Nghena endzeni

Hundzela eka leswi nga endzeni

Anakanyisisa Hi Vunene Bya Nhlengeletano Ya Yehovha

Anakanyisisa Hi Vunene Bya Nhlengeletano Ya Yehovha

 Anakanyisisa Hi Vunene Bya Nhlengeletano Ya Yehovha

“Kunene hi ta enerisiwa hi vunene bya yindlu ya wena.”—PISALEMA 65:4.

1, 2. (a) Lunghiselelo ra tempele a ri ta tisa vuyelo byihi eka vanhu va Xikwembu? (b) Davhida u endle malunghiselelo wahi leswaku ku akiwa tempele?

DAVHIDA wa le tikweni ra Israyele ra khale i un’wana wa vanhu lava hlamarisaka swinene loyi ku vulavuriweke ha yena eMatsalweni ya Xiheveru. Murisi loyi, loyi a a ri muyimbeleri, muprofeta tlhelo hosi a a tshemba Yehovha Xikwembu hi ku helela. Vuxaka lebyikulu swinene lebyi Davhida a a ri na byona na Yehovha byi n’wi endle a navela ku akela Xikwembu yindlu. Yindlu yoleyo kumbe tempele a yi ta va xivindzi xa vugandzeri bya ntiyiso eIsrayele. Davhida a a swi tiva leswaku tempele ni ntirho lowu a wu ta endliwa eka yona a swi ta tisela vanhu va Xikwembu ntsako ni mikateko. Hikwalaho Davhida u yimbelerile: “Wa tsaka loyi [wena Yehovha] u n’wi hlawulaka, loyi u endlaka leswaku a tshinela, leswaku a ta tshama eswivaveni swa wena. Kunene hi ta enerisiwa hi vunene bya yindlu ya wena, ndhawu yo kwetsima ya tempele ya wena.”—Pisalema 65:4.

2 Davhida a nga pfumeleriwanga ku kongomisa ntirho wo aka yindlu ya Yehovha. Ku ri na sweswo, lunghelo rolero ri nyikiwe n’wana wa yena Solomoni. Davhida a nga vilelanga leswi lunghelo leri ri nyikiweke munhu un’wana kasi yena a a ri navela hi mbilu hinkwayo. Lexi a xi ri xa nkoka swinene eka yena a ku ri ku akiwa ka tempele. U seketele ntirho lowu hi mbilu hinkwayo hi ku nyika Solomoni mpfampfarhuto wa yona lowu a wu kumeke eka Yehovha. Ku tlula kwalaho, Davhida u hlele magidi ya Valevhi a ma ava hi mintlawa leswaku ma endla ntirho kutani a nyikela hi nsuku ni silivhere yo tala swinene leswaku ku ta akiwa tempele hi yona.—1 Tikronika 17:1, 4, 11, 12; 23:3-6; 28:11, 12; 29:1-5.

3. Malandza ya Xikwembu ma ni langutelo rihi malunghana ni malunghiselelo ya vugandzeri bya ntiyiso?

3 Vaisrayele vo tshembeka va seketele malunghiselelo lama endleriweke vugandzeri bya ntiyiso endlwini ya Xikwembu. Tanihi malandza ya namuntlha ya Yehovha, na hina hi seketela malunghiselelo yo gandzela exiphen’wini xa  laha misaveni xa nhlengeletano ya Yehovha. Hikwalaho hi kombisa leswaku hi ni langutelo leri fanaka ni ra Davhida. A hi na moya wo gungula. Ku ri na sweswo, hi anakanyisisa hi vunene bya nhlengeletano ya Xikwembu. Xana u tshame u anakanya hi swilo swo tala leswinene leswi hi nga swi tlangelaka hakunene? A hi kambisiseni swin’wana swa swona.

Ku Tlangela Lava Rhangelaka

4, 5. (a) “Hlonga ro tshembeka ni ro tlhariha” ri hetisisa ntirho wa rona hi ndlela yihi? (b) Timbhoni tin’wana ti titwe njhani hi swakudya swa moya leswi ti swi kumaka?

