Nghena endzeni

Hundzela eka leswi nga endzeni

“Mi Xaviwile Hi Nxavo”

“Mi Xaviwile Hi Nxavo”

 “Mi Xaviwile Hi Nxavo”

“Mi xaviwile hi nxavo. Vangamisani Xikwembu swinene.”—1 VAKORINTO 6:20.

1, 2. (a) Hi ku ya hi Nawu wa Muxe, xana mahlonga ya Vaisrayele a ma fanele ma khomiwa njhani? (b) I yini lexi hlonga leri a ri rhandza n’wini wa rona a ri ta hlawula ku xi endla?

“VUHLONGA a byi tolovelekile naswona a byi amukeriwa swinene emisaveni ya khale,” ku vula Holman Illustrated Bible Dictionary. Ya engetela: “Ikhonomi ya le Egipta, Greece ni le Rhoma a yi titshege hi ntirho wa mahlonga. Hi lembe-xidzana ro sungula ra Vukreste, munhu un’we eka vanharhu eItaly ni munhu un’we eka va ntlhanu ematikweni man’wana a a ri hlonga.”

2 Hambileswi vuhlonga a byi ri kona eIsrayele wa khale, Nawu wa Muxe a wu tiyisekisa leswaku mahlonga ya Vaheveru ma sirheleriwa. Hi xikombiso, Nawu a wu lava leswaku Muisrayele a va hlonga malembe ya tsevu ntsena. Hi lembe ra vunkombo, a a pfumeleriwa ku “huma [a] ntshunxekile, [a] nga rihanga nchumu.” Kambe milawu leyi khumbaka ndlela leyi mahlonga a ma fanele ma khomiwa ha yona a yi lulamile yi tlhela yi kombisa ntwela-vusiwana lerova Nawu wa Muxe wu endle lunghiselelo leri landzelaka: “Loko hlonga ro vula hi ku sindzisa ri ku, ‘Entiyisweni ndzi rhandza n’wini wanga, nsati wanga ni vana vanga; a ndzi lavi ku huma ndzi ntshunxekile,’ n’wini wa rona u ta ri tshineta ekusuhi ni Xikwembu xa ntiyiso naswona u ta ri yimisa ri khegetela nyangwa kumbe rimba ra nyangwa; n’wini wa rona u ta ri boxa ndleve hi risungunu, kutani ri ta va hlonga ra yena hilaha ku nga riki na makumu.”—Eksoda 21:2-6; Levhitika 25:42, 43; Deteronoma 15:12-18.

3. (a) Vakreste va lembe-xidzana ro sungula va amukele vuhlonga bya muxaka muni? (b) I yini lexi hi susumetelaka ku tirhela Xikwembu?

3 Lunghiselelo ra ku va hlonga hi ku tirhandzela a ku ri xikombiso xa muxaka wa vuhlonga lowu Vakreste va ntiyiso va nga le hansi ka byona. Hi xikombiso, vatsari va Bibele vo tanihi Pawulo, Yakobo, Petro na Yudha va tivule mahlonga ya Xikwembu ni ya Kreste. (Tito 1:1; Yakobo  1:1; 2 Petro 1:1; Yudha 1) Pawulo u tsundzuxe Vakreste va le Tesalonika leswaku va ‘hundzukele eka Xikwembu va suka eswifanisweni swa vona swa hava leswaku va va mahlonga ya Xikwembu lexi hanyaka ni xa ntiyiso.’ (1 Vatesalonika 1:9) I yini lexi susumeteleke Vakreste volavo leswaku va va mahlonga ya Xikwembu hi ku tirhandzela? Kahle-kahle, i yini lexi a xi susumeta hlonga ra Muisrayele ku tshika ntshunxeko wa rona? Xana a ku nga ri ku rhandza n’wini wa rona? Vuhlonga bya Vukreste byi sekeriwe eka ku rhandza Xikwembu. Loko hi sungula ku tiva ni ku rhandza Xikwembu xa ntiyiso lexi hanyaka, hi susumeteleka ku xi tirhela hi “mbilu ya [hina] hinkwayo ni hi moya-xiviri wa [hina] hinkwawo.” (Deteronoma 10:12, 13) Kambe, swi katsa yini ku va mahlonga ya Xikwembu ni ya Kreste? Xana leswi swi byi khumba njhani vutomi bya hina bya siku ni siku?

