Nghena endzeni

Hundzela eka leswi nga endzeni

Ntlhontlho Wa Ku Titsongahata

Ntlhontlho Wa Ku Titsongahata

 Ntlhontlho Wa Ku Titsongahata

EKA vanhu vo tala, ku titsongahata swi nga tikomba swi nga pfuni nchumu emisaveni ya namuntlha. Lava va lawulaka van’wana ni lava swi tikombaka swi va fambela kahle va titlakusa, va ni manyunyu, va sindzisa leswaku swilo swi endliwa hi ndlela ya vona. Vanhu hakanyingi va tekelela vutomi bya lava hanyaka hi vulovolovo ni lava nga ni ndhuma, ku nga ri bya lava titsongahataka. Lava swi va fambelaka kahle hakanyingi va tibuma va vula leswaku va humelela hikwalaho ka matimba ya vona. Ematshan’weni yo titsongahata, va tinyungubyisa ngopfu hi ku humelela ka vona.

Muendli wa ndzavisiso wa le Canada u vulavule hi “ku humelela ka moya wa vutianakanyi” etikweni ra ka vona. Van’wana va vona onge hi hanya exikarhi ka vanhu lava rhandzaka ku titsakisa ku tlula mpimo naswona vanhu namuntlha va khathala ngopfu hi vona vini. Eka vanhu vo tano, ku titsongahata a hi nchumu lowu nga bumabumeriwaka.

Ina, a hi vangani lava nga kanetaka leswaku ku titsongahata i swinene eka van’wana, tanihi leswi swi olovaka ku hanyisana ni vanhu lava titsongahataka. Hambiswiritano, eka misava ya hina leyi phikizanaka, van’wana va chava leswaku loko va titsongahata, vanhu va ta va languta va ri lava tsaneke.

Rito ra Xikwembu, ku nga Bibele, ri profete leswaku enkarhini wa hina vanhu va ta va “lava titivaka, lava titlakusaka.” (2 Timotiya 3:1, 2) Xana a wu pfumeli leswaku vuprofeta lebyi byi karhi bya hetiseka? Xana u vona onge ku titsongahata swa vuyerisa? Kumbe, xana u anakanya leswaku munhu loyi a titsongahataka u ta langutiwa a ri loyi a tsaneke, lerova van’wana va tlanga hi yena?

Ntiyiso hileswaku Bibele yi nyika swivangelo leswinene swa ku rhandza ku titsongahata ni ku ku hlakulela. Yi hlamusela langutelo leri hi faneleke hi va na rona hi ku titsongahata naswona yi komba leswaku ku titsongahata ka ntiyiso i mfanelo leyinene, a hi xikombiso xa ku tsana. Xihloko lexi landzelaka xi ta hlamusela leswaku ha yini.

[Xifaniso eka tluka 3]

Hi fanele hi titwa njhani hi leswi hi swi fikeleleke?