Nghena endzeni

Hundzela eka leswi nga endzeni

Vukongomisi Lebyi Nga Ta Hetisisa Xikongomelo Xa Xikwembu

Vukongomisi Lebyi Nga Ta Hetisisa Xikongomelo Xa Xikwembu

 Vukongomisi Lebyi Nga Ta Hetisisa Xikongomelo Xa Xikwembu

“[Xikwembu xi endla] swilo hinkwaswo hi ku landza ndlela leyi ku rhandza ka xona ku kongomisaka ha yona.”—VAEFESA 1:11.

1. Mavandlha hinkwawo ya Timbhoni ta Yehovha ma ta hlengeletana ma endla yini hi April 12, 2006?

HI Ravunharhu nimadyambu, April 12, 2006, vanhu va kwalomu ka 16 wa timiliyoni va ta hlengeletana leswaku va tlangela Xilalelo xa Hosi. Kun’wana ni kun’wana laha va nga ta hlengeletana kona, ku ta va ku ri ni tafula leri nga ni xinkwa lexi nga riki na comela, lexi yimelaka miri wa Kreste, ni vhinyo yo tshwuka, leyi yimelaka ngati yakwe leyi halatiweke. Loko nkulumo leyi hlamuselaka leswaku Xitsundzuxo xa rifu ra Yesu xi vula yini yi ri kusuhi ni ku hela, swifanekiselo leswi swi ta fambiseriwa hinkwavo lava nga ta va va ri kona kwalaho—ku ta sunguriwa hi xinkwa ivi ku landzela vhinyo. Emavandlheni ma nga ri mangani ya Timbhoni ta Yehovha, ku ta va ni un’we kumbe va nga ri vangani lava nga ta dya swifanekiselo sweswo. Kambe, emavandlheni yo tala, a nga kona la nga ta dya. Ha yini ku dya Vakreste va nga ri vangani ntsena, lava nga ni ntshembo wo hanya etilweni, ivi vunyingi, lebyi nga ni ntshembo wo hanya emisaveni hilaha ku nga heriki, byi nga dyi?

2, 3. (a) Xana Yehovha u sungule njhani ku vumba hi ku ya hi xikongomelo xakwe? (b) Xana Yehovha u vumbe misava ni vanhu hi xikongomelo xihi?

2 Yehovha i Xikwembu lexi nga ni xikongomelo. Leswaku a hetisisa xikongomelo xa yena, u ‘endla swilo hinkwaswo hi ku landza ndlela leyi ku rhandza ka yena ku kongomisaka ha yona.’ (Vaefesa 1:11) U rhange a vumba N’wana wa yena la nga swakwe. (Yohane 1:1, 14; Nhlavutelo 3:14) Kutani, hi ku tirhisa N’wana loyi, Yehovha u vumbe ndyangu wa vana va moya kutani eku heteleleni a vumba vuako hinkwabyo, ku katsa ni misava ni vanhu lava tshamaka eka yona.—Yobo 38:4, 7; Pisalema 103:19-21; Yohane 1:2, 3; Vakolosa 1:15, 16.

3 Yehovha a nga tumbuluxanga misava leswaku yi va ndhawu leyi vanhu va nga ta kamberiwa eka yona, leswaku a ta ndlandlamuxa ndyangu wakwe wa vana va moya lava nga ta hanya etilweni, hilaha tikereke to tala ta Vujagana ti dyondzisaka hakona. U yi tumbuluxe a ri ni xikongomelo xo karhi emianakanyweni yakwe, leswaku “ku akiwa eka yona.” (Esaya 45:18) Xikwembu xi tumbuluxe misava leswaku vanhu va tshama eka yona. (Pisalema 115:16) Misava hinkwayo a yi fanele yi va paradeyisi, leyi teleke hi vanhu lavo lulama, lava a va ta yi rima naswona va yi khathalela. Mpatswa wo sungula a wu nga si tshama wu tshembisiwa leswaku siku rin’wana wu ta ya etilweni.—Genesa 1:26-28; 2:7, 8, 15.

