Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Tanihi leswi ntshovelo a wu sungula ximfumo loko va xinuna hinkwavo va Vaisrayele va ri eNkhubyeni wa Swinkwa swo Kala Comela, i vamani lava a va tshovela swirhangana swa maxalana leswi a swi tisiwa endhawini yo kwetsima?

Nawu wa Muxe wu lerise Vaisrayele wu ku: “Kanharhu hi lembe vaxinuna hinkwavo va wena va fanele va humelela emahlweni ka Yehovha Xikwembu xa wena endhawini leyi a nga ta yi hlawula: enkhubyeni wa swinkwa leswo-ke-comela ni le nkhubyeni wa mavhiki ni le nkhubyeni wa mintsonga.” (Deteronoma 16:16) Ku sukela enkarhini wa Hosi Solomoni ku ya emahlweni, ndhawu leyi hlawuriweke hi Xikwembu a ku ri tempele ya le Yerusalema.

Nkhuvo wo sungula eka leyinharhu a wu endliwa eku sunguleni ka ximun’wana. Nkhuvo lowu, lowu a wu vitaniwa Nkhuvo wa Swinkwa swo Kala Comela, a wu sungula hi siku leri tlhandlamaka siku ra nkhuvo wa Paseka lowu a wu tlangeriwa hi Nisani 14, naswona a wu tlangeriwa ku ringana masiku ya nkombo ku fikela hi Nisani 21. Siku ra vumbirhi ra nkhuvo, hi Nisani 16, a ri fungha ku sungula ka ntshovelo wo sungula wa lembe hi ku ya hi khalendara yo kwetsima. Hi siku rero, muprista lonkulu a a fanele a teka “nyandza ya swirhangana” swa ntshovelo wa maxalana a yi ndziwita “emahlweni ka Yehovha” endhawini yo kwetsima. (Levhitika 23:5-12) Tanihi leswi va xinuna hinkwavo a ku laveka leswaku va va kona eNkhubyeni wa Swinkwa swo Kala Comela, i vamani lava a va tshovela maxalana lawa ya gandzelo?

Xileriso xa ku nyikela swirhangana swa ntshovelo eka Yehovha hi nkarhi wa Nkhuvo wa Swinkwa swo Kala Comela a xi nyikiwe tiko hinkwaro. A swi nga bohi leswaku munhu un’wana ni un’wana a sungula ku tshovela kutani a ti yisela swirhangana endhawini yo kwetsima. Ematshan’weni ya sweswo, vanhu lava a va yimela tiko a va hetisisa xileriso xexo. Hikwalaho, ku tsema nyandza leyi a yi ta tirhisiwa eNkhubyeni wa Swinkwa swo Kala Comela a swi ta endliwa hi ntlawa wa vanhu lava hlawuriweke ku yimela tiko, lava a va ta rhumiwa ku ya ensin’wini ya maxalana leyi nga ekusuhi. Loko Encyclopaedia Judaica yi vulavula hi mhaka leyi, yi ri: “Loko maxalana ma wupfile, a ma tshoveriwa ehandle ka muti wa Yerusalema; kumbe a ma ta tshoveriwa kun’wana eIsrayele. A ma tshoveriwa hi vavanuna vanharhu, un’wana ni un’wana a khome sikela rakwe ni xirhundzu.” Kutani nyandza ya maxalana a yi ta yisiwa eka muprista lonkulu, loyi a a ta yi nyikela eka Yehovha.

Xileriso xa ku nyikela swirhangana swa ntshovelo a xi nyika Vaisrayele lunghelo ro hlawuleka ro kombisa ku tlangela ka vona nkateko wa Xikwembu etikweni ra vona ni le ntshovelweni wa vona. (Deteronoma 8:6-10) Kambe xa nkoka swinene, minkhuvo leyi yo nyikela magandzelo a yi ri “ndzhuti wa swilo leswinene leswi nga ta ta.” (Vaheveru 10:1) Yesu Kreste u pfuxiwe eku feni hi Nisani 16 hi 33 C.E., ku nga siku ro nyikela swirhangana swa ntshovelo eka Yehovha. Malunghana na Yesu, muapostola Pawulo u tsarile a ku: “Kreste se u pfuxiwile eka lava feke, a va xirhangana xa lava va etleleke eku feni. . . . Kambe un’wana ni un’wana exiyin’weni xa yena: Kreste a va swirhangana, ku landzela lava nga va Kreste hi nkarhi wa vukona bya yena.” (1 Vakorinto 15:20-23) Nyandza ya swirhangana leyi muprista lonkulu a a yi ndziwita emahlweni ka Yehovha a yi fanekisela Yesu Kreste la pfuxiweke—munhu wo sungula ku pfuxiwa eku feni a pfuxeriwa evuton’wini lebyi nga heriki. Xisweswo, Yesu u pfule ndlela ya leswaku vanhu va ntshunxiwa exidyohweni ni le ka rifu.

[Laha Xifaniso Xi Humaka Kona eka tluka 26]

© 2003 BiblePlaces.com