Nghena endzeni

Hundzela eka leswi nga endzeni

Xana Yesu A A Ri Xikwembu Kumbe Munhu Wa Nyama?

Xana Yesu A A Ri Xikwembu Kumbe Munhu Wa Nyama?

 Xana Yesu A A Ri Xikwembu Kumbe Munhu Wa Nyama?

“HI MINA ku vonakala ka misava. Loyi a ndzi landzelaka a nge pfuki a fambe emunyameni, kambe u ta kuma ku vonakala ka vutomi.” (Yohane 8:12) Marito lawa ma vuriwe hi Yesu Kreste. Wanuna la dyondzekeke wa lembe-xidzana ro sungula u tsale leswi malunghana na yena: “Leswi tumbetiweke hi vukheta eka yena i xuma hinkwaxo xa vutlhari ni xa vutivi.” (Vakolosa 2:3) Ku tlula kwalaho, Bibele yi ri: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Leswaku hi ta enerisa xilaveko xa hina xa moya hi fanele hi va ni vutivi lebyi kongomeke malunghana na Yesu.

Vanhu emisaveni hinkwayo va twile hi ta Yesu Kreste. A swi kanakanisi leswaku u ve ni nkucetelo ematin’wini ya vanhu. Phela, khalendara leyi tirhisiwaka eswiphen’wini swo tala swa misava yi sekeriwe eka lembe leri ku anakanyiwaka leswaku u velekiwe ha rona. The World Book Encyclopedia ya hlamusela: “Vanhu vo tala va vulavula hi masiku ya le mahlweni ka lembe rero tanihi B.C., kumbe before Christ [emahlweni ka Kreste]. Eka masiku ya le ndzhaku ka lembe rero va tirhisa A.D., kumbe anno Domini (elembeni ra Hosi ya hina).”

Ina, ku ni mavonelo lama kanetanaka malunghana ni leswaku Yesu a a ri mani. Eka van’wana, o va wanuna la hlamarisaka loyi a siyeke rhekhodo ya nkoka ematin’wini. Kambe, van’wana va n’wi gandzela tanihi Xikwembu xa Matimba Hinkwawo. Valandzeri van’wana va Mahindu va fanise Yesu Kreste ni xikwembu xa Muhindu lexi vuriwaka Krishna, lexi vo tala va vulaka leswaku i xikwembu lexi nga munhu. Xana Yesu o va munhu ntsena, kumbe a a ri munhu loyi a faneleke a gandzeriwa? Kahle-kahle a a ri mani? Xana a a huma kwihi? Xana a a ri munhu wa njhani? Naswona u le kwihi sweswi? Hilaha hi nga ta swi vona hakona exihlokweni lexi landzelaka, buku leyi nga ni rungula ro tala malunghana na Yesu yi ni tinhlamulo leti nga ntiyiso ta swivutiso leswi.