Nghena endzeni

Hundzela eka leswi nga endzeni

Vugandzeri Lebyinene Eka Wena

Vugandzeri Lebyinene Eka Wena

 Vugandzeri Lebyinene Eka Wena

MUPISALEMA Asafa u te: “Ku tshinela eka Xikwembu i swinene eka mina.” Eku sunguleni a a anakanya hi ku tekelela vanhu lava nga khathaliki hi Xikwembu leswaku va ta hanya vutomi bya vulovolovo. Kambe endzhaku Asafa u anakanye hi vuyelo lebyinene bya ku tshinela eka Xikwembu, kutani a kuma leswaku i mhaka leyinene eka yena. (Pisalema 73:2, 3, 12, 28) Xana vugandzeri bya ntiyiso i byinene eka wena namuntlha? Xana byi nga ku pfunisa ku yini?

Ku gandzela Xikwembu xa ntiyiso swi ku pfuna ku papalata mahanyelo ya vutianakanyi. Hikwalaho ka ndlela leyi “Xikwembu xa rirhandzu” xi hi endleke ha yona, lava va rhandzaka ku titsakisa ntsena a va nge pfuki va kume ntsako. (2 Vakorinto 13:11) Yesu u dyondzise mhaka ya nkoka malunghana ni vumunhu loko a ku: “Ku nyika swi tisa ntsako lowukulu ku tlula ku amukela.” (Mintirho 20:35) Hi yona mhaka leyi hi tsakelaka ku endlela vanghana ni vandyangu swilo. Kambe ntsako lowukulu hi wu kuma hi ku endlela Xikwembu swilo. Hi xona lexi hi faneleke hi xi rhandza ku tlula mani kumbe mani. Vanhu va timiliyoni va swiyimo swo hambana-hambana va kume leswaku ku gandzela Xikwembu hi ndlela leyi xi lavaka yona swi enerisa swinene.—1 Yohane 5:3.

Ku Va Ni Xikongomelo eVuton’wini

Nakambe vugandzeri bya ntiyiso i byinene eka wena hileswi byi ku nyikaka xikongomelo evuton’wini. Xana u tshame u xiya ndlela leyi munhu a tsakaka ha yona loko a fikelele nchumu wun’wana wa nkoka? Vanhu vo tala va ni pakani evuton’wini, ku nga ha va malunghana ni ndyangu, vanghana, bindzu kumbe vuhungasi. Hikwalaho ka tinxangu ta vutomi, hakanyingi swilo sweswo a swi koti ku va tisela ntsako. (Eklesiasta 9:11) Hambiswiritano, vugandzeri bya ntiyiso byi ku pfuna ku kuma xikongomelo xo antswa, lexi hambetaka xi ku enerisa niloko ku pfa ku va ni swilo leswi ku hetaka matimba evuton’wini.

Vugandzeri bya ntiyiso byi katsa ku tiva Yehovha ni ku n’wi tirhela hi ku tshembeka. Lava hanyaka hi vugandzeri bya ntiyiso va va ni vuxaka lebyikulu ni Xikwembu. (Eklesiasta 12:13; Yohane 4:23; Yakobo 4:8) Kumbexana swi nga ku tikela ku anakanya leswaku u nga tiva Xikwembu ku antswa lerova xi va munghana wa wena. Kambe loko u kambisisa matimu ya ndlela leyi xi hanyisaneke ni vanhu ha yona ni loko u anakanyisisa hi ntumbuluko wa xona, u nga twisisa vumunhu bya xona hakunene. (Varhoma 1:20) Ku tlula kwalaho, loko u hlaya Rito ra Xikwembu, u nga twisisa xikongomelo xa ku hanya ka hina, xivangelo xa ku va Xikwembu xi pfumelele ku xaniseka, ndlela leyi xi nga ta herisa ku xaniseka ha yona, naswona kumbexana xa nkoka ngopfu, ndlela leyi wena u nga hlanganyelaka ha yona eka leswi Xikwembu xi swi endlaka. (Esaya 43:10; 1 Vakorinto 3:9) Ku twisisa mhaka yoleyo swi nga ku nyika xivangelo xo antswa xa ku hanya!

