Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Hikwalaho ka yini loko Yesu a pfuxiwe eku feni a kombele Tomasi leswaku a n’wi khumba, kasi eku sunguleni u alele Mariya Magadala ku endla tano?

Vuhundzuluxeri byin’wana bya khale bya Bibele byi nyika mianakanyo ya leswaku Yesu u byele Mariya Magadala leswaku a nga n’wi khumbi. Hi xikombiso, BibeleMahungu Lamanene yi veka marito ya Yesu hi ndlela leyi: “U nga ndzi khumbi, hikuva a ndzi si tlhandlukela eka Tatana.” (Yohane 20:17) Hambiswiritano, riendli ra Xigriki xo sungula leri hakanyingi ri hundzuluxeriwaka ri va “khumba,” ri vula “ku namarhela, ku titshega, ku khomelela, ku fumbarhela ni ku khoma hi voko.” Kambe swi le rivaleni leswaku Yesu a a nga siveli Mariya Magadala ku n’wi khumba ntsena, tanihi leswi a pfumeleleke vavasati van’wana lava a va ri esirheni leswaku “va n’wi khoma milenge.”—Matewu 28:9.

Vuhundzuluxeri byo tala bya manguva lawa, byo tanihi Vuhundzuluxeri Bya Misava Leyintshwa Bya Matsalwa Yo Kwetsima, The New Jerusalem Bible na The New English Bible, byi hi pfuna ku twisisa nhlamuselo leyi nga yona ya marito ya Yesu loko byi ku: “Tshika ku ndzi namarhela.” Hikwalaho ka yini Yesu a vule marito yo tano eka Mariya Magadala, loyi a a n’wi tolovele swinene?—Luka 8:1-3.

Swi le rivaleni leswaku Mariya Magadala a a anakanya leswaku Yesu a a lava ku va siya a tlhandlukela ematilweni. Tanihi leswi a a swi tsakela swinene ku va na Hosi yakwe, u namarhele Yesu, a nga lavi ku n’wi tshika a famba. Leswaku a n’wi tiyisekisa leswaku a a nga si tlhandluka, Yesu u byele Mariya leswaku a tshika ku n’wi namarhela a ya byela vadyondzisiwa va yena leswaku u pfuxiwile.—Yohane 20:17.

Ku ni ku hambana malunghana ni ndlela leyi Yesu a vulavuleke na Tomasi ha yona. Loko Yesu a tivonakarisa eka van’wana va vadyondzisiwa vakwe, Tomasi a a nga ri kona. Endzhakunyana, Tomasi u kombise ku kanakana malunghana ni ku pfuxiwa ka Yesu, a vula leswaku a nge swi pfumeli handle ka loko o vona timbanga ta Yesu ta swipikiri a tlhela a nghenisa voko rakwe etsheveni, laha Yesu a a tlhaviwe kona hi fumu. Endzhaku ka masiku ya nhungu, Yesu u tlhele a tivonakarisa emahlweni ka vadyondzisiwa va yena. Enkarhini lowu, Tomasi a a ri kona, kutani Yesu a n’wi kombela leswaku a khumba timbanga ta yena.—Yohane 20:24-27.

Xisweswo, emhakeni ya Mariya Magadala, Yesu a a lwisana ni mboyamelo lowu nga fanelangiki wa ku n’wi sivela ku famba; emhakeni ya Tomasi, Yesu a a pfuna munhu loyi a nga ni ku kanakana. Eka swiendlakalo sweswo haswimbirhi, Yesu a a ri ni swivangelo leswi twalaka swo endla hilaha a endleke hakona.