Nghena endzeni

Hundzela eka leswi nga endzeni

“Mi Va Dyondzisa Ku Hlayisa Swilo Hinkwaswo Leswi Ndzi Mi Leriseke Swona”

“Mi Va Dyondzisa Ku Hlayisa Swilo Hinkwaswo Leswi Ndzi Mi Leriseke Swona”

 “Mi Va Dyondzisa Ku Hlayisa Swilo Hinkwaswo Leswi Ndzi Mi Leriseke Swona”

“Hikokwalaho fambani mi ya endla . . . vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.”—MATEWU 28:19, 20.

1. I mbulavurisano wihi lowu veke kona exikarhi ka mudyondzisiwa Filipi ni wanuna wa le Etiyopiya?

WANUNA wa le Etiyopiya a a pandze mananga ma sala ma hlangana a ya eYerusalema. Kwalaho u fike a gandzela Yehovha, Xikwembu lexi rhandzekaka eka yena. Swi le rivaleni leswaku a a rhandza ni Rito ra Xikwembu leri huhuteriweke. Filipi mudyondzisiwa wa Kreste u hlangane ni wanuna loyi a ri karhi a tlhelela ekaya a ri ekalichini yakwe a hlaya kopi ya matsalwa ya muprofeta Esaya. Filipi u vutise Muetiyopiya a ku: “Xana kahle-kahle wa swi tiva leswi u swi hlayaka?” Wanuna loyi u hlamule a ku: “Xana ndzi nga swi tivisa ku yini, handle ka loko ndzi kongomisiwa hi un’wana?” Filipi u ye emahlweni a pfuna xichudeni lexi hisekaka xa Matsalwa leswaku xi va mudyondzisiwa wa Kreste.—Mintirho 8:26-39.

2. (a) Nhlamulo leyi nyikeriweke hi wanuna wa le Etiyopiya i ya nkoka hi ndlela yihi? (b) Hi swihi swivutiso leswi fambisanaka ni xileriso xa Kreste xa ku endla vadyondzisiwa leswi hi nga ta swi kambisisa?

2 Nhlamulo ya wanuna wa le Etiyopiya i ya nkoka swinene. U te: “Xana ndzi nga swi tivisa ku yini, handle ka loko ndzi kongomisiwa hi un’wana?” Ina, a a lava mukongomisi leswaku a n’wi komba ndlela. Nhlamuselo leyi yi kombisa nkoka wa nkongomiso wo karhi lowu Yesu a wu katseke eka xileriso xakwe xa ku endla vadyondzisiwa. Hi wihi nkongomiso wa kona? Leswaku hi kuma nhlamulo, a hi yeni emahlweni hi kambisisa marito ya Yesu lama nga eka Matewu ndzima 28. Xihloko lexi hundzeke xi hlamule xivutiso lexi nge ha yini? ni lexi nge kwihi? Sweswi hi ta kambisisa tinhla tin’wana timbirhi leti fambisanaka ni xileriso xa Kreste xa ku endla vadyondzisiwa—ku nga xivutiso lexi nge yini? ni lexi nge rini?

“Mi Va Dyondzisa Ku Hlayisa Swilo Hinkwaswo”

3. (a) Xana swi tisa ku yini leswaku munhu a va mudyondzisiwa wa Yesu Kreste? (b) Ku endla vadyondzisiwa swi katsa ni ku dyondzisa yini?

3 Hi fanele hi dyondzisa yini leswaku hi pfuna vanhu van’wana va va vadyondzisiwa va Kreste? Yesu u lerise valandzeri vakwe a ku: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Hikwalaho, hi fanele hi dyondzisa swilo leswi Kreste a hi leriseke swona. * Kambe u nga tiyiseka njhani leswaku munhu loyi a dyondzisiwaka swileriso swa Yesu u ta va mudyondzisiwa a tlhela a khomelela? Yinhla ya nkoka yi kombisiwa hi marito lawa Yesu a hlawuleke ku ma tirhisa hi vukheta eka nhlamuselo yakwe. Xiya leswaku a nga vulanga a ku: ‘Mi va dyondzisa swilo hinkwaswo leswi ndzi mi leriseke swona.’ Ku ri na sweswo u te: “Mi va dyondzisa ku hlayisa swilo hinkwaswo leswi ndzi mi leriseke swona.” (Matewu 19:17) Xana sweswo swi vula yini?

4. (a) Xana swi vula yini ku hlayisa xileriso? (b) Kombisa ndlela leyi hi dyondzisaka munhu ha yona leswaku a hlayisa swileriso swa Kreste.

