Nghena endzeni

Hundzela eka leswi nga endzeni

Hlawula Ku Tirhela Yehovha Loko Wa Ha Ri Muntshwa

Hlawula Ku Tirhela Yehovha Loko Wa Ha Ri Muntshwa

 Hlawula Ku Tirhela Yehovha Loko Wa Ha Ri Muntshwa

“Tshama eka swilo leswi u swi dyondzeke, leswi u susumetelekeke ku swi pfumela.”—2 TIM. 3:14.

1. Yehovha u wu teka njhani ntirho lowu endliwaka hi Timbhoni ta yena leta ha riki vantshwa?

NTIRHO wo kwetsima wa vantshwa i wa nkoka swinene eka Yehovha lerova u huhutele vuprofeta lebyi vulavulaka hi vona. Mupisalema u yimbelerile a ku: “Vanhu va wena va ta tinyikela hi ku tirhandzela esikwini ra vuthu ra wena ra nyimpi. Hi ku vangama ka vukwetsimi, ku sukela embelekweni ya vurhonga, u ni ntlawa wa majaha ku fana ni mathonsi ya mberha.” (Ps. 110:3) Ina, Yehovha u va teka va ri va risima swinene vantshwa lava tiyimiseleke ku n’wi tirhela.

2. Vantshwa namuntlha va langutana ni nkucetelo wihi wa misava malunghana ni vumundzuku bya vona?

2 N’wina vantshwa lava nga evandlheni ra Vukreste, xana mi tinyiketerile eka Yehovha? Vantshwa vo tala swi nga ha va tikela ku endla xiboho xo tirhela Xikwembu xa ntiyiso. Varhangeri va mabindzu, vadyondzisi, kumbexana ni swirho swa ndyangu ni vanghana va khutaza vantshwa ku hlongorisa swilo leswi vonakaka. Loko vantshwa va hisekela swilo swa moya, hakanyingi misava ya va hlekula. Kambe ntiyiso hileswaku ku tirhela Xikwembu xa ntiyiso i ndlela leyinene ngopfu evuton’wini leyi u nga yi tekaka. (Ps. 27:4) Malunghana ni mhaka leyi, xiya swivutiso swinharhu: Ha yini u fanele u tirhela Xikwembu? Xana u nga humelela njhani loko u ri munhu la tinyiketeleke eka Xikwembu ku nga khathariseki leswi van’wana va swi vulaka kumbe ku swi endla? Hi wahi malunghelo lamakulu ya ntirho wo kwetsima lama nga ku pfulekelaka?

Yehovha U Fanele A Tirheriwa

3. Xana ntumbuluko wa Yehovha wu fanele wu hi khumba njhani?

3 Ha yini u fanele u tirhela Xikwembu xa ntiyiso lexi hanyaka? Nhlavutelo 4:11 yi nyikela xivangelo lexikulu, yi ku: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” Yehovha i Mutumbuluxi wo hlamarisa wa nchumu wun’wana ni wun’wana lowu nga kona. Wa nga vona ndlela leyi misava yi xongeke ha yona! Yehovha hi yena la endleke mirhi, swiluva, swiharhi, malwandle, tintshava ni maboboma ya mati. Pisalema 104:24, yi ri: “Misava yi tele rifuwo ra [Xikwembu].” Kunene ha tsaka leswi Yehovha hi rirhandzu a hi nyikeke miri ni mianakanyo leswi endlaka hi tiphina hi misava ni hi swilo leswinene leswi nga eka yona! Ku tlangela ka hina hi mbilu hinkwayo ntumbuluko lowu hlamarisaka swi fanele swi hi susumetela ku n’wi tirhela.

4, 5. I swiendlo swihi swa Yehovha leswi tshineteke Yoxuwa eka Yena?

