Vadyuhari I Swirho Swa Nkoka Swa Vandlha Ra Hina Ra Vukreste

“Lava va byariweke endlwini ya Yehovha, va ta rhumbuka . . . Va ta hambeta va humelela niloko va ri timpunga.”—PISALEMA 92:13, 14.

1. Xana vanhu vo tala va va teka njhani vadyuhari?

YEHOVHA wa ma rhandza malandza yakwe hinkwawo lama tshembekaka, ku katsa ni lama dyuhaleke. Hambiswiritano, xiviko xin’wana xa le United States xi vula leswaku lembe na lembe kwalomu ka vadyuhari lava ringanaka hafu ya miliyoni va le tikweni rero, va khomiwa hi ndlela yo biha kumbe a va khathaleriwi. Swiviko leswi fanaka leswi humaka emisaveni hinkwayo swi kombisa leswaku ku khomiwa hi ndlela yo biha ka vadyuhari i xiphiqo xa misava hinkwayo. Nhlangano wun’wana wu vula leswaku nchumu lowukulu lowu vangaka xiphiqo lexi i “langutelo leri vanhu vo tala va nga na rona . . . ra leswaku vanhu lava dyuhaleke a va ha pfuni nchumu, a va ha koti ku endla nchumu ni leswaku va lava ku tshama va ri karhi va khathaleriwa.”

2. (a) Xana Yehovha u ma languta njhani malandza yakwe yo tshembeka lama dyuhaleke? (b) I nhlamuselo yihi leyi khutazaka leyi hi yi kumaka eka Pisalema 92:12-15?

² Yehovha Xikwembu u teka malandza ya yena yo tshembeka lama dyuhaleke ma ri ya risima. U languta swinene “munhu loyi hi nga yena endzeni”—xiyimo xa hina xa moya—ematshan’weni yo languta leswi hi tsandzekaka ku swi endla. (2 Vakorinto 4:16) ERitweni ra yena ku nga Bibele hi kuma xitiyisekiso lexi xi khutazaka: “Lowo lulama u ta rhumbuka ku fana ni murhi wa ncindzu; u ta kula ku fana ni mukedari eLebanoni. Lava va byariweke endlwini ya Yehovha, va ta rhumbuka eswivaveni swa Xikwembu xa hina. Va ta hambeta va humelela niloko va ri timpunga, va ta hambeta va nyuhela va va vantshwa, va vula leswaku Yehovha u lulamile.” (Pisalema 92:12-15) Loko hi ri karhi hi kambisisa tindzimana leti u ta xiya leswaku ku ni swilo swa nkoka leswi n’wina vadyuhari mi nga pfunaka ha swona evandlheni ra Vukreste.

Va “Humelela Niloko Va Ri Timpunga”

3. (a) Ha yini lavo lulama va fanisiwa ni misinya ya micindzu? (b) Xana vadyuhari va nga “humelela niloko va ri timpunga” hi ndlela yihi?

³ Mupisalema u fanisa lavo lulama ni misinya ya micindzu ‘leyi byariweke eswivaveni swa Xikwembu xa hina.’ Va “hambeta va humelela niloko va ri timpunga.” Vuhundzuluxeri byin’wana byi hlayeka hi ndlela leyi: “Va hambeta va tswala mihandzu hambiloko va dyuharile.” (Tanakh) Xana lawa a hi marito lama khutazaka? Misinya ya micindzu yo saseka leyi leheke yi ku thwii, a yi tele eswivaveni swa le Vuxeni eminkarhini ya ku tsariwa ka Bibele. Ku engetela eka nkoka wa yona wa ku khavisa, micindzu a yi tekiwa yi ri ya nkoka hikwalaho ka leswi a yi tswala mihandzu yo tala swinene, naswona misinya yin’wana a yi hambeta yi tswala mihandzu niloko se yi ri ni malembe yo tlula 100. * Loko wo tshama  u tiyile evugandzerini bya ntiyiso, na wena u nga “veka mihandzu entirhweni wun’wana ni wun’wana lowunene.”—Vakolosa 1:10.

4, 5. (a) I mihandzu yihi ya nkoka leyi Vakreste va faneleke va yi humesa? (b) Nyika swikombiso swa le Matsalweni swa vadyuhari lava humeseke “mbhandzu wa milomu.”

