Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana Pawulo a a vula vamani loko a ku “lava va nga riki vapfumeri” eka 2 Vakorinto 6:14?

Eka 2 Vakorinto 6:14 ha hlaya: “Mi nga paniwi ni lava va nga riki vapfumeri.” Loko hi languta mongo wa tsalwa leri, swi le rivaleni leswaku Pawulo a a vulavula hi vanhu lava nga riki swirho swa vandlha ra Vukreste. Matwisiselo lawa ma seketeriwa hi tindzimana tin’wana ta le Bibeleni, laha Pawulo a tirhiseke xiga lexi nge “loyi a nga riki mupfumeri” kumbe “lava va nga riki vapfumeri.”

Hi xikombiso, Pawulo u sole Vakreste hikwalaho ko mangalelana ehubyeni “emahlweni ka lava nga riki vapfumeri.” (1 Vakorinto 6:6) Emhakeni leyi, lava nga riki vapfumeri a va ri vaavanyisi va le hubyeni ya le Korinto. Epapileni ra yena ra vumbirhi, Pawulo u vule leswaku Sathana ‘u dlaye mianakanyo ya lava va nga riki vapfumeri.’ Mahlo ya vanhu vo tano lava nga riki vapfumeri ma ni “nturhu” lowu va sivelaka ku voningeriwa hi mahungu lamanene. Vanhu lava lava nga pfumeriki a va tekanga goza ro tirhela Yehovha, tanihi leswi Pawulo a hlamuseleke eku sunguleni a ku: “Loko ku hundzukeriwa eka Yehovha, nturhu wa susiwa.”—2 Vakorinto 3:16; 4:4.

Van’wana lava nga riki vapfumeri va hlanganyela eka swiendlo swo kala nawu kumbe va gandzela swifaniso. (2 Vakorinto 6:15, 16) Hambiswiritano, a hi hinkwavo lava kanetanaka ni malandza ya Yehovha. Van’wana va wu tsakela ntiyiso. Vo tala va ni vanghana va vukati lava nga Vakreste naswona va swi tsakela ku tshama na vona. (1 Vakorinto 7:12-14; 10:27; 14:22-25; 1 Petro 3:1, 2) Kambe, minkarhi hinkwayo Pawulo u tirhise xiga lexi nge “loyi a nga riki mupfumeri” eka vanhu lava, hi ku ya hi leswi se swi hlamuseriweke hala henhla, va nga riki swirho swa vandlha ra Vukreste, leri vumbiwaka hi “lava pfumelaka eHosini.”—Mintirho 2:41; 5:14; 8:12, 13.

Nsinya wa nawu lowu kumekaka eka 2 Vakorinto 6:14 i nkongomiso wa nkoka eka Vakreste hinkwavo naswona wu tala ku tshahiwa tanihi lowu nyikelaka ndzayo ya vutlhari eka Vakreste lava lavaka munghana wa vukati. (Matewu 19:4-6) Mukreste la tinyiketeleke a tlhela a khuvuriwa a nge lavi munghana wa vukati exikarhi ka lava nga riki vapfumeri, tanihi leswi mahanyelo, tipakani ni tidyondzo ta loyi a nga riki mupfumeri ti hambanaka swinene ni ta Mukreste wa ntiyiso.

Kambe ku vuriwa yini hi vanhu lava dyondzaka Bibele va tlhela va hlanganyela ni vandlha ra Vukreste? Ku vuriwa yini hi vahuweleri lava nga si khuvuriwaka? Xana a hi vapfumeri? Doo, i va pfumeri. Vanhu lava amukeleke ntiyiso wa mahungu lamanene naswona va endlaka nhluvuko hi ku hiseka leswaku va khuvuriwa, a va fanelanga va vuriwa vanhu lava nga riki vapfumeri. (Varhoma 10:10; 2 Vakorinto 4:13) Loko a nga si khuvuriwa Korneliyo a a vuriwa “wanuna la tinyiketeleke, la chavaka Xikwembu.”—Mintirho 10:2.

Kutani, xana i vutlhari leswaku Mukreste la tinyiketeleke a rhandzana ni munhu la nga muhuweleri la nga khuvuriwangiki a tlhela a tiyimisela ku tekana na yena, tanihi leswi kahle-kahle ndzayo ya Pawulo leyi tsariweke eka 2 Vakorinto 6:14 yi nga vulavuliki ha yena munhu yoloye? Doo, a hi vutlhari. Hikwalaho ka yini? Hikwalaho ka ndzayo leyi kongomeke leyi Pawulo a yi nyikeke tinoni leti nga Vakreste. Pawulo u tsarile a ku: “U ntshunxekile ku tekana ni loyi a n’wi lavaka, eHosini ntsena.” (1 Vakorinto 7:39) Hi ku pfumelelana ni ndzayo yoleyo, Vakreste lava tinyiketeleke va khutaziwa ku tekana ni vanhu lava nga “eHosini” ntsena.

