Nghena endzeni

Hundzela eka leswi nga endzeni

Ku Titsongahata Eka Varisi Lava Nga Ni Rirhandzu

Ku Titsongahata Eka Varisi Lava Nga Ni Rirhandzu

 Ku Titsongahata Eka Varisi Lava Nga Ni Rirhandzu

“Yingisani lava rhangelaka exikarhi ka n’wina naswona mi titsongahata.”—VAHEVERU 13:17.

1, 2. Hi wahi matsalwa lama kombisaka leswaku Yehovha na Yesu i Varisi lava nga ni rirhandzu?

YEHOVHA XIKWEMBU ni N’wana wakwe Yesu Kreste i Varisi lava nga ni rirhandzu. Esaya u profetile a ku: “Waswivo! Yehovha, Hosi leyi Lawulaka u ta ta kukota loyi a tiyeke, voko ra yena ri ta n’wi fumela. . . . U ta risa ntlhambi wa yena ku fana ni murisi. Hi voko ra yena u ta hlengeleta swinyimpfana; u ta swi rhwala exifuveni xa yena. Leswi an’wisaka u ta swi byisa hi nkhathalelo.”—Esaya 40:10, 11.

2 Vuprofeta byebyo bya ku vuyeteriwa byi hetiseke ro sungula loko masalela ya Vayuda ma tlhelela eYuda hi 537 B.C.E. (2 Tikronika 36:22, 23) Byi tlhele byi hetiseka loko masalela lama totiweke ma ntshunxiwe eka “Babilona Lonkulu” hi 1919 hi Korexe Lonkulu, Yesu Kreste. (Nhlavutelo 18:2; Esaya 44:28) Yena i “voko” ra Yehovha ra ku fuma, leri hlengeletaka tinyimpfu ivi ri ti risa hi nkhathalelo lowukulu. Yesu hi byakwe u te: “Hi mina murisi lonene, naswona tinyimpfu ta mina ndza ti tiva ni tinyimpfu ta mina ta ndzi tiva.”—Yohane 10:14.

3. Yehovha u swi kombisa njhani leswaku wa khumbeka hi ndlela leyi tinyimpfu takwe ti khomiwaka ha yona?

3 Vuprofeta bya Esaya 40:10, 11 byi kandziyisa nkhathalelo lowu Yehovha a wu kombisaka loko a risa vanhu vakwe. (Pisalema 23:1-6) Enkarhini wa vutirheli byakwe bya laha misaveni, Yesu na yena u kombise nkhathalelo lowukulu eka vadyondzisiwa vakwe ni le ka vanhu hi ku angarhela. (Matewu 11:28-30; Marka 6:34) Yehovha na Yesu a va va venga varisi kumbe varhangeri va Israyele lava nga riki na tintswalo, lava a va honisa ni ku dyelela mintlhambi ya vona va nga khomiwi hi tingana. (Ezekiyele 34:2-10; Matewu 23:3, 4, 15) Yehovha u tshembisile a ku: “Ndzi ta ponisa tinyimpfu ta mina, ti nga ka ti nga ha vi nchumu wo phangiwa; ndzi ta avanyisa exikarhi ka nyimpfu ni nyimpfu. Ndzi ta ti vekela murisi un’we, u ta ti wundla, ku nga nandza wa mina Davhida. Yena u ta ti wundla, u ta va murisi wa tona.” (Ezekiyele 34:22, 23) Enkarhini lowu wa makumu, Yesu Kreste, ku nga Davhida Lonkulu, i ‘murisi un’we’ loyi Yehovha a n’wi vekeke ehenhla ka malandza Yakwe hinkwawo ya laha misaveni, ku nga Vakreste lava totiweke hi moya ni “tinyimpfu tin’wana.”—Yohane 10:16.

 Tinyiko Ta Le Mavandlheni Leti Humaka eTilweni

4, 5. (a) Hi yihi nyiko ya risima leyi Yehovha a yi nyikeke vanhu vakwe laha misaveni? (b) Hi yihi nyiko leyi Yesu a yi nyikeke vandlha rakwe?

4 Yehovha u nyikele nyiko ya risima evandlheni ra Vukreste hi ku veka ‘murisi un’we’—Yesu Kreste—ehenhla ka malandza Yakwe ya laha misaveni. Nyiko leyi, leyi nga Murhangeri wa le tilweni ku profetiwe ha yona eka Esaya 55:4, leyi nge: “Maswivo! Ndzi n’wi veke a va mbhoni eka vanhu va matiko, a va murhangeri ni ndhuna ya vanhu va matiko.” Vakreste lava totiweke ni swirho swa “ntshungu lowukulu” va hlengeletiwa va huma eka matiko hinkwawo, tinxaka hinkwato, vanhu hinkwavo ni tindzimi hinkwato. (Nhlavutelo 5:9, 10; 7:9) Va vumba vandlha ra misava hinkwayo, “ntlhambi wun’we” lowu nga ehansi ka vurhangeri bya ‘murisi un’we,’ Kreste Yesu.

