Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana vandlha ra Vukreste ri ma languta njhani makolo?

Rito ra Xikwembu ri sola vudakwa ni makolo tanihi mikhuva leyi nga fanelangiki eka lava va tirhelaka Xikwembu. Hikokwalaho, vandlha ra Vukreste ri languta mukhuva wa makolo hilaha ri langutaka vudakwa hakona. Xidakwa ni munhu wa makolo a va nge vi swirho swa vandlha ra Vukreste.

Swivuriso 23:20, 21 yi ri: “U nga vi exikarhi ka lava va nwaka ngopfu vhinyo, exikarhi ka lava va dyaka nyama hi makolo. Hikuva xidakwa ni munhu wa makolo va ta va ni vusiwana, naswona ku khudzehela ku ta ambexa munhu yoloye hi switlakati.” Eka Deteronoma 21:20, hi hlaya hi munhu wo “sihalala ni ku xandzuka” loyi a a fanele a dlayiwa ehansi ka Nawu wa Muxe. Hi ku ya hi ndzimana leyi, swiendlo swimbirhi leswi funghaka munhu wo tano la xandzukaka ni la sihalalaka a ku ri ‘makolo ni vudakwa.’ Kahle-kahle, eIsrayele wa khale, makolo a ma langutiwa tanihi xiendlo lexi nga amukelekiki eka lava tsakelaka ku tirhela Xikwembu.

Kambe ke, xana makolo i yini, naswona, xana Matsalwa ya Vukreste ya Xigriki ma vula yini hi mhaka leyi? Munhu wa makolo hi “loyi a titolovetaka ku dya ni ku nwa ku tlula mpimo.” Xisweswo, makolo ma fambisana ni makwanga naswona Rito ra Xikwembu ri hi byela leswaku “vanhu va makwanga” a va nge yi dyi ndzhaka ya Mfumo wa Xikwembu. (1 Vakorinto 6:9, 10; Vafilipiya 3:18, 19; 1 Petro 4:3)  Ku tlula kwalaho, loko muapostola Pawulo a tsundzuxe Vakreste malunghana ni ku papalata “mintirho ya nyama,” u vulavule hi “minkarhi ya ku dakwa, minkhuvo ya huwa, ni swilo swo fana ni sweswo.” (Vagalatiya 5:19-21) Ku dya ku tlula mpimo hakanyingi swi fambisana ni minkarhi ya ku dakwa ni minkhuvo ya huwa. Ku tlula kwalaho, makolo ma katseka eka nhlamuselo ya Pawulo leyi nge “ni swilo swo fana ni sweswo.” Mukreste la tivekaka leswaku u ni makolo, loyi hi ku sihalala a nga laviki ku tshika mukhuva wakwe wa makwanga u fanele a susiwa evandlheni, hilaha a swi ta va hakona loko a endla “mintirho [leyin’wana] ya nyama.”—1 Vakorinto 5:11, 13. *

Hambileswi Rito ra Xikwembu ri fanisaka vudakwa ni makolo, swa olova ku xiya vudakwa ku tlula makolo. Swikombiso swa vudakwa hakanyingi swi vonaka erivaleni. Hambiswiritano, ku lemuka makolo eka munhu swa tika hikuva a ma kombisiwi hi nghohe yakwe. Hikokwalaho, vakulu va le vandlheni va fanele va va ni vurhon’wana eku tameleni ka timhaka leti.

Hi xikombiso, ku nyuhela ku nga kombisa makolo, kambe hayi eka vanhu hinkwavo. Mavabyi ma nga endla leswaku munhu a nyuhela. Swilo swa xitekela swi nga va swin’wana swa swilo leswi endlaka leswaku munhu a nyuhela. Nakambe hi fanele hi tsundzuka leswaku ku nyuhela i xiyimo xa miri, kambe makolo i xiyimo xa mianakanyo. Ku nyuhela ku hlamuseriwa tanihi “miri lowu taleriweke hi mafurha,” kasi makolo i “ku dya hi ndlela ya makwanga kumbe leyi hundzeletiweke.” Xisweswo, makolo a ma voniwi hi xiyimo xa miri kambe hi langutelo ra munhu hi swakudya. Munhu a nga ha va a nga nyuhelanga kumbe a ondzile, kambe a ri ni makolo. Ku tlula kwalaho, leswaku miri wu va lowu ringaneleke ni lowu nga ni xivumbeko lexinene loko swi te yini, swi langutiwa hi ndlela leyi hambaneke hi ku ya hi tindhawu.

Xana hi swihi swikombiso swa makolo? Hakanyingi munhu wa makolo a nga tikhomi, kutani u dya ku tlula mpimo ku fikela loko khwiri ri pandza kumbe a sungula ku vabya. Ku pfumala ka yena ku tikhoma ku kombisa leswaku a nga na mhaka ni ndzhukano lowu a wu tisaka ehenhla ka Yehovha ni vito lerinene ra vanhu va Yena. (1 Vakorinto 10:31) Hi tlhelo rin’wana, munhu loyi a tshukaka a dya ku tlula mpimo eka swiendlakalo swin’wana a nge nambi a tekiwa a ri “munhu wa makwanga.” (Vaefesa 5:5) Nilokoswiritano, hi ku ya hi Vagalatiya 6:1, Mukreste wo tano a nga lava mpfuno. Pawulo u ri: “Vamakwerhu, hambiloko munhu a teka goza leri hoxeke a nga si swi lemuka, n’wina lava nga ni timfanelo ta moya ringetani ku ololoxa munhu wo tano hi moya wo rhula.”

Hikwalaho ka yini ndzayo ya Bibele malunghana ni ku papalata ku dya ku tlula mpimo yi ri ya nkoka swinene namuntlha? Hikuva, ngopfu-ngopfu malunghana ni nkarhi wa hina, Yesu u te: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi, kutani hi xitshuketa siku rero ri mi wela hi xihatla ku fana ni ntlhamu.” (Luka 21:34, 35) Ku papalata ku dya ku tlula mpimo i ndlela yin’wana ya nkoka yo balekela mikhuva leyi nga ni khombo hi tlhelo ra moya.

Ku ringanisela i mfanelo leyinene ya Vukreste. (1 Timotiya 3:2, 11) Hikokwalaho, Yehovha u ta pfuna hinkwavo lava va ringetaka ku tirhisa ndzayo ya Bibele malunghana ni ku ringanisela eku dyeni ni le ku nweni.—Vaheveru 4:16.

[Nhlamuselo ya le hansi]

^ par. 5 Vona “Swivutiso Swa Vahlayi” eka Xihondzo xo Rindza xa May 1, 1986.