Xikongomelo Xa Yehovha Xi Tlhontlhiwa

4. Xana ndlela leyi Yehovha a fumaka ha yona yi soriwe njhani vanhu va ha ku sungula ku va kona?

4 N’wana wa Xikwembu wa moya u xandzukile kutani a sungula ku hahlula xikongomelo xa Yehovha, a tlanga hi lunghelo leri Xikwembu xi n’wi nyikeke rona ra ku tihlawulela. U kavanyete ku rhula ka hinkwavo lava a va titsongahata hi  ku tirhandzela evuhosini bya Yehovha. Sathana u endle leswaku mpatswa wo sungula wa vanhu wu xandzukela Xikwembu. (Genesa 3:1-6) A a nga ali leswaku Yehovha u ni matimba, kambe a a sola ndlela leyi Yehovha a a fuma ha yona ni mfanelo Yakwe yo fuma. Hikwalaho, ku pfuke mphikamakaneta leyikulu ya ndlela leyi Yehovha a fumaka ha yona laha misaveni, vanhu va ha ku sungula ku va kona.

5. Hi yihi mphikamakaneta leyi pfuxiweke, naswona i vamani van’wana lava a va katseka eka yona?

5 Mphikamakaneta yin’wana leyi fambisanaka ni ya vuhosi bya vuako hinkwabyo yi pfuxiwe hi Sathana emasikwini ya Yobo. Sathana u kanakane xikongomelo xa swivumbiwa swa Yehovha xo titsongahata eka Yena ni ku tirhela Yena. Sathana u vule leswaku a va xi gandzela hikwalaho ka swikongomelo swa vutianakanyi nileswaku loko vo ringiwa, a va ta fularhela Xikwembu. (Yobo 1:7-11; 2:4, 5) Hambileswi a a tlhontlha nandza wa Yehovha wa la misaveni, kambe a ku katseka ni vana va Xikwembu va moya, hambi ku ri N’wana la nga swakwe wa Yehovha.

6. Yehovha u tikombise njhani a tshembekile eka xikongomelo ni vito rakwe?

6 Leswi Yehovha a tshembekeke eka xikongomelo xakwe ni le ka nhlamuselo ya vito rakwe, u ve Muprofeta tlhelo Muponisi. * U byele Sathana a ku: “Ndzi ta veka vulala exikarhi ka wena ni wansati ni le xikarhi ka mbewu ya wena ni mbewu ya yena. Yi ta ku pfotlosa nhloko kutani wena u ta yi luma xirhendze.” (Genesa 3:15) Hi ku tirhisa Mbewu ya “wansati” wakwe, kumbe xiphemu xa nhlengeletano yakwe ya le tilweni, Yehovha a a ta hlamula eka ntlhontlho wa Sathana ni ku nyika vana va Adamu ntshembo wa ku kutsuriwa ni vutomi.—Varhoma 5:21; Vagalatiya 4:26, 31.

“Xihundla Xo Kwetsima Xa Ku Rhandza Ka Xona”

7. Hi xihi xikongomelo lexi Yehovha a xi paluxeke hi ku tirhisa muapostola Pawulo?

7 Loko a tsalela Vakreste va le Efesa, muapostola Pawulo u yi hlamusele kahle ndlela leyi Yehovha a endlaka swilo ha yona leswaku a hetisisa xikongomelo xakwe. Pawulo u tsarile: “[U] hi tivisa xihundla xo kwetsima xa ku rhandza ka [ye]na. Swi fambisana ni leswi tsakeriwaka hi [ye]na hi ku ya hi xikongomelo xa [ye]na leswaku ku va ni vukongomisi eku heleni ka minkarhi leyi vekiweke, bya ku hlengeleta swilo hinkwaswo nakambe eka Kreste, swilo swa le tilweni ni swilo swa le misaveni.” (Vaefesa 1:9, 10) Xikongomelo lexinene xa Yehovha i ku endla leswaku misava yi va ni vun’we naswona ku tshama swivumbiwa leswi hi ku tirhandzela swi titsongahatelaka vulawuri byakwe. (Nhlavutelo 4:11) Xisweswo vito rakwe ri ta va ri kwetsimisiwile, Sathana u ta vonaka leswaku i muhembi, naswona ku rhandza ka Xikwembu ku ta endliwa “emisaveni, hilaha ku endlekaka hakona etilweni.”—Matewu 6:10.

