Nghena endzeni

Hundzela eka leswi nga endzeni

‘A Hi Nge Tshiki Ku Vulavula Hi Yesu’

‘A Hi Nge Tshiki Ku Vulavula Hi Yesu’

 “Hi Fanele Ku Yingisa Xikwembu Tanihi Mufumi Ku Tlula Vanhu”

‘A Hi Nge Tshiki Ku Vulavula Hi Yesu’

AKU ri hi lembe ra 33 C.E., ehubyeni leyi xiximekaka ngopfu ya Vayuda ya le Yerusalema. Sanedri a yi lava ku konanisa valandzeri va 12 va Yesu Kreste. Ha yini? Hikuva a va chumayela malunghana na Yesu. Muapostola Petro na Yohane a va humelela ra vumbirhi emahlweni ka huvo yoleyo. Vaapostola lavan’wana a a vo sungula ku konanisiwa.

Muprista lonkulu u vulavule ni vaapostola va 12 malunghana ni xileriso lexi humesiweke hi huvo enkarhini lowu hundzeke. Hi nkarhi wolowo, loko va lerisiwe leswaku va tshika ku dyondzisa hi Yesu, muapostola Petro na Yohane va te: “Loko swi lulamile emahlweni ka Xikwembu ku yingisa n’wina ematshan’weni ya Xikwembu, avanyisani hi n’wexe. Kambe loko ku ri hina, a hi nge tshiki ku vulavula hi swilo leswi hi swi voneke ni leswi hi swi tweke.” Endzhaku ko khongelela ku va ni xivindzi, vadyondzisiwa va Yesu va hambete va twarisa mahungu lamanene.—Mintirho 4:18-31.

Leswi a xiyeke leswaku minxungeto ya yena ya nkarhi lowu hundzeke a yi tirhanga, eka nkonaniso lowu wa vumbirhi muprista lonkulu u te: “Hi mi lerise kahle leswaku mi nga ha dyondzisi hi ku landza vito leri, kambe, maswivo, mi tate Yerusalema hi dyondzo ya n’wina, naswona mi tiyimisele ku tisa ngati ya munhu loyi ehenhla ka hina.”—Mintirho 5:28.

Ku Tiyimisela Loku Tiyeke

Hi xivindzi, Petro ni vaapostola lavan’wana va te: “Hi fanele ku yingisa Xikwembu tanihi mufumi ku tlula vanhu.” (Mintirho 5:29) Ina, ematshan’weni yo yingisa vanhu, hi fanele hi yingisa Yehovha loko leswi laviwaka hi vanhu swi lwisana ni swileriso swa yena. *

Marito ya vaapostola lama kombisaka ku tshembeka ka vona eka Xikwembu ma fanele ma khorwise swirho swa Sanedri. Loko va vutisiwe malunghana ni ku yingisa Xikwembu, varhangeri lava va Vayuda va fanele va hlamula hi ku pfumelelana va ku: ‘Yingisani Xikwembu.’ Phela, xana a va pfumeli leswaku Xikwembu i Hosi Leyi Lawulaka ya vuako hinkwabyo?

Entiyisweni leswi a a yimela vaapostola lavan’wana hinkwavo, Petro u vule leswaku etimhakeni leti fambisanaka ni ntirho wa vona wa ku chumayela, va yingisa Xikwembu ku tlula vanhu. Hikwalaho, u endle leswaku xihehlo lexi vaapostola va phyarhekiweke xona xa ku nga yingisi xi nga tirhi. Hi ku ya hi matimu ya tiko ra vona, swirho swa Sanedri swa swi tiva leswaku ku ni minkarhi laha swi lulameke hakunene ku yingisa Xikwembu ku tlula vanhu. Le Egipta tinsungukati timbirhi ti chave Xikwembu ematshan’weni ya Faro, ti londzovota vana va xinuna lava va velekiweke hi vavasati va Vaheveru. (Eksoda 1:15-17) Hosi Hezekiya u yingise Yehovha ematshan’weni ya Hosi Senakeribi loko a tshikileriwa leswaku a tinyiketa. (2 Tihosi 19:14-37) Matsalwa ya Xiheveru lawa swirho swa Sanedri a swi ma tiva kahle, ma kandziyisa leswaku Yehovha u langutele leswaku vanhu vakwe va n’wi yingisa.—1 Samuwele 15:22, 23.

Ku Yingisa Swi Tisa Hakelo

Swi tikomba onge xirho xin’wana xa huvo leyi, leyi tlakukeke xi khumbiwe hi marito lama nge, “hi fanele ku yingisa Xikwembu tanihi mufumi ku tlula vanhu.” Gamaliyele, muavanyisi la xiximiwaka swinene wa Sanedri u khorwise huvo leswaku yi yingisa ndzayo ya yena ya vutlhari leyi a yi nyikeleke loko swirho swa huvo swi ri swoxe. Hi ku tshaha swikombiso swa nkarhi lowu  hundzeke, Gamaliyele u vule leswaku a hi vutlhari ku sivela ntirho wa vaapostola. U gimete hi ku vula leswi: “Mi nga tikarhati hi vanhu lava, kambe va tshikeni; . . . loko swi nga ri tano, kahle-kahle mi nga ha kumeka mi lwa ni Xikwembu.”—Mintirho 5:34-39.

Marito ya Gamaliyele lama twalaka ma khorwise huvo leyi tlakukeke leswaku yi ntshunxa vaapostola. Hambileswi va biweke, kambe vaapostola a va chavisiwanga hi xiendlakalo xexo. Ematshan’weni ya sweswo, xiviko xa Bibele xi ri: “Siku ni siku etempeleni ni hi yindlu ni yindlu a va hambeta va nga rhuteli ku dyondzisa ni ku vula mahungu lamanene hi ta Kreste, Yesu.”—Mintirho 5:42.

Hakunene vaapostola va katekisiwe ngopfu hikwalaho ka leswi va byi seketeleke hi ku helela vulawuri bya Xikwembu lebyi tlakukeke! Vakreste va ntiyiso namuntlha va ni langutelo leri fanaka. Timbhoni ta Yehovha ti hambeta ti titshega hi Yehovha tanihi Mufumi wa tona la Tlakukeke. Loko ti lerisiwa ku endla swilo leswi kanetanaka ni swileriso swa Xikwembu, ti hlamula hilaha vaapostola va hlamuleke hakona, loko va te: “Hi fanele ku yingisa Xikwembu tanihi mufumi ku tlula vanhu.”

[Nhlamuselo ya le hansi]

^ par. 7 Vona 2006 Calendar of Jehovah’s Witnesses, September/October.

[Bokisi/Swifaniso leswi nga eka tluka 9]

XANA U TSHAME U TIVUTISA?

Xana Luka, mutsari wa Evhangheli u ri kume njhani rungula leri vuriweke hi Gamaliyele loko swirho swa Sanedri swi ri swoxe? Swi nga ha endleka leswaku Xikwembu xi paluxele Luka hi ku kongoma marito ya Gamaliyele. Kumbexana Pawulo (loyi khale a a ri xichudeni xa Gamaliyele) u byele Luka marito lama vuriweke hi Gamaliyele. Kumbe Luka u vulavurisane ni xirho xin’wana xa huvo leyi tlakukeke lexi a xi wu twisisa kahle ntirho wa vaapostola.