Xana xi vula yini xiga lexi nge “eHosini” swin’we ni makwavo wa xona lexi nge “eka Kreste”? Pawulo u vulavule hi vanhu lava nga “eka Kreste” kumbe “eHosini” eka Varhoma 16:8-10  ni le ka Vakolosa 4:7. Loko u hlaya tindzimana toleto, u ta swi vona leswaku vanhu vo tano i ‘vatirhi-kulorhi,’ ‘lava amukelekaka,’ ‘vamakwerhu lava rhandzekaka,’ ‘vatirheli vo tshembeka,’ ni ‘mahlonga-kulorhi.’

Xana munhu u sungula rini ku va ‘hlonga eHosini’? Sweswo swi endleka loko a titshika kutani a tiyimisela ku endla leswi hlonga ri faneleke ri swi endla. Yesu u te: “Loko munhu a lava ku ndzi landzela, a a titshike kutani a rhwala mhandzi yakwe ya nxaniso a ndzi landzela nkarhi hinkwawo.” (Matewu 16:24) Loko munhu a tinyiketela eka Xikwembu u sungula ku va mulandzeri wa Kreste ni ku tiyimisela hi ku helela ku endla ku rhandza ka Xikwembu. Endzhaku ka sweswo, wa khuvuriwa kutani a va mutirheli wa ximfumo loyi a amukelekaka emahlweni ka Yehovha Xikwembu. * Xisweswo, ku ‘teka eHosini’ swi vula ku tekana ni munhu loyi a kombiseke leswaku hakunene i mupfumeri, la tinyiketeleke ku va “hlonga ra Xikwembu ni ra Hosi Yesu Kreste.”—Yakobo 1:1.

Munhu loyi a dyondzaka Bibele ni Timbhoni ta Yehovha ni loyi a endlaka nhluvuko hakunene hi tlhelo ra moya u fanele a bumabumeriwa. Hambiswiritano, a nga si tinyiketela eka Yehovha ni ku tiboha ku endla ntirho wakwe vutomi hinkwabyo ni ku titsona swin’wana evuton’wini. Wa ha endla mindzulamiso leyi lavekaka. U fanele a endla mindzulamiso leyikulu leswaku a ta va Mukreste la tinyiketeleke a tlhela a khuvuriwa, loko a nga si anakanyisisa hi ku teka goza rin’wana lerikulu evuton’wini, ro tanihi ku nghenela vukati.

Xana swa khutaziwa leswaku Mukreste a rhandzana ni munhu loyi a vonakaka a endla nhluvuko edyondzweni ya yena ya Bibele—kumbexana hi xikongomelo xa ku tekana na yena loko a heta ku khuvuriwa? Doo! Xikongomelo xa xichudeni xa Bibele xi nga kavanyeteka loko xi xiya leswaku Mukreste la tinyiketeleke u lava ku tekana na xona kambe a nge swi koti loko xi nga si khuvuriwa.

Hi ntolovelo, munhu u va muhuweleri la nga khuvuriwangiki ku ringana nkarhinyana, ku fikela loko a endla nhluvuko kutani a khuvuriwa. Kutani ndzayo leyi nga laha henhla ya ku tekana eHosini ntsena ya twala. Kambe, xana ku vuriwa yini hi munhu loyi malembe ya yena ma n’wi pfumelelaka ku nghenela vukati, naswona a ri munhu loyi a kurisiweke endyangwini wa Vakreste, loyi se a nga ni malembe yo hlaya a hlanganyela ni vandlha hi ku hiseka kambe a ri muhuweleri la nga khuvuriwangiki? Xivutiso hi leswaku, i yini lexi n’wi siveleke ku nyiketela vutomi bya yena eka Yehovha? Hikwalaho ka yini a kanakana? Xana a nga titshembi? Hambileswi a nga mupfumeri, a nge vuriwi munhu loyi a nga “eHosini.”

Ndzayo ya Pawulo malunghana ni vukati yi vuyerisa hina. (Esaya 48:17) Loko vanhu vambirhi lava lavaka ku tekana va tinyiketerile eka Yehovha, ku tiboha ka un’wana ni un’wana wa vona hi vukati ku va ni masungulo lama tiyeke hi tlhelo ra moya. Hinkwavo va hanya hi milawu leyi fanaka naswona va ni tipakani leti fanaka. Leswi swi ta va pfuna swinene leswaku ku va ni ntsako evukatini bya vona. Ku tlula kwalaho, lava ‘tekanaka eHosini’ va kombisa leswaku va tshembekile eka Yehovha naswona va ta kuma mikateko leyi nga heriki, hikuva “[Yehovha] u ta n’wi endla hi vutshembeki loyi a tshembekeke.”—Pisalema 18:25.

[Nhlamuselo ya le hansi]

^ par. 10 Eka Vakreste lava totiweke lava Pawulo a a tsalela vona eku sunguleni, ku va ‘hlonga eHosini’ a swi tlhela swi katsa ku totiwa ka vona tanihi vana va Xikwembu tlhelo vamakwavo va Kreste.

[Xifaniso lexi nga eka tluka 31]

“[Yehovha] u ta n’wi endla hi vutshembeki loyi a tshembekeke”