Nghena endzeni

Hundzela eka leswi nga endzeni

‘Xikwembu Xa Hina Xa Swi Kota Ku Hi Ponisa’

‘Xikwembu Xa Hina Xa Swi Kota Ku Hi Ponisa’

 “Hi Fanele Ku Yingisa Xikwembu Tanihi Mufumi Ku Tlula Vanhu”

‘Xikwembu Xa Hina Xa Swi Kota Ku Hi Ponisa’

XIENDLAKALO xexo a xi hleriwe leswaku xi va lexi hlamarisaka. Xifaniso lexikulu xa nsuku a xi yimisiwe erivaleni ra Dura, leri swi nga ha endlekaka leswaku a ri ri ekusuhi ni muti wa Babilona. Xifaniso xexo a xi fanele xi khanguriwa loko ku endliwe nkhuvo wo hlawuleka, lowu a ku ta va ni vatirhela-mfumo va xiyimo xa le henhla lava a va languteriwe leswaku va nkhinsama emahlweni ka xifaniso loko ku twakala mpfumawulo wa swichayachayana swa vuyimbeleri. Hosi Nebukadnetsara wa le Babilona a a lerise leswaku un’wana ni un’wana la nga ta ka a nga xi gandzeli xifaniso lexi a a ta hoxiwa ekheleni ra ndzilo lowu hisaka ngopfu a fela kona. I mani loyi a a ta xinyata a nga xi yingisi xileriso xexo?

Leswi hlamariseke vahlaleri hileswaku vagandzeri vanharhu lava chavaka Yehovha—Xadraka, Mixaka na Abedinigo—a va xi gandzelanga. A va swi tiva leswaku loko vo endla sweswo a va ta va va lwisana ni ku tinyiketela ka vona loku hlawulekeke eka Yehovha Xikwembu. (Deteronoma 5:8-10) Loko va sindzisiwe ku hlamusela hi ta xiboho lexi va xi tekeke, va byele Nebukadnetsara handle ko chava va ku: “Loko swi fanele swi va tano, Xikwembu xa hina lexi hi xi tirhelaka xa swi kota ku hi ponisa. Xi ta hi ponisa hi huma ekheleni ra ndzilo lowu pfurhaka ni le vokweni ra wena, Wena hosi. Loko swi nga ri tano, swi tive wena, Wena hosi, leswaku swikwembu swa wena a hi swi tirheli, ni xifaniso xa nsuku lexi u xi yimiseke a hi nge xi gandzeli.”—Daniyele 3:17, 18.

Loko Vaheveru lavanharhu va hoxiwe ekheleni ra ndzilo lowu pfurhaka, va pone ntsena hi singita. Xikwembu xi rhumele ntsumi leswaku yi sirhelela malandza ya xona yo tshembeka. Kambe se a va hlawule ku fa ematshan’weni ya ku ka va nga n’wi yingisi Yehovha. * Xiboho xa vona a xi fana ni xa vaapostola va Yesu Kreste, lava endzhaku ka malembe-xidzana ya tsevu va swi vekeke erivaleni emahlweni ka huvo-nkulu ya Vayuda va ku: “Hi fanele ku yingisa Xikwembu tanihi mufumi ku tlula vanhu.”—Mintirho 5:29.

Tidyondzo Ta Nkoka Leti Hi Ti Dyondzaka

Xadraka, Mixaka na Abedinigo i swikombiso leswinene swa ripfumelo, ku yingisa ni ku tshembeka. Vaheveru lavanharhu va kombise ripfumelo eka Yehovha. Ripfalo ra vona leri leteriweke hi Matsalwa a ri va pfumelelanga ku hlanganyela eka xiendlo xihi ni xihi xa vugandzeri bya mavunwa kumbe ku tinyiketela eka moya wo rhandza tiko. Vakreste va manguva lawa na vona va tshemba Xikwembu xa ntiyiso hi ku helela. Va kongomisiwa hi ripfalo ra vona leri leteriweke hi Bibele naswona va ala ku hlanganyela eka swiendlo swa vugandzeri bya mavunwa kumbe minkhuvo leyi lwisanaka ni milawu swin’we ni misinya ya milawu ya Xikwembu.

Vaheveru lavanharhu vo tshembeka a va tshemba Yehovha kutani va arile ku tshika ku n’wi yingisa hikwalaho ko lava ku xiximiwa, ku va ni xikhundlha xa le henhla kumbe ku dzunisiwa, ku nga swilo leswi Mfumo wa le Babilona a wu ta va nyika swona. Majaha wolawo a ma tiyimiserile ku xaniseka ni ku fa ematshan’weni yo onha vuxaka bya wona ni Xikwembu. Ku fana na Muxe la hanyeke emahlweni ka vona, va “hambet[e] [v]a tserhama onge hiloko [v]a vona Loyi a nga vonakiki.” (Vaheveru 11:27) Ku nga khathariseki leswaku Yehovha a a ta va ponisa eku feni kumbe e-e, kambe majaha lamanharhu a ma tiyimisele ku tshama ma tshembekile eka yena ematshan’weni yo landzula ripfumelo  ra wona leswaku ma ponisa vutomi bya wona. Entiyisweni, loko muapostola Pawulo a kombetela eka xikombiso xa wona, u vule leswaku van’wana lavo tshembeka va “tim[e] matimba ya ndzilo.” (Vaheveru 11:34) Malandza ya Yehovha ma kombisa ripfumelo ni ku yingisa ko tano loko ma langutana ni miringo leyi ringaka vutshembeki bya wona emasikwini ya hina.

Eka ntokoto wa Xadraka, Mixaka na Abedinigo hi tlhela hi dyondza leswaku Xikwembu xi hakela lava tshembekaka eka xona. Mupisalema u yimbelerile a ku: “Yehovha . . . a nge va siyi lava tshembekeke vakwe.” (Pisalema 37:28) Namuntlha, a hi nge languteli leswaku Xikwembu xi hi ponisa hi ku tirhisa singita hilaha xi endleke hakona eka Vaheveru lavaya vanharhu. Kambe, hi nga tiyiseka leswaku ku nga khathariseki maxangu wahi ni wahi lawa hi langutanaka na wona, Tata wa hina wa le tilweni u ta hi seketela. Xikwembu xi nga ha susa xiphiqo xexo, xi nga ha hi nyika matimba yo xi tiyiselela, kumbe xi hi pfuxa eku feni loko hi tshembeke ku fikela eku feni. (Pisalema 37:10, 11, 29; Yohane 5:28, 29) Ripfumelo, ku yingisa ni ku tshembeka swa hlula minkarhi hinkwayo loko vutshembeki bya hina byi ringiwa kutani hi hlawula ku yingisa Xikwembu ku tlula vanhu.

[Nhlamuselo ya le hansi]

^ par. 5 Vona 2006 Calendar of Jehovah’s Witnesses, July/August.

[Bokisi/Xifaniso lexi nga eka tluka 9]

XANA A WU SWI TIVA?

• Vaheveru lavanharhu a va ri ehansinyana ka malembe ya 30 loko va langutana ni ndzingo lowu wo hlayisa vutshembeki.

• A swi kanakanisi leswaku ndzilo wa le kheleni a wu hlanganyeteriwe wu hisa ku tlurisa.—Daniyele 3:19.