Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana ku tlanga mintlango leyi nga ni madzolonga ya le ka khompyuta swi nga onha vuxaka bya munhu na Yehovha?

Hosi Davhida wa le tikweni ra khale ra Israyele u tsarile: “Yehovha u kambela wo lulama ni wo homboloka, kunene moya-xiviri Wakwe wa n’wi venga un’wana ni un’wana la rhandzaka madzolonga.” (Pisalema 11:5) Rito ra ririmi ra Xiheveru leri vulaka ku “venga” ri nga ha vula “munhu la nga nala.” Hikwalaho, un’wana ni un’wana la rhandzaka madzolonga u tiendla nala wa Xikwembu. Kutani, xivutiso lexi hi faneleke hi tivutisa xona hi lexi nge: Xana ku tlanga mintlango yo karhi ya le ka khompyuta swi nga ndzi endla ndzi rhandza madzolonga?

Mintlango leyi nga ni madzolonga ya le ka khompyuta yi ndhundhuzela ku tirhisiwa ka matlhari. Hakanyingi yi dyondzisa mutlangi vutshila byo lwa nyimpi. Magazini wa The Economist wu te: “Masocha ya le Amerika ma titshege swinene hi mintlango ya le ka khompyuta leswaku ma tiletela hi yona. Mintlango yin’wana leyi tirhisiwaka hi masocha lawa hi leyi yi kumekaka ni le switolo swa mani na mani.”

I ntiyiso leswaku lava tlangaka mintlango leyi nga ni madzolonga a va vavisi vanhu va xiviri. Kambe, xana ku hlawula ka vona vuhungasi byo tano swi kombisa yini malunghana ni leswi swi nga ha vaka swi endleka etimbilwini ta vona? (Matewu 5:21, 22; Luka 6:45) Xana u nga n’wi tekisa ku yini munhu la tiphinaka hi ku tlhavetela, ku balesela, ku lamata ni ku dlaya vanhu lava nga riki va xiviri? Ku vuriwa yini loko munhu yoloye a heta tiawara to tala vhiki rin’wana ni rin’wana a tlanga mintlango leyi ya madzolonga lerova yi kala yi n’wi godzombela? Leswi swi nga ha ku endla u gimeta hi leswaku a a hlakulela ku rhandza madzolonga, tanihi leswi munhu la hlalelaka swifaniso swo naveta rimbewu a hlakulelaka ku navela ko biha ka rimbewu.—Matewu 5:27-29.

Xana Yehovha u n’wi venga ku fikela kwihi munhu la rhandzaka madzolonga? Davhida u vule leswaku Yehovha “u n’wi venga swinene” munhu wo tano. Enkarhini wa Nowa, Yehovha u kombise rivengo leri a va vengaka ha rona vanhu lava rhandzaka madzolonga. Yehovha u byele Nowa a ku: “Makumu ya nyama hinkwayo ma fikile emahlweni ka mina, hikuva misava yi tale madzolonga hikwalaho ka vona; sweswi ndzi ta va lovisa swin’we ni misava.” (Genesa 6:13) Xikwembu xa ntiyiso xi lovise vanhu emisaveni hinkwayo hikwalaho ka leswi a va rhandza madzolonga. Xi hlayise ntsena Nowa ni ndyangu wakwe—ku nga vanhu va nhungu lava a va nga ma rhandzi madzolonga.—2 Petro 2:5.

Vanhu lava va lavaka ku va vanghana va Yehovha va “fula mabanga ya vona ma va swikomu ni mafumu ya vona ma va swikhutulo.” Va tshika ku titoloveta madzolonga, naswona a va “dyondzi nyimpi.” (Esaya 2:4) Leswaku hi tshama hi ri vanghana va Xikwembu, hi nga vi valala va xona, hi fanele hi “fularhela leswo biha kutani hi endla leswi nga swinene.” Hi fanele hi ‘lava ku rhula, hi ku landzelela.’—1 Petro 3:11.

Xana ku vuriwa yini loko ana se hi sungurile ku tlanga mintlango ya tivhidiyo leyi nga ni madzolonga? Kutani hi fanele hi tiyimisela ku tsakisa Yehovha hi ku swi tshika hilaha ku heleleke swilo leswi a swi vengaka. Hi fanele ku khongelela mpfuno wa moya lowo kwetsima wa Xikwembu leswaku wu hi pfuna ku lwisana ni mukhuva lowu lowu nga ni khombo hi tlhelo ra moya. Hi nga wu tshika loko ho pfumelela timfanelo to tanihi ku rhula, vunene ni ku tikhoma leswaku ti lawula vutomi bya hina.—Luka 11:13; Vagalatiya 5:22, 23.