Nghena endzeni

Hundzela eka leswi nga endzeni

Loko Xirho Xa Ndyangu Xi Fularhela Yehovha

Loko Xirho Xa Ndyangu Xi Fularhela Yehovha

 Loko Xirho Xa Ndyangu Xi Fularhela Yehovha

MARK na Louise i Timbhoni ta Yehovha. * Hi rirhandzu ni nkhathalelo, va dyondzise vana va vona Matsalwa, ku nga leswi Bibele yi khutazaka vatswari lava nga Vakreste leswaku va swi endla. (Swivuriso 22:6; 2 Timotiya 3:15) Lexi vavisaka, a hi vana va vona hinkwavo lava hambeteke va tirhela Yehovha loko se va kurile. Louise u ri: “Mbilu ya mina ya vava hikwalaho ka vana lava tshikeke ntiyiso. A ndzi lavi ku kanganyisa munhu, sweswo swi ndzi dyisa mbitsi ndzi xeva hi nhlomulo siku ni siku! Loko van’wana va vulavula hi vana va vona, mbilu ya mina ya vava naswona ndzi boheka ku lwa hi matimba leswaku mihloti yi nga humi.”

Ina, loko munhu a hlawula ku fularhela Yehovha, a tshika ku hanya hi ndlela ya Matsalwa, swirho leswi tshembekeke swa ndyangu swi twa ku vava. Irene u ri: “Sesi wa mina ndzi n’wi rhandza ngopfu. Ndzi ringete tindlela hinkwato leswaku ndzi n’wi pfuna a tlhelela eka Yehovha!” Maria, loyi ndzisana yakwe ya xinuna yi nga tshika ku gandzela Yehovha kutani yi sungula ku tikhoma hi ndlela yo biha, u ri: “Swa ndzi tikela ku langutana ni xiyimo lexi hikuva a a ri makwerhu la rhandzekaka eka mina. Ndzi n’wi kumbuka swinene loko ndyangu hinkwawo wu hlanganile wu tihungasa.”

Hikwalaho Ka Yini Swi Tika Swonghasi?

Ha yini maxaka lama nga Vakreste ma twa ku vava swinene loko n’wana kumbe xirho xin’wana xa ndyangu xi tshika ku gandzela Yehovha? Hikuva va swi tiva leswaku Matsalwa ma tshembisa vutomi lebyi nga heriki emisaveni ya paradeyisi eka vanhu lava tshamaka va tshembekile eka Yehovha. (Pisalema 37:29; 2 Petro 3:13; Nhlavutelo 21:3-5) Va swi langutele hi mahlo-ngati ku tsakela mikateko yoleyo va ri ni vanghana va vona va vukati, vana, vatswari, vamakwavo ni vatukulu. Va twa ku vava ngopfu loko va anakanya leswaku swirho swa ndyangu leswi nga tshika ku gandzela Yehovha swi nga lahlekeriwa hi lunghelo rero! Hambi ku ri evuton’wini bya vona bya namuntlha, Vakreste va swi xiya leswaku milawu ni misinya ya milawu ya Yehovha yi endleriwe ku pfuna vona. Hikokwalaho, Vakreste va karhateka swinene loko va vona swirho swa ndyangu swi byala swilo leswi swi nga ta rila hi  ntshovelo wa kona.—Esaya 48:17, 18; Vagalatiya 6:7, 8.

Van’wana lava nga si tshamaka va langutana ni xiyimo lexi swi nga ha va tikela ku twisisa leswaku swi vava ku fikela kwihi. Kahle-kahle swi khumba vutomi bya wena hinkwabyo. Louise u ri: “Swi ya swi ndzi nonon’hwela ku ya evandlheni ra Vukreste laha ndzi vonaka vatswari va ri karhi va hleka ni vana va vona va tidyela mabulo. Xiendlakalo xin’wana ni xin’wana lexi tsakisaka ndzi hetelela ndzi nga xi tsakeli hikwalaho ka xirho xa ndyangu lexi nga riki kona.” Nkulu un’wana la nga Mukreste u tsundzuka malembe ya mune lama heleke n’wana wa vona wa nhwanyana a tihambanise ni vandlha. U ri: “A swi nga olovi leswaku hi tiphina hi ‘minkarhi leyi tsakisaka.’ Loko ndzi nyika nsati wa mina nyiko kumbe ndzi n’wi yisa endhawini leyi tsakisaka hi mahelo-vhiki, a wu ta kuma a sungula ku rila, a tsundzuka leswaku loko n’wana wakwe o va kona a a ta va a tsaka na vona.”

