Nghena endzeni

Hundzela eka leswi nga endzeni

Yehovha U Sirhelela Vanhu Lava N’wi Tshembaka

Yehovha U Sirhelela Vanhu Lava N’wi Tshembaka

 Yehovha U Sirhelela Vanhu Lava N’wi Tshembaka

“Musa wa wena wa rirhandzu ni ntiyiso wa wena a swi ndzi hlayise nkarhi hinkwawo.”—PISALEMA 40:11.

1. I yini lexi Hosi Davhida a xi kombeleke eka Yehovha, naswona xikombelo xakwe xi hlamuriwa njhani enkarhini wa sweswi?

HOSI DAVHIDA la hanyeke le Israyele wa khale a a “tshemba Yehovha hi mbilu ya [yena] hinkwayo” naswona u susumeteleke ku vula leswaku Yehovha “u voyamisele ndleve yakwe eka [yena], a yingisa loko [a] kombela ku pfuniwa.” (Pisalema 40:1) U swi vone ko tala hi mahlo yakwe leswaku Yehovha wa va sirhelela vanhu lava va N’wi rhandzaka. Hi yona mhaka leyi Davhida a kombeleke leswaku Yehovha a n’wi hlayisa nkarhi hinkwawo. (Pisalema 40:11) Leswi a hlayiwaka exikarhi ka vavanuna ni vavasati vo tshembeka lava tshembisiweke “ku pfuxiwa ko antswa,” Davhida hi un’wana wa lava sweswi va nga emianakanyweni ya Yehovha naswona u ta yi kuma hakelo yoleyo leyi tshembisiweke. (Vaheveru 11:32-35) Vumundzuku bya yena byi tiyisekisiwe hi ku helela. Vito rakwe ri tsariwile eka “buku ya xitsundzuxo” ya Yehovha.—Malakiya 3:16.

2. Xana Matsalwa ma hi pfuna njhani ku twisisa leswi ku sirheleriwa hi Yehovha ku vulaka swona?

2 Hambileswi vanhu lava ku vulavuriwaka ha vona eka Vaheveru ndzima 11 va hanyeke Yesu Kreste a nga si ta emisaveni, va hanye hi ku pfumelelana ni leswi Yesu a swi dyondziseke loko a ku: “Loyi a rhandzaka moya-xiviri wakwe wa wu lovisa, kambe loyi a vengaka moya-xiviri wakwe emisaveni leyi u ta wu hlayisela vutomi lebyi nga heriki.” (Yohane 12:25) Xisweswo, swi le rivaleni leswaku ku sirheleriwa hi Yehovha a swi vuli swona leswaku munhu u huma emahlomulweni kumbe a nga ha xanisiwi. Kambe swi vula leswaku munhu u sirheleriwa hi tlhelo ra moya leswaku a kota ku tshama a tshembekile eka Xikwembu.

3. Hi byihi vumbhoni lebyi hi kombisaka leswaku Kreste Yesu u sirheleriwile hi Yehovha, naswona vuyelo byi ve byihi?

3 Yesu hi byakwe u xanisiwe hi tihanyi letikulu, a endliwa xihlekiso naswona valala vakwe va hetelele va swi kotile ku n’wi dlaya hi ndlela leyi nyumisaka ni leyi vavaka swinene. Kambe leswi a swi nga vuli swona leswaku Xikwembu a xi xi hetisisanga xitshembiso xa xona xa ku sirhelela Mesiya. (Esaya 42:1-6) Ku pfuxiwa ka Yesu hi siku ra vunharhu, endzhaku ka ku fa hi ndlela yoleyo leyi khomisaka tingana, ku kombisa leswaku Yehovha u xi twile xikombelo xakwe—hilaha a yingiseke xikombelo xa Davhida hakona. Hikwalaho, Yehovha u nyike Yesu matimba ya leswaku a tshama a tshembekile. (Matewu 26:39) Leswi a sirheleriweke, Yesu u swi kotile ku kuma vutomi lebyi nga heriki etilweni, naswona vanhu va timiliyoni lava va kombiseke ripfumelo eka gandzelo ra  yena na vona va ni ntshembo wo kuma vutomi lebyi heriki.

