Nghena endzeni

Hundzela eka leswi nga endzeni

Hi Kume Vuleteri Leswaku Hi Kota Ku Nyikela Vumbhoni Hi Rixaladza

Hi Kume Vuleteri Leswaku Hi Kota Ku Nyikela Vumbhoni Hi Rixaladza

 Hi Kume Vuleteri Leswaku Hi Kota Ku Nyikela Vumbhoni Hi Rixaladza

“Mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.”—MINTIRHO 1:8.

1, 2. Petro a a nyikiwe xileriso xihi, naswona i mani loyi a a n’wi nyike xona?

“YESU loyi a a huma eNazareta . . . u hi lerise leswaku hi chumayela evanhwini ni ku nyikela vumbhoni bya rixaladza bya leswaku loyi hi Yena la lerisiweke hi Xikwembu leswaku a va muavanyisi wa lava hanyaka ni lava feke.” (Mintirho 10:38, 42) Hi marito wolawo, muapostola Petro u hlamusele Korneliyo ni ndyangu wakwe xileriso lexi a nyikiweke xona xa ku va muvuri wa evhangeli.

2 Xana Yesu u xi vule rini xileriso xexo? Kumbexana Petro a a anakanya hi leswi Yesu la pfuxiweke eku feni a swi vuleke emahlweninyana ka ku tlhandlukela kakwe etilweni. Hi nkarhi wolowo, Yesu u byele vadyondzisiwa vakwe lava tshembekaka a ku: “Mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.” (Mintirho 1:8) Hambiswiritano, Petro ana se a a swi tiva leswaku tanihi mudyondzisiwa wa Yesu, a a fanele a vulavula ni van’wana hi ku pfumela ka yena eka Yesu.

Vuleteri Bya Malembe Manharhu

3. Hi rihi singita leri Yesu a ri endleke, naswona hi xihi xirhambo lexi a xi hundziseleke eka Petro na Andriya?

3 Loko se a ri ni tin’hwetinyana a khuvuriwile hi 29 C.E., Yesu u chumayele laha Petro na makwavo Andriya a va phasa kona tinhlampfi, eLwandle ra Galeliya. A va kayakaye vusiku hinkwabyo  kambe va nga phasi nchumu. Hambiswiritano, Yesu u va byele a ku: “Yana laha ku enteke, kutani n’wina petani tinkoka ta n’wina leswaku mi ta phasa.” Loko va endla leswi Yesu a va byeleke swona, “va phase tinhlampfi to tala ngopfu. Entiyisweni, tinkoka ta vona ti [sungule] ku handzuka hi le xikarhi.” Loko a vona singita leri, Petro u khomiwe hi ku chava, kambe Yesu u n’wi rhulise mbilu a ku: “Tshika ku chava. Ku sukela sweswi u ta phasa vanhu va ri karhi va hanya.”—Luka 5:4-10.

4. (a) Yesu u va hlomise njhani vadyondzisiwa vakwe leswaku va lunghekela ku nyikela vumbhoni? (b) Xana vutirheli bya vadyondzisiwa va Yesu a byi ta va byo tanihi kwihi loko byi ringanisiwa ni bya yena?

4 Xikan’we-kan’we, Petro na Andriya—kun’we na Yakobo na Yohane, vana va Zebediya—va siye mabyatso ya vona ivi va landzela Yesu. Va hete kwalomu ka malembe manharhu va famba-famba na Yesu eku chumayeleni ka yena, kutani va leteriwa tanihi vavuri va evhangeli. (Matewu 10:7; Marka 1:16, 18, 20, 38; Luka 4:43; 10:9) Emakumu ka vuleteri byebyo, hi Nisani 14, 33 C.E., Yesu u va byele a ku: “Loyi a kombisaka ripfumelo eka mina, na yena u ta endla mintirho leyi ndzi yi endlaka; naswona u ta endla mintirho leyikulu ku tlula leyi.” (Yohane 14:12) Vadyondzisiwa va Yesu a va ta nyikela vumbhoni bya rixaladza hilaha Yesu a endleke hakona, kambe vona a va ta hlanganisa ndhawu leyikulu swinene. Hilaha va lemukeke hakona endzhakunyana, vona ni vadyondzisiwa hinkwavo lava a va ta kumeka enkarhini lowu taka a va ta nyikela vumbhoni eka “matiko hinkwawo,” ku fikela “emakumu ka mafambiselo ya swilo.”—Matewu 28:19, 20.