4 Xivangelo xin’wana xo tirhela Yehovha xi kumeka eka marito ya Yoxuwa murhangeri wa Vaisrayele. Loko a ri kusuhi ni ku fa, Yoxuwa u byele vanhu va Xikwembu a ku: “Mi swi tiva kahle hi timbilu ta n’wina hinkwato ni mimoya-xiviri ya n’wina hinkwayo leswaku a ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina.” Ha yini Yoxuwa a vule sweswo?—Yox. 23:14.

5 Loko Yoxuwa a ha kula le Egipta, swi nga ha endleka a twe hi ta xitshembiso xa Yehovha xa ku nyika Vaisrayele tiko leri nga ta va ra vona. (Gen. 12:7; 50:24, 25; Eks. 3:8) Kutani Yoxuwa u swi xiyile loko Yehovha a sungula ku hetisisa xitshembiso xexo hi ku tisa Makhombo ya Khume aEgipta a tlhela a sindzisa Faro wo sihalala leswaku a tshika vana va Israyele va famba. Yoxuwa a a ri un’wana wa lava kutsuriweke va tsemakanya Lwandle ro  Tshwuka a tlhela a swi vona loko lwandle rolero ri mita Faro ni vuthu rakwe. Eka riendzo ro leha laha a va famba “emananga lamakulu ni lama chavisaka,” ya Sinayi, Yoxuwa u vone ndlela leyi Yehovha a va nyikeke ha yona Vaisrayele nchumu wun’wana ni wun’wana lowu a va wu lava. A nga kona munhu ni un’we la dlayiweke hi torha kumbe hi ndlala. (Det. 8:3-5, 14-16; Yox. 24:5-7) Loko ku fika nkarhi wa leswaku Vaisrayele va hlula matiko ya matimba ya Vakanana kutani va teka Tiko leri Tshembisiweke, Yoxuwa u vone ndlela leyi Xikwembu lexi yena ni Vaisrayele lavan’wana a va xi gandzela xi va seketeleke ha yona entirhweni wolowo.—Yox. 10:14, 42.

6. I yini lexi nga ta ku pfuna ku hlakulela ku navela ku tirhela Xikwembu?

6 Yoxuwa a a swi tiva leswaku Yehovha u hlayise switshembiso swa Yena. Hikwalaho, Yoxuwa u te: “Loko ku ri mina ni vandyangu wa mina, hi ta tirhela Yehovha.” (Yox. 24:15) Ku vuriwa yini hi wena? Loko u anakanya hi switshembiso leswi Xikwembu xa ntiyiso se xi swi hetisiseke ni leswi xa ha ta swi hetisisaka, xana wa swi navela ku xi tirhela hilaha Yoxuwa a endleke hakona?

7. Ha yini ku khuvuriwa ematini ku ri goza ra nkoka leri munhu a faneleke a ri teka?

7 Loko u anakanyisisa hi mintirho yo tumbuluxa ya Yehovha ni hi switshembiso swa yena swo tsakisa ni leswi tshembekaka swinene, u fanele u susumeteleka ku tinyiketela eka Yehovha ni ku kombisa ku tinyiketela ka wena hi ku khuvuriwa ematini. Nkhuvulo i goza ra nkoka leri faneleke ri tekiwa hi lava lavaka ku tirhela Xikwembu. Sweswo swi vekiwe erivaleni hi Xikombiso xa hina lexinene, Yesu. Loko a nga si sungula ntirho wakwe tanihi Mesiya, u ye eka Yohane lowo Khuvula leswaku a ya n’wi khuvula. Ha yini Yesu a teke goza rero? Hi ku famba ka nkarhi u te: “Ndzi xike hi le tilweni ku ta endla ku rhandza ka loyi a ndzi rhumeke, kambe ku nga ri ka mina.” (Yoh. 6:38) Yesu u khuvuriwile leswaku a kombisa ku tinyiketela ka yena ku endla ku rhandza ka Tata wakwe.—Mat. 3:13-17.