4. Hi xihi xitiyisekiso lexi nyikiwaka Vakreste lava totiweke ni “tinyimpfu tin’wana”?

4 Hi nga tiyiseka leswaku ni sweswi Yehovha wa swi rhandza naswona a nga swi kota ku sirhelela malandza yakwe hilaha a endleke hakona emasikwini ya Davhida ni ya Yesu. (Yakobo 1:17) Vamakwavo va Yesu va nga ri vangani lava va ha saleke laha misaveni, na vona va fanele va xi tshemba xitshembiso xa Yehovha lexi nge: “[Ndzhaka] leyi nga onhakiki ni leyi nga nyamangiki ni leyi nga vuniki. Mi vekeriwe yona ematilweni, n’wina lava hlayisiwaka hi matimba ya Xikwembu hi ripfumelo leswaku mi kuma ku ponisiwa loku lungheleke ku hlavuteriwa enkarhini wo hetelela.” (1 Petro 1:4, 5) “Tinyimpfu tin’wana,” leti nga ni ntshembo wa ku hanya laha misaveni, na tona ti fanele ti tshemba Xikwembu swin’we ni xitshembiso xa xona lexi vuriweke hi mupisalema, lexi nge: “Rhandzani Yehovha, n’wina hinkwenu lavo tshembeka vakwe. Yehovha wa n’wi hlayisa lowo tshembeka.”—Yohane 10:16; Pisalema 31:23.

Ku Sirheleriwa Hi Tlhelo Ra Moya

5, 6. (a) Xana vanhu va Xikwembu va sirheleriwa njhani eminkarhini ya namuntlha? (b) Xana vatotiwa va ni vuxaka bya njhani na Yehovha, naswona ku vuriwa yini hi lava va nga ni ntshembo wo hanya emisaveni?

5 Eminkarhini ya namuntlha, Yehovha u endle malunghiselelo yo sirhelela vanhu va yena hi tlhelo ra moya. Hambileswi a nga va sirheleliki eka nxaniso kumbe swiphiqo ni makhombo lama nga kona evuton’wini bya siku ni siku, ana se u va nyike mpfuno ni matimba lama lavekaka leswaku va kota ku sirhelela vuxaka bya vona bya risima na yena. Leswaku ku va ni vuxaka lebyi, va fanele va va ni ripfumelo eka lunghiselelo ra Xikwembu ra rirhandzu ra nkutsulo. Van’wana eka Vakreste lava vo tshembeka va totiwe hi moya wa Xikwembu leswaku va va vafumi-kulobye na Kreste ematilweni. Va vuriwe lava lulameke leswaku va va vana va Xikwembu va moya, naswona marito lawa ma kongomisiwe eka vona: “U hi kutsule eka vulawuri bya munyama kutani a hi hundzisela emfun’weni wa N’wana wa yena loyi a n’wi rhandzaka, loyi ha yena hi kumaka ku ntshunxiwa hi nkutsulo, ku rivaleriwa ka swidyoho swa hina.”—Vakolosa 1:13, 14.

6 Timiliyoni tin’wana ta Vakreste vo tshembeka na tona ta tiyisekisiwa leswaku ti nga vuyeriwa eka lunghiselelo leri endliweke hi Xikwembu ra nkutsulo. Ha hlaya: “N’wana wa munhu a nga telanga ku tirheriwa, kambe u tele ku tirhela ni ku nyikela moya-xiviri wakwe wu va nkutsulo wa lavo tala.” (Marka 10:45) Vakreste lava va langutele ku kuma “ntshunxeko lowu vangamaka wa vana va Xikwembu” enkarhini lowu taka. (Varhoma 8:21) Enkarhini wa sweswi, va byi tlangela swinene vuxaka lebyi va nga na byona ni Xikwembu naswona va tikarhata swinene leswaku va byi tiyisa.

