Nghena endzeni

Hundzela eka leswi nga endzeni

U Nga Chavi—Yehovha U Na Wena!

U Nga Chavi—Yehovha U Na Wena!

 U Nga Chavi—Yehovha U Na Wena!

KU TLULA malembe ya 50 lama hundzeke, endzhakunyana ko buluka ka tibomo to sungula ta nyutliya, Harold C. Urey mutivi wa sayense loyi a kumeke Sagwadi ra Nobel u vule leswi landzelaka malunghana ni vumundzuku: “Hi ta dya hi ri karhi hi chava, hi etlela hi ri karhi hi chava, hi hanya hi ri eku chaveni ivi hi fa hi ri karhi hi chava.” Hakunene, misava ya hina namuntlha yi funengetiwe hi ku chava, naswona a swi hlamarisi! Siku rin’wana ni rin’wana maphepha-hungu ma vika timhaka leti tsemaka nhlana ta vutherorisi, vugevenga ni mavabyi lama hlamarisaka.

Leswi hi nga Vakreste ha swi tiva leswi swiyimo swo tano swi vulaka swona. Swi kombisa leswaku hi hanya “emasikwini yo hetelela” ya mafambiselo lawa yo biha, lawa Bibele yi profeteke leswaku a ma ta funghiwa hi “minkarhi ya mangava leyi swi nonon’hwaka ku langutana na yona.” (2 Timotiya 3:1) Xisweswo ha tiyiseka swinene leswaku ku nga ri khale Yehovha Xikwembu u ta tisa misava leyintshwa leyi ku nga ta va ni ku lulama eka yona. (2 Petro 3:13) Kambe, xana ku chava loku nga kona namuntlha a ku hi khumbi hina Vakreste?

Langutelo Ra Malandza Ya Xikwembu Hi Ku Chava

Yakobe, Davhida na Eliya i van’wana va malandza ya Yehovha lawa ma langutaneke ni ku chava loko ma ri eswiyin’weni leswi nga ni khombo. (Genesa 32:6, 7; 1 Samuwele 21:11, 12; 1 Tihosi 19:2, 3) Vavanuna lava a va nga kayiveli ripfumelo. Ku hambana ni sweswo, va kombise leswaku va titshega hi Yehovha hi ku helela. Nilokoswiritano, Yakobe, Davhida na Eliya a va ri vanhu va nyama; hikokwalaho na vona a va khumbiwa hi ku chava. Mudyondzisiwa Yakobo u tsale a ku: “Eliya a a ri munhu la nga ni mintlhaveko yo fana ni ya hina.”—Yakobo 5:17.

Na hina hi nga titwa hi chava loko hi langutana ni xihinga sweswi kumbe enkarhini lowu taka. Ku chava ko tano ka twisiseka. Phela, Bibele yi vula leswaku Sathana Diyavulosi u tiyimisele ku “lwa nyimpi” ni lava va “hlayisaka swileriso swa Xikwembu naswona va nga ni ntirho wa ku nyikela vumbhoni mayelana na Yesu.” (Nhlavutelo 12:17) Hambileswi marito wolawo ma tirhaka hi ku kongoma eka Vakreste lava totiweke, kambe Pawulo u tsarile: “Hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.” (2 Timotiya 3:12) Hambiswiritano, a hi fanelanga hi khomiwa hi rhumbyana loko hi langutane ni swiphiqo. Ha yini?

‘Xikwembu Xa Swiendlo Swa Ku Ponisa’

Mupisalema Davhida u tsarile a ku: “Xikwembu xa ntiyiso i Xikwembu xa swiendlo swa ku hi ponisa.” (Pisalema 68:20) Hi ku phindha-phindha Yehovha u kombise vuswikoti bya yena bya ku ponisa vanhu vakwe, hi ku va kutsula eswiyin’weni swa khombo kumbe hi ku va nyika matimba leswaku va tiyisela. (Pisalema 34:17; Daniyele 6:22; 1 Vakorinto 10:13) Eka dyondzo ya wena ya Bibele, i ‘swiendlo swingani swa ku ponisa’ leswi u swi tsundzukaka?

Ha yini u nga endli ndzavisiso eka Watch Tower Publications Index, * malunghana ni swiendlakalo swa xiviri swo tanihi xa Ndhambi ya misava hinkwayo ya le sikwini ra Nowa, ku kutsuriwa ka Lota ni vana vakwe va vanhwanyana eSodoma na Gomora, ku Kutsuriwa ka Vaisrayele aEgipta ni ku tsemakanya ka vona Lwandle ro Tshwuka, kumbe ku tsandzeka ka rhengu ra Hamani ro herisa Vayuda? Ku hlaya ni ku anakanyisisa hi swiendlakalo leswi, leswi tsakisaka swi ta tiyisa ripfumelo ra wena emhakeni ya leswaku Yehovha i Xikwembu xa swiendlo swa ku ponisa. Ku engetela kwalaho, sweswo swi ta tlhela swi ku pfuna leswaku u langutana ni miringo ya ripfumelo ra wena handle ko chava.