8. Rito leri hundzuluxeriweke va ku “vukongomisi” ri vula yini?

8 “Leswi tsakeriwaka” hi Yehovha kumbe xikongomelo xa yena, xi ta hetisisiwa hi ku tirhisa “vukongomisi.” Pawulo u tirhise rito leri hi ku kongoma ri vulaka “vulawuri bya le ndyangwini.” A ri kombeteli eka hulumendhe, ku fana ni Mfumo wa  Mesiya kambe eka ndlela yo lawula swilo. * Ndlela leyinene leyi Yehovha a a ta kongomisa swilo ha yona eku hetisiseni ka xikongomelo xakwe a yi katsa “xihundla xo kwetsima” lexi nga ta paluxiwa hakatsongo-tsongo hi ku famba ka malembe-xidzana.—Vaefesa 1:10; 3:9, tinhlamuselo ta le hansi ta NW.

9. Yehovha u xi paluxe njhani xihundla xo kwetsima xa ku rhandza kakwe hilaha ku yaka emahlweni?

9 Hi ku tirhisa mintwanano yo tala, Yehovha hakatsongo-tsongo u paluxe ndlela leyi xikongomelo xakwe malunghana ni Mbewu leyi tshembisiweke le Edeni xi nga ta hetiseka ha yona. Ntwanano Wakwe lowu a wu endleke na Abrahama wu paluxe leswaku Mbewu leyi tshembisiweke yi ta ta emisaveni yi huma erixakeni ra Abrahama naswona ha yona “tinxaka hinkwato ta misava” ti ta katekisiwa. Ntwanano wolowo wu kombise leswaku van’wana va ta tihlanganisa ni mbewu yoleyo hi ku kongoma. (Genesa 22:17, 18) Ntwanano wa Nawu lowu endliweke na Israyele wa nyama wu paluxe xikongomelo xa Yehovha xo va ni “mfumo wa vaprista.” (Eksoda 19:5, 6) Ntwanano wa Davhida wu kombise leswaku Mbewu yoleyo yi ta va Nhloko ya Mfumo wolowo hilaha ku nga heriki. (2 Samuwele 7:12, 13; Pisalema 89:3, 4) Loko ntwanano wa Nawu wu yise Vayuda eka Mesiya, Yehovha u ye mahlweni a paluxa tindlela tin’wana leti xikongomelo xakwe xi nga ta paluxiwa ha tona. (Vagalatiya 3:19, 24) Vanhu volavo lava a va ta tihlanganisa ni mbewu hi ku kongoma a va ta vumba “mfumo wa vaprista” lowu ku vulavuriweke ha wona ka ha ri emahlweni naswona a va ta nghena eka “ntwanano lowuntshwa” tanihi “Israyele” lontshwa, wa moya.—Yeremiya 31:31-34; Vaheveru 8:7-9. *

10, 11. (a) Yehovha u yi paluxe njhani Mbewu leyi tshembisiweke? (b) N’wana la nga swakwe wa Xikwembu a a tele yini emisaveni?

 10 Leswaku vukongomisi lebyi fambisanaka ni xikongomelo xa Xikwembu byi sungula ku endla ntirho wa byona, ku fike nkarhi wa leswaku Mbewu leyi tshembisiweke yi humelela emisaveni. Yehovha u rhumele ntsumi Gabriyele leswaku yi ya byela Mariya leswaku u ta veleka n’wana loyi a nga ta thyiwa vito ra Yesu. Ntsumi yi byele Mariya yi ku: “Yena u ta va lonkulu naswona u ta vuriwa N’wana wa La nge Henhla-henhla; Yehovha Xikwembu u ta n’wi nyika xiluvelo xa Davhida tata wakwe, naswona u ta va hosi ehenhla ka yindlu ya Yakobe hi masiku, mfumo wakwe a wu nge vi na makumu.” (Luka 1:32, 33) Xisweswo, swi tivekile leswaku Mbewu leyi tshembisiweke a ku ri mani.—Vagalatiya 3:16; 4:4.