7. Xana Yehovha u va sirhelela njhani vanhu vakwe namuntlha, hi tlhelo ra moya?

7 Ndlela yin’wana leyi Yehovha a sirhelelaka vumoya bya vanhu vakwe ha yona i ku va endlela nongonoko wa leswaku va hamba va kuma ndzetelo. Leswi swi endla leswaku va ya va kuma vutivi lebyi kongomeke bya ntiyiso. Yehovha u tlhela a  va kongomisa hi ku tirhisa Rito rakwe, nhlengeletano yakwe ni moya wakwe wo kwetsima. Hi ku kongomisiwa hi “hlonga ro tshembeka ni ro tlhariha,” vanhu va Xikwembu emisaveni hinkwayo va hundzuke ndyangu lowu hlanganisaka vanhu va matiko hinkwawo. Ntlawa wa hlonga wu khathalela swilaveko swa vona swa moya naswona loko swi laveka wu tlhela wu khathalela ni swilaveko swa nyama swa ndyangu lowu vumbiwaka hi malandza ya Yehovha—ku nga khathariseki leswaku i va tiko rihi kumbe xiyimo xa vona xi njhani.—Matewu 24:45.

8. I yini lexi kombisaka leswaku Yehovha wa va tshemba vanhu vakwe lava tshembekaka, naswona u va tshembisa yini?

8 Tanihi leswi Yehovha a nga n’wi sirhelelangiki Yesu eka nhlaselo wa valala vakwe, ni Vakreste namuntlha A nga va sirheleli. Kambe leswi a swi vuli swona leswaku Xikwembu a xi va rhandzi. A swi tano nikatsongo! Kambe swi tiyisekisa leswaku xa va tshemba swinene ni leswaku va ta yima etlhelweni ra xona eka mphikamakaneta leyi nga kona ya vuako hinkwabyo. (Yobo 1:8-12; Swivuriso 27:11) Yehovha a nge va tshiki lava tshembekeke eka yena, “hikuva Yehovha u rhandza vululami, naswona a nge va siyi lava tshembekeke vakwe. Kunene va ta rindziwa hilaha ku nga riki na makumu.”—Pisalema 37:28.

Ku Sirheleriwa Hi Musa Wa Rirhandzu Ni Ntiyiso

9, 10. (a) Xana ntiyiso wa Yehovha wu va sirhelela njhani vanhu vakwe? (b) Xana Bibele yi swi kombisa njhani leswaku Yehovha u sirhelela vanhu vakwe lava tshembekaka hi ku tirhisa musa wakwe wa rirhandzu?

9 Eka xikhongelo xakwe lexi tsariweke eka Pisalema 40, Davhida u kombele leswaku musa wa rirhandzu wa Yehovha swin’we ni ntiyiso swi n’wi sirhelela. Ntiyiso wa Yehovha ni ku rhandza ka yena vululami, swi endla leswaku a hi hlamusela kahle leswi a swi languteleke eka hina. Lava va hanyaka hi milawu leyi va sirheleleka hi mpimo wo karhi eka maxangu, minchavo ni swiphiqo leswi vanhu lava va honisaka milawu leyi va langutanaka na swona. Hi xikombiso, hina ni varhandziwa va hina hi nga sirheleleka eka swiphiqo swo tala leswi khomisaka vanhu gome, loko hi papalata swidzidzirisi ni ku nwa ngopfu byala, ku tikhoma ko biha hi tlhelo ra rimbewu ni ku papalata ku va ni rigombo. Hambi ku ri lava va hambukaka endleleni ya Yehovha ya ntiyiso—hilaha Davhida a tshameke a endla hakona—va tiyisekisiwa leswaku Xikwembu xa ha ri “vutumbelo” eka vadyohi lava hundzukaka. Vanhu vo tano va nga huwelela hi ku tsaka va ku: “U ta ndzi hlayisa emaxangwini.” (Pisalema 32:7) Vona ndlela leyi musa wa rirhandzu wa Xikwembu wu hlamuseriwaka kahle ha yona!

