Nghena endzeni

Hundzela eka leswi nga endzeni

Vuhomboloki—Xana A Bya Ha Lawuleki?

Vuhomboloki—Xana A Bya Ha Lawuleki?

 Vuhomboloki—Xana A Bya Ha Lawuleki?

Xifanyetana xin’wana xi rhole nchumu wun’wana emasin’wini xi lava ku vona leswaku i yini—kasi i bomo yo fuhlekiwa—ivi yi buluka yi xi dlaya mahlo ni ku xi siya xi ri hava mavoko ni milenge. Manana un’wana u teke n’wana wakwe loyi a ha ku velekiwaka a n’wi fihla etaleni etlhelo ka gondzo. Mutirhi loyi a hlongoriweke u vuye laha a a tirha kona, a fika a duvula hinkwavo lava a hlanganeke na vona, ivi endzhaku a tidlaya. Muaka-tiko la xiximiwaka u pfinye vana.

LEXI vavisaka, swiviko swa swiendlo swo tano swo homboloka swi toloveleke ngopfu enkarhini wa hina. Lexi vavisaka ni ku tlurisa, hakanyingi swiviko leswi a swi tekeriwi enhlokweni loko ku ri ni swiendlakalo swo chavisa, swo tanihi tsima ra ku yayarhela rixaka ro karhi ni swa vutherorisi. Xiviko xa muhleri wa phepha-hungu rin’wana lexi humesiweke hi 1995 xi te: “Leswi hinkwaswo swi kombisa leswaku leri a ri ri lembe-xidzana ra Sathana. I ro sungula leswaku vanhu va va ni tinkokola ta ku dlaya vanhu va timiliyoni hikwalaho ka muvala, vukhongeri kumbe xikhundlha xa vona.”

Hi nkarhi lowu fanaka, vanhu va thyakisa moya, va onha misava ni rifuwo ra yona, va herisa mixaka ya swiharhi. Xana vanhu va nga swi kota ku herisa vuhomboloki lebyi hinkwabyo, kutani va endla misava yi va ndhawu leyinene, leyi sirhelelekeke? Kumbe, xana ku ringeta ku endla sweswo swi ta va swi fana ni ku hala ribye u lava mati? Profesa loyi a tsaleke swo tala malunghana ni vuhomboloki u te: “Ndzi ringete hi matimba ku antswisa swilo emisaveni. Kambe swilo swi nyanya ku biha.” Kumbexana na wena u titwa hi ndlela leyi fanaka.

Pfhumba ra misava ri nga fanisiwa ni ra xikepe lexi tlutaka elwandle leri yaka ri kariha ni ku va ni khombo siku ni siku. Hambileswi a nga riki kona loyi a lavaka ku teka pfhumba rero, matshalatshala hinkwawo yo cinca xiyimo a ma humeleli. Xikepe xi ya emahlweni xi ya laha xidzedze xi karihaka kona, a swi koteki ku xi yimisa.

Vanhu lava nga hetisekangiki va hoxe xandla hi ndlela yo karhi eka xiyimo lexi nyanyaka ku biha. (Varhoma 3:23) Hambiswiritano, mpimo wa vuhomboloki ni ku nyanya ka byona swi komba leswaku a hi vanhu ntsena va katsekaka. Xana swi nga endleka leswaku vanhu va kuceteriwa hi swivumbiwa swo karhi swo homboloka leswi nga vonakiki kambe swi ri ni matimba swinene? Loko swi ri tano, hi swihi swivumbiwa swa kona, naswona hi nga tisirhelela njhani eka swona? Xihloko lexi landzelaka xi ta hlamula swivutiso sweswo.

[Laha Xifaniso Xi Humaka Kona eka tluka 3]

© Hewldur Netocny/Panos Pictures