Swikombiso Swa Manguva Lawa

Xana va kona vanhu va manguva lawa lava vekeke xikombiso lexinene xo tiyisela endhawini ya ka n’wina? Ku nga ha va un’wana loyi a pfaleriweke  ekhotsweni hikwalaho ko tshembeka eka Xikwembu. Swi nga endleka u tiva Mukreste un’wana la dyuhaleke loyi a tirhelaka Yehovha hambileswi rihanyo ra yena ri tsaneke. Kumbe anakanya hi vantshwa lava tihambaniseke ni misava ku nga khathariseki mintshikilelo ya matimba ya vadyondzi-kulobye. Kumbe anakanya hi vatswari lava nga voxe, lava kurisaka vana va nga ri na munghana wa vukati, kumbe vanhu lava nga si cataka, lava tirhelaka Yehovha ku nga khathariseki xivundza lexi va nga na xona. Xana u dyondza yini eka vanhu vo tano? Ku anakanyisisa hi tindlela ta vona to tshembeka swi nga ku pfuna leswaku u tiyisela ni ku tshama u ri ni xivindzi, ku nga khathariseki ndzingo wun’wana ni wun’wana lowu u langutaneke na wona.

Ku va ni xivindzi a swi laveki ntsena loko hi langutane ni nkaneto ni nxaniso kambe swi laveka niloko hi sungula ku tivutisa loko Yehovha a hi rhandza hakunene. Hi fanele hi hlakulela ntshembo wa leswaku nkutsulo wa Kreste wu tirha eka un’wana ni un’wana wa hina. (Vagalatiya 2:20) Kutani hi nga tshinela eka Yehovha hi nga chavi. Loko hi titwa onge Yehovha a nga hi rhandzi, hi nga anakanyisisa hi marito lawa Yesu a ma byeleke valandzeri vakwe a ku: “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: mi ni risima ku tlula swindzingiri swo tala.”—Matewu 10:29-31.

Timagazini ta Xihondzo xo Rindza ni Xalamuka! hakanyingi ti kandziyisa mintokoto ya Timbhoni ta Yehovha ta manguva lawa leti hlangavetaneke ni swiyimo swo tika handle ko chava. Sweswo a swi vuli swona leswaku a ti nga khumbeki hi swiyimo swa tona leswi nga tsakisiki. Kambe sweswo a ti swi pfumelelanga swi ti tshikisa ku tirhela Yehovha. Mintokoto ya tona leyi kandziyisiweke yi nga ku pfuna na wena leswaku u tiyisela handle ko chava. Xiya swikombiso swimbirhi.

Ku Vaviseka Ku Cince Vutomi Bya Yena

Nkandziyiso wa Xalamuka! ya May 8, 2003, wu ni xihloko lexi nge, “Ndlela Leyi Ku Vaviseka Ku Cinceke Vutomi Bya Mina Ha Yona.” Eka xona, Stanley Ombeva loyi a nga Mbhoni ya Yehovha eKenya, u boxa mintlhontlho leyi a langutaneke na yona hikwalaho ko tlumbiwa hi movha lowu a wu famba hi rivilo lerikulu. Leswi rihanyo ra yena a ri tsana, u heleriwe hi ntirho na hi malunghelo ya mpfuno wa timali. Makwerhu Ombeva wa pfumela: “Loko ndzi ri karhi ndzi vona ku biha ka xiyimo lexi ndzi nga eka xona, ndzi sungule ku heleriwa hi ntshembo, ndzi tshamela ku tiputa vusiwana naswona a ndzi nyangatseka hi ku olova. Minkarhi yin’wana a ndzi bava ndzi khalakhasa.” Ku nga khathariseki maxangu lawa, wanuna loyi wa Mukreste u ve ni xivindzi a nga chavi. A nga ku pfumelelanga ku hela matimba ku n’wi tshikilela lerova a namba a khondla mavoko. Ematshan’weni ya sweswo, u titshege hi Yehovha. Makwerhu Ombeva u ri: “Minkarhi hinkwayo a a ndzi seketela eka swiyimo swo tika leswi a ndzi langutana na swona, lerova minkarhi yin’wana a ndzi khomiwa hi tingana. Ndzi endle xiboho xo hamba ndzi hlaya ni ku anakanyisisa hi matsalwa lawa ndzi tivaka leswaku ma chavelela eka xiyimo lexi ndzi nga eka xona.”

Marito lama nga erivaleni ya Makwerhu Ombeva ma pfune vo tala leswaku va tiyisela maxangu va nga chavi. Makwerhu un’wana wa xisati u tsarile: “A ndzi xiririka mihloti loko ndzi hlaya xihloko lexi. Ndzi vone leswaku Yehovha u tirhise xihloko lexi ku kombisa nkhathalelo wa yena ni rirhandzu leswaku a ndzi chavelela.” Mbhoni yin’wana yi tsarile: “Swihloko swo fana ni lexi swa hi khutaza swinene hina lava hi langutaneke ni swiyimo leswi fanaka tanihi leswi hi xanisekaka hi lo whii.”