10 Xikombiso xin’wana xa musa wa rirhandzu wa Xikwembu hileswi xi tsundzuxaka malandza ya xona leswaku ma tihambanisa ni misava leyi yo biha leyi nga ta herisiwa ku nga ri khale. Ha hlaya: “Mi nga rhandzi misava kumbe swilo leswi nga emisaveni. Loko mani na mani a rhandza misava, rirhandzu ra Tatana a ri kona eka yena; hikuva hinkwaswo leswi nga emisaveni—ku navela ka nyama ni ku navela ka mahlo ni ku bombisa rifuwo ra munhu ra vutomi—a swi humi eka Tatana, kambe swi huma emisaveni.” Loko ho yingisa xilemukiso lexi, hi ta va hi sirhelela vutomi bya  hina hilaha ku nga heriki, hikuva ndzimana leyi loko yi ya emahlweni yi ri: “Ku tlula kwalaho, misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yohane 2:15-17.

Ku Sirheleriwa Hi Vuswikoti Byo Ehleketa, Ku Twisisa Ni Vutlhari

11, 12. Hlamusela ndlela leyi vuswikoti byo ehleketa, ku twisisa ni vutlhari swi hi sirhelelaka ha yona.

11 Leswaku a pfuna lava navelaka ku amukeriwa hi Xikwembu, Solomoni n’wana wa Davhida u huhuteriwe ku tsala a ku: “Vuswikoti byo ehleketa byi ta ku rindza, ku twisisa ku ta ku hlayisa.” U tlhele a khongotela a ku: “Kuma vutlhari . . . U nga byi tshiki, byi ta ku hlayisa. Byi rhandze, byi ta ku sirhelela.”—Swivuriso 2:11; 4:5, 6.

12 Hi tirhisa vuswikoti byo ehleketa loko hi anakanyisisa hi leswi hi swi hlayaka eRitweni ra Xikwembu. Ku endla sweswo swi hi pfuna leswaku hi twisisa swilo kahle kutani hi kota ku rhangisa swilo swa nkoka emahlweni. Leswi i swa nkoka, tanihi leswi vo tala va hina hi swi tivaka—kumbexana hi ntokoto—leswaku swiphiqo swi va kona loko vanhu va rhangisa swilo leswi hoxeke emahlweni hi vomu kumbe hi xihoxo. Misava ya Sathana yi hi khutaza leswaku hi hisekela rifuwo, ndhuma ni vulawuri, kasi Yehovha yena u hi khutaza leswaku hi rhangisa swilo swa moya, hikuva hi swona swi nga swa nkoka. Loko swilo swa moya swi nga rhangisiwi, mindyangu ya hohloka, vunghana bya hela ni tipakani ta moya ti helela empfhukeni. Leswi swi nga ha endla munhu a tikuma a langutane ni leswi Yesu a swi vuleke loko a ku: “Xana munhu swi nga n’wi pfuna yini ku pindzula misava hinkwayo kambe a lahlekeriwa hi moya-xiviri wakwe?” (Marka 8:36) Vutlhari byi lava leswaku hi yingisa ndzayo ya Yesu leyi nge: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo mi ta engeteleriwa swona.”—Matewu 6:33.

Khombo Ra Vutianakanyi

13, 14. Xana ku va ni vutianakanyi swi vula yini, naswona ha yini sweswo ku ri vuhunguki?

13 Munhu hi ntumbuluko wa tirhandza. Kambe, loko a rhangisa swilaveko swa yena ni ku navela ka yena emahlweni, ku va ni swiphiqo. Xisweswo, leswaku hi tshama hi ri ni vuxaka na yena, Yehovha u hi byela leswaku hi papalata vutianakanyi. Rito leri ri vula “ku karhateka ntsena hi ku navela ka wena n’wini, swilaveko swa wena kumbe swilo leswi vuyerisaka wena ntsena.” Xana nhlamuselo leyi a yi va faneli vanhu vo tala namuntlha? Lexi xiyekaka, Bibele yi vula leswaku “emasikwini yo hetelela” ya mafambiselo yo biha ya Sathana, “vanhu va ta va lava tirhandzaka,” kumbe va ta va ni vutianakanyi.—2 Timotiya 3:1, 2.

