Nghena endzeni

Hundzela eka leswi nga endzeni

Ha Yini Hi Fanele Hi Tikarhatela Ku Endla Leswinene?

Ha Yini Hi Fanele Hi Tikarhatela Ku Endla Leswinene?

 Ha Yini Hi Fanele Hi Tikarhatela Ku Endla Leswinene?

WANUNA un’wana la dyondzekeke u tshame a ku: “Vuswikoti byo navela byi kona eka mina, kambe vuswikoti byo endla leswi nga swinene a byi kona. Hikuva leswinene leswi ndzi swi navelaka a ndzi swi endli, kambe leswo biha leswi ndzi nga swi naveliki hi swona leswi ndzi hanyaka hi swona.” Ha yini wanuna loyi a swi n’wi tikela ku endla leswinene leswi a a navela ku swi endla? U te: “Kutani eka mina ndzi kuma nawu lowu: leswaku loko ndzi navela ku endla leswi lulameke, leswo biha swi kona eka mina. Kunene ndza wu tsakela nawu wa Xikwembu hi ku ya hi munhu loyi ndzi nga yena endzeni, kambe eswirhweni swa mina ndzi vona nawu wun’wana lowu lwaka ni nawu wa mianakanyo ya mina, wu ndzi endla khumbi ra nawu wa xidyoho lowu nga eswirhweni swa mina.”—Varhoma 7:18, 19, 21-23.

Marito lawa ya muapostola Pawulo, lama tsariweke kwalomu ka malembe ya 2 000 lama hundzeke, ma hlamusela lexi endlaka swi va tikela vanhu lava nga hetisekangiki ku endla leswinene. Ku namarhela misinya ya milawu leyinene, ngopfu-ngopfu loko hi ringiwa, swi lava ku tiyimisela lokukulu. Hikwalaho hi fanele hi vutisa, Hi xihi xivangelo xa nkoka swinene xo endla leswinene?

Xiya leswi Matsalwa ma swi vulaka hi vumundzuku bya munhu wa mahanyelo lamanene. Eka Pisalema 37:37, 38, ha hlaya: “Languta la pfumalaka xisandzu naswona u vona la lulameke, hikuva vumundzuku bya munhu yoloye byi ta va ni ku rhula. Kambe lava tlulaka nawu kunene va ta lovisiwa swin’we; vumundzuku bya lavo homboloka byi ta herisiwa hakunene.” Swivuriso 2:21, 22 yi hi byela leswi: “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”

Hambileswi switshembiso leswi ni swin’wana leswi kumekaka eBibeleni swi hi nyikaka nsusumeto wo endla leswi tsakisaka Xikwembu, kambe xivangelo xa nkoka xo endla leswinene a xi titsheganga hi swona. Xivangelo xa kona xi fambisana ni mphikamakaneta leyi khumbaka swivumbiwa hinkwaswo swo tlhariha. Xihloko lexi landzelaka xi ta bula hi mphikamakaneta yoleyo swin’we ni ndlela leyi yi hi khumbaka ha yona.