Nghena endzeni

Hundzela eka leswi nga endzeni

Tekelela Muendli Lonkulu Wa Vadyondzisiwa

Tekelela Muendli Lonkulu Wa Vadyondzisiwa

 Tekelela Muendli Lonkulu Wa Vadyondzisiwa

“Nyikelani nyingiso eka ndlela leyi mi yingisaka ha yona.”—LUKA 8:18.

1, 2. Ha yini u fanele u nyikela nyingiso eka ndlela leyi Yesu a tirhisaneke ni vanhu ha yona hi nkarhi wa vutirheli bya yena?

YESU KRESTE a a hetisisa xiphemu xa yena tanihi Mudyondzisi Lonkulu ni Muendli wa Vadyondzisiwa loko a byela valandzeri va yena a ku: “Nyikelani nyingiso eka ndlela leyi mi yingisaka ha yona.” (Luka 8:16-18) Nsinya wolowo wa nawu wu tirha evutirhelini bya wena tanihi Mukreste. Loko u nyikela nyingiso eka swiletelo leswi fambisanaka ni Xikwembu ni swikongomelo swa xona, u ta swi yingisa u tlhela u va muhuweleri wa Mfumo la humelelaka. Ina, u nge ri twi rito ra Yesu namuntlha, kambe u nga hlaya leswi a swi vuleke a tlhela a swi endla, hilaha swi paluxiweke hakona eMatsalweni. Xana swilo sweswo swi paluxa yini malunghana ni ndlela leyi Yesu a tirhisaneke na vanhu ha yona enkarhini wa vutirheli bya yena?

2 Yesu a a ri muchumayeri la humelelaka swinene wa mahungu lamanene ni mudyondzisi la hlamarisaka wa ntiyiso lowu nga eMatsalweni. (Luka 8:1; Yohane 8:28) Ntirho wo endla vadyondzisiwa wu katsa ku chumayela ni ku dyondzisa, kambe Vakreste van’wana lava nga vachumayeri lava humelelaka swa va tikela ku dyondzisa vanhu hi ndlela leyi humelelaka. Ku chumayela swi katsa ku twarisa rungula, kasi ku dyondzisa vanhu malunghana na Yehovha ni swikongomelo swa yena hi ntolovelo swi lava leswaku muendli wa vadyondzisiwa a va ni vuxaka na vona. (Matewu 28:19, 20) Leswi swi nga endliwa hi ku tekelela Yesu Kreste, loyi a nga Mudyondzisi Lonkulu tlhelo Muendli wa Vadyondzisiwa.—Yohane 13:13.

3. Ku tekelela Yesu ku nga va ni vuyelo byihi eka matshalatshala ya wena yo endla vadyondzisiwa?

3 Loko u tekelela ndlela leyi Yesu a a dyondzisa ha yona, u ta va u landzela xitsundzuxo xa muapostola Pawulo lexi nge: “Hambetani mi famba hi vutlhari eka lava nga ehandle, mi tixavela nkarhi lowunene. Marito ya n’wina a ma ve ni nsovo nkarhi hinkwawo, ma lungiwe hi munyu, leswaku mi tiva ndlela leyi mi faneleke ku hlamula un’wana ni un’wana ha yona.” (Vakolosa 4:5, 6) Ku tekelela Yesu entirhweni wo endla vadyondzisiwa  swi lava matshalatshala, kambe swi ta endla leswaku u humelela eka ndlela leyi u dyondzisaka ha yona hikuva swi ta ku pfuna “ku hlamula un’wana ni un’wana” hi ku ya hi xilaveko xa yena.

Yesu U Khutaze Van’wana Leswaku Va Vulavula

4. Ha yini ku nga vuriwaka leswaku Yesu a a ri muyingiseri lonene?

4 Ku sukela loko a ha ri n’wana, Yesu a a ri ni mukhuva wa ku yingisela vanhu ni ku va khutaza ku phofula mavonelo ya vona. Hi xikombiso, loko a ri na malembe ya 12, vatswari va yena va n’wi kume a ri exikarhi ka vadyondzisi etempeleni, “a va yingisela ni ku va vutisa.” (Luka 2:46) Yesu a nga yanga etempeleni leswaku a ya khomisa vadyondzisi tingana hi vutivi bya yena. U ye kwalaho leswaku a ya yingisela, hambileswi a tlheleke a vutisa swivutiso. Swi nga ha endleka leswaku leswi a a ri muyingiseri lonene swi endle leswaku a tsakeriwa hi Xikwembu ni hi vanhu.—Luka 2:52.

5, 6. Hi swi tivisa ku yini leswaku Yesu u yingisele leswi vuriwaka hi lava a a va dyondzisa?