Xana Vakreste volavo va swi hundzeleta? Nikatsongo. Entiyisweni, va nga ha va va kombisa timfanelo ta Yehovha, loyi a vumbeke munhu hi xifaniso xa yena. (Genesa 1:26, 27) Xana leswi swi vula yini? Xana Yehovha u titwise ku yini loko Vaisrayele va xandzukile? Eka Pisalema 78:38-41, hi dyondza leswaku Yehovha u twe ku vava. Kambe u va lehisele mbilu a va lemukisa ni ku va tshinya, a va rivalela nkarhi na nkarhi loko va tisola. Handle ko kanakana, Yehovha u khumbeka swinene hi swivumbiwa swa yena, ‘ntirho wa mavoko ya yena,’ kutani a nga swi lahli hi ku olova. (Yobo 14:15; Yonasi 4:10, 11) U endle leswaku  vanhu va khumbeka hi ndlela leyi a khumbekaka ha yona, leswi endlaka leswaku vuxaka exikarhi ka swirho swa ndyangu byi va lebyikulu. Kutani a swi hlamarisi leswi vanhu va vaka ni nhlomulo loko xirho xa ndyangu xi tshika ntiyiso.

Kunene, ku va xirho xa ndyangu xi tshika ntiyiso swi tisa ndzingo lowukulu eka vagandzeri va ntiyiso. (Mintirho 14:22) Yesu u vule leswaku ku amukela rungula rakwe swi ta vanga ku avana emindyangwini yin’wana. (Matewu 10:34-38) Sweswo a swi vuli leswaku rungula ra Bibele hi roxe ri endla leswaku mindyangu yi avana. Ematshan’weni ya sweswo, swirho swa ndyangu leswi nga riki vapfumeri kumbe leswi xandzukeke hi swona swi vangaka ku avana hi ku ala ndlela ya Vukreste, ku yi tshika kumbe ku lwisana na yona. Hambiswiritano, hi nga nkhensa Yehovha hileswi a nga va tshikiki vanhu va yena vo tshembeka va langutana va ri voxe ni miringo leyi yi va welaka. Loko sweswi u ri enhlomulweni hikwalaho ka xirho xa ndyangu lexi tshikeke ntiyiso, i misinya yihi ya milawu ya le Bibeleni leyi nga ku pfunaka leswaku u tiyisela nhlomulo wa wena kutani u kuma ntsako ni ku eneriseka?

Ku Langutana Ni Xiyimo

“Hi ku tiaka . . . , tihlayiseni erirhandzwini ra Xikwembu.” (Yudha 20, 21) Swi nga ha endleka ku ri hava lexi u nga xi endlaka sweswi leswaku u pfuna xirho xa ndyangu lexi tshikeke ku tirhela Yehovha. Nilokoswiritano, u nga swi kota ku tiaka wena swin’we ni swirho leswin’wana swa ndyangu leswi tshembekaka. Veronica, loyi a voneke vana vambirhi eka majaha manharhu va tshika ntiyiso, u ri: “Mina ni nuna wa mina hi tsundzuxiwe leswaku loko ho tshama hi tiyile emoyeni, hi ta kota ku amukela majaha ya hina loko ma tlhelela enhlengeletanweni. Xana n’wana wa vusopfa a a ta helela kwihi loko tata wakwe a a nga ri exiyin’weni lexinene xa ku n’wi amukela loko a vuya?”