8. Ha yini Timotiya a hlawule ku gandzela Xikwembu, naswona i yini leswi u nga ha fanelaka u swi endla?

8 Nakambe xiya mhaka ya Timotiya, muntshwa la nga Mukreste loyi eku heteleleni Yehovha a n’wi nyikeke ntirho lowukulu ni malunghelo yo tala. Ha yini Timotiya a endle xiboho xo gandzela Xikwembu xa ntiyiso? Bibele yi hi byela leswaku ‘u dyondze swilo naswona u susumeteleke ku swi pfumela.’ (2 Tim. 3:14) Loko u dyondze Rito ra Xikwembu ni ku susumetelaka ku pfumela leswaku tidyondzo ta rona i ta ntiyiso, u le xiyin’weni xo fana ni lexiya xa Timotiya. Sweswi u fanele u endla xiboho. Ha yini u nga vulavuli ni vatswari va wena malunghana ni leswi u navelaka ku swi endla? Vatswari va wena ni vakulu va le vandlheni va nga ku pfuna leswaku u twisisa swilaveko swa Matsalwa swa nkhuvulo.—Hlaya Mintirho 8:12.

9. Vanhu van’wana va nga ha titwa njhani loko u khuvuriwa?

9 Loko u khuvuriwa, sweswo ku ta va ku ri masungulo lamanene ngopfu yo tirhela Xikwembu xa ntiyiso. Loko u teka goza leri, u va u nghenela mphikizano wo leha wa ku famba hi milenge laha u nga ta kuma hakelo ya vutomi lebyi nga heriki ni ntsako lowu u wu kumaka sweswi hi ku endla ku rhandza ka Xikwembu. (Hev. 12:2, 3) Nakambe u ta tsakisa swirho swa ndyangu wa ka n’wina leswi ana se swi ngheneleke mphikizano lowu swin’we ni vanghana va wena va le vandlheni ra Vukreste. Kambe nchumu wa nkoka swinene, u ta tsakisa mbilu ya Yehovha. (Hlaya Swivuriso 23:15.) Entiyisweni, van’wana a va nge swi twisisi leswaku ha yini u hlawule ku gandzela Yehovha, naswona va nga ha anakanya leswaku a hi xiboho lexinene.  Va nga ha ku kaneta. Kambe u nga yi hlula miringo leyi.

Loko Van’wana Va Ku Kaneta

10, 11. (a) Hi swihi swivutiso leswi vanhu va nga ku vutisaka swona malunghana ni xiboho xa wena xo tirhela Xikwembu? (b) U nga dyondza yini eka ndlela leyi Yesu a swi hlamuleke ha yona swivutiso leswi a vutisiweke swona malunghana ni vugandzeri bya ntiyiso?

10 Xiboho xa wena xo tirhela Yehovha xi nga ha pfilunganya vadyondzi-kuloni, vaakelani ni maxaka ya wena. Va nga ha ku vutisa leswaku ha yini u hlawule ndlela yoleyo va tlhela va ku vutisa hi swilo leswi u swi pfumelaka. Xana u fanele u va hlamula njhani? Ina, u fanele u kambisisa leswi u swi ehleketaka ni ndlela leyi u titwaka ha yona leswaku u ta kota ku hlamusela swivangelo leswi endleke u hlawula ku gandzela Yehovha. Nakambe loko u ri karhi u hlamula swivutiso leswi u vutisiwaka swona malunghana ni swilo leswi u swi pfumelaka, u nga tekelela xikombiso lexinene xa Yesu.