4 Hi ni swivangelo leswi twalaka swo tlangela “hlonga ro tshembeka ni ro tlhariha” leri vekiweke hi Yesu Kreste leswaku ri langutela swilo swa yena swa laha misaveni. Ntlawa wa hlonga lowu vumbiwaka hi Vakreste lava totiweke hi moya wa rhangela eku chumayeleni ka mahungu lamanene, wu hlela minhlangano ya vugandzeri wu tlhela wu kandziyisa tibuku leti sekeriweke eBibeleni hi tindzimi leti tlulaka 400. Vanhu va timiliyoni emisaveni hinkwayo va dya ‘swakudya leswi swa moya leswi fikaka hi nkarhi lowu faneleke’ va tsakile. (Matewu 24:45-47) Hakunene a ku na xivangelo xo gungula hi ntlawa lowu.

5 Mbhoni ya Yehovha leyi dyuhaleke leyi vuriwaka Elfi se yi ni malembe yo tala yi ri karhi yi kuma nchavelelo ni nseketelo hi ku tirhisa ndzayo leyi humaka eMatsalweni leyi kumekaka etibukwini ta ntlawa wa hlonga. Ku tlangela lokukulu ka Elfi ku n’wi susumetele ku tsala a ku: “A ndzi ta va yini handle ka nhlengeletano ya Yehovha?” Peter na Irmgard na vona se va ni makume ya malembe va ri malandza ya Xikwembu. Irmgard wa ti tlangela tibuku hinkwato leti kandziyisiwaka hi “nhlengeletano ya Yehovha leyi nga ni rirhandzu ni nkhathalelo.” Tibuku leti ti katsa leti endleriweke vanhu lava nga ni swilaveko swo hlawuleka, vo tanihi lava nga voniki kumbe lava nga twiki.

6, 7. (a) Xana mintirho leyi endliwaka emavandlheni lama nga le misaveni hinkwayo yi languteriwa njhani? (b) Van’wana va vule yini malunghana ni xiphemu xa laha misaveni xa nhlengeletano ya Yehovha?

6 ‘Hlonga ro tshembeka’ ri yimeriwa hi Huvo leyi Fumaka ya Timbhoni ta Yehovha, ku nga ntlawa lowutsongo wa vavanuna lava totiweke hi moya lava tirhaka eyindlu-nkulu ya Timbhoni ta Yehovha eBrooklyn, le New York. Huvo leyi Fumaka yi hlawula malandza ya Yehovha lama nga ni ntokoto leswaku ma tirha etihofisini ta marhavi leti langutelaka mintirho ya mavandlha lama tlulaka 98 000 emisaveni hinkwayo. Vavanuna lava fikelelaka swilaveko swa le Bibeleni va vekiwa ku va vakulu ni malandza ya vutirheli emavandlheni lawa. (1 Timotiya 3:1-9, 12, 13) Vakulu va rhangela va tlhela va wu risa hi rirhandzu ntlhambi wa Xikwembu lowu nga ehansi ka vulanguteri bya vona. Hakunene swa vuyerisa ku va xiphemu xa ntlhambi wolowo ni ku vona rirhandzu ni vun’we lebyi nga kona exikarhi  ka “nhlengeletano ya vamakwe[rhu] hinkwayo”!—1 Petro 2:17; 5:2, 3.

