Nghena endzeni

Hundzela eka leswi nga endzeni

Ku Lwa Hi Marito—Ha Yini Swi Bihile?

Ku Lwa Hi Marito—Ha Yini Swi Bihile?

 Ku Lwa Hi Marito—Ha Yini Swi Bihile?

“Tinyimpi ti huma exihlobyeni xihi naswona ku lwa loku nga exikarhi ka n’wina ku huma exihlobyeni xihi?”—YAKOBO 4:1.

YAKOBO mutsari wa Bibele a a nga kongomisi xivutiso xakwe eka masocha ya le Rhoma, lawa hi nkarhi wolowo a ma lwa tinyimpi ta ku hlula; naswona a a nga kambisisi minsusumeto ya vutherorisi bya swifamona swa Vayuda swa ntlawa lowu vuriwaka Sicarii kumbe Vavanuna va Masavula va le ka lembe-xidzana ro sungula C.E. Yakobo a a vulavula hi timholovo leti a ti khumba hambi ku ri vanhu vambirhi ntsena. Ha yini? Hikuva timholovo exikarhi ka vanhu ti onha ku fana ni tinyimpi. Xiya swiviko leswi swa le Bibeleni.

Vana va kokwa wa hina Yakobe a va ri ni rivengo lerikulu eka makwavo Yosefa lerova va kala va n’wi xavisela evuhlongeni. (Genesa 37:4-28) Endzhaku, Hosi Sawulo wa le Israyele u ringete ku dlaya Davhida. Ha yini? Hikuva a a ri ni mavondzo eka Davhida. (1 Samuwele 18:7-11; 23:14, 15) Eka lembe-xidzana ro sungula, Vakreste vambirhi, Efodiya na Sintika, va kavanyete ku rhula ka vandlha hinkwaro hi timholovo ta vona.—Vafilipiya 4:2.

Eminkarhini ya sweswinyana, vanhu va sungule ku susana ntshiva hi ku tirhisa matlhari kumbe swibamu. Hakanyingi eka nyimpi yin’wana ni yin’wana ku va ni loyi a faka kumbe loyi a saleke a lamale vutomi byakwe hinkwabyo. Namuntlha vanhu va tala ku lwa hi marito yo tlhava. Hambiloko ku nga halatiwanga ngati, marito yo tlhava ma vavisa munhu ma tlhela ma n’wi onha vito. Hakanyingi ku vaviseka vanhu lava nga riki na nandzu “etinyimpini” teto.

Xiya leswi humeleleke malembe ma nga ri mangani lama hundzeke loko mufundhisi wa Anglican a hehla mufundhisi-kulobye hi ku tirhisa timali ta kereke hi ndlela yo biha. Ku holova ka vona ku kale ku humela erivaleni, kutani kereke ya vona yi sungula ku avana hi le xikarhi. Swirho swin’wana a swi nga yi ekerekeni loko ku ta chumayela mufundhisi loyi swi lwisanaka na yena. Swirho swa kona a swi nga xiximani nikatsongo lerova swi papalata ni ku hlamulana loko swi ri ekerekeni. Timholovo ti tinyike matimba loko mufundhisi loyi a teke ni xihehlo xo sungula a hehliwe hi swiendlo swa vudlakuta.

 Mufundhisi-nkulu wa le Canterbury u kombele vafundhisi lava leswaku va ringeta ku tikhoma, a vula leswaku timholovo ta vona i “vuvabyi bya khensa” ni “ndzhukano lowu yisaka xisandzu eka vito ra Hosi ya Hina.” Hi 1997 un’wana wa vafundhisi lava u pfumele ku jitama exikhundlheni xakwe. Loyi un’wana u ale ku jitama ku kondza a sindzisiwa hi malembe yakwe leswaku a suka exitulwini. U ye emahlweni a namarhela xikhundlha xakwe ku fikela loko a ri ni malembe ya 70, hi August 7, 2001. The Church of England Newspaper yi vule leswaku siku leri a nga tshika ntirho ha rona a ri ri siku ra ku tsundzuka “Mukwetsimi” Victricius. “Mukwetsimi” Victricius i mani xana? I mufundhisi wa lembe-xidzana ra vumune loyi ku vuriwaka leswaku u himeteriwile hileswi a aleke ku nghenela ntirho wa nyimpi. Phepha-hungu leri ri kombise ndlela leyi mavonelo ya vanhu lava vambirhi ma hambaneke ha yona ri ku: “[Mufundhisi la tshikeke ntirho] a a nga ri na wona mboyamelo wa ku ala ku hlanganyela enyimpini ya kereke.”

Vafundhisi volavo ingi va papalate ku tivavisa ni ku vavisa van’wana loko a va tirhise ndzayo leyi nga eka Varhoma 12:17, 18: “Mi nga tlheriseli swo biha hi swo biha hambi eka mani. Endlani swilo leswi nga swinene emahlweni ka vanhu hinkwavo. Loko swi koteka, swi titshege hi n’wina, vanani ni ku rhula ni vanhu hinkwavo.”

Ku vuriwa yini hi wena? Loko u pfukiwa hi munhu, xana u namba u lwa na yena hi marito? Kumbe, xana u papalata marito yo tlhava, u tshama u pfule ndlela ya ku kondletela ku rhula? Loko u hlundzukise munhu wo karhi, xana u namba u n’wi papalata u anakanya leswaku u ta hetelela a swi rivarile? Kumbe, xana u hatla u kombela ku rivaleriwa? Ku nga khathariseki leswaku u kombela ku rivaleriwa kumbe u rivalela un’wana, loko u ringeta ku kondletela ku rhula u ta vuyeriwa swinene. Ndzayo ya Bibele yi nga hi pfuna ku herisa ni timholovo leti sunguleke khale, hilaha xihloko lexi landzelaka xi kombisaka hakona.