Nghena endzeni

Hundzela eka leswi nga endzeni

Va Tsakela Ku Endla Ku Rhandza Ka Xikwembu

Va Tsakela Ku Endla Ku Rhandza Ka Xikwembu

 Va Tsakela Ku Endla Ku Rhandza Ka Xikwembu

YESU u vekele Vakreste hinkwavo xikombiso loko a khongela eka Tata wakwe a ku: “Ku nga endleki ku rhandza ka mina, kambe a ku endleke ka wena.” (Luka 22:42) Marito wolawo yo titsongahatela ku yingisa Yehovha ma vuriwa ni hi timiliyoni ta malandza ya Xikwembu namuntlha. Lava nga exikarhi ka wona i swichudeni swa 52 swa ntlawa wa vu-120 wa Xikolo xa Bibele xa Giliyadi xa Watchtower. Hi March 11, 2006, ntlawa lowu wa mathwasana a wu swi langutele hi ntsako ku endla ku rhandza ka Xikwembu ematikweni yo hambana-hambana, hambi ku ri laha swiyimo swa kona swi tikaka.

I yini leswi susumetelaka swichudeni sweswo ku pfumelela ku rhandza ka Yehovha ku kongomisa vutomi bya swona? Chris na Leslie, ku nga mpatswa lowu averiweke ku ya va varhumiwa eBolivia, va ri: “Tanihi leswi hi tshikeke ku endla leswi a hi ta rhandza ku swi endla, hi lava ku tinyiketela ku endla xin’wana ni xin’wana lexi fambisanaka ni nhlengeletano ya Yehovha.” (Marka 8:34) Jason na Chere, lava averiweke ku ya eAlbania, va engeterile va ku: “Xiavelo xin’wana ni xin’wana lexi hi nga tshama hi xi kuma enhlengeletanweni ya Yehovha a xi nga olovi. Hambiswiritano, hi kume leswaku Yehovha swa n’wi fanela leswaku hi n’wi tshemba hi ku helela.”

Xikhutazo Xo Endla Ku Rhandza Ka Yehovha

George Smith, xirho xa ndyangu wa Bethele loyi a tirhaka eNdzawulweni ya Swifaniso, u pfule nongonoko hi xikhongelo. Stephen Lett, xirho xa Huvo leyi Fumaka ya Timbhoni ta Yehovha tlhelo mutshama-xitulu wa nongonoko wa lava thwasaka, u amukele hinkwavo lava a va ri kona. Vapfhumba lava humaka ematikweni ya 23 va teke riendzo va ya eNtsindza wa Dyondzo wa Watchtower le Patterson, eNew York, leswaku va ta va kona eka nkhuvo lowu wo tsakisa. Makwerhu Lett u byele mathwasana leswaku ma ta hetisisa “nchumu wa matimba swinene.” U vulavule hi “swilo leswi simekiweke swi tiya”—swo fana ni tidyondzo ta mavunwa—leswi varhumiwa lavantshwa a va ta swi wisa hi matimba ya Matsalwa. (2 Vakorinto 10:4, 5) U gimete hi ku: “Mayana ntsako lowu mi nga ta wu kuma hi ku tirhisiwa hi Yehovha leswaku mi wisa swilo leswi simekiweke swi tiya swinene eka vanhu va timbilu letinene, eswiavelweni swa n’wina!”

Harold Jackson, xirho xa yindlu-nkulu u vulavule hi nhloko-mhaka leyi nge, “Swilo Swi Nga Ri Swingani Leswi Mi Faneleke Ku Swi Tsundzuka.” U vule leswaku varhumiwa lavantshwa a va fanelanga va rivala ku ‘lava mfumo ni ku lulama ka Xikwembu ku sungula.’ (Matewu 6:33) Va fanele va tsundzuka leswaku “rirhandzu ra aka” naswona loko u ri na rona u ta humelela eka hinkwaswo. (1 Vakorinto 8:1) U te: “Rirhandzu a ku ve rona ri lawulaka vuxaka bya n’wina ni vanhu van’wana.”

