Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana Yesu a a vula yini loko a ku hlonga ra yena ro tshembeka ri ta va ro “tlhariha”?

Yesu u tlakuse xivutiso lexi nge: “Kahle-kahle i mani hlonga ro tshembeka ni ro tlhariha, leri n’wini wa rona a ri vekeke ehenhla ka va yindlu yakwe, ku va nyika swakudya swa vona hi nkarhi lowu faneleke?” (Matewu 24:45) “Hlonga” leri hi nyikaka “swakudya” swa moya i vandlha ra Vakreste lava totiweke. Hikwalaho ka yini Yesu a te va tlharihile? *

Leswaku hi tiva leswi Yesu a a vula swona hi rito leri nge “vutlhari,” hi fanele hi ma twisisa kahle madyondziselo ya yena. Hi xikombiso, loko Yesu a vulavula ni vadyondzisiwa va yena hi “hlonga ro tshembeka ni ro tlhariha,” u endle xikombiso xa vanhwana va khume lava a va rindzele muteki. Vanhwana lava va hi tsundzuxa Vakreste lava totiweke va le mahlweni ka 1914 lava hi mapfundza a va rindze ku fika ka Muteki lonkulu, Yesu Kreste. Eka vanhwana lava va khume, ntlhanu wa vona a va nga ri na mafurha lama eneleke loko ku fika muteki, kutani va tsandzekile ku nghena enkhubyeni wa vukati. Lavan’wana va ntlhanu a va tlharihile. A va ri ni mafurha lama eneleke leswaku va kota ku voninga loko muteki a fika, kutani va pfumeleriwile ku nghena enkhubyeni wa vukati.—Matewu 25:10-12.

Loko Yesu a vekiwe ku va hosi ya Mfumo hi 1914, Vakreste vo tala lava totiweke a va anakanya leswaku a va ta hatla va sungula ku fuma na yena etilweni. Hambiswiritano, a va ha ri ni ntirho wo tala laha misaveni, naswona van’wana va vona a va nga tiyimiselanga ku wu endla. Ku fana ni vanhwana va swiphukuphuku, a va tsanile hi tlhelo ra moya, naswona a va nga ta swi kota ku ya emahlweni va ri vabyarhi va ku vonakala. Kambe, vo tala va vona va endle hi vutlhari—hi ku anakanyela leswi nga ta endleka enkarhini lowu taka—naswona va tiyisiwile hi tlhelo ra moya. Loko va vona leswaku ntirho wa vona a wa ha tele, va ye emahlweni va wu endla va tsakile. Hikwalaho ka sweswo, hi vona lava veke “hlonga ro tshembeka ni ro tlhariha.”

A hi xiyeni nakambe ndlela leyi Yesu a ri tirhiseke ha yona rito leri nge “vutlhari” eka Matewu 7:24. Yesu u te: “Un’wana ni un’wana la twaka leswi ndzi swi vulaka kutani a swi endla u ta fanisiwa ni wanuna wo tlhariha, la akeke yindlu ya yena ehenhla ka ribye lerikulu.” Wanuna wo tlhariha u aka yindlu ya yena ehenhla ka ribye ro tiya, hileswi ku nga tshukaka ku va ni xidzedze. Kambe, wanuna wa xiphukuphuku u aka yindlu ya yena ehenhla ka sava ivi yindlu ya yena yi khukhuleka. Xisweswo, mulandzeri wo tlhariha wa Yesu hi loyi a byi vonaka ka ha ri mahlweni vuyelo byo biha bya ku landzela vutlhari bya munhu. Vutlhari bya yena ni ku hluteka ka yena emianakanyweni swi endla leswaku ripfumelo ra yena, swiendlo swa yena ni madyondziselo ya yena swi sekeriwa hilaha ku tiyeke eka leswi Yesu a swi dyondziseke. “Hlonga ro tshembeka ni ro tlhariha” ri endla hilaha ku fanaka.

Nakambe xiya matirhiselo ya rito leri nge “vutlhari” eMatsalweni yo tala ya Xiheveru. Hi xikombiso, Faro u veke Yosefa leswaku a va mulanguteri wa swakudya swa tiko ra Egipta. Leri a ku ri lunghiselelo ra Yehovha ra leswaku a nyika vanhu va yena swakudya. Hikwalaho ka yini Faro a hlawule Yosefa? Faro u te eka yena: “A ku na un’wana la fanelekaka ni la tlhariheke ku fana na wena.” (Genesa 41:33-39; 45:5) Hilaha ku fanaka, Bibele yi vula leswaku Abigayele a a “tlharihile swinene.” U teke swakudya a swi nyika Davhida, mutotiwa wa Yehovha swin’we ni vanhu va yena. (1 Samuwele 25:3, 11, 18) Yosefa na Abigayele va vuriwe vo tlhariha hikuva va endle ku rhandza ka Xikwembu hi ku anakanyela leswi nga ta endleka enkarhini lowu taka ni hileswi va tirhiseke mianakanyo ya vona yo hluteka.

Hikwalaho, loko Yesu a vula leswaku hlonga ro tshembeka ri tlharihile, a a vula leswaku lava va yimeriwaka hi hlonga rero a va ta twisisa, va anakanyela leswi nga ta endleka enkarhini lowu taka va tlhela va hluteka emianakanyweni hikuva ripfumelo ra vona, swiendlo swa vona ni madyondziselo ya vona swi sekeriwe eRitweni ra Xikwembu leri nga ntiyiso.

[Nhlamuselo ya le hansi]

^ par. 3 Rito leri nge “vutlhari” ri hundzuluxeriwa ri huma eka rito ra Xigriki leri nge phroʹni·mos. Buku leyi nge Word Studies in the New Testament, leyi tsariweke hi M. R. Vincent, yi hlamusela leswaku minkarhi yo tala rito leri ri vula vutlhari ni ku kota ku anakanya.