“Endlani Hinkwaswo Leswaku Mi Vangamisa Xikwembu”

4. Hi va mahlonga ya Xikwembu ni ya Kreste hi ndlela yihi?

4 Hlonga ri hlamuseriwa tanihi “munhu la nga ehansi ka munhu kumbe vanhu vo karhi hi ku ya hi nawu naswona u boheka ku yingisa hi ku hetiseka.” Hi va ehansi ka Yehovha hi nawu loko hi nyiketela vutomi bya hina eka yena kutani hi khuvuriwa. Muapostola Pawulo wa hlamusela: “A mi tifumi, hikuva mi xaviwile hi nxavo.” (1 Vakorinto 6:19, 20) Ina, nxavo wolowo i gandzelo ra nkutsulo ra Yesu Kreste, tanihi leswi Xikwembu xi hi amukelaka tanihi malandza ya xona exisekelweni xa rona, ku nga khathariseki leswaku hi Vakreste lava totiweke kumbe hi vanakulobye va vona lava nga ni ntshembo wa laha misaveni. (Vaefesa 1:7; 2:13; Nhlavutelo 5:9) Hikwalaho, loko hi khuvuriwa, “hi va Yehovha.” (Varhoma 14:8) Tanihi leswi hi xaviweke hi ngati ya risima ya Yesu Kreste, na hina hi va mahlonga naswona hi boheka ku hlayisa swileriso swakwe.—1 Petro 1:18, 19.

5. Tanihi mahlonga ya Yehovha, i vutihlamuleri byihi bya nkoka lebyi hi nga na byona, naswona hi nga byi hetisisa njhani?

5 Mahlonga ma fanele ma yingisa n’wini wa wona. Hi ve mahlonga hi ku tirhandzela naswona hi susumeteriwe hi ku rhandza N’wini wa hina. Yohane wo Sungula 5:3 yi ri: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” Hikwalaho, eka hina ku yingisa i vumbhoni bya rirhandzu ra hina swin’we ni ku titsongahata ka hina. Swi tikomba eka nchumu wun’wana ni wun’wana lowu hi wu endlaka. Pawulo u  te: “Hambi mi dya kumbe mi nwa kumbe mi endla yini na yini, endlani hinkwaswo leswaku mi vangamisa Xikwembu.” (1 Vakorinto 10:31) Eka xin’wana ni xin’wana lexi hi xi endlaka siku ni siku, hambi xi ri xitsongo, hi lava ku kombisa leswaku hi “mahlonga ya Yehovha.”—Varhoma 12:11.

