Nghena endzeni

Hundzela eka leswi nga endzeni

Xana Swiphiqo Swa Hina Swi Vangiwa Hi Xikwembu?

Xana Swiphiqo Swa Hina Swi Vangiwa Hi Xikwembu?

 Xana Swiphiqo Swa Hina Swi Vangiwa Hi Xikwembu?

LOKO n’wana wa nhwanyana wa Marion a vaviseke byongo, Marion u endle leswi vo tala va hina hi nga swi endlaka. * U khongele eka Xikwembu a kombela mpfuno. Marion u ri: “A ndzi tsundzuki ndzi titwa ndzi heleriwe hi matimba ni ku va ni xivundza hi ndlela leyi.” Endzhakunyana xiyimo xa n’wana wa yena xi nyanyile, kutani Marion u sungule ku tivutisa swo tala hi Xikwembu. U te: “Hikwalaho ka yini ndzi humeleriwa hi swilo leswi?” A a nga swi twisisi leswaku ha yini Xikwembu xa rirhandzu ni nkhathalelo xi n’wi fularhela.

Leswi humeleleke Marion swi tolovelekile. Namuntlha vanhu vo tala emisaveni loko va ri emaxangwini va titwe va fularheriwe hi Xikwembu eminkarhini leyi va lavaka mpfuno. Endzhaku ka loko ntukulu wa yena wa xinuna a dlayiwile, Lisa u te: “Na sweswi ndza ha tivutisa leswaku ‘ha yini XIKWEMBU xi pfumelela swilo swo biha.’ Ntshembo wa mina eka Xikwembu a wa ha tiyanga ku fana ni le ku sunguleni.” Hi ku fanana, wansati un’wana endzhaku ka loko n’wana wa yena wa mufana la ha riki ricece, a humeleriwe hi mhangu leyi tsemaka nhlana, u te: “Xikwembu a xi ndzi chavelelanga eka leswi swi ndzi humeleleke. A xi ndzi kombisanga leswaku xa khathala hi mina kumbe ku ndzi twela vusiwana.” U ye emahlweni a ku: “A ndzi nge pfuki ndzi xi rivalerile Xikwembu.”

Van’wana va hlundzukela Xikwembu loko va xiya swiyimo swa misava. Va vona vanhu lava nga evuswetini ni lava sikaka, va vona vabaleki va nyimpi lava heleriweke hi ntshembo, nhlayo leyikulu ya vana lava feriweke hi vatswari hikwalaho ka vuvabyi bya AIDS ni vanhu vo tala lava xanisiwaka hi mavabyi man’wana. Loko ku humelela makhombo lawa ni man’wana yo fana na wona, vo tala va rhwexa Xikwembu nandzu tanihi leswi va anakanyaka leswaku a xi khathali hi nchumu.

Hambiswiritano, ntiyiso hileswaku, Xikwembu a xi fanelanga xi voniwa nandzu hikwalaho ka swiphiqo swa vanhu. Kahle-kahle, ku ni swivangelo leswi twalaka swo tshemba leswaku Xikwembu ku nga ri khale xi ta herisa ku vaviseka loku vanhu va ku twaka. Ha ku rhamba leswaku u hlaya xihloko lexi landzelaka leswaku u swi vona leswaku Xikwembu xa hi khathalela hakunene.

[Nhlamuselo ya le hansi]

^ par. 2 Mavito ma cinciwile.