Nghena endzeni

Hundzela eka leswi nga endzeni

Xana I Yini ‘Masiku Yo Hetelela’?

Xana I Yini ‘Masiku Yo Hetelela’?

 Xana I Yini ‘Masiku Yo Hetelela’?

XANA wa tivutisa leswaku vumundzuku byi ku khomele yini wena, swin’we ni vanhu lava u va rhandzaka? Vanhu vo tala va yingiserisisa mahungu leswaku va vona ndlela leyi swiendlakalo swa misava swi nga ha khumbaka vutomi bya vona ha yona. Hambiswiritano, ku nyikela nyingiso eRitweni ra Xikwembu leri huhuteriweke swi hi endla hi va ni ku twisisa lokunene. Leswi swi vangiwa hileswi Bibele yi nga profeta khale swinene malunghana ni swiyimo swa manguva lawa ni swa nkarhi lowu taka.

Hi xikombiso, loko Yesu Kreste a ha ri emisaveni, u vulavule swinene hi Mfumo wa Xikwembu. (Luka 4:43) Ina, vanhu lava n’wi tweke va lave ku tiva leswaku Mfumo wolowo lowu hlamarisaka a wu ta fika rini. Entiyisweni, loko ka ha sele masiku manharhu leswaku Yesu a dlayiwa swi nga fanelanga, vadyondzisiwa vakwe va n’wi vutisile va ku: “Xi ta va xihi xikombiso xa vukona bya wena [ematimbeni ya Mfumo] ni xa makumu ya mafambiselo ya swilo?” (Matewu 24:3) Yesu u va byele leswaku i Yehovha Xikwembu ntsena la tivaka nkarhi lowu kongomeke lowu Mfumo wu nga ta lawula misava hi ku helela. (Matewu 24:36; Marka 13:32) Hambiswiritano, Yesu ni van’wana va profete hi swilo swo karhi leswi a swi ta humelela emisaveni leswi a swi ta va vumbhoni bya leswaku Kreste wa fuma ematimbeni ya Mfumo.

Loko hi nga si kambisisa vumbhoni lebyi vonakaka bya leswaku hi hanya “emasikwini yo hetelela” ya mafambiselo lawa ya swilo, hi ku komisa a hi xiyeni xiendlakalo xa nkoka lexi endlekeke ematilweni. (2 Timotiya 3:1) Yesu Kreste u ve Hosi etilweni hi lembe ra 1914. * (Daniyele 7:13, 14) Endzhakunyana ka loko a amukele matimba ya Mfumo, Yesu u teke goza. Bibele yi hi byela leswi: “Ku tlhekeka nyimpi etilweni: Mikayele ni tintsumi ta yena va lwa ni dragona, dragona yona yi lwa yi ri ni tintsumi ta yona.” (Nhlavutelo 12:7) “Mikayele ntsumi leyikulu” i Yesu Kreste exikhundlheni xakwe xa le tilweni. * (Yudha 9; 1 Vatesalonika 4:16) Dragona i Sathana Diyavulosi. Swi n’wi fambele njhani Sathana ni tintsumi takwe leto biha, leti vuriwaka madimona, enyimpini yoleyo? Va hluriwile kutani va “lahleriwa ehansi,” kumbe va cukumeteriwa emisaveni va huma etilweni. (Nhlavutelo 12:9) Hikwalaho ka leswi “matilo [ni] . . . lava tshamaka eka wona,” hileswaku vana va Xikwembu va moya vo tshembeka, va tsakile. Kambe vanhu a va vanga na wona ntsako wo tano. Bibele yi profetile yi ku: “Khombo eka misava . . . hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.”—Nhlavutelo 12:12.

Leswi Sathana a kariheke, u tise khombo—ku xaniseka ni nhlomulo—eka lava tshamaka emisaveni. Hambiswiritano, khombo rero ri ta va ra nkarhinyana, “nkarhi wo koma.” Bibele yi vula leswaku nkarhi wolowo i ‘masiku yo hetelela.’ Hi nga tsaka leswi nkucetelo wa Diyavulosi wu nga ta herisiwa hi ku helela emisaveni ku nga ri khale. Kambe hi byihi vumbhoni lebyi hi nga na byona bya leswaku hi hanya emasikwini yo hetelela?

[Tinhlamuselo ta le hansi]

^ par. 4 Loko u lava rungula leri engetelekeke, vona buku leyi nge, Xana Bibele Yi Dyondzisa Yini Hakunene? matluka 218-19, leyi kandziyisiweke hi Timbhoni ta Yehovha.

 [Laha Swifaniso Swi Humaka Kona eka tluka 2]

COVER: Foreground: © Chris Stowers/Panos Pictures; background: FAROOQ NAEEM/AFP/Getty Images