Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Leswi Hosi Solomoni wa le Israyele wa khale a fularheleke Xikwembu loko se a dyuharile, xana hi nga gimeta hi leswaku a nge pfuxiwi?—1 Tihosi 11:3-9.

Hambileswi Bibele yi va boxaka hi mavito vavanuna ni vavasati va ripfumelo lava handle ko kanakana va nga ta pfuxiwa eku feni, a yi vuli hi ku kongoma leswaku munhu un’wana ni un’wana loyi yi n’wi boxaka hi vito u ta pfuxiwa. (Vaheveru 11:1-40) Hambiswiritano, emhakeni ya Solomoni hi nga kuma ndlela leyi Xikwembu xi n’wi avanyiseke ha yona hi ku ringanisa leswi humeleleke eka yena loko a fa ni leswi humeleleke eka vanhu van’wana vo tshembeka loko va fa.

Matsalwa ma vulavula hi swilo swimbirhi malunghana ni lava feke—xiyimo xa nkarhinyana xa ku nga vi kona ni xiyimo xa ku loviseriwa makumu. Lava va kumekaka va nga faneriwi hi ku pfuxiwa va hoxiwa “eGehena,” kumbe “etiveni ra ndzilo.” (Matewu 5:22; Marka 9:47, 48; Nhlavutelo 20:14) Van’wana va vona ku ta va ku ri mpatswa wo sungula wa vanhu, ku nga Adamu na Evha, Yudasi Iskariyota loyi a veke muxengi, ni van’wana lava feke loko Xikwembu xi va avanyisa, vo tanihi vanhu va le nkarhini wa Nowa ni vaaki va le Sodoma na Gomora. * Loko va fa, lava va nga ta pfuxiwa va ya esirheni leri tolovelekeke ra vanhu—Sheol kumbe Hayidesi. Loko yi vulavula hi vumundzuku bya vona, Bibele yi ri: “Lwandle ri humesa vafi lava nga eka rona, rifu ni Hayidesi swi humesa vafi lava nga eka swona, kavaloko munhu ni munhu a avanyisiwa hi ku ya hi swiendlo swa yena.”—Nhlavutelo 20:13.

Kutani, vanhu lavo lulama lava ku vulavuriwaka ha vona eka Vaheveru ndzima 11, va le Sheol, kumbe eHayidesi, va rindzele ku pfuxiwa. Van’wana va vona i malandza yo tshembeka ya Xikwembu, ku nga Abrahama, Muxe na Davhida. Xiya ndlela leyi Bibele yi vulavulaka ha vona malunghana ni ku fa ka vona. Yehovha u byele Abrahama a ku: “Loko ku ri wena, u ta ya eka vatata wa wena hi ku rhula; u ta lahliwa u dyuharile swinene.” (Genesa 15:15) Yehovha u byele Muxe a ku: “Waswivo! U etlela ni vatata wa wena.” (Deteronoma 31:16) Malunghana na Davhida, tata wa Solomoni, Bibele yi ri: “Davhida a etlela ni vatata wakwe, kutani a lahliwa eMutini wa Davhida.” (1 Tihosi 2:10) Hikwalaho, xiga lexi nge ‘ku etlela ni vatata wa wena’ i ndlela yin’wana yo vula leswaku munhu u le Sheol.

Ku humelele yini hi Solomoni loko a fa? Bibele yi ri: “Masiku lawa Solomoni a fumeke eYerusalema, a fuma tiko hinkwaro ra Israyele a ku ri malembe ya 40. Hiloko Solomoni a etlela ni vatata wakwe, a lahliwa eMutini wa Davhida tata wakwe.” (1 Tihosi 11:42, 43) Hikwalaho, swi vonaka swi twala ku gimeta hileswaku Solomoni u le Sheol, kumbe eHayidesi, laha a nga ta pfuxiwa kona.

Xiboho lexi xi vula leswaku ni van’wana lava Matsalwa ma vulaka hi ku kongoma leswaku ‘va etlele ni vatata wa vona,’ va nga ha pfuxiwa. Entiyisweni, to tala ta tihosi leti tlhandlameke Solomoni, hambileswi a ti nga tshembekanga, ku vulavuriwa hi tona hi ndlela yoleyo. Leswi swa twala, hikuva “ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Ina, hi ta swi tiva kahle leswaku i vamani lava nga pfuxiwa endzhaku ka ku pfuxiwa ka “hinkwavo lava nga eka masirha-bako ya xitsundzuxo.” (Yohane 5:28, 29) Hikwalaho ematshan’weni yo nyikela nhlamulo leyi kongomeke malunghana ni ku pfuxiwa ka vanhu vo karhi va le minkarhini ya khale, hi ta rindza, hi tshembe xiboho xa Yehovha lexi hetisekeke.

[Nhlamuselo ya le hansi]

^ par. 4 Vona matluka 30-1 eka nkandziyiso wa Xihondzo xo Rindza xa June 1, 1988.