⁴ Yehovha u langutele leswaku Vakreste va humesa “mbhandzu wa milomu”—marito lama dzunisaka yena swin’we ni lama vulavulaka hi swikongomelo swakwe. (Vaheveru 13:15) Xana marito lawa ma tirha eka wena tanihi leswi u dyuhaleke? Ina ma tirha.

⁵ Bibele yi ni swikombiso swa vadyuhari lava twariseke vito ra Yehovha ni swikongomelo swakwe hi xivindzi. Muxe se a a ri ni ‘malembe yo tlula 70’ loko Yehovha a n’wi lerisa ku ya va muprofeta wakwe tlhelo muyimeri wakwe. (Pisalema 90:10; Eksoda 4:10-17) Muprofeta Daniyele a nga tshikanga ku nyikela vumbhoni hi xivindzi malunghana ni vuhosi bya Yehovha hambileswi a a dyuharile. Swi nga ha endleka leswaku Daniyele a a ri emalembeni ya yena ya va-90 loko Belxatsara a n’wi lerisa ku hlamusela marito lawa a ma tsariwe ekhumbini, lawa a ma ri xihundla. (Daniyele, ndzima 5) Naswona ku vuriwa yini hi muapostola Yohane loyi a a dyuharile? Loko a ri emalembeni ya yena yo hetelela, u khotsiwile exihlengeni xa Patmosi “hikwalaho ka ku vulavula hi Xikwembu ni ku nyikela vumbhoni mayelana na Yesu.” (Nhlavutelo 1:9) Kumbexana wa va tsundzuka vanhu vo tala va le Bibeleni lava humeseke “mbhandzu wa milomu” loko se va dyuharile.—1 Samuwele 8:1, 10; 12:2; 1 Tihosi 14:4, 5; Luka 1:7, 67-79; 2:22-32.

6. Yehovha u va tirhise njhani “vavanuna lava kuleke” leswaku va profeta emasikwini lawa ya makumu?

⁶ Loko muapostola Petro a tshaha marito ya Yuwele muprofeta wa Muheveru, u te: “‘Emasikwini yo hetelela,’ ku vula Xikwembu, ‘ndzi ta chululela mpimo wo karhi wa moya wa mina ehenhla ka nyama ya muxaka wun’wana ni wun’wana [ku katsa ni “vavanuna lava kuleke”], . . . kutani va ta profeta.’” (Mintirho 2:17, 18; Yuwele 2:28) Hi ku pfumelelana ni sweswo, emasikwini lawa ya makumu Yehovha u tirhise swirho leswi dyuhaleke swa ntlawa wa vatotiwa ni swa “tinyimpfu tin’wana” leswaku swi twarisa swikongomelo swa yena. (Yohane 10:16) Van’wana va vona se va ni makume ya malembe va ri karhi va humesa mihandzu ya Mfumo hi ku tshembeka.

7. Kombisa ndlela leyi vadyuhari va hambetaka ha yona va humesa mihandzu ya Mfumo hambileswi va tsandzekaka ku endla swilo swin’wana.

⁷ Anakanya hi Sonia loyi a veke muhuweleri wa Mfumo wa nkarhi hinkwawo hi 1941. Hambileswi se a a ri ni malembe a vabya, nkarhi na nkarhi a a fambisa tidyondzo ta Bibele ekaya rakwe. Sonia u te: “Ku chumayela mahungu lamanene i swa nkoka swinene evuton’wini bya mina. Kahle-kahle a ndzi nge hanyi handle ka swona. A ndzi swi lavi ku tshika.” Sonia na sesi wa yena Olive, va ha ku byela Janet rungula ra Bibele leri nyikaka ntshembo. Janet a a vabyela ku fa, naswona va hlangane na yena ekamareni ro rindza ka rona exibedlhele. Mana wa Janet, loyi a a ri Mukhatoliki la hisekaka, u tsakisiwe swinene hi nkhathalelo wa rirhandzu lowu kombisiweke n’wana wa yena, lerova u kale a pfumela ku dyondzeriwa Bibele ekaya naswona sweswi u endla nhluvuko lowukulu. Xana na wena u nga tirhisa minkarhi leyi fanaka ni leyi leswaku u humesa mihandzu ya Mfumo?

8. Xana Kalebe loyi a a dyuharile u swi kombise njhani leswaku u tshemba Yehovha, naswona Vakreste lava dyuhaleke va nga xi tekelela njhani xikombiso xakwe?