5 Kutani Yesu u nyike vandlha rakwe ra laha misaveni nyiko ya risima. U nyikele hi varisi vo tshembeka lava tirhaka ehansi ka nkongomiso wakwe, lava tekelelaka Yehovha na Yesu hi ku risa ntlhambi hi nkhathalelo lowukulu. Muapostola Pawulo u vulavule hi nyiko leyi ya rirhandzu epapileni rakwe leri yaka eka Vakreste va le Efesa. U tsarile a ku: “‘Loko a tlhandlukela ehenhla u teke makhumbi; u nyike tinyiko leti nga vanhu.’ . . . U nyike van’wana ku va vaapostola, van’wana ku va vaprofeta, van’wana ku va vaevhangeli, van’wana ku va varisi ni vadyondzisi, hi xikongomelo xa ku ololoxa vakwetsimi, hikwalaho ka ntirho wa vutirheli, leswaku va aka miri wa Kreste.”—Vaefesa 4:8, 11, 12.

6. Valanguteri lava totiweke lava a va ri eka tihuvo ta vakulu va hlamuseriwa njhani eka Nhlavutelo 1:16, 20, naswona ku nga vuriwa yini hi vakulu lava vekiweke va tinyimpfu tin’wana?

6 “Tinyiko [teto] leti nga vanhu” i valanguteri kumbe vakulu lava vekiweke hi Yehovha ni N’wana wakwe hi ku tirhisa moya lowo kwetsima, leswaku va risa tinyimpfu hi rirhandzu. (Mintirho 20:28, 29) Eku sunguleni, valanguteri lava hinkwavo a va ri vavanuna lava totiweke lava nga Vakreste. Eka Nhlavutelo 1:16, 20, lava a va tirha eka tihuvo ta vakulu evandlheni ra vatotiwa a va fanekiseriwa hi “tinyeleti” kumbe “tintsumi” leti nga evokweni ra xinene ra Kreste, leswi vulaka leswaku ti le hansi ka vulawuri byakwe. Hambiswiritano, enkarhini lowu wa makumu, laha nhlayo ya valanguteri lava totiweke lava ha riki laha misaveni yi yaka emahlweni yi hunguteka, vakulu vo tala lava nga Vakreste emavandlheni i va tinyimpfu tin’wana. Leswi va vekiwaka hi vayimeri va Huvo leyi Fumaka hi nkongomiso wa moya lowo kwetsima, ku nga ha vuriwa leswaku na vona va le vokweni ra xinene (kumbe va le hansi ka nkongomiso) wa Murisi Lonene, Yesu Kreste. (Esaya 61:5, 6) Leswi vakulu emavandlheni ya hina va tivekaka ehansi ka Kreste, Nhloko ya vandlha, swa fanela leswaku hi khomisana ngopfu na vona.—Vakolosa 1:18.

Ku Yingisa Ni Ku Titsongahata

7. Hi yihi ndzayo leyi nyikeriweke hi muapostola Pawulo malunghana ni langutelo ra hina hi valanguteri lava nga Vakreste?

7 Varisi va hina va le tilweni, ku nga Yehovha  Xikwembu na Yesu Kreste, va langutele leswaku hi yingisa hi tlhela hi titsongahata eka varisi lava va va nyikeke vutihlamuleri evandlheni. (1 Petro 5:5) Hi ku kongomisiwa hi moya lowo kwetsima, muapostola Pawulo u tsarile a ku: “Tsundzukani lava rhangelaka exikarhi ka n’wina, lava mi byeleke rito ra Xikwembu, naswona loko mi ri karhi mi xiyisisa vuyelo bya ku tikhoma ka vona, mi tekelela ripfumelo ra vona. Yingisani lava rhangelaka exikarhi ka n’wina naswona mi titsongahata, hikuva va tshama va rindze mimoya-xiviri ya n’wina hikuva hi vona va nga ta hlamusela; leswaku va endla leswi hi ntsako ku nga ri hi ku vilela, hikuva leswi swi nga mi vavisa.”—Vaheveru 13:7, 17.

