Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u ta swi kota ku hlamula swivutiso leswi landzelaka:

Ha yini xidyoho xo sungula—ku nga yingisi ka Adamu—xi fanisiwa ni vuvabyi lebyi kumiwaka tanihi ndzhaka?

Xi fanisiwa ni vuvabyi hikuva Adamu hi yena a hundziseleke xidyoho eka vatukulu va yena. Hikwalaho, hi tluletiwe xidyoho ku fana ni leswi vana van’wana va tluletiwaka mavabyi hi vatswari va vona.—8/15, tluka 5.

Hi swihi swilo leswikulu leswi vangaka ku engeteleka ka madzolonga namuntlha?

Sathana u ringeta ku hambukisa vanhu eka Yehovha hi ku byala moya wa madzolonga etimbilwini, hi ku tirhisa tifilimi, vuyimbeleri ni mintlango ya tikhompyuta leyi yi khutazaka vanhu ku tekelela swiendlo swa tihanyi ni ku dlaya. Madzolonga lama kombisiwaka eka swihaxa-mahungu ma hoxe xandla eka swiendlo swo tala swa madzolonga.—9/1, tluka 29.

A a ri mani Pontiyo Pilato?

A a ri mulawuri wa xiyimo xa le hansi wa le Rhoma, loyi swi nga ha endlekaka a a ri socha. Tiberiyo, Mufumi wa le Rhoma, u veke Pilato ku va ndhuna-nkulu ya xifundzha xa Yudiya hi 26 C.E. Loko Yesu a tengisiwa, Pilato u yingise swihehlo swa varhangeri va Vayuda. Leswaku a tsakisa ntshungu, u pfumerile leswaku Yesu a dlayiwa.—9/15, matluka 10-12.

Hi xihi “xikombiso” lexi boxiweke eka Matewu 24:3?

Xikombiso lexi xi vumbiwa hi swiendlakalo swo hlayanyana leswi loko swi hlanganile swi vumbaka mfungho kumbe xikombiso. Xikombiso lexi xi katsa nyimpi, ndlala, ntungu ni ku tsekatseka ka misava naswona xi ta endla leswaku valandzeri va Yesu va xiya “vukona” bya yena ku katsa ni “makumu ya mafambiselo ya swilo.”—10/1, matluka 4-5.

Vayuda lava a va nga tshami ePalestina a va tshama kwihi?

Eka lembe-xidzana ro sungula, tindhawu leti a va tele ngopfu eka tona a ku ri eSiriya, Asia Minor, Babilona na Egipta, naswona a va nga talanga exiphen’wini xa le Yuropa xa Mfumo wa Rhoma.—10/15, tluka 12.

Xana Mukreste a nga sala ni ripfalo lerinene loko a amukela ntirho lowu lavaka leswaku a khoma xibamu?

Ku endla ntirho lowu lavaka ku khoma xibamu kumbe tlhari rin’wana i mhaka ya munhu hi yexe. Kambe ntirho lowu lavaka leswaku munhu a khoma xibamu wu nga n’wi peta ekhombyeni ra ku va ni nandzu wa ngati loko munhu yoloye o xi tirhisa naswona a nga va ekhombyeni ro vavisiwa kumbe ku dlayiwa hi xigevenga lexi tisirhelelaka kumbe hi munhu loyi a rihiselaka. Mukreste loyi a khomaka matlhari yo tano a nge faneleki ku kuma malunghelo yo hlawuleka evandlheni. (1 Timotiya 3:3, 10)—11/1, tluka 31.

Leswi rito “Armagedoni” ri humaka eritweni ra Xiheveru ra “Ntshava ya Megido,” xana nyimpi ya Armagedoni yi ta lweriwa entshaveni ya le Vuxa Xikarhi?

Doo! Ntshava ya Megido a yi kona, ko va ni xintshabyana lexi tlakukeke ekusuhi ni rivala ra le Israyele. Ndhawu yoleyo i yitsongo ngopfu lerova “tihosi ta misava ni mavuthu ya tona” a ti nge heleli eka yona. Nyimpi leyikulu ya Xikwembu yi ta lwiwa emisaveni hinkwayo naswona yi ta herisa tinyimpi hinkwato. (Nhlavutelo 16:14, 16; 19:19; Pisalema 46:8, 9)—12/1, matluka 4-7.