Leswaku u tshama u tiyile, tinyiketele eka swilo swa moya. Leswi swi katsa ku namarhela xiyimiso xa dyondzo ya Bibele leyi dzikeke ni ku va kona eminhlanganweni ya Vukreste. Tinyiketele swinene hilaha u nga swi kotaka hakona ku pfuna van’wana evandlheni. I ntiyiso leswaku eku sunguleni u nga ha kuma swi ku tikela sweswo. Veronica wa tsundzuka: “Eku sunguleni a ndzi titwa ndzi lava ku titshamela ndzexe ku fana ni xiharhi lexi vavisekeke. Kambe nuna wa mina u phikelele leswaku hi namarhela xiyimiso xa swilo swa moya. A a tiyiseka leswaku ha ya eminhlanganweni. Loko ku ri nkarhi wo ya entsombanweni, a ndzi boheka ku kanya mbilu leswaku ndzi va ni xivindzi xo ya hlangana ni vanhu. Kambe nongonoko a wu hi tshineta eka Yehovha. N’wana wa hina wa jaha loyi a tshameke a tshembekile u pfuniwe ngopfu hi ntsombano wolowo.”

Maria, loyi a boxiweke eku sunguleni, u pfuniwe ngopfu hi ku tshama a khomekile entirhweni wa nsimu naswona sweswi u pfuna vanhu va mune leswaku va dyondza Bibele. Hilaha ku fanaka, Laura u ri: “Hambileswi ndza ha rilaka siku ni siku, ndzi nkhensa Yehovha hikuva hambileswi ndzi nga mutswari loyi a nga humelelangiki eku kuriseni ka vana, ndzi ni rungula leri hetisekeke ra Bibele, leri kotaka ku pfuna mindyangu emasikwini lawa ya makumu.” Ken na Eleanor, lava vana va vona lava kuleke va siyeke vandlha, va hlele swiyimo swa vona leswaku va rhurhela laha ku nga ni xilaveko lexikulu xa vahuweleri va Mfumo va ya phayona kona. Sweswo swi va  pfunile leswaku va va ni langutelo lerinene kutani va papalata ku dya mbitsi va xeva hi nhlomulo.

U nga heleriwi hi ntshembo. Rirhandzu “ri va ni ntshembo eka swilo hinkwaswo.” (1 Vakorinto 13:7) Ken, loyi a boxiweke laha henhla, u ri: “Loko vana va hina va tshike ndlela ya ntiyiso, a ndzi titwa ku fana ni loko ndzi feriwile. Kambe endzhaku ko fa ka sesi wa mina, langutelo ra mina ri cincile. Ndza tsaka leswi vana va mina va nga fangiki rifu ra xiviri nileswi Yehovha a tshameke a va pfulele ndlela, leswaku va tlhelela eka yena.” Kunene, ntokoto wu kombise leswaku vo tala lava hambukeke entiyisweni eku heteleleni va vuya.—Luka 15:11-24.

U nga tivoni nandzu. Hakanyingi vatswari va sala va tisola loko va anakanya hi swa nkarhi lowu hundzeke ivi va kuma leswaku ku ni timhaka leti va nga ti tamela hi ndlela leyi hoxeke. Hambiswiritano, mhaka-nkulu leyi hlamuseriweke eka Ezekiyele 18:20 hileswaku Yehovha u vona mudyohi nandzu wa xidyoho xakwe, ku nga ri vatswari. Lexi tsakisaka, hambileswi buku ya Swivuriso yi vulaka swo tala hi vutihlamuleri bya vatswari byo kurisa vana va vona hi ndlela leyinene, nakambe yi tamele tinhlamuselo leti andzisiweke ka mune to laya vana leswaku va yingisa vatswari va vona. Ina, vana va ni vutihlamuleri byo yingisa ndzetelo lowu humaka eBibeleni lowu va nyikiwaka wona hi vatswari va vona lava nga hetisekangiki. Kumbexana u ringetile ku tamela timhaka hi ndlela leyi u nga kotaka ha yona enkarhini wolowo. Kambe hambiloko u vona onge u endle swihoxo swo karhi, sweswo a swi vuli swona leswaku swihoxo swa wena hi swona swi endleke n’wana a tshika ntiyiso. Ku tshamela ku “titshandza” swi nga ka swi nga ku pfuni. Dyondza eka swihoxo swa wena, tiyimisele leswaku u nga ha swi endli, naswona khongela eka Yehovha leswaku a ku rivalela. (Pisalema 103:8-14; Esaya 55:7) Kutani languta swa nkarhi lowu taka ku nga ri swa nkarhi lowu hundzeke.

