Nghena endzeni

Hundzela eka leswi nga endzeni

Barizilayi—Wanuna Loyi A A Twisisa Ku Tsana Kakwe

Barizilayi—Wanuna Loyi A A Twisisa Ku Tsana Kakwe

 Barizilayi—Wanuna Loyi A A Twisisa Ku Tsana Kakwe

‘HA YINI ndzi fanele ku va ndzhwalo eka wena?’ Barizilayi, wanuna loyi a nga ni malembe ya 80 hi vukhale, hi yena loyi a vuleke marito lawa eka Hosi Davhida wa le Israyele. Bibele yi vula leswaku a a ri “munhu lonkulu ngopfu,” handle ko kanakana hikwalaho ka rifuwo rakwe. (2 Samuwele 19:32, 35) Barizilayi a a tshama etikweni ra Giliyadi, endhawini ya tintshava evuxeni bya Nambu wa Yordani.—2 Samuwele 17:27; 19:31.

Swi te njhani leswaku Barizilayi a vula marito wolawo eka Davhida? Naswona ha yini mukhalabye loyi a vulavule hi ndlela leyi?

Ku Pfukela Hosi

Davhida a a ri ekhombyeni. N’wana wakwe Absalomu a a wutle vuhosi endzhaku ka loko a “kok[e] timbilu ta vanhu va Israyele.” A swi ri erivaleni leswaku Absalomu a a nga ta n’wi tsetselela munhu wihi ni wihi loyi a a seketela tata wakwe. Kutani Davhida ni malandza yakwe va balekile eYerusalema. (2 Samuwele 15:6, 13, 14) Loko Davhida a fike eMahanayimi, ku nga ndhawu leyi nga evuxeni bya Yordani, Barizilayi u n’wi pfunile.

Barizilayi ni vavanuna van’wana vambirhi, Xobi na Makiri, va nyike Davhida swilo swo tala hi mbilu hinkwayo. Vaaka-tiko lava vanharhu vo tshembeka va kombise leswaku a va xi twisisa xiyimo xakwe xo nonon’hwa loko va vule leswi hi Davhida ni vavanuna vakwe: “Vanhu va khomiwe hi ndlala naswona va karhele, va ni torha emananga.” Barizilayi ni vavanuna volavo va endle  hinkwaswo leswi nga ematimbeni ya vona leswaku va enerisa swilaveko sweswo hi ku nyika Davhida ni vavanuna vakwe masangu, koroni, maxalana, mapa, mavele lama katingiweke, tinyawa, swinyawana, vulombe, phehlwa, tinyimpfu ni swilo swin’wana.—2 Samuwele 17:27-29.

Ku pfuna Davhida a swi ri ni khombo. A swi kanakanisi leswaku Absalomu a a nga ta tshika ku xupula munhu un’wana ni un’wana loyi a a seketela hosi leyi faneleke. Hikokwalaho, leswi Barizilayi a tshembekeke eka Davhida, a a kombisa xivindzi.

Ku Cinca Ka Xiyimo

Hi ku hatlisa endzhaku ka sweswo, vuthu leri xandzukeke ra Absalomu ri hlangane ni vavanuna va Davhida. Ku tlhekeke nyimpi enhoveni ya Efrayimi, kumbexana ekusuhi ni le Mahanayimi. Vuthu ra Absalomu ri hluriwile, kutani “ku dlaya ku va kukulu esikwini rero.” Hambileswi Absalomu a ringeteke ku baleka, hi ku hatlisa na yena u dlayiwile.—2 Samuwele 18:7-15.

Kutani Davhida u tlhele a va hosi ya le Israyele leyi a yi nga kanetiwi hi munhu. Valandzeri vakwe a va nga ha ta boheka ku hanya tanihi vabaleki. Ku tlula kwalaho, Davhida u va xiximile a tlhela a va nkhensa hileswi va tshembekeke eka yena.

Loko Davhida se a lava ku tlhelela eYerusalema, “Barizilayi lowa le Giliyadi a rhelela a suka eRogelimi leswaku a ta pela Yordani a ri ni hosi leswaku a yi heleketa eYordani.” Hi nkarhi wolowo, Davhida u kombele Barizilayi loyi a dyuhaleke a ku: “Wena pela na mina, kunene ndzi ta ku nyika swakudya u ri na mina eYerusalema.”—2 Samuwele 19:15, 31, 33.

A swi kanakanisi leswaku Davhida u wu tlangele swinene mpfuno wa Barizilayi. Swi tikomba onge hosi a yi nga lavi ntsena ku hakela Barizilayi hi ku n’wi nyika swilaveko swa nyama ntsena. Barizilayi loyi a a ri xigwili a a nga wu lavi mpfuno wa muxaka wolowo. Swi nga ha endleka leswaku Davhida a a n’wi lava ehubyeni ya vuhosi hikwalaho ka leswi mukhalabye yoloye a a ri ni timfanelo letinene. Ku va xirho xa nkarhi hinkwawo kwalaho a ku ta va ku ri lunghelo, a swi ta endla leswaku Barizilayi a va ni ndhuma ni ku vuyeriwa hi ku va munghana wa hosi.