6. Ku va mahlonga ya Xikwembu swi swi khumba njhani swiboho leswi hi swi endlaka evuton’wini? Endla xikombiso.

6 Hi xikombiso, loko hi endla swiboho hi fanele hi anakanyisisa swinene hi ku rhandza ka N’wini wa hina wa le tilweni, Yehovha. (Malakiya 1:6) Swiboho swo tika swi nga ringa ku yingisa ka hina Xikwembu. Kutani xana hi ta yingisa ndzayo ya xona ematshan’weni yo landzela mboyamelo wa mbilu ya hina leyi ‘kanganyisaka’ yi tlhela yi va “ni khombo”? (Yeremiya 17:9) Melisa, Mukreste la nga tekiwangiki, a a ha ku khuvuriwa loko jaha rin’wana ri sungula ku n’wi gangisa. A ri tikomba ri ri munhu lonene, naswona se a a ri dyondza Bibele ni Timbhoni ta Yehovha. Nilokoswiritano, nkulu un’wana u vulavule na Melisa malunghana ni vutlhari byo landzela xileriso xa Yehovha xo tekiwa “eHosini ntsena.” (1 Vakorinto 7:39; 2 Vakorinto 6:14) Melisa wa pfumela: “A swi nga ndzi oloveli ku landzela xitsundzuxo lexi. Kambe ndzi endle xiboho xa leswaku leswi se a ndzi tinyiketerile eka Xikwembu leswaku ndzi endla ku rhandza ka xona, a ndzi ta yingisa swileriso swa xona leswi nga erivaleni.” Loko a hlamusela leswi humeleleke, u ri: “Ndza tsaka hileswi ndzi landzeleke xitsundzuxo lexi. Jaha leri ri vuye ri tshika ku dyondza. Loko a ndzi lo pfumela ku rhandzana na rona, sweswi a ndzi ta va ndzi tekiwe hi munhu la nga riki mupfumeri.”

7, 8. (a) Ha yini hi nga fanelanga hi karhateka swinene hi ku tsakisa vanhu? (b) Kombisa ndlela leyi ku chava vanhu ku nga hluriwaka ha yona.

7 Leswi hi nga mahlonga ya Xikwembu, a hi fanelanga hi va mahlonga ya vanhu. (1 Vakorinto 7:23) I ntiyiso, a nga kona eka hina la nga swi laviki ku rhandziwa, kambe hi fanele hi tsundzuka leswaku Vakreste va ni mimpimanyeto leyi hambaneke ni ya misava. Pawulo u vutisile: “Xana ndzi lava ku tsakisa vanhu?” U gimete hi ku: “Loko a ndza ha tsakisa vanhu, a ndzi nga ta va hlonga ra Kreste.” (Vagalatiya 1:10) A hi nge pfumeleli ku tshikileriwa hi tintangha kutani hi tsakisa vanhu. Kutani, hi nga endla yini loko hi langutane ni ntshikilelo wa leswaku hi endla swo karhi?

8 Xiya xikombiso xa Elena, ku nga Mukreste la ha riki muntshwa wa le Spain. Vanhu vo hlayanyana lava a a nghena na vona xikolo a va nyikela  hi ngati. A va swi tiva leswaku Elena, loyi a a ri Mbhoni ya Yehovha a a nga ta nyikela hi ngati kumbe ku pfumela ku pomperiwa ngati. Loko a pfulekeriwe hi nkarhi wa ku hlamusela vonelo ra yena emahlweni ka tlilasi hinkwayo, Elena u nyikele nkulumo. Elena u ri: “Entiyisweni, a ndzi chuhile. Kambe ndzi lunghiselele kahle, naswona vuyelo bya kona a byi hlamarisa. Ndzi sungule ku xiximiwa hi swichudeni-kulorhi swo tala, naswona mudyondzisi wa mina u ndzi byele leswaku wa wu tsakela ntirho lowu a ndzi wu endla. Ku tlula kwalaho, ndzi titwe ndzi enerisekile leswi ndzi lweleke vito ra Yehovha naswona ndzi koteke ku swi hlamusela kahle swivangelo swa ku seketela ka mina Matsalwa.” (Genesa 9:3, 4; Mintirho 15:28, 29) Ina, tanihi mahlonga ya Xikwembu ni ya Kreste, hi hambanile ni misava. Hambiswiritano, hi ta xiximiwa hi vanhu loko hi tshama hi lunghekele ku lwela tidyondzo ta hina hi xichavo.—1 Petro 3:15.