11 Loko varhangeri va vukhongeri va Vayuda va konanise Yesu hi ta ku pfuxiwa ka vafi, u va hlamule hi tsalwa leri a va nga ri na mhaka na rona. (Eks. 3:6; Mat. 22:23, 31-33) Loko mutsari un’wana a n’wi vutise leswaku hi xihi xileriso lexikulu, Yesu u n’wi tshahele tindzimana leti faneleke ta le Bibeleni. Mutsari yoloye u yi tsakele ngopfu nhlamulo ya Yesu. (Lev. 19:18; Det. 6:5; Mar. 12:28-34) Ku tirhisa ka Yesu Matsalwa ni ndlela leyi a a vulavula ha yona swi vange ku “avana exikarhi ka ntshungu hikwalaho ka yena,” naswona vakaneti va yena a va swi kotanga ku n’wi vavisa. (Yoh. 7:32-46) Loko u hlamula swivutiso leswi u vutisiwaka swona malunghana ni swilo leswi u swi pfumelaka, tirhisa Bibele naswona u hlamula hi “moya wo rhula ni xichavo lexi enteke.” (1 Pet. 3:15) Loko u nga yi tivi nhlamulo, pfumela leswaku a wu yi tivi nhlamulo kutani u tshembisa leswaku u ta endla ndzavisiso. Endzhaku ka sweswo, kambisisa mhaka ya kona eka Watch Tower Publications Index kumbe eka Watchtower Library leyi nga le ka CD-ROM loko yi ri kona hi ririmi leri u ri twisisaka. Loko u lunghiselele kahle, u ta ‘tiva ndlela leyi u faneleke ku hlamula ha yona.’—Kol. 4:6.

12. Ha yini u nga fanelanga u pfumelela nxaniso wu ku heta matimba?

12 A wu nge vutisiwi swivutiso ntsena malunghana ni xiboho xa wena xo tirhela Xikwembu ni leswi u swi pfumelaka. Phela, nala wa Xikwembu, Sathana Diyavulosi, u lawula misava. (Hlaya 1 Yohane 5:19.) Swi ta va swi nga twali loko wo langutela leswaku un’wana ni un’wana u ta ku bumabumela kumbe a amukela xiboho xa wena, naswona u ta pfa u langutana ni nkaneto. Vanhu van’wana va nga ha “ku tseketsela,” naswona va nga ha hambeta va endla tano. (1 Pet. 4:4) Kambe, tsundzuka leswaku a wu wexe. Yesu Kreste na yena u xanisiwile. Muapostola Petro na yena u xanisiwile, naswona u tsarile a ku: “Varhandziwa, mi nga hlamarisiwi hi ku tshwa loku nga exikarhi ka n’wina, loku endlekaka eka n’wina leswaku mi ringiwa, onge hiloko mi humeleriwa hi nchumu lowu nga tolovelekangiki. Ku hambana ni sweswo, hambetani mi tsaka tanihi leswi mi nga vahlanganyeri eku xanisekeni ka Kreste.”—1 Pet. 4:12, 13.

13. Ha yini Vakreste va fanele va tsaka loko va xanisiwa?

13 Loko Mukreste a tiyisela nxaniso kumbe ku kanetiwa u ni xivangelo xo tsaka. Ha yini? Hikuva loko u tsakeriwa hi misava swi kombisa leswaku u hanya hi ku landza misinya ya milawu ya Sathana—ku nga ri ya Xikwembu. Yesu u tsundzuxile a ku: “Mi ni khombo, loko vanhu hinkwavo va vulavula kahle ha n’wina, hikuva swilo swo fana ni sweswo hi leswi vatata wa vona va swi endleke eka vaprofeta va mavunwa.” (Luka 6:26) Nxaniso wu  kombisa leswaku Sathana ni misava yakwe va ku hlundzukerile hileswi u tirhelaka Yehovha. (Hlaya Matewu 5:11, 12.) Kutani “loko [u] rhukaniwa hikwalaho ka vito ra Kreste,” u fanele u tsaka.—1 Pet. 4:14.