Geoffrey Jackson, xirho xa Huvo leyi Fumaka loyi a a ri murhumiwa ku sukela hi 1979 ku fikela hi 2003, u vutise mathwasana a ku: “Xana U Hetisisa Vutihlamuleri Lebyi Languteriweke Eka Wena?” U kandziyise xilaveko xo va ni langutelo  lerinene hi wena n’wini ni hi ntirho wa nsimu. Vakreste va ni vutihlamuleri byo tirha hi matimba eku byaleni ni le ku cheleteni ka timbewu ta ntiyiso. Hambiswiritano, ku kurisa swilo hi tlhelo ra moya i vutihlamuleri bya Yehovha, tanihi leswi ku nga “Xikwembu lexi xi swi kurisaka.” (1 Vakorinto 3:6-9) Makwerhu Jackson u engeterile: “Yehovha u langutele leswaku u tshama u tiyile hi tlhelo ra moya. Kambe vutihlamuleri bya wena lebyikulu hi byihi? I ku rhandza Yehovha ni ku rhandza vanhu lava u nga ta va chumayela.”

Muleteri wa le Giliyadi, Lawrence Bowen, u tlhuvutse nhloko-mhaka leyi nge, “Tiva Ndlela Leyi U Faneleke U Tikhoma Ha Yona.” U tsundzuxe swichudeni leswaku Yehovha u kongomise Vaisrayele ni ku va sirhelela hi singita emananga. (Eksoda 13:21, 22) Wa hi kongomisa ni ku hi sirhelela namuntlha hi ku tirhisa vandlha ra Vakreste lava totiweke lava nga “phuphu tlhelo xiseketelo xa ntiyiso.” (1 Timotiya 3:14, 15) Varhumiwa lavantshwa va fanele va yimela ntiyiso lowu kongomisaka ni ku sirhelela lava titsongahataka.

 Wallace Liverance, muleteri un’wana wa le Giliyadi, u khutaze mathwasana leswaku ma nga rivali rito ra Xikwembu leri nga “endzhaku” ka wona. Rito ra Xikwembu ri le ndzhaku ka hina, hikuva Bibele yi hetiwe ku tsariwa eka malembe-xidzana lama hundzeke. Ku fana ni murisi loyi a vitanaka ntlhambi wa tinyimpfu a ri endzhaku ka wona, Yehovha u le ndzhaku ka vanhu va yena, a va nyika nkongomiso hi ku tirhisa “hlonga ro tshembeka ni ro tlhariha.” (Esaya 30:21; Matewu 24:45-47) Xikolo xa Giliyadi xi pfune mathwasana leswaku ma wu tlangela swinene ntlawa lowu wa hlonga. Nakambe “hlonga” leri ri humese Vuhundzuluxeri Bya Misava Leyintshwa Bya Matsalwa Yo Kwetsima. Xivulavuri xi khutaze swichudeni leswi xi ku: “Tekani xihlovo lexi xa rungula ra risima, mi ya dyondzisa van’wana ha xona.”—Matewu 13:52.

Ku Endla Ku Rhandza Ka Yehovha eNsin’wini

Eka nhloko-mhaka leyi a yi ku, “Ku Va Ni Mapfundza Yo Vula Mahungu Lamanene,” Mark Noumair loyi a nga muleteri eGiliyadi u kandziyise mintokoto yin’wana leyi mathwasana ma yi tsakeleke ensin’wini loko ma ha ri eXikolweni xa Giliyadi. (Varhoma 1:15) Mimbulavurisano leyi veke kona ni mathwasana yi paluxe leswaku hakunene ma kombise mapfundza lamakulu yo chumayela minkarhi hinkwayo.

Nakambe mathwasana ma khutaziwe hi Kenneth Flodin loko a vulavurisana ni valanguteri vanharhu lava endzelaka mavandlha lava sweswi va tirhaka eUnited States. Richard Keller na Alejandro Lacayo, lava khale a va tirha eAmerika Dzonga ni le Amerika Xikarhi, va hlamusele ndlela leyi va langutaneke ni miringo yo hambana-hambana ha yona naswona va hlamusele mikateko yin’wana leyi va yi kumeke loko va ha ri varhumiwa. Moacir Felisbino u tsundzuka vuleteri lebyi a byi kumeke loko a ri karhi a tirha ni varhumiwa eBrazil, laha a kuleleke kona.

