Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Endzhaku ka ndzingo wo hetelela eku heleni ka Gidi ra Malembe, xana swi ta koteka leswaku vanhu va dyoha kutani va fa?

Tindzimana timbirhi leti kumekaka eka Nhlavutelo ti hi nyika rungula leri hi pfunaka ku hlamula xivutiso xexo: “Rifu ni Hayidesi swi lahleriwa etiveni ra ndzilo. Tiva leri ra ndzilo ri vula rifu ra vumbirhi.” (Nhlavutelo 20:14) “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.

Xiya nkarhi lowu katsekaka laha. Ku lahleriwa ka “rifu ni Hayidesi” etiveni ra ndzilo swi ta humelela endzhaku ka loko vanhu va pone Armagedoni, ni loko vafi va pfuxiwile, naswona munhu wihi na wihi loyi a velekiweke endzhaku ka Armagedoni u ta va a avanyisiwile hi ku ya hi “swilo leswi tsariweke eka tibuku-nsongwa,” kumbe swilaveko swa Yehovha leswi vanhu va tsaleriweke swona hi nkarhi wa gidi ra malembe. (Nhlavutelo 20:12, 13) Muapostola Yohane u tsale hi ta xivono xin’wana, lexi kumekaka eka Nhlavutelo ndzima 21 lexi nga ta hetiseka hi nkarhi wa Mfumo wa Kreste Yesu wa Gidi ra Malembe. Hambiswiritano, xivono xexo xi ta hetiseka hi ku helela loko ku hela malembe ya gidi ya Siku ra Vuavanyisi. Kutani Yehovha u ta tshama ni vanhu hi ku helela handle ka vavulavuleri endzhaku ka loko Yesu a tlherisele Mfumo eka Tata wakwe. Yehovha u ta tshama ni ‘vanhu va yena’ hi ndlela ya moya hilaha ku nga heriki. Xitshembiso lexi nge “rifu a ri nge he vi kona” xi ta hetiseka hi ndlela ya xiviri loko vanhu va ta va se va hetisekile hikwalaho ka leswi va nga ta kuma vuyelo lebyi heleleke bya gandzelo ra nkutsulo ra Kreste.—Nhlavutelo 21:3, 4.

Xisweswo, rifu leri boxiweke eka tindzimana leti tshahiweke laha henhla hi leri hi ri kumeke hikwalaho ka xidyoho xa Adamu, leri nga ta herisiwa hi nkutsulo wa Kreste. (Varhoma 5:12-21) Loko rifu leri va ri kumeke tanihi ndzhaka eka wanuna wo sungula se ri herisiwile, vanhu va ta fana na Adamu loko a ha ku vumbiwa. Adamu a a hetisekile, kambe sweswo a swi nga vuli leswaku a swi nga ta koteka ku va a fa. Yehovha u byele Adamu leswaku a nga dyi eka “murhi wa ku tiva leswinene ni leswo biha” kutani a ku: “Siku u nga ta wu dya, u ta fa hakunene.” (Genesa 2:17) Rero a ku ri rifu leri vangiweke hi xidyoho lexi endliweke hi vomu. Endzhaku ka loko va ringiwe ro hetelela eku heleni ka Mfumo wa Gidi ra Malembe, vanhu va ha ta hambeta va ri ni ntshunxeko wa ku tihlawulela. (Nhlavutelo 20:7-10) Va ha ta hambeta va tihlawulela loko va lava ku ya emahlweni va tirhela Yehovha kumbe e-e. Hikokwalaho, swi nga ka swi nga vuriwi leswaku vanhu va nge pfuki va fularhele Xikwembu hilaha Adamu a endleke hakona.

Ku ta humelela yini hi munhu la hlawulaka ku xandzuka endzhaku ka ndzingo wo hetelela loko rifu ni Hayidesi se swi nga ha ri kona? Hi nkarhi wolowo, rifu leri hi ri kumeke hikwalaho ka Adamu ri ta va ri nga ha ri kona. Kutani Hayidesi, sirha leri tolovelekeke ra vanhu lava nga ni ntshembo wa ku pfuxiwa, ri ta va ri nga ha ri kona. Hambiswiritano, Yehovha a nga lovisa muxandzuki un’wana ni un’wana etiveni ra ndzilo, laha a nga ta ka a nga ha wu kumi ntshembo wun’wana wa ku pfuxiwa. Rifu ra vona ri ta fana ni ra Adamu na Evha, a ri nge fani ni rifu ra ntumbuluko leri vanhu va ri kumeke eka Adamu.

Hambiswiritano, a hi na xona xivangelo xa ku langutela vuyelo byo tano. Lava nga ta hlula ndzingo wo hetelela va ta hambana na Adamu hi nchumu wun’we lowu hlawulekeke. Va ta va va ringiwe hi ku helela. Hi nga tiyiseka leswaku vanhu va ta va va ringiwe hi ndlela leyi heleleke eka ndzingo wo hetelela hikuva Yehovha wa swi tiva ku kambisisa munhu hi ku helela. Hi nga tiyiseka leswaku ndzingo wo hetelela wu ta herisa munhu wihi na wihi la nga ta tirhisa ntshunxeko wakwe wa ku tihlawulela hi ndlela yo biha. Xisweswo, hambileswi xi nga riki kona lexi nga sivelaka vanhu lava hluleke ndzingo wo hetelela leswaku va xandzukela Xikwembu ivi va lovisiwa, a swi tshembisi leswaku nchumu wo tano wu nga humelela.

[Xifaniso lexi nga eka tluka 31]

Endzhaku ka loko vanhu va ringiwe ro hetelela, xana va ta fana na Adamu hi ndlela yihi?