4 Ku hlayisa xileriso swi vula ku “twananisa swiendlo swa wena” ni xileriso—ku xi yingisa kumbe  ku xi namarhela. Kutani hi n’wi dyondzisa njhani munhu leswaku a hlayisa kumbe ku yingisa swilo leswi Kreste a hi leriseke swona? Anakanya hi ndlela leyi muleteri wa ku chayela a swi dyondzisaka ha yona swichudeni swakwe leswaku swi hlayisa milawu ya le mapatwini. Muleteri a nga dyondzisa swichudeni swa yena milawu ya le mapatwini etlilasini. Kambe leswaku a dyondzisa swichudeni swakwe ndlela yo tirhisa milawu yoleyo, u letela swichudeni loko swi chayela hi xiviri emapatwini, laha swi ringetaka ku tirhisa leswi swi dyondzisiweke swona. Hilaha ku fanaka, loko hi dyondza Bibele ni vanhu, hi va dyondzisa swileriso swa Kreste. Hambiswiritano, nakambe hi fanele hi kongomisa swichudeni loko swi ri karhi swi ringeta ku tirhisa swiletelo swa Kreste evuton’wini bya swona ni le nsin’wini. (Yohane 14:15; 1 Yohane 2:3) Xisweswo, ku hetisisa xileriso xa Kreste xa ku endla vadyondzisiwa swi lava leswaku hi va vadyondzisi ni vakongomisi. Hi ndlela yoleyo, hi ta va hi tekelela xikombiso lexi vekiweke hi Yesu na Yehovha hi byakwe.—Pisalema 48:14; Nhlavutelo 7:17.

5. Ha yini munhu loyi hi dyondzaka Bibele na yena a nga ha kanakanaka ku yingisa xileriso xa Kreste xa ku endla vadyondzisiwa?

5 Ku dyondzisa van’wana leswaku va hlayisa swileriso swa Yesu swi katsa ku va pfuna leswaku va yingisa xileriso xa ku endla vadyondzisiwa. Eka munhu loyi hi dyondzaka Bibele na yena, wolowo wu nga vonaka wu ri ntirho wo tika. Niloko eku sunguleni va ve swirho leswi hisekaka swa kereke yo karhi ya Vujagana, a swi kanakanisi leswaku khale ka vadyondzisi va vona va vukhongeri a va kalanga va va dyondzisa hi ta ku endla vadyondzisiwa. Varhangeri van’wana va tikereke va vula va nga tilumalumi leswaku tikereke ta Vujagana ti hluleka hi ku helela loko swi ta eku dyondziseni ka mintlhambi ya tona ku vula evhangeli. Loko a vulavula hi xileriso xa Yesu xa ku ya pfuna vanhu va mixaka hinkwayo leswaku va va vadyondzisiwa, mukambisisi wa Bibele John R. W. Stott u te: “Ku tsandzeka ka hina ku yingisa leswi xileriso xexo xi vulaka swona, i xihoxo lexikulu xa Vakreste va evhangeli namuntlha.” U ye emahlweni a ku: “Hakanyingi hi vulavula rungula ra hina hi ri ekule ni vanhu. Minkarhi yin’wana hi fana ni vanhu lava huwelelaka kunene va yime eribuweni ra lwandle, va ringeta ku byela vanhu lava nwelaka leswaku va endla yini loko va lava ku pona. A hi ringeti ku nghena hi ya va phalala. Hi chava ku tsakama.”

6. (a) Loko hi pfuna xichudeni xa Bibele, hi nga xi tekelela njhani xikombiso xa Filipi? (b) Hi nga wu kombisa njhani nkhathalelo wa hina loko xichudeni xa Bibele xi sungula ku hlanganyela entirhweni wo chumayela?

6 Loko munhu loyi hi dyondzaka Bibele na yena a hume evukhongerini byin’wana lebyi swirho swa byona swi “[chavaka] ku tsakama,” swi nga ha n’wi tikela ku dzudza vutoya bya ku chava mati yo fanekisela, kutani a nga swi koti ku yingisa xileriso  xa Kreste xa ku endla vadyondzisiwa. U ta lava mpfuno. Hikwalaho, hi fanele hi lehisa mbilu loko hi ri karhi hi n’wi nyika vuleteri ni vukongomisi lebyi antswisaka matwisiselo ya yena kutani byi n’wi susumetela ku teka goza, tanihi leswi tidyondzo ta Filipi ti voningeleke wanuna wa Muetiyopiya kutani ti n’wi susumetela ku khuvuriwa. (Yohane 16:13; Mintirho 8:35-38) Ku tlula kwalaho, ku navela ka hina ku dyondzisa swichudeni swa Bibele leswaku swi yingisa xileriso xa ku endla vadyondzisiwa ku hi susumetela ku tirha na swona leswaku hi swi pfuna loko swi sungula ku ya chumayela hi timhaka ta Mfumo.—Eklesiasta 4:9, 10; Luka 6:40.