Ku Va Munhu Wo Antswa

Vugandzeri bya ntiyiso i byinene eka wena hikuva byi ku pfuna ku va munhu wo antswa. Loko u hanya hi ku pfumelelana ni vugandzeri bya ntiyiso, u hlakulela vumunhu lebyi ku susumetelaka ku va ni vuxaka lebyinene ni van’wana. U dyondza eka Xikwembu ni le ka N’wana wa xona malunghana ni ku hanya hi ku tshembeka, ku vulavula hi musa ni ku endla leswi languteriweke eka wena. (Vaefesa 4:20–5:5) Loko u tiva Xikwembu ku antswa lerova u sungula ku xi rhandza, u ta titwa u susumeteleka ku xi tekelela. Bibele yi ri: “Leswi mi nga vana lava rhandzekaka, vanani vatekeleri va Xikwembu, mi hambeta mi famba erirhandzwini.”—Vaefesa 5:1, 2.

Xana a swi nga ta ku tsakisa ku hanya ni vanhu lava tekelelaka rirhandzu ra Xikwembu? Lexi tsakisaka, a wu nge swi koti ku tiendla nconge yin’we  eku gandzeleni ka Xikwembu xa ntiyiso. Swi lava leswaku u hlangana ni van’wana lava rhandzaka leswinene. Kunene, swi nga endleka u nga yi rhandzi mhaka ya ku va ku ri ni vukhongeri lebyi hleriweke. Kambe hilaha hi voneke hakona eka xihloko lexi hundzeke, xiphiqo lexi nga kona hi vukhongeri byo tala hileswaku a byi hleriwanga hi ndlela ya kona naswona a byi hleriwanga hi swikongomelo leswinene. Vukhongeri byo tala lebyi hleriweke byi endla swilo leswi nga fambisaniki ni Vukreste. Vanhu va Xikwembu va hleriwe hi Yehovha hi byakwe hi xikongomelo lexinene. Bibele yi ri: “Xikwembu a hi Xikwembu xa mpfilumpfilu, kambe i xa ku rhula.” (1 Vakorinto 14:33) Ku fana ni vanhu van’wana lava hlayiwaka hi timiliyoni, na wena u nga kuma leswaku ku tihlanganisa ni ntlawa lowu hlelekeke wa Vakreste swi ni nsusumeto lowunene eka wena.

Ntshembo Hi Vumundzuku

Matsalwa yo Kwetsima ma kombisa leswaku Xikwembu xi hlela vagandzeri va ntiyiso leswaku va pona makumu ya mafambiselo ya namuntlha ya swilo ivi va dya ndzhaka ya misava leyintshwa laha ku nga “ta va ni ku lulama.” (2 Petro 3:13; Nhlavutelo 7:9-17) Xisweswo, vugandzeri lebyi nga byinene eka wena byi ku nyika ntshembo lowu u faneleke u va na wona leswaku u kuma ntsako. Van’wana va veka ntshembo wa vona eka vuswikoti bya tihulumendhe, switshembiso swa mabindzu kumbe swa rihanyo lerinene ni ku huma phexeni leyi enerisaka. Kambe swilo sweswo hakanyingi a swi tiyisekisi leswaku u ta va ni vumundzuku lebyi tsakisaka. Hi hala tlhelo, muapostola Pawulo u tsale a ku: “Hi veke ntshembo wa hina eka Xikwembu lexi hanyaka.”—1 Timotiya 4:10.

Loko wo endla ndzavisiso wa vukheta, u nga va kuma vagandzeri va ntiyiso. Emisaveni ya namuntlha leyi avaneke, rirhandzu ni vun’we i timfanelo leti kombisaka Timbhoni ta Yehovha erivaleni. Ti huma ematikweni ni le swiyin’weni hinkwaswo; kambe ti hlanganisiwa hi ku rhandzana ni hi ku rhandza Yehovha. (Yohane 13:35) Ta ku rhamba leswaku u tixiyela hi wexe leswi ti swi kumeke. Asafa u tsarile a ku: “Ku tshinela eka Xikwembu i swinene eka mina.”—Pisalema 73:28.

[Xifaniso lexi nga eka tluka 7]

U nga va munghana wa Xikwembu