5 Endzhaku ka ku khuvuriwa ni ku totiwa ka yena tanihi Mesiya, Yesu u hambete a yingisela vanhu. A a nga khomekanga ngopfu hi leswi a a swi dyondzisa lerova a rivala hi vanhu lava a va tela ku ta n’wi yingisela loko a vulavula. Hakanyingi, a a yimanyana, a vutisa leswaku va swi vona njhani, ivi a yingisela nhlamulo ya vona. (Matewu 16:13-15) Hi xikombiso, endzhaku ka ku fa ka Lazaro, Yesu u byele Marta a ku: “Un’wana ni un’wana loyi a hanyaka a tlhela a kombisa ripfumelo eka mina a nge fi nikatsongo.” Hiloko a n’wi vutisa a ku: “Xana wa swi kholwa leswi ke?” Handle ko kanakana Yesu u yingiserile loko Marta a n’wi hlamula a ku: “Ina, Hosi; ndzi khorwile leswaku u Kreste N’wana wa Xikwembu.” (Yohane 11:26, 27) Swi fanele swi n’wi enerisile ku twa Marta a phofula ripfumelo ra yena hi ndlela yoleyo!

6 Loko vadyondzisiwa vo tala va fularhele Yesu, a a tsakela ku twa vonelo ra vaapostola va yena. Kutani u vutisile: “N’wina a mi swi lavi ku famba, a hi swona ke?” Simoni Petro u hlamurile: “Hosi, xana hi ta ya eka mani? Hi wena u nga ni marito ya vutomi lebyi nga heriki; naswona hi khorwile ni ku tiva leswaku u Mukwetsimi wa Xikwembu.” (Yohane 6:66-69) Hakunene marito wolawo ma fanele ma n’wi tsakisile Yesu! Nhlamulo leyi fanaka ni yoleyo leyi phofulaka ripfumelo ra xichudeni xa Bibele handle ko kanakana yi ta ku tsakisa.

Yesu U Yingisele Hi Xichavo

7. Ha yini Vasamariya vo tala va pfumele eka Yesu?

7 Xivangelo xin’wana lexi endleke Yesu a va muendli wa vadyondzisiwa la humelelaka hileswi a a khathala hi vanhu a tlhela a va yingisela hi xichavo. Hi xikombiso, siku rin’wana Yesu u chumayele wansati wa Musamariya ekusuhi ni xihlovo xa Yakobe le Sikari. Ebulwini rolero a ku nga vulavuli Yesu ntsena; a a yingisela leswi vuriwaka hi wansati loyi. Loko a ha n’wi yingiserile, Yesu u swi xiyile leswaku u tsakela vugandzeri kutani a n’wi byela leswaku Xikwembu xi lava vanhu lava a va ta xi gandzela hi moya ni ntiyiso. Yesu u xixime wansati loyi a tlhela a khathala hi yena, ivi wansati loyi a byela van’wana malunghana na yena, kutani “vo tala va Vasamariya va le mutini wolowo va pfumela eka yena hikwalaho ka rito ra wansati loyi.”—Yohane 4:5-29, 39-42.

8. Leswi vanhu vo tala va rhandzaka ku vula mavonelo ya vona, sweswo swi nga ku pfuna njhani leswaku u sungula bulo ensin’wini?

8 Hakanyingi vanhu va swi tsakela ku phofula mavonelo ya vona. Hi xikombiso, vaaki va le mutini wa Atena wa khale a va swi tsakela ku phofula mavonelo ya vona ni ku yingisa timhaka letintshwa. Sweswo swi endle leswaku ku va ni vuyelo lebyinene eka nkulumo leyi muapostola Pawulo a yi nyikeleke entshaveni ya Areyopago leyi a yi ri emutini wolowo. (Mintirho 17:18-34) Namuntlha loko u sungula bulo ni n’wini wa muti ensin’wini, u nga ha ku, “Ndzi ku endzele hileswi ndzi tsakelaka ku twa vonelo ra wena malunghana [ni mhaka yo karhi].” Yingisela vonelo ra munhu yoloye, u vulavula hi rona, kumbe u vutisa xivutiso malunghana na rona. Kutani hi musa u n’wi komba leswi Bibele yi swi vulaka hi mhaka yoleyo.