11 N’wana wa Yehovha la nga swakwe a a fanele a ta emisaveni naswona a ta ringiwa hi ku helela. Nhlamulo leyi hetisekeke ya ntlhontlho wa Sathana a yi ta va emavokweni ya Yesu. Xana a a ta tshama a tshembekile eka Tata wakwe? Leswi a swi katsa xihundla xo kwetsima. Hi ku famba ka nkarhi muapostola Pawulo u hlamusele ntirho wa Yesu: “Xihundla xo kwetsima xa ku tinyiketela loku ku nga ni vukwembu i xikulu: ‘U kombisiwile a ri wa nyama, a vuriwa la lulameke a ri wa moya, u humelerile eka tintsumi, ku chumayeriwa ha yena exikarhi ka matiko, u khorwiwile emisaveni, u amukeriwile ehenhla eku vangameni.’” (1 Timotiya 3:16) Ina, hikwalaho ko tshembeka ka yena kukondza a fa, Yesu u nyikele nhlamulo leyi hetisekeke eka ntlhontlho wa Sathana. Kambe vuxokoxoko byin’wana bya xihundla xo kwetsima a byi nga si paluxiwa.

“Xihundla Xo Kwetsima Xa Mfumo Wa Xikwembu”

12, 13. (a) Hi xihi xiyenge xin’wana xa “xihundla xo kwetsima xa mfumo wa Xikwembu”? (b) I yini lexi a xi katseka loko Yehovha a hlawula nhlayo yo karhi ntsena ya vanhu lava nga ta hanya etilweni?

12 Eka rin’wana ra maendzo yakwe ya ku chumayela ya le Galeliya, Yesu u kombise leswaku xihundla xo kwetsima a xi fambisana ngopfu ni hulumendhe ya yena ya Mfumo wa Vumesiya. U byele vadyondzisiwa vakwe a ku: “N’wina mi nyikiwe ku twisisa swihundla swo kwetsima swa mfumo wa matilo [“mfumo wa Xikwembu,” Marka 4:11].” (Matewu 13:11) Xiyenge xin’wana xa xihundla xexo a xi katsa leswaku Yehovha a hlawula “ntlhambinyana” wa vanhu va 144 000 lava a va ta va ni N’wana wa yena tanihi xiphemu xa mbewu, leswaku va ya fuma na yena etilweni.—Luka 12:32; Nhlavutelo 14:1, 4.

13 Tanihi leswi vanhu a va vumbiwe hi xikongomelo xa leswaku va hanya emisaveni, a ku laveka leswaku Yehovha a endla vanhu van’wana va va ‘swivumbiwa leswintshwa’ leswi nga ta hanya etilweni. (2 Vakorinto 5:17) Loko a vulavula tanihi un’wana wa lava hlawuriweke ku va ni ntshembo wolowo wo hlawuleka wa le tilweni, muapostola Petro u tsale a ku: “A ku dzunisiwe Xikwembu tlhelo Tata wa Hosi ya hina Yesu Kreste, leswi hikwalaho ka tintswalo ta xona letikulu xi hi velekeke hi vuntshwa eka ntshembo lowu hanyaka hi ku pfuxiwa ka Yesu Kreste eka lava feke, lowu hi yisaka endzhakeni leyi nga onhakiki ni leyi nga nyamangiki ni leyi nga vuniki. Mi vekeriwe yona ematilweni.”—1 Petro 1:3, 4.

14. (a) Xana lava nga riki Vayuda a va katseka njhani eka “xihundla xo kwetsima xa mfumo wa Xikwembu”? (b) Ha yini hi swi kota ku twisisa “swilo leswi enteke swa Xikwembu”?