7 Ematshan’weni yo vilela, vanhu lava va kombisa ku tlangela nkongomiso wa moya wa rirhandzu lowu va wu kumaka eka vakulu. Hi xikombiso, anakanya hi Birgit, wansati la nga Mukreste la nga le malembeni ya va-30. Loko a ha ri n’wana wa kondlo-a-ndzi-dyi, a a ri ni vanghana vo biha naswona u lave ku wela exidyohweni. Kambe ndzayo leyi kongomeke leyi humaka eBibeleni leyi a yi kumeke eka vakulu ni nseketelo wa vapfumeri-kulobye swi n’wi phule exiyin’weni lexi a xi ta n’wi hoxa ekhombyeni. Xana Birgit u titwa njhani sweswi? U ri: “Ndza tsaka swinene hileswi ndza ha riki enhlengeletanweni leyi hlamarisaka ya Yehovha.” Jaha ra malembe ya 17 hi vukhale leri vuriwaka Andreas ri ri: “Leyi i nhlengeletano ya Yehovha hakunene, nhlengeletano leyinene ngopfu ku ti tlula hinkwato emisaveni.” Hi fanele hi xi tlangela swinene xiphemu xa laha misaveni xa nhlengeletano ya Yehovha.

Lava Rhangelaka A Va Hetisekanga

8, 9. Vanhu van’wana va le nkarhini wa Davhida va n’wi endle yini, kambe u angurise ku yini?

8 Ina, lava vekiweke leswaku va rhangela evugandzerini bya ntiyiso a va hetisekanga. Hinkwavo ka vona va swi endla swihoxo, naswona van’wana va karhatiwa hi ku tsana loku va tirhaka hi matimba leswaku va ku lawula. Xana leswi swi fanele swi hi khunguvanyisa? Doo! Ni vanhu lava a va ri ni vutihlamuleri lebyikulu le Israyele wa khale va endle swidyoho leswikulu. Hi xikombiso, loko Davhida a ha ri jaha u komberiwile leswaku a ya chayela Hosi Sawulo vuyimbeleri lebyi a byi ta n’wi verhamisa. Endzhakunyana, Sawulo u ringete ku dlaya Davhida, hiloko eku heteleleni Davhida a boheka ku baleka leswaku a ta ponisa vutomi bya yena.—1 Samuwele 16:14-23; 18:10-12; 19:18; 20:32, 33; 22:1-5.

9 Vaisrayele van’wana va ve ni vukanganyisi. Hi xikombiso, Yowabu ndhuna ya nyimpi ya Davhida u dlaye Abinere xaka ra Sawulo. Absalomu u endle xikungu xo wutla vuhosi bya tata wa yena Davhida. Ahitofele mutsundzuxi la tshembekaka wa Davhida u n’wi xengile. (2 Samuwele 3:22-30; 15:1-17, 31; 16:15, 21) Kambe, Davhida a nga hlundzukanga kutani a sungula ku vilela; kumbe a fularhela vugandzeri bya ntiyiso. Entiyisweni u angule hi ndlela leyi hambaneke. Davhida u susumeteriwe hi maxangu leswaku a namarhela Yehovha a tlhela a tshama a ri ni langutelo lerinene leri a a ri na rona loko a baleka Sawulo. Hi nkarhi wolowo Davhida u yimbelerile a ku: “Oho Xikwembu, ndzi kombe tintswalo, ndzi kombe tintswalo, hikuva moya-xiviri wa mina wu tumbele eka wena; naswona endzhutini wa timpapa ta wena, ndzi tumbele kona ku fikela loko maxangu ma hundza.”—Pisalema 57:1.

10, 11. Mukreste la vuriwaka Gertrud u humeleriwe hi yini loko a ha ri ntsongo, naswona u vule yini hi swihoxo swa vapfumeri-kulobye?

10 A hi na xivangelo xo vilela hi leswaku ku ni vukanganyisi enhlengeletanweni ya Xikwembu namuntlha. Yehovha kumbe tintsumi ta yena kumbe varisi va moya a va nge va pfumeleli vanhu lava kanganyisaka ni lava hombolokeke leswaku va hambeta va va swirho swa vandlha ra Vukreste. Nilokoswiritano, hinkwerhu hi langutane ni ku nga hetiseki ka hina swin’we ni ka malandza man’wana ya Xikwembu.

