mavulavulelo ya yena. Esaya 35:9 yi ri: “A ku nge vi na nghala, ni swivandzana swo leva a swi nge vi kona,” ‘eNdleleni ya Vukwetsimi.’ Hi ndlela yo fanekisela, vanhu lava rhandzaka madzolonga ni tihanyi ni mavulavulelo ya thyaka va fanisiwa ni swivandzana swa nhova. A va nge vi na ndhawu emisaveni leyintshwa ya Xikwembu yo lulama. (Esa. 11:6; 65:25) Hikwalaho i swinene leswaku lava tsakelaka ku amukeriwa hi Xikwembu va tshika vumunhu byo tano bya vuharhi kutani va hlayisa vukwetsimi.

Matsalwa ma hi khutaza ma ku: “Ku leva hinkwako ni ku hlundzuka ni vukarhi ni huwa ni mavulavulelo ya nhlambha a swi susiwe eka n’wina swin’we ni vubihi hinkwabyo.” (Efe. 4:31) Eka Vakolosa 3:8, ha hlaya: “Cukumetani hinkwaswo ekule na n’wina, vukarhi, ku hlundzuka, vubihi, mavulavulelo ya nhlambha, ni mavulavulelo lama thyakeke ma suseni emilon’wini ya n’wina.” Xiga lexi nge “mavulavulelo ya nhlambha” lexi tirhisiweke eka tindzimana letimbirhi kahle-kahle xi kombetela eka mavulavulelo yo biha, lama khomisaka tingana kumbe yo sandza.

Namuntlha mavulavulelo yo vavisa, ya nhlambha ma tolovelekile hambi ku ri emakaya man’wana. Mimpatswa leyi tekaneke ya rhuketelana yi tlhela yi rhuketela ni vana va yona. Vakreste a va fanelanga va vulavurisana hi ndlela leyi hambi ku ri emakaya ya vona.—1 Kor. 5:11.

Ku Hlayisa “Vukwetsimi Hi Ku Chava Xikwembu” I Nkateko!

Kunene i lunghelo ku tirhela Yehovha, Xikwembu lexi kwetsimaka! (Yox. 24:19) Paradeyisi ya moya leyi Yehovha a hi nyikeke yona i ya risima swinene. Ku tshama hi ri ni mahanyelo lama kwetsimaka ematihlweni ya Yehovha i ndlela ya nkoka swinene yo hanya ha yona.

Ku nga ri khale misava ya Paradeyisi leyi tshembisiweke hi Xikwembu yi ta va ya xiviri. (Esa. 35:1, 2, 5-7) Lava yi languteleke hi mahlo-ngati naswona va tshamaka va ri karhi va landzela ndlela ya Xikwembu va ta nyikiwa ndhawu eka yona. (Esa. 65:17, 21) Hikwalaho, a hi hambeteni hi gandzela Xikwembu hi tengile hi tlhelo ra moya naswona hi tshama hi ri ni vuxaka lebyikulu na xona.

[Nhlamuselo ya le hansi]

^ par. 12 Leswaku u kuma rungula ra malunghana ni ku hambanisa “thyaka . . . hi makwanga” ni “thyaka,” vona Xihondzo xo Rindza, xa July 15, 2006, matluka 29-31.

[Xifaniso eka tluka 26]

I yini lexi a xi laveka eka Vayuda leswaku va famba eka “Ndlela ya Vukwetsimi”?

[Xifaniso eka tluka 27]

Ku languta swifaniso swo navetisa rimbewu swi onha vuxaka bya munhu na Yehovha

[Xifaniso eka tluka 28]

“Huwa ni mavulavulelo ya nhlambha a swi susiwe eka n’wina”