“Swilo Hinkwaswo”

7. Ku dyondzisa van’wana ku “hlayisa swilo hinkwaswo” swi katsa ku va dyondzisa swileriso swihi?

7 Ntirho wa hina a wu heleli eku leteleni ka vadyondzisiwa lavantshwa ndlela yo endla vadyondzisiwa ntsena. Yesu u hi lerise leswaku hi dyondzisa van’wana ku “hlayisa swilo hinkwaswo” leswi a hi leriseke swona. Sweswo swi katsa swileriso swimbirhi leswikulu—ku nga ku rhandza Xikwembu ni varikwerhu. (Matewu 22:37-39) Mudyondzisiwa lontshwa a nga dyondzisiwa njhani ku hlayisa swileriso sweswo?

8. Kombisa ndlela leyi mudyondzisiwa lontshwa a nga dyondzisiwaka ha yona xileriso xa ku kombisa rirhandzu.

8 Tlhela u anakanya hi xifaniso xa munhu la dyondzaka ku chayela. Loko a chayela exikarhi ka mimovha yin’wana a ri ni muleteri wakwe kwala tlhelo, u dyondza hi ku yingisa muleteri wakwe ni hi ku xiya ndlela leyi van’wana va chayelaka ha yona. Hi xikombiso, muleteri a nga kombetela eka muchayeri loyi a kombisaka musa hi ku pfumelela vachayeri van’wana leswaku va nghena emahlweni ka yena; kumbe muchayeri loyi a hungutaka timboni ta movha wakwe nivusiku leswaku ti nga tlhavi vachayeri lava a hlanganaka na vona; kumbe muchayeri loyi a yimaka a pfuna munhu loyi a n’wi tivaka loyi a onhakeriweke hi movha. Swikombiso swo tano swi dyondzisa xichudeni swilo swa nkoka leswi na xona xi nga swi tirhisaka loko xi ri karhi xi chayela. Hilaha ku fanaka, mudyondzisiwa lontshwa loyi a fambaka egondzweni leri yisaka evuton’wini u dyondza eka mudyondzisi wakwe ni le ka swikombiso leswinene leswi a swi vonaka evandlheni.—Matewu 7:13, 14.

9. Mudyondzisiwa lontshwa u swi dyondza njhani leswi swi vulaka swona ku yingisa xileriso xa ku kombisa rirhandzu?

9 Hi xikombiso, xichudeni xa Bibele xi nga vona mutswari la nga riki na munghana wa vukati, loyi a ringetaka hi matimba leswaku a tshama a ri kona eminhlanganweni eHolweni ya Mfumo kun’we ni vana vakwe. A nga lemuka munhu la nga ni gome loyi a nga tshikiki ku ta eminhlanganweni, a nga lemuka mukhegula la feriweke hi nuna loyi a taka ni vadyuhari van’wana eminhlanganweni hi movha wakwe, kumbe muntshwa loyi a pfunetaka ku basisa Holo ya Mfumo. Xichudeni xa Bibele xi nga lemuka nkulu wa vandlha loyi a vekaka xikombiso entirhweni wa nsimu hambileswi a nga ni vutihlamuleri byo tala evandlheni. A nga vona Mbhoni leyi nga swi kotiki ku huma ekaya hikwalaho ka ku lamala, kambe yi ri xikhutazo lexikulu eka hinkwavo lava va yi endzelaka. Xichudeni lexi xi nga xiya mpatswa lowu endleke mindzulamiso leyikulu evuton’wini leswaku wu kota ku khathalela vatswari va wona lava dyuhaleke. Hi ku xiya Vakreste volavo lava nga ni musa, lava pfunaka ni lava tshembekaka, mudyondzisiwa lontshwa u swi dyondza hi xikombiso leswi swi vulaka swona ku yingisa xileriso xa Kreste xa ku rhandza Xikwembu ni varikwavo, ngopfu-ngopfu vapfumeri-kulobye. (Swivuriso 24:32; Yohane 13:35; Vagalatiya 6:10; 1 Timotiya 5:4, 8; 1 Petro 5:2, 3) Hi ndlela yoleyo, xirho xin’wana ni xin’wana xa vandlha ra Vukreste xi nga va mudyondzisi ni mukongomisi, naswona xi ni vutihlamuleri byo tano emakatleni ya xona.—Matewu 5:16.