14. Hi byihi vuyelo lebyinene lebyi nga vaka kona loko munhu a tshama a tshembekile eka Yehovha hambiloko a xanisiwa?

14 Loko u tshama u tshembekile eka Yehovha ku nga khathariseki nkaneto, ku ni vuyelo bya mune lebyi vaka kona. U nyikela vumbhoni malunghana ni Xikwembu ni N’wana xa xona. Ku tshembeka ka wena ku khutaza Vakreste van’wana. Vanhu van’wana lava ku vonaka lava nga n’wi tiviki Yehovha va nga susumeteleka ku n’wi lava. (Hlaya Vafilipiya 1:12-14.) Kutani loko u vona ndlela leyi Yehovha a ku nyikaka matimba ha yona leswaku u tiyisela miringo, u ya u n’wi rhandza swinene.

U Pfulekeriwe “Hi Nyangwa Leyikulu”

15. Hi yihi “nyangwa leyikulu” leyi a yi pfulekele muapostola Pawulo?

15 Malunghana ni vutirheli bya yena bya le Efesa, muapostola Pawulo u tsarile a ku: “Ndzi pfulekeriwe hi nyangwa leyikulu leyi yisaka entirhweni.” (1 Kor. 16:8, 9) A ku ri nyangwa ya ntirho lowukulu wo chumayela mahungu lamanene ni ku endla vadyondzisiwa emutini wolowo. Leswi Pawulo a amukeleke lunghelo rero, u pfune vanhu vo tala leswaku va dyondza hi Yehovha ni ku N’wi gandzela.

16. Xana masalela lama totiweke ma nghene hi “nyangwa leyi pfulekeke” hi ndlela yihi hi 1919?

16 Hi 1919 Yesu Kreste loyi a vangamisiweke u pfulele masalela lama totiweke “nyangwa leyi pfulekeke.” (Nhlav. 3:8) Ma nghene hi nyangwa yoleyo kutani ma sungula ku chumayela mahungu lamanene, ma dyondzisa ntiyiso wa Bibele hi ku hiseka lokukulu ku tlula rini na rini. Xana byi ve byihi vuyelo bya vutirheli bya wona? Sweswi mahungu lamanene ma fike emakumu ya misava, naswona kwalomu ka vanhu va timiliyoni ta nkombo va ni ntshembo wo kuma vutomi lebyi nga heriki emisaveni leyintshwa ya Xikwembu.

17. Xana u nga nghena njhani hi “nyangwa leyikulu leyi yisaka entirhweni”?

17 “Nyangwa leyikulu leyi yisaka entirhweni” ya ha pfulekele malandza hinkwawo ya Yehovha. Lava nghenaka ha yona va kuma ntsako ni ku eneriseka loko va ri karhi va hlanganyela swinene entirhweni wo chumayela mahungu lamanene. N’wina vantshwa lava nga malandza ya Yehovha, xana mi ri teka ri ri ra nkoka ku fikela kwihi lunghelo leri nga pimanisiwiki na nchumu ro pfuna van’wana leswaku va “va ni ripfumelo eka mahungu lamanene”? (Mar. 1:14, 15) Xana u anakanyile hi ku va phayona ra nkarhi hinkwawo kumbe ra nkarhinyana? Ku aka Tiholo ta Mfumo, ku tirha eBethele ni ku va murhumiwa i man’wana ya malunghelo lawa ma nga ha pfulekelaka vo tala va n’wina. Leswi misava yo homboloka ya Sathana yi heleriwaka hi nkarhi, ku endla mintirho leyi ya Mfumo i swa xihatla swinene. Xana u ta nghena hi “nyangwa leyikulu” loko ka ha ri na nkarhi?

“Nantswani Mi Vona Leswaku Yehovha Hi Lonene”

18, 19. (a) I yini lexi pfuneke Davhida leswaku a swi navela swinene ku tirhela Yehovha? (b) I yini lexi kombisaka leswaku Davhida a nga tisolanga hikwalaho ko tirhela Xikwembu?