14 Xiyenge xin’wana xa xihundla xo kwetsima lexi khumbaka hulumendhe ya Mfumo ya nkarhi lowu taka a ku ri ku rhandza ka Xikwembu leswaku xi katsa ni lava nga riki Vayuda exikarhi ka nhlayo leyitsongo ya vanhu lava nga ta vitaneriwa ku fuma na Kreste etilweni. Pawulo u hlamusele xiphemu lexi xa “vukongomisi” bya Yehovha, kumbe ndlela leyi a ku lawulaka ha yona ku hetiseka ka xikongomelo xakwe: “Eka switukulwana swin’wana xihundla lexi a xi tivisiwanga eka vana va vanhu hilaha xi hlavuteriweke hakona sweswi eka vaapostola vakwe vo kwetsima ni vaprofeta hi moya, xa leswaku, vanhu va matiko va fanele ku va vadyandzhaka-kulobye ni swirho-kulobye swa miri ni vahlanganyeri swin’we na hina va xitshembiso evun’weni na Kreste Yesu hi mahungu lamanene.” (Vaefesa 3:5, 6) Nhlamuselo ya xiphemu lexi xa xihundla xo kwetsima yi paluxiwile eka ‘vaapostola vo kwetsima.’ Hilaha ku fanaka ni namuntlha, loko a ku nga ri hikwalaho ka moya lowo kwetsima, a hi nga ta swi twisisa “swilo leswi enteke swa Xikwembu.”—1 Vakorinto 2:10; 4:1; Vakolosa 1:26, 27.

15, 16. Ha yini Yehovha a hlawule lava nga ta fuma na Kreste exikarhi ka vanhu?

 15 Ku vuriwa leswaku “lava 144 000” lava voniweke va ri ni “Xinyimpfana” eNtshaveni ya Siyoni wa le tilweni va ‘xaviwe emisaveni,’ “va xaviwe evanhwini leswaku va va swirhangana eka Xikwembu ni le ka Xinyimpfana,” Kreste Yesu. (Nhlavutelo 14:1-4) Yehovha u hlawule mativula ya vana vakwe va le tilweni leswaku a va xiphemu lexikulu xa mbewu leyi tshembisiweke le Edeni, kambe ha yini a hlawule lava nga ta va na Kreste exikarhi ka vanhu? Muapostola Pawulo u vula leswaku vanhu lava va nga riki vangani va ‘vitaniwe hi ku ya hi xikongomelo xa Yehovha,’ “hi ku ya hi ku rhandza ka [ye]na.”—Varhoma 8:17, 28-30; Vaefesa 1:5, 11; 2 Timotiya 1:9.

16 Xikongomelo xa Yehovha i ku kwetsimisa vito rakwe lerikulu leri kwetsimaka ni ku lwela vuhosi byakwe bya vuako hinkwabyo. Hi “vukongomisi” byakwe lebyo tlhariha ku tlula hinkwabyo kumbe ndlela leyi a lawulaka swilo ha yona, Yehovha u rhumele N’wana wakwe wa mativula emisaveni, laha a fikeke a ringiwa hi ku helela. Tlhandlakambirhi, Yehovha u endle xiboho xa leswaku hulumendhe yoleyo ya Mfumo wa Mesiya ya N’wana wakwe yi ta katsa vanhu lava na vona va seketeleke vuhosi Byakwe ku yisa eku feni.—Vaefesa 1:8-12; Nhlavutelo 2:10, 11.