 14 Vakreste va swi tiva leswaku i vutlhari ku yingisa xileriso xa Bibele xa leswaku va khathalela swilaveko swa vanhu van’wana, va va rhandza kukota loko va tirhandza. (Luka 10:27; Vafilipiya 2:4) Vanhu van’wana va nga ha anakanya leswaku leswi a swi nge tirhi, kambe swa laveka leswaku hi swi endla loko hi lava ku va ni vukati lebyi humelelaka, vuxaka lebyinene endyangwini ni vunghana lebyi tsakisaka. Hikwalaho, nandza wa ntiyiso wa Yehovha a nga tshuki a pfumelela ku tirhandza ku n’wi endla a honisa swilo swa nkoka. Ngopfu-ngopfu leswi swi vula ku rhangisa swilo leswi khumbaka Yehovha, Xikwembu lexi hi xi gandzelaka.

15, 16. (a) Xana vutianakanyi byi nga vanga yini, naswona leswi swi endleke eka mani? (b) Entiyisweni, xana munhu u va a endla yini loko a hatlisela ku avanyisa van’wana?

15 Vutianakanyi byi nga endla munhu a tivona a lulamile ku tlula vanhu van’wana, naswona leswi swi nga n’wi endla a va ni mianakanyo yo khuma, a tinavelela swa le henhla. Bibele yi swi veka kahle loko yi ku: “A wu swi koti ku tiyimelela, wena munhu loko u avanyisa, ku nga khathariseki leswaku u mani; hikuva eka xilo lexi u avanyisaka un’wana ha xona wa tigweva, tanihi leswi wena loyi u avanyisaka u hanyaka hi ku endla swilo sweswo.” (Varhoma 2:1; 14:4, 10) Varhangeri va vukhongeri va le sikwini ra Yesu a va khorwiseka swinene leswaku va lulamile lerova a va tivona va faneleka ku sola Yesu ni valandzeri vakwe. Xiendlo lexi xa vona xi kombisa leswaku a va tiendla vaavanyisi. Leswi a va nga swi koti ku vona swihoxo swa vona, a va tiavanyisa hi voxe.

16 Yudasi, mulandzeri wa Yesu, la n’wi xengeke, u tiendle muavanyisi wa vanhu van’wana. Le Betaniya, loko Mariya, makwavo wa Lazaro, a tota Yesu hi mafurha lama nun’hwelaka kahle, Yudasi u ringete ku n’wi tshikisa. U kombise ku hlundzuka ka yena hi ku vula a ku: “Ha yini mafurha lawa yo nun’hwela ma nga xavisiwanga hi tidenari ta 300 kutani ti nyikiwa swisiwana?” Kambe rungula ri ya emahlweni ri ku: “Hambiswiritano, leswi a nga swi vulanga hi ku va a khathala hi swisiwana, kambe hikuva a a ri khamba naswona a a tamela bokisi ra mali, a a tshamela ku pambula timali leti a ti nghenisiwa kona.” (Yohane 12:1-6) Hi nga tshuki hi fana na Yudasi kumbe varhangeri va vukhongeri, lava va hatliselaka ku avanyisa van’wana, kambe va hetelela va tiavanyisile hi voxe.

17. Kombisa khombo leri vangiwaka hi moya wa ku titiva kumbe wa ku titshemba ku tlula mpimo.

17 Lexi vavisaka, Vakreste van’wana va lembe-xidzana ro sungula, hambileswi a va nga ri makhamba ku fana na Yudasi, a va ri ni moya wa ku tikukumuxa, moya wa ku titiva. Loko a vulavula ha vona Yakobo u te: “Mi tinyungubyisa hi ku tikurisa ka n’wina ka manyunyu.” Kutani a engetela a ku: “Ku tinyungubyisa ko tano hinkwako ku hombolokile.” (Yakobo 4:16) Ku tibuma hi leswi hi swi endleke kumbe hi malunghelo lawa hi nga na wona entirhweni wa Yehovha a swi nge hi yisi kule. (Swivuriso 14:16) Hi tsundzuka leswi nga endleka eka muapostola Petro, loyi hi ku titshemba a tibumeke a ku: “Hambiloko hinkwavo va nga khunguvanyeka mayelana na wena, mina a ndzi nge pfuki ndzi khunguvanyekile! . . . Hambiloko ndzi fanela ku fa na wena, a ndzi nge ku ali nikatsongo.” Kahle-kahle a hi na xivangelo ni xin’we xa ku tibuma. Xin’wana ni xin’wana lexi hi nga na xona hi xi kume hikwalaho ka musa wa rirhandzu wa Yehovha. Ku tshama hi ri karhi hi tsundzuka leswi, swi ta hi endla leswaku hi papalata moya wa ku titiva.—Matewu 26:33-35, 69-75.