5. Hi nga vuyeriwa njhani eka vuleteri lebyi Yesu a byi nyikeke valandzeri vakwe?

5 Hi hanya enkarhini wa “makumu ya mafambiselo ya swilo.” (Matewu 24:3) Ku hambana ni vadyondzisiwa volavo vo sungula, a swi koteki leswaku hina hi famba na Yesu hi vona ndlela leyi a chumayelaka vanhu ha yona. Hambiswiritano, vuleteri byakwe byi nga hi pfuna loko hi teka Bibele hi hlaya hi ta ndlela leyi a chumayeleke ha yona ni swiletelo leswi a swi nyikeke valandzeri vakwe. (Luka 10:1-11) Hambiswiritano, xihloko lexi xi ta hlamusela nchumu wun’wana wa nkoka swinene lowu Yesu a wu kombiseke vadyondzisiwa vakwe—ku nga langutelo leri faneleke hi ntirho wo chumayela.

Ku Khumbeka Hi Vanhu

6, 7. I mfanelo yihi leyi endleke leswaku Yesu a humelela swonghasi evutirhelini bya yena, naswona hi nga n’wi tekelela njhani emhakeni leyi?

6 Ha yini Yesu a nyikele vumbhoni lebyi humeleleke swonghasi? Xivangelo xin’wana hileswi a a rhandza vanhu swinene naswona a a khumbeka ha vona. Mupisalema u profete leswaku Yesu a a ta “va ni nsovo eka loyi a pfumalaka ni loyi a nga xisiwana.” (Pisalema 72:13) U byi hetisisile hakunene vuprofeta byebyo. Bibele yi vula leswi landzelaka hi ta xiendlakalo xin’wana: “Loko a vona mintshungu a yi twela vusiwana, hikuva a yi vavisiwile ni ku tsalangana ku fana ni tinyimpfu leti nga riki na murisi.” (Matewu 9:36) Hambi ku ri vadyohi lavakulu a va swi lemuka leswaku wa khumbeka ha vona, kutani va tshinele eka yena.—Matewu 9:9-13; Luka 7:36-38; 19:1-10.

7 Na hina namuntlha hi ta humelela loko hi kombisa moya lowu fanaka wa ku khumbeka hi van’wana. Loko u nga si ya ensin’wini, ha yini u nga yiminyana u anakanyisisa hi ndlela leyi vanhu va ri lavaka ha yona rungula leri u va yiselaka rona? Anakanya hi swiphiqo leswi va nga vaka va ri na swona leswi nga ta tlhantlhiwa hi Mfumo ntsena. Tiyimisele ku va ni langutelo lerinene hi munhu un’wana ni un’wana, tanihi leswi u nga swi tiviki leswaku i mani loyi a nga ta amukela rungula leri u ri tameleke. Kumbexana un’wana wa vanhu lava u yaka eka vona a a ri karhi a khongelela leswaku ku ta munhu wo fana na wena a ta n’wi pfuna!