“Ku Fikela eMakumu Ka Mafambiselo Ya Swilo”

10. (a) Xana hi ta hambeta hi endla vadyondzisiwa ku fikela rini? (b) Hi xihi xikombiso lexi Yesu a hi vekeleke xona malunghana ni ku hetisisa swiavelo swa hina?

10 Xana ntirho lowu wa ku endla vadyondzisiwa hi fanele hi wu endla ku fikela rini? Ku fikela emakumu ka mafambiselo lawa ya swilo. (Matewu 28:20) Xana hi ta swi kota ku xi hetisisa xileriso lexi xa Yesu? Tanihi vandlha ra misava hinkwayo, hi tiyimisele ku xi hetisisa. Emalembeni lama hundzeke, hi tirhise nkarhi, matimba ni rifuwo ra hina hi ntsako leswaku hi kuma lava va nga ni “mboyamelo  lowunene eka vutomi lebyi nga heriki.” (Mintirho 13:48) Hi xiringaniso, sweswi Timbhoni ta Yehovha ti heta tiawara to tlula timiliyoni tinharhu hi siku entirhweni wo chumayela timhaka ta Mfumo ni wa ku endla vadyondzisiwa emisaveni hinkwayo. Sweswo hi swi endla hileswi hi landzelaka xikombiso xa Yesu. U te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yohane 4:34) Na hina hi tiyimisele ku endla sweswo hi timbilu ta hina hinkwato. (Yohane 20:21) Xikongomelo xa hina a hi ku lava ku sungula ntirho lowu hi byarhisiweke wona ntsena; nakambe hi lava ku wu endla wu hela.—Matewu 24:13; Yohane 17:4.

11. Ku endleke yini hi van’wana va Vakreste-kulorhi, naswona hina hi fanele hi tivutisa yini?

11 Kambe, swa hi vavisa ku xiya leswaku van’wana va vapfumeri-kulorhi va sungule ku tsana emoyeni kutani va nga ha hisekeli ku hetisisa xileriso xa Kreste xa ku endla vadyondzisiwa, kumbe va tshika hi ku helela. Xana yi kona ndlela leyi hi nga va pfunaka ha yona leswaku va pfuxeta vuxaka bya vona ni vandlha leswaku va tlhela va hlanganyela entirhweni wa ku endla vadyondzisiwa? (Varhoma 15:1; Vaheveru 12:12) Ndlela leyi Yesu a pfuneke vaapostola va yena ha yona loko va kombisa ku tsana ko karhi swa xinkarhana yi nga hi voningela eka leswi hi nga swi endlaka namuntlha.

Kombisa Nkhathalelo

12. (a) Xana vaapostola va Yesu va endle yini emahlweninyana ka rifu rakwe? (b) Yesu u kombise moya wa njhani eka vaapostola vakwe hambiloko va kombise ku tsana lokukulu?

12 Loko Yesu a heta vutirheli byakwe emisaveni, hi nkarhi lowu a a ri kusuhi ni ku fa, vaapostola “va n’wi [siyile] va baleka.” Hilaha Yesu a profeteke hakona, va ‘hangalakele etindlwini ta vona.’ (Marka 14:50; Yohane 16:32) Xana Yesu u endle yini loko a xiya leswaku vanghana vakwe va tsanile emoyeni? Endzhakunyana ka ku pfuxiwa kakwe, Yesu u byele van’wana va valandzeri vakwe a ku: “Mi nga chavi! Fambani, mi ya vikela vamakwerhu, leswaku va ya eGaleliya; va ta ndzi vona kwale.” (Matewu 28:10) Hambileswi vaapostola va kombiseke ku tsana lokukulu, Yesu u hambete a va vitana “vamakwerhu.” (Matewu 12:49) A nga va helelanga mbilu. Hi ndlela yoleyo, Yesu u va kombise tintswalo ni moya wa ku rivalela, tanihi leswi Yehovha a nga ni moya wa tintswalo ni wa ku rivalela. (2 Tihosi 13:23) Hi nga n’wi tekelela njhani Yesu?