⁸ Loko Vakreste lava dyuhaleke va ya emahlweni hi xivindzi entirhweni wo chumayela hi Mfumo ku nga khathariseki ku dyuhala ka vona, va landzela xikombiso xa Kalebe, Muisrayele wo tshembeka loyi a fambeke na Muxe emananga ku ringana malembe ya 40. Kalebe a a ri ni malembe ya 79 hi vukhale loko a tsemakanya Nambu wa Yordani a ya eTikweni leri Tshembisiweke. Loko a a ri munhu un’wana, endzhaku ko heta malembe ya tsevu a ri socha evuthwini ra Vaisrayele leri a ri hlula, a a  ta va a lo khondla mavoko. Kambe ku ri na sweswo, hi vurhena u kombele xiavelo xo tika xa ku ya teka “miti leyikulu leyi tiyisiweke” endhawini ya tintshava ya Yuda, ku nga ndhawu leyi a ku tshama Vaanaka, vavanuna lava a va lehe hi ndlela leyi nga tolovelekangiki. Hi ku pfuniwa hi Yehovha, Kalebe u va “[hlongorile] hilaha Yehovha a tshembiseke hakona.” (Yoxuwa 14:9-14; 15:13, 14) Tiyiseka leswaku Yehovha u na wena, hilaha a veke na Kalebe hakona, loko u ri karhi u humesa mihandzu ya Mfumo hambileswi u dyuhaleke. Naswona loko u tshama u tshembekile, u ta ku nyika ndhawu emisaveni ya yena leyintshwa leyi a yi tshembiseke.—Esaya 40:29-31; 2 Petro 3:13.

“Va Ta Hambeta Va Nyuhela Va Va Vantshwa”

9, 10. I yini lexi endlaka Vakreste lava dyuhaleke va tshama va hanyile eripfumelweni va tlhela va tiya emoyeni? (Vona bokisi eka tluka 13.)

⁹ Loko a kokela nyingiso eka mihandzu leyi tswariwaka hi malandza lama dyuhaleke ya Yehovha, mupisalema u yimbelerile: “Lowo lulama u ta rhumbuka ku fana ni murhi wa ncindzu; u ta kula ku fana ni mukedari eLebanoni. Va ta hambeta va humelela niloko va ri timpunga, va ta hambeta va nyuhela va va vantshwa.”—Pisalema 92:12, 14.

¹⁰ Xana u nga endla yini leswaku u tshama u tiyile emoyeni hambiloko u dyuharile? Lexi endlaka leswaku nsinya wa ncindzu wu tshama wu sasekile hileswi wu kumaka mati yo tenga minkarhi hinkwayo. Hilaha ku fanaka, u nga kuma matimba ematini lawa ma nga ntiyiso wa le Bibeleni, hi ku dyondza Rito ra Xikwembu na hi ku hlanganyela ni nhlengeletano ya xona. (Pisalema 1:1-3; Yeremiya 17:7, 8) Ku tiya ka wena hi tlhelo ra moya ku ku endla u va wa risima eka vapfumeri-kulobye. Xiya ndlela leyi leswi swi tiyisekisiweke ha yona emhakeni ya Yoyada, Muprista la Tlakukeke loyi a a dyuharile.

11, 12. (a) Hi xihi xiphemu xa nkoka lexi hetisisiweke hi Yoyada ematin’wini ya mfumo wa Yuda? (b) Yoyada u xi tirhise njhani xikhundlha xakwe leswaku a kondletela vugandzeri bya ntiyiso?

¹¹ Swi nga ha endleka leswaku Yoyada a a ri ni malembe lama tlulaka 100 loko Hosi ya xisati Ataliya loyi a a titlakusa a teke vulawuri bya le Yuda hi ku dlaya vatukulu va yena n’wini. Xana Yoyada la dyuhaleke a a ta endla yini? Yena ni nsati wakwe va tumbete Yehowaxi etempeleni ku ringana malembe ya tsevu, loyi a a ri yena ntsena mudyandzhaka wa le vuhosini la saleke. Kutani swi nga rindzeriwanga, Yoyada u tivise leswaku Yehowaxi wa malembe ya nkombo hi vukhale se i hosi kutani a lerisa leswaku Ataliya a dlayiwa.—2 Tikronika 22:10-12; 23:1-3, 15, 21.