8. I yini leswi Pawulo a hi rhambaka leswaku hi swi “xiyisisa,” naswona hi fanele hi ‘yingisa’ hi ndlela yihi?

8 Xiya leswaku Pawulo u hi rhamba leswaku hi “xiyisisa” kumbe hi anakanyisisa hi vuyelo bya ku tshembeka ka vakulu ivi hi tekelela swikombiso swo tano swa ripfumelo. Ku tlula kwalaho, u hi laya leswaku hi va lava yingisaka ni ku titsongahatela nkongomiso wa vavanuna volavo lava vekiweke. Mukambisisi wa Bibele R. T. France u vula leswaku eka Xigriki xo sungula, rito leri laha ri hundzuluxeriweke ri va “yingisani” a hi rona “rito leri tolovelekeke leri vulaka ku yingisa, kambe hi ku kongoma ri vula ku ‘khorwiseka,’ leswi kombisaka ku amukela nkongomiso wa vona swi suka embilwini.” Hi yingisa vakulu hileswi Rito ra Xikwembu ri hi lerisaka leswaku hi endla tano, kambe ni hileswi hi khorwisekaka leswaku va lava ku vona timhaka ta Mfumo ti humelela naswona va hi navelela leswinene. Hakunene hi ta tsaka loko hi amukela nkongomiso wa vona swi suka embilwini.

9. Ha yini hi fanele hi “titsongahata” hambiloko se hi ri lava yingisaka?

9 Kambe ku vuriwa yini loko hi nga khorwiseki leswaku nkongomiso lowu vakulu va wu nyikelaka etimhakeni to karhi wu fanerile hakunene? Ku titsongahata ka laveka exiyin’weni xexo. Swa olova ku yingisa loko swilo hinkwaswo swi ri erivaleni ni loko hi pfumelelana na swona, kambe hi ta kombisa leswaku ha titsongahata hakunene loko hi pfumelelana ni swiyimo hambiloko hina hi hexe hi nga wu twisisi nkongomiso lowu nyikeriwaka. Petro loyi endzhaku ka nkarhi a veke muapostola, u kombise ku titsongahata ko tano.—Luka 5:4, 5.

Swivangelo Swa Mune Swo Khomisana Ni Valanguteri

10, 11. Valanguteri va ‘byele Vakreste-kulobye rito ra Xikwembu’ hi lembe-xidzana ro sungula ni namuntlha hi ndlela yihi?

10 Eka Vaheveru 13:7, 17 leyi tshahiweke laha henhla, muapostola Pawulo u nyikela swivangelo swa mune swa leswaku ha yini hi fanele hi yingisa ni ku titsongahata eka valanguteri lava nga Vakreste. Xo sungula hileswaku hi vona va hi “byeleke rito ra Xikwembu.” Tsundzuka leswaku “tinyiko leti nga vanhu” leti Yesu a ti nyikelaka evandlheni u ti nyikele leswaku ti “ololoxa vakwetsimi.” (Vaefesa 4:11, 12) U ololoxe langutelo ni mahanyelo ya Vakreste va lembe-xidzana ro sungula hi ku tirhisa varisi vo tshembeka lava tirhaka ehansi ka nkongomiso wakwe, laha van’wana va vona va huhuteriweke ku tsala mapapila lama yeke emavandlheni. U tirhise valanguteri volavo lava vekiweke hi moya leswaku va kongomisa ni ku tiyisa Vakreste vo sungula.—1 Vakorinto 16:15-18; 2 Timotiya 2:2; Tito 1:5.

11 Namuntlha, Yesu u hi kongomisa hi ku tirhisa “hlonga ro tshembeka ni ro tlhariha,” leri yimeriwaka hi Huvo ya rona leyi Fumaka ni hi vakulu lava vekiweke. (Matewu 24:45) Hikwalaho ko xixima “murisi lonkulu,” Yesu Kreste, hi yingisa ndzayo ya Pawulo leyi nge: “Xixima[ni] lava tirhaka hi matimba exikarhi ka n’wina, lava va mi ungamelaka eHosini, lava va mi tsundzuxaka.”—1 Petro 5:4; 1 Vatesalonika 5:12; 1 Timotiya 5:17.