13. Hi fanele hi va languta njhani vanhu lava tsaneke emoyeni?

13 Hi fanele hi khathala swinene hi lava va nga ha wu hisekeriki ntirho wa ku chumayela kumbe lava va wu tshikeke hi ku helela. Ha ha yi tsundzuka mintirho leyi kombisaka rirhandzu leyi endliweke hi vapfumeri-kulorhi volavo enkarhini lowu hundzeke—naswona van’wana va nga ha va va yi endle hi makume ya malembe. (Vaheveru 6:10) Ha va kumbuka swinene. (Luka 15:4-7; 1 Vatesalonika 2:17) Kutani ke, xana  hi nga swi kombisa njhani leswaku ha khathala hi vona?

14. Hi nga n’wi tekelela njhani Yesu malunghana ni ku pfuna munhu la tsaneke emoyeni?

14 Yesu u byele vaapostola lava a va ri ni gome leswaku va fanele va ya eGaleliya va ya n’wi vona kona. Kahle-kahle, Yesu u va rhambe leswaku va ta enhlanganweni wo hlawuleka. (Matewu 28:10) Hilaha ku fanaka namuntlha, hi khutaza lava tsaneke emoyeni leswaku va ta eminhlanganweni ya vandlha ra Vukreste, naswona swi nga lava leswaku hi va khutaza ko tala leswaku va endla tano. Emhakeni ya ku rhambiwa ka vaapostola ku ve ni vuyelo lebyinene, hikuva “vadyondzisiwa va 11 va [ye] entshaveni ya Galeliya laha Yesu a a hlele ku ya hlangana na vona kona.” (Matewu 28:16) Na hina ha tsaka swinene loko vanhu lava tsaneke emoyeni va amukela xirhambo xa hina ivi va tlhela va sungula ku ta eminhlanganweni ya Vukreste!—Luka 15:6.

15. Hi nga xi tekelela njhani xikombiso xa Yesu xa ku amukela vanhu lava tsaneke loko va ta endhawini leyi hi hlanganyelaka eka yona?

15 Xana hi ta angurisa ku yini loko Mukreste la tsaneke emoyeni a fika eHolweni ya Mfumo? Xana Yesu u endle yini loko a vona vaapostola vakwe va fikile endhawini leyi va byeriweke yona, kasi ripfumelo ra vona a ri tsanile swa xinkarhana? “Yesu [u tshinerile] ivi a vulavula na vona.” (Matewu 28:18) A nga va langutanga hi tihlo ra le tin’hwembeni kambe u ye eka vona. Anakanya ndlela leyi timbilu ta vaapostola ti weke ha yona loko Yesu a teka goza rero! Onge na hina hi nga teka goza, hi va amukela hi mandla mambirhi vanhu lava tsaneke emoyeni lava ringetaka ku vuyela evandlheni ra Vukreste.

16. (a) Hi nga dyondza yini eka leswi Yesu a swi endleke eka valandzeri vakwe? (b) Hi nga n’wi tekelela njhani Yesu eka moya lowu a wu kombiseke vanhu lava tsaneke emoyeni? (Vona nhlamuselo ya le hansi.)

16 I yini swin’wana leswi Yesu a swi endleke? Xo sungula, u endle xitiviso lexi nge: “Ndzi nyikiwe vulawuri hinkwabyo.” Xa vumbirhi u va nyike ntirho a ku: “Hikokwalaho fambani mi ya endla . . . vadyondzisiwa.” Xa vunharhu, u va tshembisile a ku: “Ndzi na n’wina masiku hinkwawo.” Kambe, xana u swi xiyile leswi Yesu a papalateke ku swi endla? U papalate ku holovela vadyondzisiwa vakwe hikwalaho ka swihoxo swa vona ni ku kanakana ka vona. (Matewu 28:17) Xana sweswo swi pfunile? Swi pfunile hakunene. Hi ku hatlisa, vaapostola va tlhele va sungula “ku dyondzisa ni ku vula mahungu lamanene.” (Mintirho 5:42) Loko hi tekelela ndlela leyi Yesu a languteke ni ku khoma vanhu lava tsaneke ha yona, hi nga vona vuyelo lebyi fanaka emavandlheni ya ka hina. *Mintirho 20:35.

“Ndzi Na N’wina Masiku Hinkwawo”

17, 18. Hi yihi mianakanyo leyi chavelelaka eka marito ya Yesu lama nge, “Ndzi na n’wina masiku hinkwawo”?

