Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Hi byihi vumbhoni lebyi kombisaka leswaku xiga lexi nge “loyi ku nga yena ntsena la nga fiki” ni lexi nge “loyi ku nga riki na munhu ni un’we la n’wi voneke kumbe la nga n’wi vonaka” swi kombetela eka Yesu ematshan’weni ya Yehovha Xikwembu?

Muapostola Pawulo u tsarile: “Mulawuri-nkulu la tsakeke ni loyi a nga yexe u ta kombisa ku humelela loku eminkarhini ya kona leyi vekiweke, yena Hosi ya lava nga tihosi ni Mufumi wa lava nga vafumi, loyi ku nga yena ntsena la nga fiki, la tshamaka eku vonakaleni loku nga tshinelelekiki, loyi ku nga riki na munhu ni un’we la n’wi voneke kumbe la nga n’wi vonaka.”—1 Timotiya 6:15, 16.

Vahlamuseri va Bibele hakanyingi va ri: ‘Swi nga endlekisa ku yini leswaku xiga lexi nge, “loyi ku nga yena ntsena la nga fiki,” “Mulawuri-nkulu . . . loyi a nga yexe,” “loyi ku nga riki na munhu ni un’we la n’wi voneke kumbe la nga n’wi vonaka” swi kombetela eka munhu un’wana ematshan’weni ya Lowa Matimba Hinkwawo?’ Ina, swiga leswi swi nga tirhisiwa ku hlamusela Yehovha. Hambiswiritano, mongo wu kombisa leswaku eka 1 Timotiya 6:15, 16, Pawulo a a kombetela eka Yesu hi ku kongoma.

Emakumu ya ndzimana 14, Pawulo u vulavula hi “ku humelela [ka] Hosi ya hina Yesu Kreste.” (1 Timotiya 6:14) Hikokwalaho, loko Pawulo a tsala eka ndzimana 15 leswaku “Mulawuri-nkulu la tsakeke ni loyi a nga yexe u ta kombisa ku humelela loku eminkarhini ya kona leyi vekiweke,” u kombetela eku humeleleni ka Yesu, hayi ka Yehovha Xikwembu. Kutani, i mani ‘Mulawuri-nkulu loyi a nga yexe’? Swi vonaka swi twala ku gimeta hileswaku Yesu i Mulawuri-nkulu loyi Pawulo a a vulavula hi yena. Hikwalaho ka yini? Mongo wu swi veka erivaleni leswaku Pawulo u fanisa Yesu ni vafumi lava nga vanhu. Hilaha Pawulo a tsaleke hakona, hakunene Yesu i “Hosi ya [vanhu] lava nga tihosi ni Mufumi wa [vanhu] lava nga vafumi.” * Ina, loko a fanisiwa na vona Yesu i ‘Mulawuri-nkulu loyi a nga yexe.’ Yesu u nyikiwe “ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela.” (Daniyele 7:14) A nga kona mulawuri la nga vulaka leswaku u ni xikhundlha xo tano!

Ku vuriwa yini hi xiga lexi nge “loyi ku nga yena ntsena la nga fiki”? Na xona xi fananisa Yesu ni tihosi leti nga vanhu. A nga kona mufumi wa laha misaveni la nga vulaka leswaku u nyikiwe matimba ya ku ka a nga fi, kambe i Yesu loyi a nga swi vulaka sweswo. Pawulo u tsarile: “Ha swi tiva leswaku Kreste, leswi se a pfuxiweke eka lava feke, a nge he fi nakambe; rifu a ra ha n’wi lawuli nikatsongo.” (Varhoma 6:9) Hikokwalaho, Yesu hi yena wo sungula eBibeleni ku hlamuseriwa tanihi loyi a amukelaka nyiko ya ku nga fi. Ina, loko Pawulo a tsala marito lawa, Yesu a ku ri yena ntsena loyi a kumeke vutomi lebyi swi nga kotekiki ku byi lovisa.

Nakambe hi fanele hi tsundzuka leswaku a swi ta va swi hoxile ku va Pawulo a vula leswaku Yehovha Xikwembu hi yena ntsena loyi a nga fiki, tanihi leswi na Yesu a a ri loyi a nga fiki loko Pawulo a tsala marito wolawo. Kambe Pawulo u vule leswaku i Yesu ntsena la nga fiki loko a fanisiwa ni vafumi va laha misaveni.

Ku tlula kwalaho, i ntiyiso hakunene leswaku endzhaku ko pfuxiwa ivi a tlhandlukela etilweni, Yesu a nga hlamuseriwa tanihi “loyi ku nga riki na munhu ni un’we la n’wi voneke kumbe la nga n’wi vonaka.” Swi lo dlaa, leswaku vadyondzisiwa vakwe lava totiweke a va ta vona Yesu endzhaku ka rifu ra vona loko se va pfuxeriwe etilweni va ri swivumbiwa swa moya. (Yohane 17:24) Kambe a nga kona munhu ni un’we laha misaveni loyi a a ta vona Yesu a ri exiyin’weni xakwe lexi vangamaka. Hikokwalaho, hi nga vula hi nga kanakani leswaku ku sukela loko Yesu a pfuxiwile a tlhela a tlhandlukela etilweni a nga kona ni “munhu ni un’we” la n’wi voneke.

Ina, eku sunguleni munhu a nga anakanya leswaku nhlamuselo leyi kumekaka eka 1 Timotiya 6:15, 16 yi tirha eka Xikwembu. Kambe mongo wa marito ya Pawulo swin’we ni vumbhoni bya matsalwa man’wana—swi komba leswaku Pawulo a a vulavula hi Yesu.

[Nhlamuselo ya le hansi]

^ par. 5 Yesu u hlamuseriwa hi ndlela leyi fanaka eka 1 Vakorinto 8:5, 6; Nhlavutelo 17:12, 14; 19:16.