Ku Langutana Ni Gome

Ntokoto wun’wana lowu khutazaka i wa Herbert Jennings, lowu hlamuseriweke exihlokweni lexi nge, “A Mi Swi Tivi Leswaku Vutomi Bya N’wina  Byi Ta Va Yini Mundzuku.” * Makwerhu Jennings a a ri ni swipfukela. Loko a tsundzuka hi ta masiku yo sungula ya vuvabyi byakwe, u ri: “A swi tika swinene ku ya eminhlanganweni ya Vukreste. Hambiswiritano, a ndzi khorwiseke hi ku helela hi nkoka wa xinakulobye xa vumakwerhu xa moya. Leswaku ndzi langutana ni xiphiqo lexi, a ndzi tala ku nghena eHolweni ya Mfumo endzhaku ka ku va ntshungu se wu tshamisekile naswona a ndzi huma emahlweni ko va wu sungula ku hangalaka emakumu ka minhlangano.”

Ni ku chumayela a swi tika. Makwerhu Jennings u ri: “Nkarhi wun’wana, hambi loko se ndzi fikile emutini, a ndzi nga vi na xona xivindzi xo gongondza. Hambiswiritano, a ndzi nga tshiki hikuva ndza swi tiva leswaku vutirheli bya hina byi vula ku ponisiwa ka hina ni ka lava va hi yingisaka. (1 Timotiya 4:16) Endzhaku ka nkarhi, a ndzi vuyela exiyin’weni lexinene, kutani ndzi ya endlwini leyi landzelaka ivi ndzi ringeta nakambe. Hi ku hambeta ndzi hlanganyela entirhweni wa nsimu, ndzi tihlayise ndzi hanya hi tlhelo ra moya naswona sweswo swi antswise vuswikoti bya mina byo langutana ni vuvabyi bya mina.”

Rungula leri kongomeke ra Makwerhu Jennings ri pfune vahlayi vo tala leswaku na vona va langutana ni gome ra vona va nga chavi. Hi xikombiso, Mukreste un’wana wa xisati u tsarile: “Se ku hundze malembe ya 28 ndzi hlaya timagazini ta Xihondzo xo Rindza na Xalamuka!, kambe a ndzi nga si tshama ndzi khumbeka hi ndlela leyi ndzi khumbekeke ha yona loko ndzi hlaya xihloko lexi. Ndzi boheke ku tshika vutirheli bya mina bya nkarhi hinkwawo naswona ndzi titwe nandzu swinene, ndzi ehleketa leswaku loko ingi a ndzi ri ni ripfumelo leri tiyeke a ndzi ta va ndzi nga tshikanga. Loko ndzi hlaya hi ndlela leyi Makwerhu Jennings a bohekeke ha yona ku tshika xiavelo leswaku a khathalela vuvabyi bya yena swi ndzi pfunile leswaku ndzi va ni langutelo lerinene hi xiyimo xa mina. Kunene ndzi kume nhlamulo ya swikhongelo swa mina!”

Makwerhu un’wana na yena u tsarile: “Endzhaku ko va nkulu evandlheni ku ringana malembe ya khume, ndzi boheke ku tshika lunghelo ra mina hikwalaho ka vuvabyi bya miehleketo. A ndzi titwa ndzi ri mutsandzeki lerova minkarhi yo tala a swi ndzi heta matimba ku hlaya swihloko leswi vulavulaka hi mhaka ya vutomi, leswi hakanyingi swi vulavulaka hi swilo swo hlamarisa leswi vanhu va Yehovha va koteke ku swi endla. Kambe ku tiyisela ka Makwerhu Jennings ku ndzi khutaze ngopfu. Ndzi hlaye xihloko lexi minkarhi yo tala.”

Ku Ya eMahlweni Hi Ku Tiyiseka

Ku fana na Makwerhu Ombeva na Jennings, Timbhoni ta Yehovha to tala ti ya emahlweni ti gandzela Yehovha Xikwembu handle ko chava, ku nga khathariseki swihinga swo tika. Loko swi ri tano ha wena, wa bumabumeriwa swinene. Tiyiseka hi leswi: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona, hileswi mi tirheleke vakwetsimi naswona ma ha ya emahlweni mi va tirhela.”—Vaheveru 6:10.

Leswi Yehovha a pfuneke vanhu va yena vo tshembeka va le minkarhini ya khale leswaku va hlula valala va vona, a nga ku pfuna na wena leswaku u hlula xihinga xin’wana ni xin’wana lexi u nga hlangavetanaka na xona. Hikwalaho tsundzuka marito lawa Yehovha a ma vuleke hi ku tirhisa muprofeta Esaya a ku: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.”—Esaya 41:10.

[Tinhlamuselo ta le hansi]

^ par. 9 Yi kandziyisiwe hi Timbhoni ta Yehovha.

^ par. 18 Vona Xihondzo xo Rindza xa December 1, 2000, matluka 24-8.

[Swifaniso leswi nga eka tluka 16]

Ku fana na Stanley Ombeva (laha ehenhla) na Herbert Jennings (exineneni), vo tala va tirhela Yehovha handle ko chava

[Laha Xifaniso Xi Humaka Kona eka tluka 14]

USAF photo