17 Marito yo hetelela eka xileriso xa Yesu lama nge, “Ndzi na n’wina masiku hinkwawo,” ma ni xikhutazo lexikulu eka hinkwavo lava ringetaka  ku hetisisa xileriso xa Kreste xa ku endla vadyondzisiwa. Hambiloko valala va hina va lwisana ni ntirho wa hina wo chumayela timhaka ta Mfumo va tlhela va hi onha vito, a hi fanelanga hi chava. Ha yini? Yesu, Murhangeri wa hina, loyi a nga ni “vulawuri hinkwabyo etilweni ni le misaveni,” u na hina leswaku a hi seketela!

18 Xitshembiso xa Yesu lexi nge, “Ndzi na n’wina masiku hinkwawo” nakambe xa hi chavelela. Loko hi ri karhi hi ringeta ku hetisisa xileriso xa Kreste xa ku endla vadyondzisiwa, masiku man’wana swi hi fambela kahle, kasi masiku man’wana hi koka ku tika. (2 Tikronika 6:29) Van’wana va hina va dya mbitsi va xeva hi nhlomulo loko va feriwe hi munhu loyi va n’wi rhandzaka. (Genesa 23:2; Yohane 11:33-36) Van’wana va karhatiwa hi swiphiqo swa vudyuhari, laha se va hanyaka vutomi byo lomba va tlhela va hela matimba. (Eklesiasta 12:1-6) Van’wanyana va koka exilogweni hikwalaho ka ntshikilelo wa mianakanyo. (1 Vatesalonika 5:14) Naswona lava engetelekeke exikarhi ka hina va hanya hi rikoko ra xilondza. Kambe ku nga khathariseki swiphiqo swo tano, vutirheli bya hina bya humelela hikuva Yesu u na hina “masiku hinkwawo,” ku katsa ni masiku lawa hi kokaka ku tika evuton’wini bya hina.—Matewu 11:28-30.

19. (a) Xileriso xa Yesu xa ku endla vadyondzisiwa xi katsa ni swiletelo swihi? (b) I yini leswi hi pfunaka ku hetisisa xileriso xa Kreste?

19 Hilaha hi voneke hakona eka xihloko lexi ni lexi hundzeke, xileriso xa Yesu xa ku endla vadyondzisiwa xi hlanganisa swo tala. Yesu u hi byele leswaku ha yini hi fanele hi hetisisa xileriso xa yena naswona hi fanele hi xi hetisisa kwihi. U tlhele a hi byela leswi hi faneleke hi swi dyondzisa ni leswaku hi swi dyondzisa ku fikela rini. Ina, ku hetisisa xileriso xexo lexikulu a hi matlangwana. Kambe tanihi leswi Kreste a hi seketelaka ni leswi a nga na hina, hi nga swi kota ku xi hetisisa! A swi tano ke?

[Tinhlamuselo ta le hansi]

^ par. 3 Buku yin’wana ya tinhlamuselo yi kombisa leswaku Yesu u te, “mi va khuvula . . . mi va dyondzisa,” hayi ‘mi va khuvula mi tlhela mi va dyondzisa.’ Hikwalaho, xileriso xa ku khuvula ni ku dyondzisa a hi “swiendlo leswi swi bohaka . . . leswaku swi tlhandlamana.” Ku ri na sweswo, “ku dyondzisa i xiendlo lexi yaka emahlweni, naswona xi ta emahlweni ka nkhuvulo . . . xi tlhela xi hambetanyana endzhaku ka nkhuvulo.”

^ par. 16 Rungula leri engetelekeke malunghana ni ndlela yo languta ni ku pfuna vanhu lava tsaneke emoyeni ri kumeka eka Xihondzo xo Rindza xa February 1, 2003, matluka 15-18.

A Wu Ta Hlamurisa Ku Yini?

• Hi va dyondzisa njhani van’wana leswaku va hlayisa leswi Yesu a swi leriseke?

• I yini leswi mudyondzisiwa lontshwa a nga swi dyondzaka eka van’wana evandlheni?

• Hi nga endla yini leswaku hi pfuna lava se va tsaneke emoyeni?

• Xitshembiso xa Yesu lexi nge, “Ndzi na n’wina masiku hinkwawo” xi hi tiyisa xi tlhela xi hi chavelela hi ndlela yihi?

[Swivutiso Swa Dyondzo]

[Swifaniso leswi nga eka tluka 15]

Hi fanele hi va vadyondzisi tlhelo vakongomisi

[Swifaniso leswi nga eka tluka 17]

Mudyondzisiwa lontshwa u dyondza swo tala eka xikombiso xa van’wana