Nghena endzeni

Hundzela eka leswi nga endzeni

Ripfumelo Ra Manana Ri Hlula Vuyelo Bya Mhangu

Ripfumelo Ra Manana Ri Hlula Vuyelo Bya Mhangu

 Ripfumelo Ra Manana Ri Hlula Vuyelo Bya Mhangu

“Loko mi ri eku hlayeni ka papila leri, swi vula leswaku vuhandzuri a byi fambanga kahle nileswaku vutomi byi tsandzile.”

LAWA i marito yo sungula ya papila leri tsariweke hi Carmen, manana loyi a nga Mukreste, leri yaka eka vana vakwe vanharhu va vanhwanyana, va malembe ya 25, 19 na 16 hi ku siyana ka vona. Lexi vavisaka, vuhandzuri a byi fambanga kahle, kutani Carmen u lovile.

Ku siya vana vanharhu ehansi ka swiyimo swo tano swo tika swa vavisa hakunene. Hambiswiritano, ripfumelo leri tiyeke ra manana loyi eka Yehovha ni le ka switshembiso swa yena hakunene ri hlule vuyelo bya mhangu, tanihi leswi ri n’wi nyikeke ku rhula ka mianakanyo loku kombisiweke kahle hi papila ra yena leri khumbaka mbilu. Xiya leswi a swi byeleke vana vakwe va vanhwanyana.

“Xo sungula ndzi lava ku mi byela leswaku ndzi mi rhandza hi mbilu ya mina hinkwayo. . . . Mi vanhwanyana lavanene ngopfu lava manana un’wana ni un’wana a nga tsakelaka ku va na vona, naswona ndza tinyungubyisa swinene ha n’wina.

“A ndzi swi lava ku hambeta ndzi va na n’wina ku kondza ku fika misava leyintshwa leyi tshembisiweke hi Xikwembu . . . , kambe tanihi leswi swi nga ta ka swi nga vi tano, ndzi kombele Xikwembu xi mi pfuna leswaku mi tshama mi tshembekile, hilaha mi veke hakona. Hi tiyisele miringo yo tala swin’we, naswona Yehovha a nga hi tshikanga. . . . Hikwalaho, hambetani mi namarhela nkongomiso lowu a wu nyikelaka hi ku tirhisa nhlengeletano ya yena, naswona hambetani mi seketela vandlha ni vakulu. Chumayelani swinene hilaha mi nga kotaka hakona, naswona mi rhandza vamakwerhu hinkwavo.

“Ku hambana ka hina i ka xinkarhana ntsena. . . . Ndzi kombela mi ndzi rivalela eka swihoxo hinkwaswo leswi ndzi swi endleke ni hileswi a ndzi pfa ndzi nga mi twisisi kumbe ndzi nga mi byeli leswaku ndza mi rhandza swinene. . . . Ndza swi tiva leswaku un’wana ni un’wana wa n’wina u ni swilaveko swa yena n’wini. Yehovha u tiva swilaveko swa n’wina ku tlula leswi n’wina mi swi tivisaka swona, naswona u ta mi nyika xin’wana ni xin’wana lexi mi xi pfumalaka, naswona u ta mi hakela hikwalaho ka hinkwaswo leswi mi swi tiyiseleke.

“Mi nga tshuki mi rivala pakani ya n’wina—ku hanya emisaveni leyintshwa—naswona hambetani mi tikarhatela ku yi fikelela. Onge Yehovha a nga mi katekisa ni ku mi tiyisa leswaku mi tshembeka ku fikela emakumu. . . . Mi nga karhateki ngopfu vananga. Ndza mi rhandza!”

Mhangu yi nga ha wela mani na mani, nkarhi wihi na wihi. Hosi Solomoni wa khale u tsarile a ku: “Nkarhi ni xiendlakalo lexi nga languteriwangiki swa va wela hinkwavo.” (Eklesiasta 9:11) Hambiswiritano, lava nga ni ripfumelo leri tiyeke eka Xikwembu, va nga tiyiseka ku fana na muapostola Pawulo, loyi a nga te: “Ndza kholwa leswaku rifu ni vutomi . . . ni xivumbiwa xihi ni xihi xin’wana a swi nge swi koti ku hi hambanisa ni rirhandzu ra Xikwembu leri nga eka Kreste Yesu Hosi ya hina.”—Varhoma 8:38, 39; Vaheveru 6:10.