Ku Susumetiwa Hi Rirhandzu

8. I yini lexi susumetelaka valandzeri va Yesu leswaku va tekelela xikombiso xakwe eku chumayeleni ka mahungu lamanene?

8 Mahungu lamanene lawa Yesu a ma twariseke a ma fambisana ni ku hetisisiwa ka ku rhandza ka Yehovha, ku kwetsimisiwa ka vito ra Yena, ni ku lweriwa ka vuhosi bya Yena—ku nga timhaka ta nkoka swinene leti khumbaka vanhu. (Matewu 6:9, 10) Tanihi leswi a a rhandza Tata wakwe, Yesu u susumeteleke ku hlayisa vutshembeki ku fikela emakumu ni ku nyikela vumbhoni bya rixaladza malunghana ni Mfumo lowu nga ta ahlula timhaka teto. (Yohane 14:31) Tanihi leswi valandzeri va Yesu namuntlha va nga ni nsusumeto lowu fanaka, va hlanganyela hi ku hiseka entirhweni wa nsimu. Muapostola Yohane u te: “Ku rhandza Xikwembu, hi kona ku hlayisa swileriso swa xona,” ku katsa ni xileriso xa ku  chumayela mahungu lamanene ni ku endla vadyondzisiwa.—1 Yohane 5:3; Matewu 28:19, 20.

9, 10. Handle ka rirhandzu ra Xikwembu, hi rihi rirhandzu rin’wana leri hi susumetelaka ku nyikela vumbhoni bya rixaladza?

9 Yesu u byele valandzeri vakwe a ku: “Loko mi ndzi rhandza, mi ta hlayisa swileriso swa mina. Loyi a nga ni swileriso swa mina a tlhela a swi hlayisa, hi yena loyi a ndzi rhandzaka.” (Yohane 14:15, 21) Xisweswo, ku rhandza Yesu ku fanele ku hi susumetela ku nyikela vumbhoni malunghana ni ntiyiso, hi tlhela hi yingisa ni swilo leswin’wana leswi Yesu a hi leriseke swona. Siku rin’wana loko a tihumelerisa erivaleni endzhaku ka ku pfuxiwa ka yena, Yesu u khutaze Petro a ku: “Phamela swinyimpfana swa mina. . . . Risa tinyimpfu ta mina letitsongo. . . . Phamela tinyimpfu ta mina letitsongo.” Xana Petro a a ta susumetiwa hi yini leswaku a endla tano? Yesu u nyikele nhlamulo loko a vutisa Petro hi ku phindha-phindha a ku: “Xana [wa] ndzi rhandza? . . . Xana wa ndzi rhandza? . . . Xana u ni xinakulobye eka mina?” Ina, rirhandzu ni xinakulobye lexi Petro a a ri na xona eka Yesu a swi ta n’wi susumetela ku nyikela vumbhoni hi rixaladza, a kuma “tinyimpfu letitsongo” ta Yesu, kutani a va murisi wa tona wa moya.—Yohane 21:15-17.

10 Namuntlha Yesu a hi n’wi tivi hilaha Petro a a n’wi tiva hakona. Hambiswiritano, leswi Yesu a hi endleleke swona hi swi twisisa kahle. Timbilu ta hina ti susumetiwa hi rirhandzu lerikulu leri endleke leswaku a “nantswa rifu hikwalaho ka vanhu hinkwavo.” (Vaheveru 2:9; Yohane 15:13) Hi titwa hilaha Pawulo a titweke hakona loko a tsala a ku: “Rirhandzu leri Kreste a nga na rona ra hi susumeta . . . U fele hinkwavo leswaku lava va hanyaka va nga ha tihanyeli, kambe va hanyela [yena].” (2 Vakorinto 5:14, 15) Hi kombisa leswaku rirhandzu leri Yesu a hi rhandzeke ha rona ha ri tlangela swinene naswona hi nyikela vumbhoni bya rirhandzu ra hina eka yena hi ku hetisisa xileriso lexi a hi nyikeke xona xa ku nyikela vumbhoni hi rixaladza. (1 Yohane 2:3-5) A hi fanelanga hi va ni moya wa ku nga khathali hi ntirho wo chumayela, onge hiloko gandzelo ra Yesu ri nga ri nchumu eka hina.—Vaheveru 10:29.