Lehisela van’wana mbilu. Swi nga ha va tikela van’wana leswaku va ku khutaza kumbe ku ku chavelela, ngopfu-ngopfu loko va nga si tshama va langutana ni xiyimo lexi fanaka ni xa wena. Ku engetela kwalaho, vanhu va ni langutelo leri nga faniki malunghana ni ku khutaza ni ku chavelela. Kutani loko van’wana va vula swilo leswi swi ku khunguvanyisaka, tirhisa ndzayo ya muapostola Pawulo leyi kumekaka eka Vakolosa 3:13, leyi nge: “Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana.”

Xixima lunghiselelo ro tshinya ra Yehovha. Loko xaka ra wena ri tshinyiwile evandlheni, tsundzuka leswaku sweswo i xiphemu xa lunghiselelo ra Yehovha naswona ri pfuna vanhu hinkwavo, ku katsa ni mudyohi. (Vaheveru 12:11) Hikwalaho, papalata mboyamelo wun’wana ni wun’wana wo xopaxopa swihoxo eka vakulu lava tameleke mhaka ya kona kumbe eka swiboho leswi endliweke. Tsundzuka leswaku vuyelo lebyinene byi tisiwa hi ku endla swilo hi ndlela ya Yehovha, kasi ku kaneta malunghiselelo ya Yehovha swi engetela maxangu.

Endzhaku ka loko Vaisrayele va kutsuriwile aEgipta, hakanyingi Muxe a a endla ntirho wa vuavanyisi. (Eksoda 18:13-16) Tanihi leswi hakanyingi xiboho xi tsakisaka un’wana ivi xi vilerisa un’wana, a swi kanakanisi leswaku van’wana a va hetiwa matimba hi swiboho swa Muxe. Kumbexana ku sola-soriwa ka swiboho swa Muxe hi swona leswi endleke leswaku van’wana va xandzukela vurhangeri bya yena. Hambiswiritano, Yehovha a a tirhisa Muxe leswaku a rhangela vanhu va Yena, kutani ematshan’weni yo xupula Muxe, U xupule vaxandzuki ni mindyangu ya vona leyi va seketeleke. (Tinhlayo 16:31-35) Hi nga dyondza emhakeni leyi, hi ku hisekela ku xixima ni ku fambisana ni swiboho leswi endliweke hi lava kongomisiwaka hi Xikwembu namuntlha.

 Malunghana ni mhaka leyi, Delores u tsundzuka ndlela leyi swi n’wi tikeleke ha yona leswaku a va ni langutelo lerinene loko n’wana wa yena wa nhwanyana a tshinyiwa evandlheni. U ri: “Lexi ndzi pfuneke i ku tshamela ku hlaya swihloko leswi vulavulaka hi ndlela leyi malunghiselelo ya Yehovha ma pfunaka ha yona. Ndzi tiendlele xibukwana xo tsalela tinhla leti humaka eka tinkulumo ni swihloko leswi nga ndzi pfunaka ku tiyisela ni ku hambeta ndzi tirhela Yehovha.” Sweswo swi hi yisa eka yinhla yin’wana leyi nga hi pfunaka ku langutana ni xiyimo.

Phofula mintlhaveko ya wena. U nga kuma swi pfuna ku phofula ta le mbilwini eka munghana un’we kumbe vambirhi lava nga ni ntwela-vusiwana lava u va tshembaka. Loko u endla tano, hlawula vanghana lava nga ta ku pfuna leswaku u tshama u ri ni langutelo lerinene. U ta vuyeriwa swinene loko u ‘chulula mbilu ya wena’ eka Yehovha hi xikhongelo. * (Pisalema 62:7, 8) Ha yini? Hikuva u yi twisisa kahle ndlela leyi u titwaka ha yona. Hi xikombiso, u nga ha vona swi nga fanelanga leswaku u langutana ni xiyimo lexi u nga eka xona. Phela, a hi wena u nga fularhela Yehovha. Phofula mintlhaveko ya wena eka Yehovha, kutani u kombela leswaku a ku pfuna u kota ku languta xiyimo hi mianakanyo leyi hlutekeke.—Pisalema 37:5.

