Nghena endzeni

Hundzela eka leswi nga endzeni

Nkandziyiso Lowuntshwa Wa Swihloko Leswi Dyondziwaka eVandlheni Swa Xihondzo Xo Rindza

Nkandziyiso Lowuntshwa Wa Swihloko Leswi Dyondziwaka eVandlheni Swa Xihondzo Xo Rindza

 Nkandziyiso Lowuntshwa Wa Swihloko Leswi Dyondziwaka eVandlheni Swa Xihondzo Xo Rindza

MAGAZINI lowu u nga le ku wu hlayeni i nkandziyiso wo sungula wa swihloko leswi dyondziwaka evandlheni swa Xihondzo xo Rindza. Hi lava ku hlamusela ndlela leyi magazini lowu wu hleriweke ha yona.

Magazini lowu wu kandziyiseriwa Timbhoni ta Yehovha kun’we ni lava ku dyondziwaka na vona Bibele lava endlaka nhluvuko. Wu ta huma kan’we hi n’hweti naswona wu ta va ni swihloko leswi dyondziwaka swa mune kumbe swa ntlhanu. Xiyimiso xa swihloko leswi dyondziwaka xi ta va exifunengetweni xa kona. Xihondzo xo Rindza lexi dyondziwaka evandlheni a xi nge vi na swifaniso eka xifunengeto tanihi leswi xi nga fambisiwiki ensin’wini, a xi nge fani ni lexa vanhu hinkwavo.

Eka tluka 2 ra magazini lowu, ku na nhlamuselo yo koma ya xikongomelo xa xihloko xin’wana ni xin’wana lexi dyondziwaka kumbe nxaxamelo wa swona swin’we ni swihloko leswin’wana. Nhlamuselo leyi yi ta va pfuna ngopfu vafambisi va Dyondzo ya Xihondzo xo Rindza, loko va ri karhi va lunghiselela dyondzo leyi akaka ya swihloko leswi nga ta dyondziwa enhlanganweni wa vandlha.

U ta xiya leswaku swihloko leswi dyondziwaka swi komile ku tlula leswa khale. Leswi swi ta pfuna leswaku ku va ni nkarhi wo tala wo kambisisa matsalwa lama seketelaka xihloko hi nkarhi wa Dyondzo ya Xihondzo xo Rindza. Hi ku khutaza leswaku u hlaya matsalwa hinkwawo lama kombisiweke eka xihloko xa vhiki rin’wana ni rin’wana. Eka matsalwa man’wana lama kombisiweke ku tsariwe “hlaya” kutani ma fanele ma hlayiwa ma tlhela ma tlhuvutsiwa hi nkarhi wa Dyondzo. Matsalwa laman’wana na wona ma nga hlayiwa loko nkarhi wu pfumela. Eka swihloko swin’wana u nga ha kuma matsalwa man’wana ma tsariwe “ringanisa.” Tanihi leswi matsalwa wolawo ma nga vekiki tinhla-nkulu ta ndzimana erivaleni hi ku kongoma, hakanyingi a ma nge hlayiwi hi nkarhi wa Dyondzo. Kambe matsalwa lama nga tsariwa “ringanisa” ma ni rungula leri engetelekeke, kumbe ma seketela tinhla leti ku vulavuriwaka ha tona hi ndlela yo karhi. Hi ku khutaza ku ma hlaya loko u ri karhi u lunghiselela Dyondzo ya Xihondzo xo Rindza. Kumbexana u ta kota ku ma hlamusela loko u ri karhi u hlamula.

Xiviko xa lembe ni lembe a xi nge he vi kona eka Xihondzo xo Rindza. Ku sukela hi 2008, xi ta kumeka eka xiengetelo xa Vutirheli Bya Hina Bya Mfumo ni le ka Buku Ya Lembe. Kambe, hilaha swi kombisiweke hakona laha henhla, nkandziyiso lowu dyondziwaka wu ta katsa ni swihloko swin’wana. Hambileswi swo tala swa swona swi nga taka swi nga dyondziwi evandlheni, hi ku khutaza leswaku u swi hlaya hi vukheta. Swihloko leswi, na swona i swakudya swa moya leswi humaka eka “hlonga ro tshembeka ni ro tlhariha.”—Mat. 24:45-47.

Xo hetelela, nkandziyiso wa Xihondzo xo Rindza lowu dyondziwaka evandlheni ni wa vanhu hinkwavo a yi hambananga. Minkandziyiso leyi hayimbirhi i Xihondzo xo Rindza Xi Huwelela Mfumo Wa Yehovha. Yi ni ndzimana leyi hlamuselaka xikongomelo xa Xihondzo xo Rindza eka tluka 2. Hinkwayo ka yona yi ta patsiwa eka vholumo yin’we ya lembe ni lembe. Naswona rungula leri nga ta kumeka eka xihloko lexi nge “Wa Tsundzuka Xana?” ri ta va ri tekiwe eka minkandziyiso hayimbirhi, naswona xi ta kumeka eka nkandziyiso lowu dyondziwaka evandlheni.

Ku sukela hi 1879, Xihondzo xo Rindza xi huwelele ntiyiso hi ta Mfumo wa Xikwembu, hambi ku ri eminkarhini ya tinyimpi, ya ku pfumaleka ka timali ni minxaniso. Hi khongelela leswaku Yehovha a xi katekisa xi hambeta xi huwelela ntiyiso hambileswi xi hleriweke hi vuntshwa. Nakambe hi khongelela leswaku Yehovha a ku katekisa, wena muhlayi, loko u ri karhi u tiphina hi ku hlaya nkandziyiso lowu wa Xihondzo xo Rindza lowu dyondziwaka evandlheni.