9. Hi dyondza yini eka ntsumi leyi humeleleke eka muapostola Yohane?

9 Ku tsundzuka leswaku hi mahlonga ya Xikwembu swi nga tlhela swi hi pfuna leswaku hi hambeta hi titsongahata. Hi nkarhi wun’wana, muapostola Yohane u tsakisiwe swinene hi xivono lexi hlamarisaka xa Yerusalema wa le tilweni lerova a wela ehansi a gandzela emahlweni ka milenge ya ntsumi leyi a yi ri muvulavuleri wa Xikwembu. Ntsumi yi n’wi byele leswi: “Tivonele! U nga endli sweswo! Mina ndzo va hlonga-kuloni swin’we ni vamakwenu lava nga vaprofeta ni lava hlayisaka marito ya buku-nsongwa leyi. Gandzela Xikwembu.” (Nhlavutelo 22:8, 9) Mawaku xikombiso lexinene lexi ntsumi yi xi vekeleke mahlonga hinkwawo ya Xikwembu! Vakreste van’wana va nga ha va va ri ni vutihlamuleri byo hlawuleka evandlheni. Nilokoswiritano, Yesu u te: “Mani na mani la lavaka ku va lonkulu exikarhi ka n’wina u fanele ku va mutirheli wa n’wina, naswona mani na mani la lavaka ku va wo sungula exikarhi ka n’wina u fanele ku va hlonga ra n’wina.” (Matewu 20:26, 27) Leswi hi nga valandzeri va Yesu, hinkwerhu hi mahlonga.

“Leswi Hi Nga Swi Endla Hi Leswi A Hi Fanele Ku Swi Endla”

10. Nyika swikombiso swa le Matsalweni leswi kombisaka leswaku malandza lama tshembekaka ya Xikwembu a swi nga ma oloveli minkarhi hinkwayo ku endla ku rhandza ka xona.

10 A hi minkarhi hinkwayo swi va olovelaka vanhu lava nga hetisekangiki ku endla ku rhandza ka Xikwembu. Muprofeta Muxe a a kanakana ku yingisa loko Yehovha a n’wi kombela ku famba a ya humesa vana va Israyele evuhlongeni bya le Egipta. (Eksoda 3:10, 11; 4:1, 10) Loko Yonasi a kuma xiavelo xo ya twarisa rungula ra ku avanyisiwa ka vanhu va le Ninivha, u “pfuk[e], a baleka emahlweni ka Yehovha a ya eTaraxixi.” (Yonasi 1:2, 3) Baruku, matsalana wa muprofeta Yeremiya, u rile hileswaku u karhele. (Yeremiya 45:2, 3) Hi fanele hi endla yini loko ku navela ka hina ku lwisana ni ku endla ku rhandza ka Xikwembu? Xikombiso lexi nyikeriweke hi Yesu xi na nhlamulo.

11, 12. (a) Hi ku komisa hlamusela xifaniso xa Yesu lexi kumekaka eka Luka 17:7-10. (b) Hi dyondza yini exifanisweni xa Yesu?

11 Yesu u vulavule hi hlonga leri a ri risa ntlhambi wa n’wini wa rona siku hinkwaro emasin’wini. Loko hlonga leri ri fika ekaya, ri karhele endzhaku ko tirha hi matimba tiawara ta kwalomu ka 12, n’wini wa rona a nga ri byelanga leswaku ri tshama ehansi ri tiphina hi swakudya swo nandziha swo lalela. Ku ri na sweswo, n’wini wa rona u te: “Ndzi lunghiselele swakudya leswi ndzi nga ta lalela ha swona, u ambala fasikoti u ndzi tirhela kukondza ndzi heta ku dya ni ku nwa, kutani endzhaku ka sweswo na wena u nga dya ni ku nwa.” Hlonga rolero a ri ta wisa endzhaku ko va ri tirhele n’wini wa  rona. Yesu u gimete xifaniso lexi hi ku: “Kutani na n’wina, loko mi endle swilo hinkwaswo leswi mi averiweke swona, vulani mi ku, ‘Hi mahlonga lama nga pfuniki nchumu. Leswi hi nga swi endla hi leswi a hi fanele ku swi endla.’”—Luka 17:7-10.

