Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana Mukreste a nga sala ni ripfalo lerinene loko a amukele ntirho lowu lavaka leswaku a khoma xibamu?

Timbhoni ta Yehovha emisaveni hinkwayo a ti byi tekeli ehansi vutihlamuleri lebyi ti nyikiweke hi Xikwembu bya ku wundla mindyangu ya tona hi swilo swa nyama. (1 Timotiya 5:8) Hambiswiritano, mintirho yin’wana yi lwisana hi ku kongoma ni misinya ya milawu ya le Bibeleni, kutani yi fanele yi papalatiwa. Sweswo swi katsa mintirho leyi fambisanaka ni ku gembula, ku tirhisa ngati hi ndlela yo biha ni ku khutaza ku tirhisiwa ka fole. (Esaya 65:11; Mintirho 15:29; 2 Vakorinto 7:1; Vakolosa 3:5) Mintirho yin’wana, hambiloko yi nga yirisiwanga hi ku kongoma eBibeleni, yi nga vavisa ripfalo ra wena kumbe ra van’wana.

Ku endla ntirho lowu lavaka ku khoma xibamu kumbe tlhari ro karhi i mhaka ya munhu hi yexe. Hambiswiritano, ntirho lowu lavaka leswaku u khoma xibamu wu nga ku peta ekhombyeni ra ku va ni nandzu wa ngati loko xiyimo xi tshuka xi lava leswaku u tirhisa xibamu xa kona. Hikwalaho, Mukreste u fanele a tivutisa kahle malunghana ni loko a tiyimisele ku amukela ndzhwalo wa ku endla xiboho xa xihatla eka xiendlakalo lexi katsaka vutomi bya munhu. Ku khoma xibamu swi tlhela swi peta munhu ekhombyeni ra ku vavisiwa kumbe ku dlayiwa hi xigevenga lexi tisirhelelaka kumbe hi munhu loyi a rihiselaka.

Ni van’wana va nga khumbiwa hi xiboho xo tano. Hi xikombiso, vutihlamuleri lebyikulu bya Mukreste i ku chumayela mahungu lamanene ya Mfumo wa Xikwembu. (Matewu 24:14) Xana u ta swi kota ku dyondzisa van’wana leswaku va va “ni ku rhula ni vanhu hinkwavo,” kasi yena u tihanyisa hi ntirho lowu lavaka leswaku a khoma xibamu? (Varhoma 12:18) Ku vuriwa yini hi vana kumbe swirho swin’wana swa ndyangu? Xana ku va ni xibamu endlwini a swi nge peti vutomi bya vona ekhombyeni? Ku tlula kwalaho, xana van’wana va nga khunguvanyisiwa hi xiboho xa wena emhakeni leyi?—Vafilipiya 1:10.

“Emasikwini [lawa] yo hetelela” vanhu lava engetelekeke va ni ‘tihanyi, naswona a va rhandzi vunene.’ (2 Timotiya 3:1, 3) Hikwalaho, xana munhu a nga “pfumala . . . xihehlo” loko a hlawula ntirho lowu lavaka leswaku a khoma xibamu, lowu nga n’wi lwisaka ni vanhu vo tano? (1 Timotiya 3:10) Doo! Hikwalaho, vandlha a ri nge teki munhu wo tano a ri la ‘pfumalaka xisandzu’ loko a hambeta a khoma xibamu endzhaku ko nyikiwa ndzayo ya musa leyi humaka eBibeleni. (1 Timotiya 3:2; Tito 1:5, 6) Kutani munhu wo tano a nge fanelekeli malunghelo hinkwawo yo hlawuleka evandlheni.

Yesu u tiyisekise vadyondzisiwa vakwe leswaku loko va rhangisa timhaka ta Mfumo evuton’wini bya vona, a va fanelanga va vilela ku tlula mpimo hi ku kuma swilo leswi lavekaka evuton’wini. (Matewu 6:25, 33) Kunene, loko hi tshemba Yehovha hi ku helela, “u ta [hi] seketela. A nge pfuki a pfumerile leswaku la lulameke a tsekatseka.”—Pisalema 55:22.