Varhumiwa vanharhu lava nga ni ntokoto, Robert Jones, Woodworth Mills na Christopher Slay, va vulavurisane na David Schafer. Vamakwerhu lava vanharhu va hlamusele ndlela leyi va dyondzeke ha yona ku tshembela eka Yehovha loko va langutane ni swiyimo swo tika. Va tiyisekise swichudeni leswi leswaku ndzetelo lowu swi wu kumeke enhlengeletanweni ya Yehovha wu swi hlomisele ku ya eswiavelweni swa swona tanihi varhumiwa. Makwerhu Mills u katsakanye hi ndlela leyi: “Vutivi lebyi ndzi byi kumeke eGiliyadi byi ndzi pfunile hi ndlela yo karhi, kambe leswi xikolo xi ndzi dyondziseke swona hi ku titsongahata ni ku va ni rirhandzu hi swona swi ndzi pfuneke ngopfu.”

Guy Pierce loyi a nga xirho xa Huvo leyi Fumaka u nyikele nkulumo-nkulu leyi nge, “Yehovha A Nge Tsandzeki.” Adamu u tsandzekile, kambe, xana sweswo swi vula ku tsandzeka ka Xikwembu? Xana Xikwembu xi tsandzekile ku vumba Adamu a hetisekile, hilaha vanhu van’wana va vulaka hakona? Nikatsongo, hikuva “Xikwembu xa ntiyiso xi endle vanhu va va vo lulama.” (Eklesiasta 7:29) Ndlela leyi Yesu a tshembekeke ha yona loko a ri ehansi ka ndzingo lowukulu emisaveni yi kombise leswaku “Adamu a ri hava xivangelo xo tsandzeka,” ku vula xivulavuri. Ndzingo wa vutshembeki bya Adamu entangeni wa Edeni a wu nga tiki loko wu ringanisiwa ni lowu Yesu a wu hluleke. Kambe Adamu u tsandzekile. Nilokoswiritano, Yehovha a nge tsandzeki. Xikongomelo xa yena xi ta hetiseka. (Esaya 55:11) Makwerhu Pierce u byele varhumiwa lavantshwa a ku: “Mi ni lunghelo ro dzunisa Yehovha hi moya wa n’wina wo tinyiketela. Onge Yehovha a nga va ni un’wana ni un’wana wa n’wina laha mi nga ta ya kona tanihi varhumiwa.”

Endzhaku ka loko mutshama-xitulu, Makwerhu Lett, a hundzise marungula yo huma emarhavini yo hambana-hambana ya Timbhoni ta Yehovha, u nyike mathwasana tidiploma ni ku ma tivisa lomu ma averiweke ku ya kona. Vernon Wisegarver, loyi ku nga khale a ri xirho xa ndyangu wa Bethele, u pfale hi xikhongelo.

Vanhu va 6 872, lava a va ri kona va pfumerile leswaku nongonoko wa ku thwasa wu va nyike matimba ya ku hambeta va hisekela ku endla ku rhandza ka Xikwembu. (Pisalema 40:8) Van’wana va mathwasana, ku nga Andrew na Anna, va te: “Hi tinyiketele eka Yehovha. Hi tshembise Yehovha leswaku hi ta endla xin’wana ni xin’wana lexi a xi kombelaka eka hina. Sweswi Yehovha u hi kombele leswaku hi ya le Cameroon, eAfrika.” Vona ni van’wana va ntlawa lowu thwasaka va ni mapfundza yo nghenela ntirho lowu nga ta va enerisa. Ina, va tsakela ku endla ku rhandza ka Xikwembu.

[Bokisi leri nga eka tluka 17]

TINHLAYO TA NTLAWA

Nhlayo ya matiko lawa va humaka eka wona: 6

Nhlayo ya matiko lawa va averiweke eka wona: 20

Nhlayo ya swichudeni: 52

Xiringaniso xa malembe: 35,7

Xiringaniso xa malembe entiyisweni: 18,3

Xiringaniso xa malembe evutirhelini bya nkarhi hinkwawo: 14,5

[Xifaniso lexi nga eka tluka 18]

Ntlawa Wa Vu-120 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.