12. Valanguteri “va tshama va rindze mimoya-xiviri ya [hina]” hi ndlela yihi?

12 Xivangelo xa vumbirhi xa ku khomisana ni valanguteri lava nga Vakreste hileswi “va tshama[ka] va rindze mimoya-xiviri ya [hina].” Loko va xiya swo karhi eka langutelo ra hina kumbe endleleni leyi hi tikhomaka ha yona, leswi nga ha vekaka vumoya bya hina ekhombyeni, hi ku hatlisa va hi nyika ndzayo leyi lavekaka hi xikongomelo xo hi ololoxa. (Vagalatiya 6:1) Rito ra Xigriki leri hundzuluxeriweke ri va ku ‘tshama u  rindzile’ hi ku kongoma ri vula “ku nga etleli.” Hi ku ya hi mukambisisi un’wana wa Bibele, swi “vula ku va murisi a tshama a hitekile.” Handle ko va vona vini va tshama va hitekile hi tlhelo ra moya, vakulu va nga heleriwa hi vurhongo loko va anakanya hi vuhlayiseki bya hina bya moya. Xana a hi fanelanga hi khomisana ni varisi vo tano va rirhandzu, lava endlaka hinkwaswo leswi va nga swi kotaka leswaku va tekelela nkhathalelo lowukulu lowu kombisiweke hi Yesu Kreste, “murisi lonkulu wa tinyimpfu”?—Vaheveru 13:20.

13. Valanguteri ni Vakreste hinkwavo va ta tihlamulela eka mani, naswona va ta tihlamulela hi tindlela tihi?

13 Xivangelo xa vunharhu lexi endlaka leswaku hi khomisana ni valanguteri swi huma embilwini hileswi va tshamaka va hi rindzile tanihi lava “nga ta hlamusela.” Valanguteri va swi tsundzuka leswaku i varisi lava tirhaka ehansi ka nkongomiso wa Varisi va le tilweni, Yehovha Xikwembu na Yesu Kreste. (Ezekiyele 34:22-24) Yehovha i N’wini wa tinyimpfu, loyi a ti “xaveke hi ngati ya N’wana [wakwe],” naswona U langutele leswaku valanguteri lava vekiweke va tihlamulela endleleni leyi va khomaka ntlhambi Wakwe ha yona, lowu faneleke ku khomiwa “hi rirhandzu.” (Mintirho 20:28, 29) Hikwalaho, hinkwerhu hi ta tihlamulela eka Yehovha malunghana ni ndlela leyi hi angulaka ha yona eka nkongomiso wakwe. (Varhoma 14:10-12) Nakambe loko hi yingisa vakulu lava vekiweke swi kombisa leswaku hi titsongahata eka Kreste, loyi a nga Nhloko ya vandlha.—Vakolosa 2:19.

14. I yini lexi nga vangaka leswaku valanguteri lava nga Vakreste va tirha “hi ku vilela,” naswona sweswo swi nga va ni vuyelo byihi?

14 Pawulo u nyikele xivangelo xa vumune xa leswaku ha yini hi fanele hi titsongahata eka valanguteri lava nga Vakreste. U tsarile a ku: “Leswaku va endla leswi hi ntsako ku nga ri hi ku vilela, hikuva leswi swi nga mi vavisa.” (Vaheveru 13:17) Vakulu lava nga Vakreste va rhwele ndzhwalo wo tika, hikuva va ni vutihlamuleri byo tika bya ku dyondzisa, ku risa, ku rhangela entirhweni wo chumayela, ku wundla mindyangu ya vona ni ku tlhantlha swiphiqo evandlheni. (2 Vakorinto 11:28, 29) Loko hi tsandzeka ku khomisana na vona, hi va engetelela ndzhwalo ntsena. Sweswo swi nga endla leswaku va “vilela.” Yehovha a nga tsaki loko hi nga khomisani na vona kutani sweswo swi nga hi vavisa. Kambe loko hi xixima vakulu hi ndlela leyi faneleke naswona hi khomisana na vona, va nga endla mintirho  ya vona hi ntsako, kutani sweswo swi kondletela vun’we ni ntsako entirhweni wo chumayela hi Mfumo.—Varhoma 15:5, 6.