12 Yesu a nga vulanga xifaniso lexi hi ku lava ku kombisa leswaku Yehovha a nga swi tlangeli leswi hi swi endlaka entirhweni wa yena. Bibele yi swi veka kahle yi ku: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” (Vaheveru 6:10) Ku ri na sweswo, leswi hi swi dyondzaka exifanisweni xa Yesu hileswaku hlonga a ri nge titsakisi kumbe ri anakanyisisa hi ku tiphina. Loko hi tinyiketela eka Xikwembu kutani hi hlawula ku va mahlonga ya xona, hi pfumele ku rhangisa ku rhandza ka xona emahlweni. Hi fanele hi rhangisa ku rhandza ka Xikwembu emahlweni.

13, 14. (a) Hi le swiyin’weni swihi laha hi nga ha bohekaka ku hlula mimboyamelo ya hina? (b) Ha yini hi fanele hi pfumelela ku rhandza ka Xikwembu ku hlula?

13 Ku dyondza Rito ra Xikwembu nkarhi na nkarhi ni minkandziyiso ya “hlonga ro tshembeka ni ro tlhariha” swi nga ha lava leswaku hi endla matshalatshala lamakulu. (Matewu 24:45) Sweswo swi nga ha va tano ngopfu-ngopfu loko minkarhi hinkwayo a swi hi tikela ku hlaya kumbe loko nkandziyiso wa kona wu vulavula hi “swilo leswi enteke swa Xikwembu.” (1 Vakorinto 2:10) Kambe, xana a hi fanelanga hi tinyika nkarhi wa dyondzo ya munhu hi yexe? Hi nga ha boheka ku tidyondzisa ku tinyika nkarhi wo kambisisa mhaka leyi hi yi dyondzaka hi vuenti. Kambe, loko hi nga endli tano hi ta swi kotisa ku yini ku navela “swakudya leswi tiyeke . . . swa vanhu lava wupfeke”?—Vaheveru 5:14.

14 Ku vuriwa yini hi minkarhi leyi hi vuyaka ekaya hi karhele endzhaku ka ku tirha siku hinkwaro? Hi nga ha boheka ku tikoka loko hi ya eminhlanganweni ya Vukreste. Kumbe hi nga ha va hi nga swi tsakeli ku chumayela vanhu vambe. Pawulo hi yexe u swi xiyile leswaku ku nga ha va ni minkarhi laha hi chumayelaka mahungu lamanene ‘hi nga swi rhandzi.’ (1 Vakorinto 9:17) Hambiswiritano, hi endla swilo leswi hikuva Yehovha—N’wini wa hina wa le tilweni, loyi hi n’wi rhandzaka—u hi byela leswaku hi fanele hi swi endla. Naswona xana minkarhi hinkwayo a hi titwi hi enerisekile hi tlhela hi phyuphya endzhaku ko tikarhatela ku dyondza, ku ya eminhlanganweni ni ku chumayela?—Pisalema 1:1, 2; 122:1; 145:10-13.

U Nga Languti “Swilo Swa Le Ndzhaku”

15. Yesu u xi veke njhani xikombiso xa ku titsongahata eka Xikwembu?

15 Yesu Kreste u kombise leswaku wa titsongahata eka Tata wa yena wa le tilweni hi ndlela leyikulu. Yesu u byele vadyondzisiwa vakwe a ku: “Ndzi xike hi le tilweni ku ta endla ku rhandza ka loyi a ndzi rhumeke, kambe ku nga ri ka mina.” (Yohane 6:38) Loko a ri ni gome entangeni wa Getsemani, u khongerile a ku: “Tatana, loko swi koteka, hundzisa xinwelo lexi eka mina. Kambe, ku nga ri hi ku rhandza ka mina, kambe hi ku rhandza ka wena.”—Matewu 26:39.