 Yesu A A Swi Kota Ku Sungula Bulo

9. Yesu u endle yini loko a nga si ‘pfulela Kleyopasi ni nakulobye wa yena Matsalwa hi ku helela’?

9 Yesu a a nga heleriwi hi swo swi vula. Handle ko va muyingiseri lonene, hakanyingi a a swi tiva leswi vanhu a va swi anakanya ni leswi a a fanele a swi vula. (Matewu 9:4; 12:22-30; Luka 9:46, 47) Hi xikombiso: Endzhakunyana ka ku pfuxiwa ka Yesu, vadyondzisiwa va yena vambirhi a va suka eYerusalema va ya aEmawusi. Rungula ra Evhangeli ri ri: “Kuteloko va ha bula ni ku kanerisana, Yesu a tshinela ivi a fambisana na vona; kambe a va nga swi koti ku n’wi lemuka hi mahlo ya vona. A ku eka vona: ‘Xana mi kanetana hi timhaka tihi mi ri karhi mi famba?’ Kutani va yima va ku tserhe, va khwanyane mimombo. Loyi a vuriwaka Kleyopasi a n’wi hlamula a ku: ‘Xana u muluveri u ri wexe eYerusalema lerova a wu swi tivi swilo leswi humeleleke kona emasikwini lawa?’ A ku eka vona: ‘Swilo swihi?’” Mudyondzisi Lonkulu u yingiserile loko va ri karhi va hlamusela leswaku Yesu wa Munazareta u dyondzise vanhu, a endla masingita ivi a dlayiwa. Kutani sweswi van’wana a va vula leswaku u pfuxiwile eku feni. Yesu u pfumelele Kleyopasi ni nakulobye wa yena va tiphofula. Hiloko a va hlamusela leswi a va fanele va swi tiva, a va “pfulela Matsalwa hi ku helela.”—Luka 24:13-27, 32.

10. U nga ri tiva njhani vonelo ra vukhongeri ra munhu loyi u hlanganaka na yena ensin’wini?

10 Swi nga ha endleka u nga ma tivi mavonelo ya vukhongeri ya n’wini wa muti wo karhi. Leswaku u tiva mavonelo ya yena, u nga ha vula leswaku u tsakela ku twa leswi vanhu va swi ehleketaka malunghana ni xikhongelo. Kutani u nga ha vutisa u ku, “Xana u ehleketa leswaku ku ni munhu loyi a yingisaka swikhongelo hakunene?” Nhlamulo ya munhu yoloye yi nga ha paluxa swo tala malunghana ni langutelo ra yena ni leswi a swi tivaka hi vukhongeri. Loko a byi rhandza vukhongeri, u nga n’wi endla a ya emahlweni a tiphofula hi ku vutisa u ku, “Xana u ehleketa leswaku Xikwembu xi yingisa swikhongelo hinkwaswo, kumbe ku ni swikhongelo swo karhi leswi xi nga swi yingisiki?” Swivutiso swo tano swi nga endla leswaku mi burisana hi ndlela leyi ntshunxekeke. Loko swi fanerile ku n’wi hlayela Tsalwa, u ta swi endla hi vutlhari, u nga kaneti leswi a swi pfumelaka. Loko a swi tsakela ku ku yingisela, a nga ha swi tsakela leswaku u tlhela u vuya. Kambe a hi nge u ku vutise xivutiso lexi u tsandzekaka ku xi hlamula? U nga ha ya u ya endla ndzavisiso kutani u vuyela eka yena u lunghekele ku nyikela ‘xivangelo xa ntshembo wa wena, u endla sweswo hi moya wo rhula ni xichavo lexi enteke.’—1 Petro 3:15.

Yesu U Dyondzise Lava Swi Va Fanelaka

11. I yini lexi nga ta ku pfuna ku kuma lava faneriwaka hi ku dyondzisiwa?

11 Yesu loyi a a hetisekile a a ri na ku twisisa loku n’wi endleke a kota ku vona lava faneriwaka hi ku dyondzisiwa. Swi hi tikela swinene ku kuma lava nga ni “mboyamelo lowunene eka vutomi lebyi nga heriki.” (Mintirho 13:48) A swi va tikela ni vaapostola lava Yesu a va byeleke leswi: “Emutini kumbe eximutanini xin’wana ni xin’wana lexi mi nga ta nghena eka xona, lavisisani loyi swi n’wi fanelaka.” (Matewu 10:11) Ku fana ni vaapostola va Yesu, u fanele u lavisisa vanhu lava tiyimiseleke ku yingisela ni ku dyondzisiwa ntiyiso wa Matsalwa. U nga kuma lava swi va  fanelaka hi ku yingiserisisa vanhu hinkwavo lava u vulavulaka na vona, u xiya langutelo ra munhu un’wana ni un’wana.