11 Loko Gertrud, la nga ni nkarhi wo leha a gandzela Yehovha a ha ri nhwana, u tshame a hehliwa hi leswaku i mukanganyisi naswona a hi muhuweleri wa Mfumo wa nkarhi hinkwawo. Xana u endle yini? Xana Gertrud u gungurile malunghana ni ndlela leyi a nga khomiwa hi yona? Doo! Emahlweninyana ka ku fa ka yena hi 2003 a ri ni malembe ya 91, u tsundzuke ta vutomi bya yena kutani a ku: “Swilo leswi ni swin’wana leswi humeleleke evuton’wini bya mina swi ndzi dyondzise leswaku ku nga khathariseki swihoxo leswi endliwaka hi vanhu, Yehovha u kongomisa ntirho wa yena wa nkoka, laha a tirhisaka hina vanhu lava nga hetisekangiki.” Loko a fanele a langutana ni swihoxo swa malandza man’wana ya Xikwembu, Gertrud u khongele hi mbilu hinkwayo eka Yehovha.

12. (a) Vakreste van’wana va lembe-xidzana ro sungula va veke xikombiso xihi xo biha? (b) Hi fanele hi anakanyisisa hi yini?

12 Tanihi leswi ni Vakreste lava tshembekaka swinene va tlhela va tinyiketela va nga hetisekangiki,  loko nandza la vekiweke a endla xihoxo, a hi hambeteni hi endla “swilo hinkwaswo [hi] nga gunguli.” (Vafilipiya 2:14) A swi ta khomisa tingana hakunene loko a ho landzela xikombiso xo biha xa vanhu va nga ri vangani va le vandlheni ra Vukreste ra lembe-xidzana ro sungula! Hi ku ya hi mudyondzisiwa Yudha, vadyondzisi va mavunwa va le nkarhini wolowo a va “honisa vuhosi naswona va tseketsela lava vangamaka.” Ku tlula kwalaho, vadyohi volavo a va ri “vagunguli, va vilela hi swiavelo swa vona evuton’wini.” (Yudha 8, 16) Onge hi nga fularhela ndlela leyi landzeleriweke hi vagunguli kutani hi anakanyisisa hi swilo leswinene leswi humaka eka ‘hlonga ro tshembeka.’ A hi tlangeleni vunene bya nhlengeletano ya Yehovha kutani hi “endla swilo hinkwaswo [hi] nga gunguli.”

“Mhaka Leyi Yi Tsema Nhlana”

13. Van’wana va angurise ku yini eka tidyondzo tin’wana ta Yesu Kreste?

13 Van’wana hi lembe-xidzana ro sungula a va gungula hi malandza lama vekiweke, kasi van’wana a va n’unun’uta hi tidyondzo ta Yesu. Hilaha swi tsariweke hakona eka Yohane 6:48-69, Yesu u te: “Loyi a dyaka nyama ya mina a tlhela a nwa ngati ya mina u ni vutomi lebyi nga heriki.” Loko va twa marito lawa, “vo tala va vadyondzisiwa vakwe . . . va ku: ‘Mhaka leyi yi tsema nhlana; i mani la nga yi yingisaka?’” Yesu a a swi xiya leswaku “vadyondzisiwa vakwe a va n’unun’uta hi leswi.” Ku tlula kwalaho, “hikwalaho ka sweswo vo tala va [vona] va tlhelela eka swilo swa le ndzhaku naswona va nga ha fambi na yena.” Kambe a hi vadyondzisiwa hinkwavo va n’unun’uteke. Xiya leswi humeleleke loko Yesu a vutisa vaapostola lava 12 a ku: “N’wina a mi swi lavi ku famba, a hi swona ke?” Muapostola Petro u hlamule a ku: “Hosi, xana hi ta ya eka mani? Hi wena u nga ni marito ya vutomi lebyi nga heriki; naswona hi khorwile ni ku tiva leswaku u Mukwetsimi wa Xikwembu.”

14, 15. (a) Ha yini vanhu va nga ri vangani va vilerisiwa hi timhaka tin’wana ta tidyondzo ta Vukreste? (b) Hi nga dyondza yini emhakeni ya wanuna la vuriwaka Emanuel?