16, 17. (a) Hi fanele hi swi languta njhani swilo leswi hi swi siyeke endzhaku? (b) Kombisa ndlela leyi Pawulo a a tiyise ha yona loko a teka swilo swa misava leswi a a ta swi fikelela tanihi “nhulu ya thyaka.”

16 Yesu Kreste u lava leswaku hi tshembeka eka xiboho xa hina xa ku va mahlonga ya Xikwembu. U te: “A ku na munhu la vekaka voko ra yena eka puluho kutani a languta swilo swa le ndzhaku loyi a fanelekaka kahle emfun’weni wa Xikwembu.” (Luka 9:62) Loko hi ri karhi hi tirhela Xikwembu a hi fanelanga hi tshama hi ri karhi hi anakanyisisa hi leswi hi swi siyeke endzhaku. Ku ri na sweswo, hi fanele hi tlangela leswi hi swi kumeke hi ku hlawula ku va mahlonga ya Xikwembu. Pawulo u tsalele Vafilipiya a ku: “Hakunene ndzi tlhela ndzi teka swilo hinkwaswo ku ri ku lahlekeriwa hikwalaho ka ntikelo lowu tlurisaka wa ku tiva Kreste Yesu Hosi ya mina. Hikwalaho ka yena ndzi pfumele ku lahlekeriwa hi swilo hinkwaswo naswona ndzi swi teka ku ri nhulu ya thyaka, leswaku ndzi kuma Kreste.”—Vafilipiya 3:8.

17 Anakanya hi swilo hinkwaswo leswi Pawulo a swi tekeke swi ri nhulu ya thyaka kutani a swi tshika leswaku a ta kuma hakelo ya moya tanihi hlonga ra Xikwembu. A nga tshikanga vulovolovo bya misava ntsena kambe ni ntshembo wa  ku va murhangeri wa vukhongeri bya Vuyuda wa nkarhi lowu taka. Loko Pawulo a a lo ya mahlweni ni Vuyuda, a a ta va a fike exikhundlheni lexi fanaka ni xa Simiyoni, n’wana wa Gamaliyele la dyondziseke Pawulo. (Mintirho 22:3; Vagalatiya 1:14) Simiyoni u ve murhangeri wa Vafarisi naswona hi yena a hlohloteleke Vayuda swinene leswaku va xandzukela Varhoma hi 66-70 C.E., hambileswi a a ri ni ku kanakana. U fele enyimpini yoleyo, swi nga ha endleka a dlayiwe hi Vayuda lava a va hisekela etlhelo kumbe hi vuthu ra Varhoma.

18. Nyika xikombiso lexi kombisaka ndlela leyi nhluvuko wa moya wu tisaka hakelo ha yona.

18 Timbhoni ta Yehovha to tala ti landzele xikombiso xa Pawulo. Jean u ri: “Endzhaku ka malembe ma nga ri mangani ndzi hete xikolo, ndzi kume ntirho wa ku va matsalana la nga mulanguteri eka gqweta leri dumeke eLondon. A ndzi wu rhandza ntirho wa mina naswona mali a ndzo yi kelela kunene, kambe embilwini ya mina a ndzi swi tiva leswaku ndzi nga endla leswi engetelekeke entirhweni wa Yehovha. Eku heteleleni, ndzi yise papila ra mina ro tshika ntirho kutani ndzi sungula ku phayona. Ndza tsaka swinene leswi ndzi tekeke goza rero kwalomu ka 20 wa malembe lama hundzeke! Ntirho wa mina wa nkarhi hinkwawo wu antswise vutomi bya mina ku tlula leswi nga endliwaka hi ntirho wihi na wihi wa ku va matsalana. A ku na nchumu lowu enerisaka swinene ku tlula ku vona ndlela leyi Rito ra Yehovha ri nga hundzulaka vutomi bya munhu ha yona. Ku hlanganyela entirhweni wolowo swi tsakisa swinene. Leswi hi swi nyikaka Yehovha a hi nchumu loko swi ringanisiwa ni leswi hi swi amukelaka.”