12. U nga hambeta u n’wi pfuna hi ndlela yihi munhu la tsakelaka?

12 Endzhaku ka loko u bule ni munhu loyi a tsakelaka rungula ra Mfumo, i swinene ku hambeta u anakanya hi ntiyiso wa Bibele lowu a faneleke a wu dyondza. Loko u tsala ehansi leswi u swi dyondzeke endzhaku ko vulavurisana ni munhu hi mahungu lamanene, leswi swi ta ku pfuna ku hambeta u pfuna munhu yoloye hi tlhelo ra moya. Loko u endla maendzo yo vuyela, u fanele u yingisela hi vukheta leswaku u ta tiva leswi engetelekeke malunghana ni leswi munhu yoloye a swi pfumelaka, langutelo ra yena kumbe swiyimo swa yena.

13. I yini lexi nga ku pfunaka ku twisisa ndlela leyi munhu a titwaka ha yona hi Bibele?

13 U nga va khutaza njhani vanhu leswaku va ku byela ndlela leyi va titwaka ha yona malunghana ni Rito ra Xikwembu? Etindhawini tin’wana, swa pfuna ku vutisa u ku, “Xana swa ku tikela ku twisisa Bibele?” Hakanyingi nhlamulo ya xivutiso xexo yi paluxa langutelo leri munhu a nga na rona hi timhaka ta moya. Ndlela yin’wana i ku hlaya tsalwa ivi u vutisa u ku, “U ri twisisa njhani tsalwa leri?” Ku fana na Yesu, u nga ha vuyeriwa swinene ensin’wini hi ku tirhisa swivutiso leswinene. Kambe, hi lexi xitsundzuxo.

Yesu U Tirhise Swivutiso Hi Ndlela Leyi Humelelaka

14. U nga swi kombisa njhani leswaku u tsakela langutelo ra vanhu handle ko va konanisa?

14 Kombisa leswaku u tsakela langutelo ra van’wana handle ko va khomisa tingana. Landzela ndlela leyi Yesu a endleke ha yona. A a nga vutisi swivutiso hi ndlela leyi nga kombisiki vutlhari, kambe a a vutisa swivutiso leswi tlhontlhaka mianakanyo. Nakambe Yesu a a ri muyingiseri la nga ni musa loyi a a phyuphyisa vanhu va timbilu letinene a tlhela a va endla va titwa va ntshunxekile. (Matewu 11:28) Vanhu va swiyimo hinkwaswo a va titwa va ntshunxekile ku n’wi phofulela swiphiqo swa vona. (Marka 1:40; 5:35, 36; 10:13, 17, 46, 47) Leswaku vanhu va ta titwa va ntshunxekile ku ku byela leswi va swi anakanyaka hi Bibele ni hi leswi yi swi dyondzisaka, u fanele u papalata ku va konanisa.

15, 16. U nga va susumetela njhani vanhu leswaku va bula hi timhaka ta vukhongeri?

15 Ku tlula kwalaho, loko u tirhisa swivutiso hi ndlela leyi humelelaka, u nga endla leswaku bulo ri ya emahlweni hi ku vula mhaka leyi tsakisaka kutani u yingisa ndlela leyi a angulaka ha yona. Hi xikombiso, Yesu u byele Nikodema a ku: “Loko munhu a nga velekiwanga ra vumbirhi, a nge wu voni mfumo wa Xikwembu.” (Yohane 3:3) Marito wolawo a ma tsakisa swinene lerova Nikodema u susumeteleke ku vulavula ni ku yingisela Yesu. (Yohane 3:4-20) Na wena u nga kota ku burisana na vanhu hi ndlela leyi fanaka.

16 Namuntlha, ku ni vukhongeri byo tala lebyintshwa etindhawini to tanihi le Afrika, Yuropa Vuxa ni le Latin Amerika. Etindhawini to tano, hakanyingi u nga sungula bulo hi ku vula leswi: “Ndza karhateka leswi ku nga ni vukhongeri byo tala swonghasi. Kambe ndzi ni ntshembo wa leswaku ku nga ri khale ndzi ta vona vanhu va matiko hinkwawo va ri evugandzerini byin’we bya ntiyiso. Xana u nga swi tsakela ku swi vona sweswo swi humelela?” Loko u vula nchumu lowu hlamarisaka malunghana ni ntshembo wa wena, u nga kota ku endla vanhu va phofula mavonelo ya vona. Naswona swa olova ku hlamula swivutiso loko u fanele u hlawula eka swilo swimbirhi. (Matewu 17:25) Endzhaku ka loko n’wini wa muti a xi hlamurile xivutiso xa wena, xi hlamule hi tsalwa rin’we kumbe mambirhi. (Esaya 11:9; Sofaniya 3:9) Loko u yingisela hi vukheta naswona u xiya ndlela leyi munhu lowun’wana a angulaka ha yona, u nga swi kota ku vona leswaku enkarhini lowu taka loko u vuya mi nga bula hi yini.