¹² Leswi a a ri muhlayisi wa hosi, Yoyada u tirhise xikhundlha xa yena ku kondletela vugandzeri bya ntiyiso. U “endl[e] ntwanano exikarhi ka yena ni vanhu hinkwavo ni hosi leswaku va ya emahlweni va ri vanhu va Yehovha.” Yoyada u lerise vanhu leswaku va hirimuxa yindlu ya Bali xikwembu xa mavunwa va tlhela va susa tialitari, swifaniso ni vaprista vakwe. Yoyada u tlhele a kongomisa Yehowaxi leswaku a vuyetela mintirho ya le tempeleni ni ku pfuxeta tempele hi yoxe. “Yehowaxi a hambeta a endla leswi lulameke ematihlweni ya Yehovha emasikwini hinkwawo yakwe lawa Yoyada lowa muprista a n’wi leteleke ha wona.” (2 Tikronika 23:11, 16-19; 24:11-14; 2 Tihosi 12:2) Loko a fa a ri ni malembe ya 130, Yoyada u xiximiwe hi ndlela leyikulu hi ku lahliwa ni tihosi hikuva “a a endle leswinene eIsrayele ni le ka Xikwembu xa ntiyiso ni le ka yindlu ya xona.”—2 Tikronika 24:15, 16.

13. Xana Vakreste lava dyuhaleke va nga ‘endla leswinene eka Xikwembu xa ntiyiso ni le ka yindlu ya xona’ hi ndlela yihi?

¹³ Kumbexana rihanyo leri tsaneke kumbe swiyimo swin’wana swa ku sivela ku kondletela vugandzeri bya ntiyiso. Nilokoswiritano, u nga swi kota ku ‘endla leswinene eka Xikwembu xa ntiyiso ni le ka yindlu ya xona.’ U nga kombisa leswaku u hisekela yindlu ya Yehovha ya moya hi ku va kona eminhlanganweni ya vandlha u tlhela u nyikela tinhlamulo, na hi ku ya ensin’wini loko u swi kota. Ku tiyimisela ka wena ku amukela ndzayo ya Bibele ni ku ri seketela hi ku tshembeka “hlonga ro tshembeka ni ro tlhariha” ni vandlha, swi ta tiyisa Vakreste-kuloni. (Matewu 24:45-47) U nga tlhela u khutaza vapfumeri-kuloni “erirhandzwini ni le mintirhweni leyinene.” (Vaheveru 10:24, 25; Filemoni 8, 9) Naswona u ta pfuna van’wana loko u endla swilo hi ku pfumelelana ni ndzayo ya muapostola Pawulo leyi nge: “Vavanuna lava kuleke a va ringanisele emikhuveni, va tiyimisela, va va lava hlutekeke emianakanyweni, va va lava hanyeke [“tiyeke,” An American Translation] eripfumelweni,  erirhandzwini ni le ku tiyiseleni. Hilaha ku fanaka vavasati lava kuleke a va ve ni mahanyelo ya xichavo, va nga vi lava lumbetaka, hambi ku ri ku va mahlonga ya vhinyo yo tala, va va vadyondzisi va leswi nga swinene.”—Tito 2:2-4.

14. Xana vamakwerhu lava se va nga ni malembe yo tala va ri valanguteri lava nga Vakreste va nga endla yini leswaku va kondletela vugandzeri bya ntiyiso?

¹⁴ Xana se u ni malembe yo tala u ri nkulu evandlheni? Makwerhu un’wana loyi se a nga ni nkarhi wo leha a ri nkulu wa vandlha u nyika xitsundzuxo lexi: “Avela van’wana vutivi lebyi u byi hlengeleteke eka malembe lama hundzeke, u nga va tsoni. Nyika van’wana vutihlamuleri naswona dyondzisa lava va tiyimiseleke ku dyondza mintirho . . . Ringeta ku vona vuswikoti lebyi vanhu van’wana va nga na byona. Va pfune leswaku va byi hlakulela. Va pfune leswaku va lunghekela nkarhi lowu taka.” (Deteronoma 3:27, 28) Loko u wu rhandza hi mbilu hinkwayo ntirho lowu wo chumayela hi Mfumo, van’wana lava nga le vandlheni ra Vukreste va ta kuma mikateko yo tala hikwalaho ka wena.