Tshama U Langute Swilo Swa Nkoka

11, 12. Yesu a a tele yini emisaveni, naswona u xi namarhele njhani xikongomelo xakwe?

11 Loko Yesu a ri emahlweni ka Pontiyo Pilato, u te: “Leswi ndzi velekeriweke swona, ni leswi ndzi teleke swona emisaveni i ku ta nyikela vumbhoni malunghana ni ntiyiso.” (Yohane 18:37) Yesu a nga pfumelelanga nchumu xi n’wi hambukisa eku nyikeleni ka vumbhoni malunghana ni ntiyiso. Wolowo i ntirho lowu Xikwembu a xi lava leswaku a wu hetisisa.

12 Sathana u ringe Yesu swinene emhakeni leyi. Loko Yesu a ha ku khuvuriwa, Sathana u nambe a n’wi landza ivi a n’wi tshembisa xikhundlha lexikulu emisaveni, a vula leswaku u ta n’wi nyika “mimfumo hinkwayo ya misava ni ku vangama ka yona.” (Matewu 4:8, 9) Endzhaku, Vayuda va lave ku n’wi endla hosi. (Yohane 6:15) Van’wana va nga ha vula leswaku loko Yesu a a amukele swilo sweswo ingi ku lunghe swo tala, kumbexana va anakanya leswaku loko Yesu a a ve hosi ya laha misaveni, ingi a pfune vanhu hi tindlela to tala. Kambe Yesu u bakanye miehleketo yoleyo. Mianakanyo yakwe a yi dzike eku nyikeleni ka vumbhoni malunghana ni ntiyiso.

13, 14. (a) I yini lexi tsandzekeke ku tshikisa Yesu ntirho wa yena wa nkoka? (b) Hambileswi Yesu a a pfumala swilo leswi vonakaka, i yini leswi a koteke ku swi hetisisa?

13 Ku tlula kwalaho, Yesu a nga yengiwanga hi rifuwo. Hikwalaho, a a nga ri n’wankumi. Phela ni kaya a a nga ri na rona. Siku rin’wana u te: “Timhungubye ti ni micele ni tinyenyana ta tilo ti ni byetlelo, kambe N’wana wa munhu a nga na ndhawu yo veka nhloko yakwe.” (Matewu 8:20) Loko Yesu a file, nchumu wun’we ntsena lowu tivekaka lowu a feke a wu siya a ku ri nguvu leyi masocha ya Varhoma ma avelaneke yona hi ku tirhisa vuhlolotwana. (Yohane 19:23, 24) Kutani ke, xana sweswo swi vula leswaku Yesu u fe a nga ri nchumu? Doo!

14 Yesu u hetisise swo tala ku tlula leswi van’wankumi lavakulu va nga swi endlelaka vanhu. Pawulo u te: “Ma wu tiva musa lowu nga faneriwiki wa Hosi ya hina Yesu Kreste, leswaku hambileswi a a  fuwile, u ve xisiwana hi mhaka ya n’wina, leswaku mi fuwa hikwalaho ka vusiwana byakwe.” (2 Vakorinto 8:9; Vafilipiya 2:5-8) Hambileswi a a pfumala swilo leswi vonakaka, Yesu u pfulele vanhu lava titsongahataka ndlela, leswaku va kota ku kuma vutomi lebyi nga heriki, va ri vanhu lava hetisekeke. Ha swi tlangela swinene leswi a hi endleleke swona! Naswona ha tsaka swinene hikwalaho ka hakelo leyi a yi kumeke hileswi a dzikiseke mianakanyo yakwe eku endleni ka ku rhandza ka Xikwembu!—Pisalema 40:8; Mintirho 2:32, 33, 36.