Loko nkarhi wu ri karhi wu famba, u ta swi kota ku lawula mintlhaveko ya wena. Kutani u nga heli matimba eka matshalatshala ya wena yo tsakisa Tata wa wena wa le tilweni, naswona u nga ehleketi leswaku matshalatshala ya wena i ya hava. (Vagalatiya 6:9) Tsundzuka leswaku niloko hi fularhele Yehovha, swiphiqo ha ha ta va na swona. Hi hala tlhelo, loko hi tshama hi tshembekile eka yena, u ta hi pfuna eka miringo leyi hi langutanaka na yona. Kutani tiyiseka leswaku Yehovha u xi twisisa kahle xiyimo xa wena naswona u ta hambeta a ku nyika matimba lawa u ma lavaka hi nkarhi wa kona.—2 Vakorinto 4:7; Vafilipiya 4:13; Vaheveru 4:16.

[Tinhlamuselo ta le hansi]

^ par. 2 Mavito man’wana ya cinciwile.

^ par. 19 Malunghana ni ku khongelela xaka leri susiweke evandlheni, vona Xihondzo xo Rindza xa December 1, 2001, matluka 30-1.

[Bokisi leri nga eka tluka 19]

Ndlela Yo Langutana Ni Xiyimo

◆ ‘Tiake, u tihlayisa erirhandzwini ra Xikwembu.’—Yudha 20, 21.

◆ U nga heleriwi hi ntshembo.—1 Vakorinto 13:7.

◆ U nga tivoni nandzu.—Ezekiyele 18:20.

◆ Lehisela van’wana mbilu.—Vakolosa 3:13.

◆ Xixima lunghiselelo ro tshinya ra Yehovha.—Vaheveru 12:11.

◆ Phofula mintlhaveko ya wena.—Pisalema 62:7, 8.

[Bokisi/Xifaniso lexi nga eka tluka 21]

Xana Fularhele Yehovha?

Loko swi ri tano, ku nga khathariseki xivangelo lexi endleke sweswo, vuxaka bya wena na Yehovha ni ntshembo wa wena wa ku hanya hi masiku swi le khombyeni. Kumbexana u lava ku vuyela eka Yehovha. Xana u le ku endleni ka matshalatshala yo karhi sweswi? Kumbe, xana wa ha yimela “nkarhi lowu faneleke”? Tsundzuka, Armagedoni yi kwala nyongeni. Tlhandlakambirhi, vutomi bya namuntlha byi komile naswona ku nga endleka swin’wana ni swin’wana hi byona. A wu nge swi tivi loko mundzuku kunene u ta pfuka wa ha hanya. (Pisalema 102:3; Yakobo 4:13, 14) Wanuna un’wana loyi a khomiweke hi vuvabyi lebyi nga tshungulekiki u te: “Vuvabyi lebyi byi ndzi khome ndzi ri karhi ndzi tirhela Yehovha entirhweni wa nkarhi hinkwawo, ndzi nga hanyi vutomi bya mikoka mimbirhi. Sweswo hi swona swi ndzi chavelelaka sweswi.” Kambe, anakanya ndlela leyi a a ta titwa ha yona loko vuvabyi byebyo a byi lo n’wi khoma a ha garingetela a ku, “Ra ta siku, ndzi ta tlhelela eka Yehovha!” Loko u fularhele Yehovha, sweswi i nkarhi wa leswaku u tlhelela eka yena.

[Swifaniso leswi nga eka tluka 18]

Ku khomeka hi swilo swa moya swi nga ku pfuna leswaku u tshama u ri ni langutelo lerinene