“Vula Leswaku Yehovha U Lulamile”

15. Vadyuhari lava nga Vakreste va “vula [njhani] leswaku Yehovha u lulamile”?

¹⁵ Malandza ya Xikwembu lama dyuhaleke ma byi hetisisa ma tsakile vutihlamuleri bya wona byo “vula leswaku Yehovha u lulamile.” Loko u ri Mukreste la dyuhaleke, marito ni swiendlo swa wena swi nga va kombisa van’wana leswaku ‘Yehovha i Ribye ra wena, loyi eka yena xi nga riki kona lexi nga lulamangiki.’ (Pisalema 92:15) Hambileswi murhi wa ncindzu wu nga vulavuriki, vukona bya wona byi kombisa leswaku Muvumbi wa wona u tlharihe swinene. Kambe Yehovha u ri nyike wena lunghelo ra ku nyikela vumbhoni ha yena eka lava va amukelaka vugandzeri bya ntiyiso sweswi. (Deteronoma 32:7; Pisalema 71:17, 18; Yuwele 1:2, 3) Ha yini leswi swi ri swa nkoka?

16. I xikombiso xihi xa le Bibeleni lexi kombisaka nkoka wa ku “vula leswaku Yehovha u lulamile”?

¹⁶ Loko Yoxuwa, murhangeri wa Vaisrayele, a “dyuhele naswona a ri wa masiku,” u “vitane tiko hinkwaro ra Israyele, vakulukumba va rona ni varhangeri va rona ni vaavanyisi va rona ni tindhuna ta rona,” a va tsundzuxa hi ndlela leyinene leyi Xikwembu xi tirhisaneke na vona ha yona. U te: “A ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina.” (Yoxuwa 23:1, 2, 14) Marito lawa ma tiyise vanhu leswaku va tiyimisela ku tshama va tshembekile ku ringana nkarhi wo karhi. Kambe, endzhaku  ka ku fa ka Yoxuwa “ku [pfuke] xitukulwana xin’wana . . . lexi a xi nga n’wi tivi Yehovha hambi wu ri ntirho lowu a wu endleleke Israyele. Vana va Israyele va endla swo biha ematihlweni ya Yehovha ni ku tirhela Vabali.”—Vaavanyisi 2:8-11.

17. Yehovha u tirhisane njhani ni vanhu vakwe eminkarhini ya manguva lawa?

¹⁷ Ku tshembeka ka vandlha ra Vukreste ra namuntlha a ku titsheganga hi leswi vuriweke hi malandza lama dyuhaleke ya Xikwembu. Kambe ripfumelo ra hina eka Yehovha ni le ka switshembiso swakwe ra tiyisiwa loko hi titwela hi ta hina swiviko swa ‘ntirho lowukulu’ lowu a wu endleleke vanhu vakwe emasikwini lawa ya makumu. (Vaavanyisi 2:7; 2 Petro 1:16-19) Loko se u ri ni malembe yo tala u ri karhi u hlanganyela ni nhlengeletano ya Yehovha, swi nga ha endleka wa ha wu tsundzuka nkarhi lowu a ko va ni vahuweleri va Mfumo va nga ri vangani endhawini ya ka n’wina kumbe etikweni ra ka n’wina kumbe loko ntirho wo chumayela wa ha kanetiwa swinene. Hi ku famba ka nkarhi u swi vonile loko Yehovha a susa swihinga swin’wana kutani a “hatlisisa” ku andza ka vahuweleri va Mfumo. (Esaya 54:17; 60:22) U xiye nhlamuselo leyi antswisiweke ya ntiyiso wa le Bibeleni naswona u vone ku antswisiwa loku yaka emahlweni ka xiphemu lexi vonakaka xa nhlengeletano ya Xikwembu. (Swivuriso 4:18; Esaya 60:17) Xana wa tinyika nkarhi wo khutaza van’wana hi ku va hlamusela ntokoto wa wena malunghana ni ndlela leyinene leyi Yehovha a tirhisaneke ni vanhu vakwe ha yona? Leswi swi nga va ni vuyelo lebyinene ni lebyi tiyisaka evandlheni ra Vukreste!

18. (a) Kombisa vuyelo lebyi tshamaka hi masiku bya ku ‘byela van’wana leswaku Yehovha u lulamile.’ (b) Xana u ku tokote njhani ku lulama ka Yehovha evuton’wini bya wena?