18. Xana Yehovha u titwa njhani hi ku tikukumuxa?

18 Hi byeriwa leswi: “Ku tinyungubyisa ku le kusuhi ni ku wa, ni moya lowu titlakusaka wu le kusuhi ni ku khunguvanyeka.” Ha yini? Yehovha wa hlamula: “Ndzi swi vengile ku titlakusa [ni] ku tinyungubyisa.” (Swivuriso 8:13; 16:18) Hi yona mhaka leyi Yehovha a hlundzukeke swinene loko a vona “ku tikurisa ka mbilu ka hosi ya Asiriya ni  ku tikurisa ka mahlo yakwe yo tlakuka”! (Esaya 10:12) Yehovha u n’wi xupurile. Ku nga ri khale, misava ya Sathana swin’we ni varhangeri va yona lava tikukumuxaka, lava vonakalaka ni lava nga vonakariki, va ta xupuriwa na vona. Onge hi nga papalata langutelo leri valala va Yehovha va nga na rona!

19. Xana vanhu va Xikwembu va tinyungubyisa hi ndlela yihi, naswona ha yini va titsongahata?

19 Vakreste va ntiyiso va fanele va tinyungubyisa hi leswi va nga malandza ya Yehovha. (Yeremiya 9:24) Hi nkarhi lowu fanaka va fanele va titsongahata minkarhi hinkwayo. Ha yini? Hikuva “hinkwavo va dyohile, naswona va kayivela ku vangama ka Xikwembu.” (Varhoma 3:23) Kutani ke, leswaku hi tshama hi ri malandza ya Yehovha, hi fanele hi titwa ku fana na Pawulo la nga vula leswaku “Kreste Yesu u tile emisaveni leswaku a ta ponisa vadyohi,” kutani a engetela a ku: “Eka vona ndzi le mahlweni.”—1 Timotiya 1:15.

20. Xana Yehovha u va sirhelela njhani vanhu vakwe sweswi naswona u ta va sirhelela njhani enkarhini lowu taka?

20 Leswi vanhu va Yehovha hi ntsako va vekelaka swilaveko swa vona etlhelo leswaku va ta kota ku rhangisa swilaveko swa Xikwembu, hi nga tiyiseka leswaku Yehovha u ta hambeta a sirhelela vumoya bya vona. Na hina hi nga tiyiseka leswaku loko nhlomulo lowukulu wu sungula, Yehovha u ta va sirhelela vanhu vakwe ku nga ri hi tlhelo ra moya ntsena kambe ni ra nyama. Loko va nghena emisaveni leyintshwa ya Xikwembu, va ta swi kota ku vula va ku: “Maswivo! Lexi i Xikwembu xa hina. Hi tshembe xona, naswona xi ta hi ponisa. Loyi i Yehovha. Hi tshembe yena. A hi tsakeni, hi tsakela ku ponisiwa hi yena.”—Esaya 25:9.

Wa Tsundzuka Xana?

• Xana Hosi Davhida na Yesu Kreste va sirheleriwe njhani?

• Xana vanhu va Yehovha namuntlha va sirheleriwa njhani?

• Ha yini hi fanele hi papalata ku rhangisa swilaveko swa hina?

• Hi nga swi kotisa ku yini ku tinyungubyisa kambe hi nkarhi lowu fanaka hi ri lava titsongahataka?

[Swivutiso Swa Dyondzo]

[Swifaniso leswi nga eka tluka 9]

Xana Yehovha u sirhelele Davhida na Yesu hi ndlela yihi?

[Swifaniso leswi nga eka tluka 10, 11]

Xana vanhu va Xikwembu va sirheleriwa njhani hi tlhelo ra moya namuntlha?

[Swifaniso leswi nga eka tluka 12]

Hambileswi hi tinyungubyisaka hi ku tirhela Yehovha, hi fanele hi titsongahata minkarhi hinkwayo