14 Eminkarhini ya manguva lawa, vanhu va nga ri vangani exikarhi ka vanhu va Xikwembu va vilerisiwe hi timhaka tin’wana ta tidyondzo ta Vukreste naswona va gungule hi xiphemu xa laha misaveni xa nhlengeletano ya Yehovha. Leswi swi vangiwa hi yini? Ku gungula koloko hakanyingi ku vangiwa hi ku nga yi twisisi kahle ndlela leyi Xikwembu xi endlaka swilo ha yona. Muvumbi u paluxela vanhu va yena ntiyiso hakatsongo-tsongo. Hikwalaho, ndlela leyi hi ma twisisaka ha yona Matsalwa minkarhi yin’wana yi lava ku lulamisiwa. Vanhu vo tala va Yehovha va tsaka loko ku endliwa mindzulamiso yoleyo. Va nga ri vangani va “lulam[e] ku tlula mpimo” kutani va nyangatsiwa hi mindzulamiso yoleyo. (Eklesiasta 7:16) Van’wana va nga ha va va tikukumuxa, kasi van’wana va phasiwa hi ku tianakanyela swa vona. Ku nga khathariseki leswaku xivangelo xa kona hi xihi, ku gungula ko tano ku ni khombo, hikuva ku nga hi endla hi tlhelela emisaveni ni le tindleleni ta yona.

15 Hi xikombiso, Emanuel a a ri Mbhoni leyi a yi xopa-xopa leswi a yi swi hlaya etibukwini ta “hlonga ro tshembeka ni ro tlhariha.” (Matewu 24:45) U tshike ku hlaya tibuku ta hina ta Vukreste ivi eku heteleleni a byela vakulu va vandlha ra ka vona leswaku a a nga ha swi lavi ku ya emahlweni a ri Mbhoni ya Yehovha. Hambiswiritano, swi nga si ya kule Emanuel u swi xiyile leswaku tidyondzo ta nhlengeletano ya Yehovha a ti ri ntiyiso hakunene. U vulavurisane ni Timbhoni, a pfumela xihoxo xa yena kutani a vuyiseriwa ku va Mbhoni ya Yehovha. Hikwalaho, u tlhele a va wanuna la tsakeke.

16. I yini lexi nga hi pfunaka ku herisa ku kanakana tidyondzo to karhi ta Vukreste?

16 Ku vuriwa yini loko tidyondzo tin’wana ta nhlengeletano ya Yehovha ti hi kanakanisa lerova hi lava ku vilela? Hikwalaho a hi fanelanga hi hela mbilu. ‘Hlonga ro tshembeka’ ri nga ha hetelela ri vulavule hi mhaka leyi hlamulaka swivutiso swa hina kutani ku kanakana ka hina ku suka. I vutlhari ku lava mpfuno wa vakulu lava nga Vakreste. (Yudha 22, 23) Xikhongelo, dyondzo ya munhu hi yexe ni ku hlangana ni vapfumeri-kulorhi lava rhangisaka timhaka ta moya na swona swi nga hi pfuna ku susa ku kanakana kutani swi kurisa ku tlangela ka hina ntiyiso wa  le Bibeleni lowu tiyisaka ripfumelo lowu hi wu dyondzeke eka ndlela leyi Yehovha a yi tirhisaka ku vulavurisana ni vanhu.

Tshama U Ri Ni Langutelo Lerinene

17, 18. Ematshan’weni yo vilela, hi fanele hi va ni langutelo rihi, naswona ha yini?

17 Ina, vanhu lava nga hetisekangiki va tswariwe va ri ni mboyamelo wo dyoha, naswona van’wana va nga ha va va voyamele swinene eku vileleni hi swilo leswi nga twaliki. (Genesa 8:21; Varhoma 5:12) Kambe loko ho titoloveta ku tshamela ku vilela, hi ta va hi veka vuxaka bya hina na Yehovha Xikwembu ekhombyeni. Hikwalaho, hi fanele hi lawula mboyamelo wihi ni wihi wo vilela lowu hi nga vaka na wona.

