Nghena endzeni

Hundzela eka leswi nga endzeni

Ku Lavisisa Lava Fanelekaka eMatiko-xikaya Ya Le Australia

Ku Lavisisa Lava Fanelekaka eMatiko-xikaya Ya Le Australia

 Xiviko Xa Vahuweleri Va Mfumo

Ku Lavisisa Lava Fanelekaka eMatiko-xikaya Ya Le Australia

XIPHEMU lexikulu xa tiko ra Australia xi tiveka tanihi tiko-xikaya. Se ku hundze malembe ya 12 ku nga si chumayeriwa eswiphen’wini swin’wana swa ndhawu leyi. Kutani Timbhoni ta Yehovha ta le Darwin, ku nga ntsindza wa Xifundzha xa le N’walungwini, ti hlele tsima ro chumayela ra masiku ya kaye, ti lava vanhu lava fanelekaka.—Matewu 10:11.

Tsima leri ri hleriwe ka ha sele tin’hweti ta 12, naswona a ri katsa ku endliwa ka mimepe ya ndhawu leyi tlulaka 800 000 wa swikwere-khilomitara—ku nga ndhawu leyi New Zealand yi nghenaka kanharhu eka yona. Leswaku u vona ndlela leyi ndhawu leyi yi nga yikulu ha yona, anakanya hi purasi ra tihomu leri swi tekaka 30 wa tikhilomitara ku suka ehekeni ku ya laha yindlu ya n’wini wa rona yi nga kona! Tlhandlakambirhi, swi nga ha teka 300 wa tikhilomitara kumbe ku tlula loko u suka eka purasi rin’wana u ya eka rin’wana.

Timbhoni ta 145 ti hlanganyerile etsimeni leri. Tin’wana a ti huma ekule swinene tanihi le Tasmania. Tin’wana ti te hi mimovha leyi kokaka hi mavhilwa ya mune ti rhwele nhundzu yo tala leyi a ti ta yi tirhisa eriendzweni, tiphatsi ta movha ni petirolo. Tin’wana a ti rhwale nhundzu ya tona eswigolonyanini. Ku engetela kwalaho, swibazana swimbirhi leswi layichaka vanhu va 22 swi hiriwile leswaku swi rhwala lava nga riki na mimovha leyi kokaka hi mavhilwa mambirhi leyi lavekaka kwalaho. Lava a va famba hi swibazana a va chumayela vaaki lava tshamaka eswidorobanini etindhawini to karhi.

Loko va nga si suka, vamakwerhu va hlele tinkulumo ni minkombiso leswaku va kombisa ndlela yo chumayela mahungu lamanene ensin’wini leyi nga tolovelekangiki. Hi xikombiso, leswaku munhu a swi kota ku va chumayela kahle vanhu lava davukeke kwalaho lava vuriwaka Ma-aborigine, a swi lava a tolovelana ni mahanyelo ya vona ni ku tiva mindhavuko ya vona. Ku tlhele ku buriwa ni hi timhaka ta mbango leswaku ku sirheleriwa swiharhi swa nhova.

Ku ve ni mintokoto yo tala leyi tsakisaka. Hi xikombiso, endhawini yin’wana ya Ma-aborigine,  vamakwerhu va endle malunghiselelo yo nyikela nkulumo ya le rivaleni leyi sekeriweke eBibeleni. Ndhuna ya wansati ya muganga wolowo yi tirhwale hi yoxe yi ya tivisa vanhu hi ta nkulumo leyi. Endzhaku ka sweswo, tibuku ta 5 ni tibroxara ta 41 ti fambiseriwe vanhu lava a va ri kona. Endhawini yin’wana ku burisaniwe ni Mu-aborigine. Yena a a ri ni Bibele yakwe ya King James Version, kambe a yi ri ya khale naswona a yi hlakarile. Loko a vutisiwile loko a ri tiva vito ra Xikwembu, u hlamule a ku ina, kutani a humesa nkandziyiso wa khale wa Xihondzo xo Rindza exikhwameni xa baji rakwe. U hlaye eka magazini lowu, a tshaha Marka 12:30, leyi nge: “U fanele u rhandza Yehovha Xikwembu xa wena hi mbilu ya wena hinkwayo.” U te, “Ndzi ri rhandza ngopfu tsalwa leri.” Endzhaku ko burisana na yena hi vuenti hi Bibele, u amukele Bibele leyintshwa ni tibuku tin’wana leti sekeriweke eBibeleni.

Ekusuhi ni Nsonga-nkulu wa Carpentaria, foromani yin’wana ya purasi ra tihomu leri endlaka 400 000 wa tihekitara yi tsakele rungula ra Mfumo. Loko yi kombiwe Buku Yanga Ya Timhaka Ta Bibele ni buku leyi nge Vutivi Lebyi Yisaka eVuton’wini Lebyi Nga Heriki, * yi vutisile loko ti kumeka hi Xikriol. Xivutiso lexi a xi hlamarisa hikuva hambileswi Ma-aborigine yo tala a ma vulavula Xikriol, a hi mangani lawa a ma kota ku hlaya. Ku kumeke leswaku vatirhi hinkwavo va 50 epurasini rero a va kota ku hlaya Xikriol. Foromani a yi tsake ngopfu ku kuma minkandziyiso ya Bibele hi Xikriol, naswona yi nyike vamakwerhu nomboro ya yona ya riqingho leswaku yi kota ku foneriwa.

Emasikwini wolawo ya kaye yo chumayela hi rixaladza, ku fambisiwe Tibibele ta 120, tibuku ta 770, timagazini ta 705 ni tibroxara ta 1 965. Ku engetela kwalaho, ku endliwe maendzo yo vuyela ya 720 kutani ku sunguriwa tidyondzo ta Bibele ta 215.

Hakunene torha ra moya ra vanhu lava tsalanganeke endhawini yoleyo leyikulu ri timuriwile.—Matewu 5:6.

[Nhlamuselo ya le hansi]

^ par. 8 Ti kandziyisiwe hi Timbhoni ta Yehovha.

[Mepe lowu nga eka tluka 30]

(Leswaku u vona rungula leri hleriweke hi ku helela, vona nkandziyiso wa kona)

AUSTRALIA

XIFUNDZHA XA LE N’WALUNGWINI

Darwin

Nsonga- nkulu Wa Carpentaria

Sydney

TASMANIA