15. Hi wihi nchumu wa nkoka swinene ku tlula rifuwo?

15 Vakreste lava namuntlha va lwelaka ku tekelela Yesu na vona va ala ku yengiwa hi rifuwo. (1 Timotiya 6:9, 10) Va pfumela leswaku rifuwo ri nga tisa ntsako evuton’wini, kambe va swi tiva leswaku a ri nge va nyiki vutomi lebyi nga heriki. Loko Mukreste a fa, rifuwo ra yena a ra ha n’wi pfuni nchumu, ku fana ni nguvu ya Yesu leyi yi nga ha n’wi pfunangiki nchumu loko a file. (Eklesiasta 2:10, 11, 17-19; 7:12) Loko Mukreste a fa, nchumu wa nkoka hakunene lowu a faka na wona i vuxaka byakwe na Yehovha na Yesu Kreste.—Matewu 6:19-21; Luka 16:9.

Nkaneto A Wu N’wi Hetanga Matimba

16. Yesu u langutane njhani ni nkaneto?

16 Nkaneto a wu swi kotanga ku tshikisa Yesu ntirho wa yena wa ku nyikela vumbhoni malunghana ni ntiyiso. Hambiloko a tiva leswaku vutirheli byakwe bya laha misaveni byi ta tsemiwa hi rifu rakwe ra gandzelo, sweswo a swi n’wi hetanga matimba. Malunghana na Yesu, Pawulo u te: “Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso, a tsan’wa tingana, kutani a tshama evokweni ra xinene ra xiluvelo xa Xikwembu.” (Vaheveru 12:2) Xiya leswaku Yesu ‘u tsan’we tingana.’ Leswi vakaneti a va anakanya swona ha yena a swi nga n’wi tovi helo. A a dzikise mianakanyo yakwe eku endleni ka ku rhandza ka Xikwembu.

17. Hi nga dyondza yini eku tiyiseleni ka Yesu?

17 Loko a kombisa ndlela leyi ku tiyisela ka Yesu ku tirhaka ha yona eka hina, Pawulo u khutaze Vakreste a ku: “Ehleketisisani hi loyi a tiyiseleke mavulavulelo yo tano yo kaneta ya vadyohi hi ku lwisana ni leswi vuyerisaka vona ntsena, leswaku mi nga karhali mi wa mapa eka mimoya-xiviri ya n’wina.” (Vaheveru 12:3) Kunene, ku langutana ni nkaneto kumbe ku hlekuriwa siku na siku swi nga ku heta matimba. Swi nga hi karharisa ku hambeta hi lwisana ni miringo ya misava, kumbexana hi ku tshama hi ri karhi hi soriwa hi maxaka lama lavaka leswaku hi va “vanhu va mavito” etikweni. Hambiswiritano, ku fana na Yesu, hi titshega hi Yehovha leswaku a hi pfuna loko hi ri karhi hi lwela ku rhangisa timhaka ta Mfumo evuton’wini bya hina.—Matewu 6:33; Varhoma 15:13; 1 Vakorinto 2:4.

18. Hi yihi dyondzo leyinene leyi hi nga yi kumaka emaritweni lawa Yesu a ma byeleke Petro?

18 Ku tiyimisela ka Yesu ku ala ku hambukisiwa ku kombisiwe loko a sungula ku byela vadyondzisiwa vakwe hi ta rifu rakwe leri tshinelaka. Petro u khutaze Yesu leswaku a ‘titsetselela,’ a n’wi tiyisekisa leswaku ‘swilo leswi a vulavulaka ha swona a  swi nga ta humelela eka yena.’ Yesu u ale ku yingisela nchumu wihi ni wihi lowu a wu ta tsanisa xiboho xakwe xa ku endla ku rhandza ka Yehovha. U fularhele Petro kutani a ku: “Yana endzhaku ka mina, Sathana! U xikhunguvanyiso eka mina, hikuva a wu ehleketi miehleketo ya Xikwembu, kambe u ehleketa miehleketo ya vanhu.” (Matewu 16:21-23) Onge na hina minkarhi hinkwayo hi nga tshama hi tiyimisele ku bakanyela miehleketo ya vanhu etlhelo. Ina, a hi kongomisiweni hi miehleketo ya Xikwembu minkarhi hinkwayo.

