Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana vandlha ri ni vutihlamuleri byihi loko Mukreste la chayelaka movha a endla mhangu yo karhi kutani ku fa vanhu van’wana?

Mhaka ya nandzu wa ngati yi fanele yi kambisisiwa hikuva vandlha ri fanele ri papalata ku tluleriwa hi nandzu wa ku halata ngati. (Deteronoma 21:1-9; 22:8) Muchayeri loyi a vangeke mhangu a nga ha tivangela nandzu wa ngati loko a lo va ni vusopfa kumbe a tlule milawu ya Khezari kumbe milawu ya le mapatwini. (Marka 12:14) Kambe ku ni timhaka tin’wana leti ti faneleke ku kambisisiwa.

Mudlayi loyi a a balekela eka yin’wana ya miti ya Israyele ya vutumbelo a a boheka ku tengisiwa. Loko ku kumeka leswaku mudlayi loyi a nga dlayanga hi vomu, a a pfumeleriwa ku tshama emutini, kutani a sirheleleka eka murihiseri wa ngati. (Tinhlayo 35:6-25) Hilaha ku fanaka loko Mukreste a khumbeka eka mhangu ya movha laha ku feke munhu, vakulu va fanele ku kambisisa timhaka leswaku va tiyiseka loko ku ri ni nandzu wa ngati. Loko mfumo kumbe huvo ya milawu yi teke xiboho xo karhi, a swi vuli swona leswaku ni vandlha ri ta fikelela xiboho xexo.

Hi xikombiso, huvo ya milawu yi nga vona munhu a ri ni nandzu hikwalaho ko tlula milawu ya mapatu kambe vakulu lava kambisisaka mhaka va nga kuma leswaku a nga na nandzu wa ngati hikuva xiyimo lexi a a langutane na xona loko ku humelela mhangu ya movha a a nga ta kota ku xi lawula. Hambiloko huvo yi nga n’wi voni nandzu, vakulu va nga ha gimeta hi ku vula leswaku muchayeri u ni nandzu wa ngati.

Xiboho lexi endliwaka hi vakulu lava kambisisaka nandzu xi fanele xi sekeriwa eMatsalweni ni le ka vuxokoxoko bya mhaka lebyi kumiweke eka muchayeri la tivonaka nandzu kumbe eka vumbhoni bya vanhu vambirhi kumbe vanharhu lava swi voneke hi mahlo. (Deteronoma 17:6; Matewu 18:15, 16) Loko ku kumeke leswaku ku ni nandzu wa ngati ku fanele ku simekiwa komiti ya vuavanyisi. Loko komiti yi kuma leswaku munhu loyi a nga ni nandzu wa ngati wa tisola, u ta tshinyiwa hi Matsalwa naswona u ta nyikiwa swipimelo malunghana ni vutihlamuleri lebyi a nga na byona evandlheni. A nge he vi nkulu kumbe nandza wa vutirheli. U ta vekeriwa ni swipimelo swin’wana. Naswona u ni vutihlamuleri eka Xikwembu hikwalaho ka vusopfa bya yena, ku honisa kumbe ku nga vi ni vuxiyaxiya leswi heteleleke swi vange mhangu ya movha swin’we ni ku fa ka vanhu van’wana.—Vagalatiya 6:5, 7.

Hi xikombiso: Loko maxelo a ma bihile hi nkarhi wa mhangu ya kona, muchayeri a a fanele a chayele hi vuxiya-xiya. Loko ku ri hileswaku a a khudzehela, a a fanele a yimile kutani a wisa kukondza vurhongo byi hela kumbe a a fanele a nyike un’wana leswaku a chayela.

A hi nge muchayeri o haha kunene. Loko Mukreste wihi na wihi a tlula rivilo leri a pimeriweke rona epatwini, sweswo swi vula ku tlula nawu wo nyika “swilo swa Khezari eka Khezari.” Naswona swi kombisa ku ka munhu a nga xiximi ku kwetsima ka vutomi, ku nga ha va swona leswi vangeke leswaku mhangu leyi yi humelela. (Matewu 22:21) Emhakeni leyi, xiya nchumu wun’wana. I xikombiso xa njhani lexi nkulu a nga ta va a xi vekela ntlhambi loko a honise milawu ya Khezari ya le patwini kumbe a yi tlule hi vomu?—1 Petro 5:3.

Vakreste a va fanelanga va kombela vanhu van’wana leswaku va va endhawini yo karhi hi nkarhi lowu va nga ta tsandzeka ku fika endhawini yoleyo ha wona, handle ko tlula swipimelo swa rivilo leri ku fambiwaka ha rona epatwini. Hambiswiritano, minkarhi yo tala, swo lava ku va munhu a suka ka ha ni nkarhi kumbe a cinca xiyimiso xa yena leswaku a kuma nkarhi lowu eneleke wo ya fika laha a yaka kona. Loko sweswo swo endliwa, Mukreste a nge ringeki leswaku a chayela hi rivilo lerikulu, kambe u ta kota ku landzela milawu ya le patwini leyi vekiweke hi “valawuri lava tlakukeke” va hulumendhe. (Varhoma 13:1, 5) Leswi swi ta pfuna muchayeri leswaku a nga endli timhangu leti nga vangaka nandzu wa ngati. Nakambe swi ta n’wi pfuna leswaku a veka xikombiso lexinene ni ku hlayisa ripfalo lerinene.—1 Petro 3:16.