Yesu U Yingise Vana

17. I yini lexi kombisaka leswaku Yesu a a khathala hi vana?

17 Yesu a a nga khathali hi vanhu lavakulu ntsena kambe ni hi vana. A a yi tiva mintlangu leyi vana a va yi tlanga ni swilo leswi a va swi vula. Minkarhi yin’wana a a vitana vana va ta eka yena. (Luka 7:31, 32; 18:15-17) Exikarhi ka mintshungu  leyi a yi yingisela Yesu a ku ri ni vana vo tala. Loko vafana va huwelela va dzunisa Mesiya, Yesu u swi xiyile kutani a kombisa leswaku Matsalwa a ma swi profetile sweswo. (Matewu 14:21; 15:38; 21:15, 16) Namuntlha, vana vo tala va va vadyondzisiwa va Yesu. Kutani u nga va pfuna njhani?

18, 19. U nga n’wi pfuna njhani n’wana wa wena hi tlhelo ra moya?

18 Leswaku u pfuna n’wana wa wena hi tlhelo ra moya, u fanele u n’wi yingisela. U fanele u twisisa leswaku hi wahi mavonelo lawa a nga na wona lawa ma nga fambisaniki ni mianakanyo ya Yehovha. Ku nga khathariseki leswaku n’wana wa wena u ri yini, i swinene leswaku u rhanga u n’wi bumabumela. Kutani u nga tirhisa matsalwa lama faneleke leswaku u pfuna n’wana wa wena a twisisa langutelo ra Yehovha hi timhaka to karhi.

19 Swivutiso swi nga ku pfuna ku twisisa ndlela leyi vana va titwaka ha yona. Kambe vana a va swi tsakeli ku konanisiwa tanihi leswi ni vanhu lavakulu va nga swi tsakeliki. Ematshan’weni yo tikisela n’wana wa wena hi ku n’wi vutisa swivutiso swo tala leswi tikaka, ha yini u nga n’wi hlamuseli mhaka yo koma malunghana na wena? U nga ha vula leswaku a wu tshamela ku titwa hi ndlela yo karhi u tlhela u hlamusela leswaku ha yini a wu titwa hi ndlela yoleyo swi ya hi mhaka leyi mi vulavulaka ha yona. Kutani u nga ha vutisa u ku, “Xana na wena u titwa hi ndlela yoleyo?” Nhlamulo ya n’wana wa wena yi nga ha ku pfulela ndlela ya bulo ra Matsalwa leri pfunaka ni leri khutazaka.

Hambeta U Tekelela Muendli Lonkulu Wa Vadyondzisiwa

20, 21. Ha yini u fanele u va muyingiseri lonene entirhweni wa wena tanihi muendli wa vadyondzisiwa?

20 Ku nga khathariseki leswaku u bula ni n’wana wa wena kumbe munhu un’wana, i swa nkoka ku yingiserisisa. Hakunene, ku yingiserisisa i xikombiso xa rirhandzu. Loko u yingisela, wa titsongahata naswona u kombisa munhu loyi a vulavulaka na wena xichavo ni ku n’wi anakanyela. Ina, ku yingisela swi lava leswaku u yingiserisisa leswi vuriwaka hi munhu un’wana.

21 Loko u ri ensin’wini, hambeta u yingiserisisa vini va miti. Loko u yingiserisisa leswi va swi vulaka, handle ko kanakana u ta xiya leswaku hi wihi ntiyiso wa Bibele lowu nga ta koka nyingiso wa vona hakunene. Kutani tikarhatele ku va pfuna hi ku tirhisa tindlela to hambana-hambana to dyondzisa leti tirhisiweke hi Yesu. Loko u endla tano u ta kuma ntsako ni ku eneriseka hikuva u tekelela Muendli Lonkulu wa Vadyondzisiwa.

A Wu Ta Hlamurisa Ku Yini?

• Yesu u va khutaze njhani van’wana leswaku va vula leswi va swi anakanyaka?

• Ha yini Yesu a yingisele lava a a va dyondzisa?

• U nga swi tirhisa njhani swivutiso loko u ri ensin’wini?

• U nga endla yini leswaku u pfuna vana hi tlhelo ra moya?

[Swivutiso Swa Dyondzo]

[Xifaniso eka tluka 28]

Loko u chumayela, tiyiseka leswaku wa yingisela

[Xifaniso eka tluka 30]

Hi tekelela Yesu loko hi pfuna vana hi tlhelo ra moya