Ku Tisiwa Ka Mikateko Ya Xiviri

19. Hambileswi Yesu a a ri muendli wa masingita, hi wihi nchumu lowu a wu ri wa nkoka swinene evutirhelini bya yena?

19 Yesu u endle masingita yo tala lama kombisaka leswaku a a ri Mesiya. U kale a pfuxa ni lava feke. Masingita wolawo ma khumbe mintshungu, kambe Yesu a a nga telanga ku ta antswisa xiyimo xa vanhu ntsena emisaveni. A a tele ku ta nyikela vumbhoni malunghana ni ntiyiso. A a swi tiva leswaku swilo hinkwaswo swa nyama leswi a pfuneke vanhu ha swona a swi ri swa nkarhinyana. Ni vanhu lava a va pfuxeke eku feni a va ta tlhela va fa. Ku nyikela ka yena vumbhoni malunghana ni ntiyiso hi swona ntsena a swi ta endla leswaku van’wana va kuma vutomi lebyi nga heriki.—Luka 18:28-30.

20, 21. Hi kwihi ku ringanisela loku Vakreste va ntiyiso va ku namarhelaka emhakeni ya ku endla leswinene?

20 Namuntlha vanhu van’wana va ringeta ku tekelela mintirho leyinene ya Yesu hi ku pfula swibedlhele kumbe ku endla mintirho yin’wana yo pfuna swisiwana. Minkarhi yin’wana sweswo swi va koxa mali yo tala swinene, kutani moya wa vona wa bumabumeriwa; kambe mpfuno wihi ni wihi lowu va wu nyikelaka i wa nkarhinyana ntsena. I Mfumo ntsena lowu nga ta tisa mpfuno lowu hetisekeke. Hikwalaho, ku fana na Yesu, Timbhoni ta Yehovha ti dzikisa mianakanyo ya tona eku nyikeleni ka vumbhoni malunghana ni ntiyiso wa Mfumo wolowo.

21 Kunene, Vakreste va ntiyiso va yi endla mintirho leyinene. Pawulo u tsarile a ku: “Loko ntsena hi ri ni nkarhi lowunene wa swona, a hi endleleni hinkwavo leswi nga swinene, kambe ngopfu-ngopfu lava nga swin’we na hina eripfumelweni.” (Vagalatiya 6:10) Loko vaakelani va hina kumbe Vakreste-kulorhi va weriwe hi mhangu kumbe va ri eku pfumaleni, a hi kanakani ku va “[endlela] leswi nga swinene.” Kambe hi dzikisa mianakanyo ya hina entirhweni lowu faneleke—wa ku nyikela vumbhoni malunghana ni ntiyiso.

Dyondza Eka Xikombiso Xa Yesu

22. Ha yini Vakreste va chumayela vaakelani va vona?

22 Pawulo u tsarile a ku: “Kunene ndzi le khombyeni loko ndzi nga ma vuli mahungu lamanene!” (1 Vakorinto 9:16) A a nga ma honisi mahungu lamanene, hikuva ku ma chumayela a swi ta vula vutomi eka yena ni le ka lava n’wi yingisaka.  (1 Timotiya 4:16) Na hina hi languta vutirheli bya hina hi ndlela yoleyo. Hi lava ku pfuna vaakelani va hina. Hi lava ku kombisa rirhandzu ra hina eka Yehovha. Hi lava ku kombisa leswaku ha n’wi rhandza Yesu naswona hi tlangela rirhandzu lerikulu leri a hi kombiseke rona. Hikwalaho, hi chumayela mahungu lamanene, xisweswo hi nga ha “[hanyeli] ku navela ka vanhu nikatsongo, kambe [hi] hanyela ku rhandza ka Xikwembu.”—1 Petro 4:1, 2.