18 Ematshan’weni yo vilela hi swilo swo karhi evandlheni, hi fanele hi hlayisa langutelo lerinene kutani hi tshama hi khomekile, hi tsakile, hi ri ni mahanyelo ya xichavo, hi ringanisela swilo hi tlhela hi hanya eripfumelweni. (1 Vakorinto 15:58; Tito 2:1-5) Yehovha u lawula swilo hinkwaswo leswi nga enhlengeletanweni ya yena, naswona Yesu wa swi xiya leswi endlekaka evandlheni rin’wana ni rin’wana, hilaha a endleke hakona hi lembe-xidzana ro sungula. (Nhlavutelo 1:10, 11) Hi ku lehisa mbilu, rindzela Xikwembu na Kreste, Nhloko ya vandlha. Ku nga ha tirhisiwa varisi lava nga ni vutihlamuleri leswaku va lulamisa timhaka leti nga ha lavaka ku lulamisiwa.—Pisalema 43:5; Vakolosa 1:18; Tito 1:5.

19. Hi fanele hi langutisisa yini loko ha ha rindzele leswaku Mfumo wu lawula timhaka hinkwato ta vanhu?

19 Ku nga ri khale fambiselo leri ro homboloka ra swilo ri ta lovisiwa, naswona Mfumo wa Mesiya hi wona wu nga ta lawula timhaka hinkwato ta vanhu. Hakunene i swa nkoka leswaku un’wana ni un’wana wa hina a tshama a ri ni langutelo lerinene kukondza nkarhi wolowo wu fika! Leswi swi ta hi pfuna leswaku hi xiya timfanelo letinene ta vapfumeri-kulorhi, ematshan’weni yo languta swihoxo swa vona. Loko hi langutisisa swilo leswinene eka vumunhu bya vona swi ta hi endla hi tsaka. Xisweswo, ematshan’weni yo karharisiwa hi ku vilela, hi ta khutazeka hi tlhela hi akeka hi tlhelo ra moya.

20. Langutelo lerinene ri ta endla leswaku hi tiphina hi mikateko yihi?

20 Langutelo lerinene ri ta tlhela ri hi pfuna leswaku hi tsundzuka mikateko yo tala leyi hi nga na yona hikwalaho ka leswi hi tihlanganisaka ni xiphemu xa laha misaveni xa nhlengeletano ya Yehovha. Leyi hi yona ntsena nhlengeletano emisaveni leyi tshembekaka eka Hosi ya vuako hinkwabyo. U titwa njhani hi mhaka yoleyo na hi lunghelo ro hlanganyela eku gandzeleni ka Xikwembu xi ri xin’we xa ntiyiso, Yehovha? Onge u nga va ni langutelo leri fanaka ni ra Davhida, la yimbeleleke a ku: “Oho Mutwi wa xikhongelo, vanhu hinkwavo va ta ta eka wena. Wa tsaka loyi u n’wi hlawulaka, loyi u endlaka leswaku a tshinela, leswaku a ta tshama eswivaveni swa wena. Kunene hi ta enerisiwa hi vunene bya yindlu ya wena.”—Pisalema 65:2, 4.

Wa Tsundzuka Xana?

• Ha yini hi fanele hi va tlangela swinene lava rhangelaka evandlheni?

• Hi fanele hi angurisa ku yini loko vamakwerhu lava nga ni vutihlamuleri va endla swihoxo?

• Hi fanele hi yi teka njhani mindzulamiso leyi vaka kona yo twisisa Matsalwa?

• I yini lexi nga pfunaka Mukreste leswaku a hlula ku kanakana?

[Swivutiso Swa Dyondzo]

[Xifaniso lexi nga eka tluka 20]

Davhida u nyike Solomoni pulani ya tempele kutani a seketela vugandzeri bya ntiyiso hi mbilu hinkwayo

[Xifaniso lexi nga eka tluka 23]

Vakulu lava nga Vakreste va nyikela mpfuno hi tlhelo ra moya va tsakile