Ku Kombisa Moya Wo Titsongahata

15. Hi nga swi kombisa njhani leswaku ha yingisa ni ku titsongahata?

15 Ku ni tindlela to tala ta xiviri leti hi nga khomisanaka ni valanguteri lava vekiweke ha tona. Leswaku vandlha ri fambisana ni swiyimo leswintshwa swa le nsin’wini, xana vakulu va hlele leswaku minhlangano ya ntirho wa nsimu yi khomiwa hi masiku ni minkarhi leyi lavaka leswaku hi cinca xiyimiso xa hina? A hi endleni matshalatshala yo seketela malunghiselelo wolawo lamantshwa. Hi nga ha kuma mikateko leyi a hi nga yi rindzelanga. Xana mulanguteri wa ntirho u ta endzela ntlawa wa hina wa Dyondzo ya Buku ya Vandlha? A hi hlanganyeleni swinene entirhweni wo chumayela hi vhiki rero. Xana hi kume xiavelo eka Xikolo xa Vutirheli bya le Tilweni? Hi fanele hi tiyimisela ku va kona kutani hi nyikela xiavelo xa hina. Xana mulanguteri wa Dyondzo ya Buku ya Vandlha u tivisile leswaku ntlawa wa hina hi wona lowu nga ta basisa Holo ya Mfumo? A hi endleni hinkwaswo leswi hi nga swi kotaka leswaku hi n’wi seketela hi xitalo. Hi tindlela leti ni tin’wana to tala, hi kombisa leswaku ha titsongahata eka vavanuna lava Yehovha ni N’wana wakwe va va vekeke leswaku va khathalela ntlhambi.

16. Loko nkulu a endla swilo leswi hambanaka ni nkongomiso lowu nyikeriweke, ha yini sweswo swi nga hi nyiki mpfumelelo wo pfukela vulawuri?

16 Minkarhi yin’wana nkulu a nga ha endla swilo leswi hambanaka ni nkongomiso wa hlonga ro tshembeka ni Huvo ya rona leyi Fumaka. Loko a ya emahlweni a endla hi ndlela yoleyo, u ta boheka ku hlamusela eka Yehovha, “murisi ni mulanguteri wa mimoya-xiviri ya [hina].” (1 Petro 2:25) Kambe loko vakulu van’wana va tsandzeka ku endla swo karhi kumbe va endla swihoxo, sweswo a swi hi nyiki mpfumelelo wa ku ka hi nga va yingisi. Yehovha a nga va seketeli vanhu lava nga yingisiki ni lava pfukelaka vulawuri.—Tinhlayo 12:1, 2, 9-11.

Yehovha U Katekisa Ku Khomisana Swi Huma eMbilwini

17. Hi rihi langutelo leri hi faneleke hi va na rona hi valanguteri va hina?

17 Yehovha Xikwembu wa swi tiva leswaku vavanuna lava a va vekeke ku va valanguteri a va hetisekanga. Kambe wa va tirhisa, naswona hi ku tirhisa moya wakwe wo kwetsima u risa vanhu vakwe emisaveni. Eka vakulu—ni le ka hina hinkwerhu—mhaka ya xiheri hileswaku “matimba lama tlulaka lama tolovelekeke [i] ya Xikwembu, ku nga [ri] ya hina.” (2 Vakorinto 4:7) Hikwalaho hi fanele hi khensa Yehovha hikwalaho ka leswi a swi hetisisaka hi ku tirhisa valanguteri va hina lavo tshembeka, kutani hi fanele hi khomisana na vona swi suka embilwini.

18. Loko hi titsongahata eka valanguteri va hina, xana kahle-kahle hi endla yini?

18 Valanguteri va endla hinkwaswo leswi nga ematimbeni ya vona leswaku va hanya hi ku pfumelelana ni nhlamuselo ya Yehovha ya varisi va ntlhambi wakwe emasikwini yo hetelela, hi ku ya hi Yeremiya 3:15 leyi nge: “Ndzi ta mi nyika varisi hi ku pfumelelana ni mbilu ya mina, kunene va ta mi wundla hi vutivi ni ku twisisa.” Hakunene vakulu lava nga exikarhi ka hina va endla ntirho lowunene wa ku dyondzisa ni ku sirhelela tinyimpfu ta Yehovha. Onge hi nga hambeta hi va tlangela hikwalaho ka ku tikarhata ka vona, hi ku khomisana na vona swi suka embilwini, hi va yingisa hi tlhela hi titsongahata eka vona. Loko hi endla tano, hi ta kombisa leswaku hi tlangela Varisi va hina va le tilweni, Yehovha Xikwembu na Yesu Kreste.

Mpfuxeto

• Yehovha na Yesu Kreste va swi kombise njhani leswaku i Varisi lava nga ni rirhandzu?

• Ha yini ku titsongahata ku laveka hambiloko hi ri lava yingisaka?

• Hi tihi tindlela leti hi nga kombisaka ha tona leswaku ha titsongahata?

[Swivutiso Swa Dyondzo]

[Xifaniso lexi nga eka tluka 27]

Vakulu lava nga Vakreste va titsongahatela nkongomiso wa Kreste

[Xifaniso lexi nga eka tluka 29]

Ku ni tindlela to tala leti ha tona hi nga kombisaka ku titsongahata ka hina eka varisi lava vekiweke hi Yehovha