A A Titsongahata Kambe A A Nga Amukeli Xin’wana Ni Xin’wana

Loko Barizilayi a hlamula eka xirhambo xa Hosi Davhida, u te: “Xana masiku ya malembe ya vutomi bya mina i yini leswaku ndzi tlhandlukela eYerusalema ni hosi? Namuntlha ndzi ni malembe ya 80 hi vukhale. Xana ndzi nga hambanisa exikarhi ka leswinene ni swo biha, kumbe, xana nandza wa wena a nga nantswa leswi ndzi swi dyeke nileswi ndzi swi nweke, kumbe ndzi nga ha tlhela ndzi yingisa rito ra vayimbeleri vaxinuna kumbe vaxisati?” (2 Samuwele 19:34, 35) Xisweswo, hi xichavo Barizilayi a nga xi amukelanga xirhambo naswona u ale lunghelo lerikulu. Kambe ha yini a arile?

Xivangelo xin’wana xa xiboho xa Barizilayi ku nga ha va ku ri leswi a a dyuharile naswona a tsanile hikwalaho ko dyuhala. Barizilayi a nga ha va a vone leswaku a a nga ha ta hanya nkarhi wo leha. (Pisalema 90:10) U endle leswi a swi koteke leswaku a seketela Davhida, kambe a a twisisa ku tsana kakwe loku a ku vangiwa hi ku dyuhala. Barizilayi a nga pfumelanga leswaku mhaka ya ku va ni ndhuma swin’we ni ku kuma xikhundlha swi n’wi sivela ku kambisisa vuswikoti byakwe hi ndlela leyi twalaka. Ku hambana na Absalomu loyi a a tikukumuxa, hi vutlhari Barizilayi u kombise ku titsongahata.—Swivuriso 11:2.

Xivangelo xin’wana xa xiboho xa Barizilayi ku nga ha va ku ri leswi a a nga lavi leswaku ku tsana kakwe ku kavanyeta ntirho wa hosi leyi vekiweke hi Xikwembu. Barizilayi u vutisile: “Ha yini nandza wa wena a tlhela a va ndzhwalo eka hosi yanga  leyi nga mufumi?” (2 Samuwele 19:35) Hambileswi a a ha seketela Davhida, swi nga endleka leswaku Barizilayi a a anakanya leswaku mintirho leyi a yi ta endliwa kahle hi munhu loyi a ha ri jaha. Kumbexana loko a vulavula hi n’wana wakwe wa jaha, Barizilayi u te: “Nandza wa wena Kimihama hi loyi. A a pele ni hosi yanga leyi nga mufumi; n’wi endle leswi nga swinene ematihlweni ya wena.” Ematshan’weni ya ku va Davhida a khunguvanyeka, u xi amukerile xiringanyeto lexi. Entiyisweni, loko Davhida a nga si tsemakanya Yordani, u “ntswontsw[e] Barizilayi [kutani a] n’wi katekisa.”—2 Samuwele 19:37-39.

Ku Laveka Ku Ringanisela

Mhaka ya Barizilayi yi kandziyisa xilaveko xa ku ringanisela. Kasi hi hala tlhelo, a hi fanelanga hi ala ku amukela xiavelo xo hlawuleka kumbe ku tshika ku fikelela malunghelo ya ntirho hikwalaho ko lava ku tshama hi nga endli nchumu kumbe hi titwa hi nga swi fanelekeli ku byarha vutihlamuleri. Xikwembu xi ta hi engetelela laha hi kayivelaka kona loko hi kombela matimba ni vutlhari eka xona.—Vafilipiya 4:13; Yakobo 4:17; 1 Petro 4:11.

Hi hala tlhelo, hi fanele hi tiva ku tsana ka hina. Hi xikombiso, kumbexana Mukreste un’wana se u khomekile swinene hi mintirho ya moya. Wa swi xiya leswaku loko o amukela swiavelo swin’wana, a nga ha va ekhombyeni ro honisa vutihlamuleri bya Matsalwa byo tanihi ku wundla ndyangu wakwe. Exiyin’weni xo tano, ku ta va ku ri xikombiso xa leswaku wa titsongahata naswona wa anakanyela loko a ala malunghelo lama engetelekeke.—Vafilipiya 4:5; 1 Timotiya 5:8.

Barizilayi u hi vekele xikombiso lexinene, kutani hi fanele hi anakanyisisa hi xona. A a tshembekile, a a ri ni xivindzi, a a hanana naswona a a titsongahata. Ku tlula kwalaho, Barizilayi a a tiyimisele ku rhangisa swilaveko swa Xikwembu eka swa yena n’wini.—Matewu 6:33.

[Mepe lowu nga eka tluka 15]

(Leswaku u vona rungula leri hleriweke hi ku helela, vona nkandziyiso wa kona)

Barizilayi loyi a a ri ni malembe ya 80 hi vukhale u teke riendzo ro leha leswaku a ya pfuna Davhida

GILIYADI

Rogelimi

Sukoti

Mahanayimi

Nambu wa Yordani

Giligala

Yerusalema

Yeriko

EFRAYIMI

[Xifaniso lexi nga eka tluka 13]

Ha yini Barizilayi a nga xi amukelanga xirhambo xa Davhida?