18 Mupisalema loyi a huhuteriweke u rhambe van’wana leswaku va ‘nantswa va vona leswaku Yehovha hi lonene.’ (Ps. 34:8) Loko Hosi Davhida wa le Israyele wa khale a ha ri xifanyetana lexi nga murisi, Yehovha u n’wi ponisile leswaku a nga hlaseriwi hi swivandzana swa nhova. Xikwembu xi n’wi seketerile loko a lwa na Goliyadi xi tlhela xi n’wi ponisa eka makhombo man’wana yo tala. (1 Sam. 17:32-51; Ps. 18, rito ro rhanga) Hikwalaho ka rirhandzu lerikulu ra Xikwembu, Davhida u susumeteleke ku tsala a ku: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka  hina; a nga kona la nga fanisiwaka na wena.”—Ps. 40:5.

19 Davhida u sungule ku rhandza Yehovha swinene naswona a a lava ku N’wi dzunisa hi mbilu yakwe hinkwayo na hi mianakanyo ya yena hinkwayo. (Hlaya Pisalema 40:8-10.) Loko malembe ma ri karhi ma famba, Davhida a nga tisolanga hileswi a heteke vutomi byakwe hinkwabyo a ri karhi a gandzela Xikwembu xa ntiyiso. Xuma xakwe lexikulu swinene a ku ri ku hanya hi ku tinyiketela eka Xikwembu, leswi veke xihlovo xa ntsako lexi nga ringanisiwiki na nchumu. Loko se a dyuharile, Davhida u te: “U ntshembo wa mina, Wena Yehovha, Hosi leyi Lawulaka, ntshembo wa mina ku sukela evuntshweni bya mina. Oho Xikwembu, u nga ndzi tshiki ku fikela emalembeni ya ku dyuhala ni ya ku va mpunga.” (Ps. 71:5, 18) Vuxaka bya Davhida na Yehovha ni ntshembo wakwe eka Yena swi tiyile hambiloko se matimba yakwe ma tsanile hikwalaho ka vudyuhari.

20. Ha yini ku tirhela Xikwembu ku ri ndlela leyinene leyi u nga yi tekaka evuton’wini bya wena?

20 Vutomi bya Yoxuwa, Davhida na Timotiya byi swi tiyisekisa kahle leswaku ku tirhela Yehovha i ndlela leyinene ngopfu leyi u nga yi tekaka evuton’wini bya wena. Ku hlongorisa ntirho wo tihanyisa emisaveni leyi a swi nge ku vuyerisi ku fana niloko u ‘tirhela Yehovha hi mbilu ya wena hinkwayo ni hi moya-xiviri wa wena hinkwawo.’ (Yox. 22:5) Loko u nga si tinyiketela eka Yehovha hi xikhongelo, tivutise, ‘I yini lexi ndzi sivelaka ku va Mbhoni ya Yehovha?’ Loko se u ri mugandzeri wa Yehovha la khuvuriweke, xana u nga tsakela ku engetela ntsako wa wena evuton’wini? Kutani ndlandlamuxa vutirheli bya wena, naswona u endla nhluvuko hi tlhelo ra moya. Xihloko lexi landzelaka xi ta ku kombisa ndlela leyi u nga wu endlaka ha yona nhluvuko hi tlhelo ra moya hi ku landzela xikombiso xa muapostola Pawulo.

U Nga Hlamula Njhani?

• Nyika swivangelo swimbirhi leswi endlaka hi boheka ku tirhela Xikwembu.

• I yini lexi pfuneke Timotiya leswaku a endla xiboho xo tirhela Xikwembu?

• Ha yini u fanele u tshama u tiyile loko u langutane ni nxaniso?

• I malunghelo wahi ya ntirho lama nga ha ku pfulekelaka?

[Swivutiso Swa Dyondzo]

[Xifaniso eka tluka 18]

Ku tirhela Yehovha i ndlela leyinene evuton’wini

[Xifaniso eka tluka 19]

Xana u nga hlamula swivutiso leswi vutisiwaka malunghana ni swilo leswi u swi pfumelaka?