17. Ha yini swi fanele swi hi tsakisa leswi Kreste ni vafumi-kulobye va tshameke va va vanhu va nyama?

17 Yehovha u kombise rirhandzu rakwe lerikulu eka vana va Adamu hi ku endla leswaku N’wana wakwe a ta emisaveni ni ku hlawula exikarhi ka vanhu, vanhu lava nga ta va vadyandzhaka ni N’wana wakwe eka hulumendhe ya Mfumo. Xana sweswo a swi ta va vuyerisa njhani lava tshameke va tshembekile eka Yehovha ku sukela eka Avele ku ya emahlweni? Leswi vanhu lava nga hetisekangiki va tswariweke va ri mahlonga ya xidyoho ni rifu, va fanele va tshunguriwa hi tlhelo ra moya ni ra nyama naswona va endliwa lava hetisekeke hi ku ya hi ku xikongomelo xa Yehovha xa le ku sunguleni hi vanhu. (Varhoma 5:12) Mawaku ndlela leyi swi va chavelelaka ha yona hinkwavo lava swi languteleke hi mahlo-ngati ku kuma vutomi lebyi nga heriki emisaveni, ku tiva leswaku Hosi ya vona yi ta va kombisa rirhandzu ni ku va twisisa hi ndlela ya musa hilaha yi endleke hakona eka vadyondzisiwa va yona hi nkarhi wa vutirheli bya yona bya laha misaveni! (Matewu 11:28, 29; Vaheveru 2:17, 18; 4:15; 7:25, 26) Mawaku ndlela leyi swi chavelelaka ha yona ku xiya leswaku vaprista lava nga ta va tihosi na Kreste etilweni ku ta va ku ri vavanuna ni vavasati va ripfumelo lava na vona va lweke ni ku tsana ka nyama naswona va langutaneke ni mintlhontlho ya vutomi, ku fana na hina!—Varhoma 7:21-25.

Xikongomelo Xa Yehovha Lexi Nga Tsandzekiki

18, 19. Ha yini hi ma twisisa kahle marito ya Pawulo lama nga eka Vaefesa 1:8-11, naswona hi ta bula hi yini exihlokweni lexi landzelaka?

18 Sweswi se ha yi twisisa nhlamuselo ya marito ya Pawulo lawa a ma tsaleleke Vakreste lava totiweke, lama kumekaka eka Vaefesa 1:8-11. U vule leswaku Yehovha u va tivise “xihundla xo kwetsima xa ku rhandza ka [ye]na,” nileswaku va ‘averiwe ku va vadyandzhaka’ na Kreste, naswona va “[vekiwe] hi ku ya hi xikongomelo xa loyi a endlaka swilo hinkwaswo hi ku landza ndlela leyi ku rhandza ka yena ku kongomisaka ha yona.” Ha swi xiya leswaku leswi swi fambisana ni ndlela leyinene leyi Yehovha a ‘kongomisaka’ swilo ha yona leswaku a hetisisa xikongomelo xakwe. Nakambe leswi swi hi pfuna ku twisisa leswaku ha yini ku ri Vakreste va nga ri vangani ntsena lava dyaka swifanekiselo eXilalelweni xa Hosi.

19 Exihlokweni lexi landzelaka, hi ta swi vona leswaku Xitsundzuxo xa rifu ra Kreste xi vula yini eka Vakreste volavo lava nga ni ntshembo wa le tilweni. Hi ta tlhela hi dyondza leswaku ha yini vanhu va timiliyoni lava nga ni ntshembo wo hanya hilaha ku nga heriki emisaveni va fanele va swi tsakela hi timbilu ta vona hinkwato ku tiva leswi Xitsundzuxo xi yimelaka swona.

[Tinhlamuselo ta le hansi]

^ par. 6 Vito ra Xikwembu hi ku kongoma ri vula leswaku “U Endla Leswaku Swi Va Kona.” Yehovha a nga va xin’wana ni xin’wana lexi a lavaka ku va xona leswaku a hetisisa xikongomelo xakwe.—Eksoda 3:14, nhlamuselo ya le hansi ya NW.

^ par. 8 Marito ya Pawulo ma kombisa leswaku “vukongomisi” a byi ri kona esikwini rakwe, kasi Matsalwa ma kombisa leswaku Mfumo wa Mesiya wu simekiwe hi 1914.

^ par. 9 Leswaku u kuma vuxokoxoko bya mintwanano leyi katsekaka eku hetisiseni ka xikongomelo xa Xikwembu, vona Xihondzo xo Rindza xa February 1, 1989, matluka 10-15.

Mpfuxeto

• Ha yini Yehovha a endle misava naswona a veke vanhu eka yona?

• Ha yini a swi ri swa nkoka leswaku N’wana wa Yehovha la nga swakwe a ringiwa emisaveni?

• Ha yini Yehovha a hlawule vafumi-kulobye va Kreste exikarhi ka vanhu va nyama?

[Swivutiso Swa Dyondzo]