19. Hi fanele hi tiyimisela ku endla yini, naswona ha yini?

19 Swiyimo swa hina swi nga ha cinca hi ku famba ka nkarhi. Hambiswiritano, ku tinyiketela ka hina eka Xikwembu a ku hundzuki. Ha ha ri mahlonga ya Yehovha, naswona u swi siyela eka hina ku endla xiboho xa ndlela leyinene leyi hi nga ta tirhisa nkarhi, matimba, vuswikoti ni swilo swin’wana swa hina ha yona. Hikwalaho, swiboho leswi hi swi endlaka emhakeni leyi swi nga kombisa rirhandzu ra hina eka Xikwembu. Swi tlhela swi kombisa leswaku hi tiyimisele ku fikela kwihi ku titsona swo karhi. (Matewu 6:33) Ku nga khathariseki swiyimo swa hina, xana a hi fanelanga hi tiyimisela ku nyika Yehovha leswi nga ematimbeni ya hina? Pawulo u tsarile: “Loko ku lungheka ku ri kona ku sungula, swi amukeleka hi ku hlawuleka hi ku ya hi leswi munhu a nga na swona, ku nga ri hi leswi a nga riki na swona.”—2 Vakorinto 8:12.

“Mi Kuma Mbhandzu Wa N’wina”

20, 21. (a) I mihandzu yihi leyi tswariwaka hi mahlonga ya Xikwembu? (b) Yehovha u va hakela njhani lava n’wi nyikaka leswi nga ematimbeni ya vona?

20 Ku va mahlonga ya Xikwembu a swi karharisi. Ku ri na sweswo, swi hi ntshunxa eka vuhlonga lebyi nga ni khombo lebyi hi tekelaka ntsako. Pawulo u tsarile: “Leswi mi ntshunxiweke exidyohweni, kambe mi nga mahlonga ya Xikwembu, mi kuma mbhandzu wa n’wina malunghana ni vukwetsimi, naswona makumu ya kona i vutomi lebyi nga heriki.” (Varhoma 6:22) Ku va ka hina mahlonga ya Xikwembu swi tswala mihandzu leyinene malunghana ni vukwetsimi hi leswi hi kumaka vuyelo bya ku tikhoma loku kwetsimaka, kumbe loku baseke. Ku tlula kwalaho, swi ta endla leswaku hi kuma vutomi lebyi nga heriki enkarhini lowu taka.

21 Yehovha u ni malwandla eka mahlonga yakwe. Loko hi endla leswi hi nga swi kotaka entirhweni wa hina, u hi pfulela “tinyangwa ta ndhambhi ya matilo” kutani a hi chululela “nkateko, kukondza ku nga ha pfumaleki nchumu.” (Malakiya 3:10) Mawaku ndlela leyi swi nga ta tsakisa ha yona ku hambeta hi ri mahlonga ya Yehovha hilaha ku nga heriki!

Wa Tsundzuka Xana?

• Ha yini hi va mahlonga ya Xikwembu?

• Hi swi kombisa njhani leswaku hi titsongahatela ku rhandza ka Xikwembu?

• Ha yini hi fanele hi lunghekela ku rhangisa ku rhandza ka Yehovha emahlweni?

• Ha yini hi nga fanelanga hi ‘languta swilo swa le ndzhaku’?

[Swivutiso Swa Dyondzo]

[Xifaniso lexi nga eka tluka 16, 17]

Lunghiselelo ra ku va hlonga hi ku tirhandzela eIsrayele a ri ri xikombiso xa vuhlonga bya Vukreste

[Xifaniso lexi nga eka tluka 17]

Hi va mahlonga ya Xikwembu loko hi khuvuriwa

[Swifaniso leswi nga eka tluka 17]

Vakreste va rhangisa ku rhandza ka Xikwembu emahlweni

[Xifaniso lexi nga eka tluka 18]

Muxe a a kanakana ku amukela xiavelo xakwe