Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Le Israyele wa khale, xana ku vonakala loku hlamarisaka loku minkarhi yin’wana a ku vitaniwa Shechinah loku a ku humelela eNdhawini yo Kwetsima Ngopfu ya tabernakela ni ya tempele, a ku yimela yini?

Yehovha, Tatana la nga ni rirhandzu tlhelo Musirheleri wa vanhu vakwe, u endle leswaku vukona byakwe byi vonakala kahle eIsrayele. Ndlela yin’wana leyi a swi endleke ha yona leswi, i ku tirhisa papa leri vangamaka leri a ri fambisana swinene ni ndhawu leyi a a gandzeriwa eka yona.

Ku vonakala koloko loku vangamaka a ku yimela vukona bya Yehovha lebyi nga vonakiki. A ku humelela eNdhawini yo Kwetsima Ngopfu ya le tabernakeleni ni ya le tempeleni leyi akiweke hi Solomoni. Ku vonakala koloko loku hlamarisaka a a ku nga vuli swona leswaku Yehovha a a ri kwalaho hi xiviri. Xikwembu a xi nge tshami emiakweni leyi akiweke hi vanhu. (2 Tikronika 6:18; Mintirho 17:24) Ku vangama loku nga tolovelekangiki exikwetsimisisweni xa Xikwembu a ku tiyisekisa muprista lonkulu leswaku Yehovha u na vona, wa va sirhelela naswona wa swi khathalela swilaveko swa vona kutani muprista a tiyisekisa Vaisrayele hinkwavo.

Hi ku ya hi tibuku ta Xiaramu leti tsariweke endzhaku ka ku tsariwa ka Bibele, ku vonakala loku a ku vitaniwa Shechinah (shekhi·nahʹ), ku nga rito leri vulaka “nchumu lowu tshamaka endhawini yo karhi” kumbe “vutshamo.” Rito leri a ri humeleli eBibeleni kambe ra humelela eka vuhundzuluxeri bya Xiaramu bya Matsalwa ya Xiheveru, lawa nakambe ma vitaniwaka Ti-targum.

Loko Yehovha a nyika Muxe swileriso malunghana ni ndlela leyi tabernakela yi faneleke yi akiwa ha yona, u te: “Kutani u fanele u veka xifunengeto ehenhla ka Areka, endzeni ka Areka u ta veka vumbhoni lebyi ndzi nga ta ku nyika byona. Ndzi ta tikombisa kwalaho eka wena naswona ndzi vulavula na wena ndzi ri ehenhla ka xifunengeto, ndzi ri exikarhi ka makerubu mambirhi lama nga ehenhla ka areka ya vumbhoni.” (Eksoda 25:21, 22) Areka leyi ku vulavuriweke ha yona a yi ri bokisi leri rhideriweke hi nsuku leri nga eNdhawini yo Kwetsima Ngopfu. A ku vekiwe makerubu mambirhi ya nsuku ehenhla ka xifunengeto xa Areka.

Xana Yehovha a a ta vulavula a ri kwihi? U nyikele nhlamulo hi ku byela Muxe a ku: “Ndzi ta humelela epapeni ehenhla ka xifunengeto.” (Levhitika 16:2) Papa leri a ri yime ndhawu yin’we ehenhla ka Areka yo kwetsima exikarhi ka makerubu mambirhi ya nsuku. Bibele a yi boxi leswaku papa rolero a ri ri ehenhla ku fika kwihi kumbe leswaku a ri ri ekule ku fika kwihi eka makerubu wolawo.

Papa leri leri voningaka a ri voninga Ndhawu yo Kwetsima Ngopfu. Entiyisweni, hi rona ntsena leri a ri voninga kamara rero. A ri voningela muprista lonkulu loko a nghena ekamareni ra le ndzeni-ndzeni ra tempele hi Siku ro Kombela ku Rivaleriwa. A a va a yime emahlweni ka Yehovha.

Xana ku vonakala loku loku hlamarisaka ku fanekisela swo karhi eka Vakreste? Exivonweni, muapostola Yohane u vone muti lowu ‘vusiku a byi nga ha ta va kona eka wona.’ Muti lowu i Yerusalema Lowuntshwa, lowu vumbiwaka hi Vakreste lava totiweke, lava pfuxeriweke ku ya fuma na Yesu. Ku vonakala ka muti lowu wo fanekisela a ku humi edyambyini kumbe en’wetini. Ku vangama ka Yehovha Xikwembu hi kona loku voningaka nhlengeletano leyi hi ku kongoma, hilaha papa ra Shechinah a a ri voninga hakona eNdhawini yo Kwetsima Ngopfu. Xinyimpfana, Yesu Kreste, na yena i “rivoni” ra muti lowu. Naswona, “muti” lowu wu kongomisa vanhu lava kutsuriweke vo huma ematikweni hinkwawo, hi ku va voningela hi tlhelo ra moya naswona wu va nisela mikateko.—Nhlavutelo 21:22-25.

Leswi va amukelaka mikateko yoleyo yo tala leyi humaka eka yena, vagandzeri va Yehovha va nga tiyiseka leswaku Yehovha hi yena Murisi wa vona loyi a va sirhelelaka ni Tata wa vona la nga ni rirhandzu lerikulu.