Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana ku vitaniwa ka Vakreste lava nga ni ntshembo wo ya hanya ematilweni ku ta hela rini?

Bibele a yi na yona nhlamulo leyi kongomeke ya xivutiso lexi. Lexi hi xi tivaka hi leswaku ku totiwa ka vadyondzisiwa va Yesu lava nga ni ntshembo wo kuma ndzhaka ya le matilweni ku sungule hi 33 C.E. (Mintirho 2:1-4) Nakambe hi tiva leswaku endzhaku ka ku fa ka vaapostola, “koroni,” ku nga Vakreste va ntiyiso lava totiweke, yi ‘kule swin’we’ ni “mfava,” ku nga Vakreste va mavunwa. (Matewu 13:24-30) Kutani, eku heleni ka va-1800, Vakreste lava totiweke va tlhele va hiseka swinene. Hi 1919 ku sungule “ntshovelo wa misava,” ku katsa ni ku hlengeletiwa ka masalela ya vatotiwa.—Nhlavutelo 14:15, 16.

Ku sukela eku heleni ka va-1800 ku ya fika hi 1931, xikongomelo-nkulu xa ntirho wo chumayela a ku ri ku hlengeleta lava saleke va swirho swa miri wa Kreste. Hi 1931 Swichudeni swa Bibele swi amukele vito leri sekeriweke eBibeleni leri nge Timbhoni ta Yehovha, naswona eka nkandziyiso wa Xihondzo xo Rindza (xa Xinghezi) xa November 15, 1933, ku hlamuseriwe leswaku vito leri ro hlawuleka a ku ri “denari” leyi Yesu a vulavuleke ha yona eka xifaniso xakwe lexi nga eka Matewu 20:1-16. A ku anakanyiwa leswaku tiawara ta 12 leti ti boxiweke eka xifaniso lexi ti fambisana ni malembe ya 12 yo sukela eka 1919 ku ya fika eka 1931. Endzhaku ka sweswo ku hundze malembe ku anakanyiwa leswaku xirhambo xo ya eMfun’weni wa matilo xi hele hi 1931 nileswaku lava va vitaniweke leswaku va va vadyandzhaka swin’we na Kreste hi 1930 na 1931 hi vona “lavo hetelela” ku vitaniwa. (Matewu 20:6-8) Hambiswiritano, hi 1966 matwisiselo ya xifaniso lexi ma lulamisiwile, naswona swi ve erivaleni leswaku a xi nga vulavuli hi ku vitaniwa ka vatotiwa ko hetelela.

Hi 1935 “ntshungu lowukulu” lowu ku vulavuriwaka hi wona eka Nhlavutelo 7:9-15 a wu twisisiwa wu ri lowu vumbiweke hi “tinyimpfu tin’wana,” Vakreste lava nga ni ntshembo wo hanya la misaveni, lava a va ta hlengeletiwa emisaveni “emasikwini ya makumu,” lava tanihi ntlawa a va ta pona Armagedoni. (Yohane 10:16; 2 Timotiya 3:1; Nhlavutelo 21:3, 4) Endzhaku ka lembe rero, xikongomelo xa ntirho wo endla vadyondzisiwa ku ve ku hlengeleta ntshungu lowukulu. Hikwalaho, ngopfu-ngopfu endzhaku ka 1966 a ku tshembiwa leswaku xirhambo xa ku ya etilweni xi hele  hi 1935. Leswi swi vonake swi ri ntiyiso loko vanhu vo tala lava khuvuriweke endzhaku ka 1935 va vona leswaku va ni ntshembo wo hanya laha misaveni. Endzhaku ka sweswo, a ku ehleketiwa leswaku mani na mani la kumaka xirhambo xa ku ya ematilweni a a siva Mukreste la totiweke la kombiseke ku nga tshembeki.

Handle ko kanakana, loko un’wana wa lava totiweke a tshika ntiyiso, Yehovha u tirhisa un’wana leswaku a siva ndhawu ya yena. (Varhoma 11:17-22) Hambiswiritano, nhlayo ya vatotiwa va xiviri lava nga tshembekangiki i yitsongo. Hi hala tlhelo, hi ku famba ka nkarhi, Vakreste van’wana lava khuvuriweke endzhaku ka 1935 va ve ni vumbhoni bya leswaku va ni ntshembo wa ku ya hanya etilweni. (Varhoma 8:16, 17) Xisweswo, swi le rivaleni leswaku a hi nge veki siku leri kongomeke ra ku hela ka nkarhi wa ku vitaniwa ka Vakreste lava nga ni ntshembo wo ya hanya etilweni.

U fanele a langutiwa njhani munhu loyi a tiyisekaka embilwini ya yena leswaku sweswi i mutotiwa kutani a sungula ku dya swifanekiselo eXitsundzuxweni? A nga fanelanga a avanyisiwa. Mhaka leyi i ya yena na Yehovha. (Varhoma 14:12) Hambiswiritano, Vakreste lava totiweke va xiviri a va lavi ku tikokela mahlo. A va pfumeli leswaku leswi va totiweke va ni ku “twisisa” loku hlawulekeke, ku tlula loku swirho swin’wana leswi nga ni ntokoto swa ntshungu lowukulu swi nga na kona. A va pfumeli leswaku va ni moya lowu engetelekeke wo kwetsima ku tlula wa vanghana va vona va tinyimpfu tin’wana; naswona a va lavi ku khomiwa hi ndlela yo hlawuleka kumbe ku anakanya leswaku ku dya ka vona swifanekiselo swi va endla va va ehenhla ka vakulu lava vekiweke evandlheni. Hi ku titsongahata va tsundzuka leswaku vavanuna van’wana lava totiweke va lembe-xidzana ro sungula a va nga faneleki ku va vakulu kumbe malandza ya vutirheli. (1 Timotiya 3:1-10, 12, 13; Tito 1:5-9; Yakobo 3:1) Kasi Vakreste van’wana lava totiweke a va tsanile hi tlhelo ra moya. (1 Vatesalonika 5:14) Naswona vamakwerhu va xisati, hambileswi a va totiwile, a va nga dyondzisi evandlheni.—1 Timotiya 2:11, 12.

Hikwalaho, Vakreste lava totiweke ni vanghana va vona va tinyimpfu tin’wana va lwela ku tshama va tiyile hi tlhelo ra moya, va hlakulela mihandzu ya moya naswona va kondletela ku rhula evandlheni. Vakreste hinkwavo, ku nga khathariseki leswaku i vatotiwa kumbe i tinyimpfu tin’wana, va tirha hi matimba eku chumayeleni ka mahungu lamanene ni ku endla vadyondzisiwa ehansi ka nkongomiso wa Huvo leyi Fumaka. Vakreste lava totiweke va titwa va enerisekile ku endla leswi, ntsena loko Xikwembu xa ha rhandza leswaku va hambeta va hanya laha misaveni tanihi malandza ya Yehovha.