23, 24. (a) Hi yihi dyondzo leyi hi yi kumaka eka singita ro phasa tinhlampfi? (b) I vamani lava namuntlha va nyikelaka vumbhoni hi rixaladza?

23 Ku fana na Yesu, a hi tshiki ku endla ntirho wa hina wa nkoka hambiloko van’wana va hi hlekula kumbe va ala rungula ra hina hi vukarhi. Hi dyondza swo karhi eka singita leri Yesu a ri endleke loko a vitana Petro na Andriya leswaku va n’wi landzela. Ha swi vona leswaku loko hi yingisa Yesu, kutani hi peta tinkoka ta hina hambi ku ri ematini lawa ma vonakaka ma nga ri na tinhlampfi, hi nga tikuma hi phase tinhlampfi to tala to fanekisela. Vunyingi bya Vakreste byi phase tinhlampfi to tala endzhaku ko tirha malembe ematini lawa ma tikombaka ma nga ri na tinhlampfi. Van’wana va rhurhele laha ku nga ni tinhlampfi to tala kutani va phasa vunyingi bya tona kona. Ku nga khathariseki leswi hi swi endlaka, a hi nge tshiki ku peta tinkoka ta hina. Ha swi tiva leswaku Yesu a nga si vula leswaku ntirho wo chumayela wu fike emakumu exiphen’wini xo karhi xa misava.—Matewu 24:14.

24 Timbhoni ta Yehovha to tlula timiliyoni ta tsevu sweswi ti khomekile ematikweni yo tlula 230. Xihondzo xo Rindza xa February 1, 2005, xi ta va ni xiviko xa lembe na lembe xa misava hinkwayo xa ntirho lowu ti wu endleke hi lembe ra ntirho ra 2004. Xiviko xexo xi ta kombisa ndlela leyi Yehovha a wu katekisaka swinene ha yona ntirho wo chumayela. Hi nkarhi lowa ha saleleke mafambiselo lawa ya swilo, onge hi nga hambeta hi yingisa xikhutazo xa Pawulo lexi nge: “Chumayela rito, u va eka rona hi xihatla.” (2 Timotiya 4:2) Onge hi nga hambeta hi nyikela vumbhoni bya rixaladza ku fikela loko Yehovha a vula leswaku ntirho se wu herile.

Ku sukela eka lembe leri, Xiviko Xa Lembe Ra Ntirho Xa Timbhoni Ta Yehovha eMisaveni Hinkwayo a xi nge he vi eka Xihondzo xo Rindza xa January 1. Ematshan’weni ya sweswo, se xi ta hamba xi kandziyisiwa enkandziyisweni wa February 1.

U Nga Hlamula Xana?

• Hi nga pfuneka njhani eka vuleteri lebyi Yesu a byi nyikeke vadyondzisiwa vakwe?

• Yesu a a ri ni langutelo rihi eka vanhu lava a a va chumayela?

• I yini leswi hi susumetelaka ku nyikela vumbhoni bya rixaladza?

• Ku fana na Yesu, hi tihi tindlela leti hi nga dzikisaka mianakanyo ya hina ha tona eku endleni ka ku rhandza ka Xikwembu?

[Swivutiso Swa Dyondzo]

[Xifaniso lexi nga eka tluka 15]

Hi ta humelela evutirhelini bya hina loko hi khathala hi vanhu hilaha Yesu a endleke hakona

[Xifaniso lexi nga eka tluka 16, 17]

Ngopfu-ngopfu Yesu u te emisaveni leswaku a ta nyikela vumbhoni malunghana ni ntiyiso

[Swifaniso leswi nga eka tluka 17]

Timbhoni ta Yehovha ti dzikisa ngopfu mianakanyo eku nyikeleni ka vumbhoni bya rixaladza