¹⁸ Ku vuriwa yini hi minkarhi leyi u voneke nkhathalelo wa Yehovha wa rirhandzu ni nkongomiso wakwe evuton’wini bya wena? (Pisalema 37:25; Matewu 6:33; 1 Petro 5:7) Makwerhu wa xisati la dyuhaleke la vuriwaka Martha a a tolovele ku khutaza van’wana a ku: “Hambi ko endleka yini, u nga tshuki u fularhela Yehovha. U ta ku tiyisa.” Xitsundzuxo lexi xi ve ni vuyelo lebyikulu eka Tolmina, xin’wana xa swichudeni swa Bibele swa Martha, lexi khuvuriweke eku sunguleni ka va-1960. Tolmina u ri: “Loko ndzi feriwa hi nuna ndzi hele matimba, kambe marito wolawo ma endle ndzi tiyimisela ku ka ndzi nga hundziwi ni hi nhlangano wun’we. Naswona Yehovha u ndzi tiyisile hakunene leswaku ndzi ya emahlweni.” Tolmina u nyike swichudeni swa yena swo tala swa Bibele xitsundzuxo lexi fanaka eka malembe lama landzeleke. Hakunene, loko u khutaza van’wana u tlhela u vulavula hi ndlela leyinene leyi Yehovha a tirhisanaka ha yona ni vanhu vakwe, u nga pfuna swinene eku tiyiseni ka ripfumelo ra vapfumeri-kuloni.

Yehovha U Va Teka Va Ri Va Risima Vadyuhari Lava Tshembekaka

19, 20. (a) Yehovha u yi languta njhani mintirho ya malandza ya yena lama dyuhaleke? (b) I yini leswi nga ta kambisisiwa exihlokweni lexi landzelaka?

¹⁹ Emisaveni ya namuntlha, laha vanhu va kona va nga nkhensiki, vadyuhari a va khathaleriwi.  (2 Timotiya 3:1, 2) Loko vo tsundzukiwa, hakanyingi ku va ku ri hikwalaho ka swilo leswi va swi endleke enkarhini lowu hundzeke—va tsundzukiwa hikwalaho ka leswi va swi endleke ku nga ri hikwalaho ka leswi va swi endlaka. Ku hambana ni sweswo, Bibele yi ri: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona, hileswi mi tirheleke vakwetsimi naswona ma ha ya emahlweni mi va tirhela.” (Vaheveru 6:10) Ina, Yehovha Xikwembu wa yi tsundzuka mintirho leyi u yi endleke hi ku tshembeka enkarhini lowu hundzeke. Kambe u tlhela a ku teka u ri wa risima hikwalaho ka leswi u hambetaka u swi endla entirhweni wakwe. Ina, u teka vadyuhari lava tshembekeke va ri Vakreste lava vekaka mihandzu, lava tiyeke emoyeni ni lava gingiritekaka—vanhu lava nyikelaka vumbhoni bya matimba yakwe.—Vafilipiya 4:13.

²⁰ Xana vadyuhari lava nga evandlheni ra hina ra Vukreste u va languta hi ndlela leyi Yehovha a va langutaka ha yona? Loko swi ri tano, u ta susumeteleka ku va kombisa rirhandzu. (1 Yohane 3:18) Xihloko lexi landzelaka xi ta kombisa tindlela leti nga tirhisiwaka ku kombisa rirhandzu rolero loko ku khathaleriwa swilaveko swa vona.

[Nhlamuselo ya le hansi]

A Wu Ta Hlamurisa Ku Yini?

• Vadyuhari va “tswala mihandzu” hi ndlela yihi?

• Ha yini ku tiya emoyeni ka Vakreste lava dyuhaleke ku ri nchumu wa nkoka?

• Vadyuhari va nga “vula [njhani] leswaku Yehovha u lulamile”?

• Ha yini Yehovha a ma teka ma ri ya risima malandza yakwe lawa se ma nga ni nkarhi wo leha ma n’wi tirhela?

[Swivutiso Swa Dyondzo]

[Bokisi leri nga eka tluka 13]

Lexi Va Pfuneke Leswaku Va Tshama Va Tiyile eRipfumelweni

I yini lexi pfuneke vanhu lava nga ni malembe yo tala va ri Vakreste leswaku va tshama va tiyile eripfumelweni ni ku tshama va hanyile hi tlhelo ra moya? Van’wana va vule leswi landzelaka:

“Ku hlaya matsalwa lama vulavulaka hi vuxaka bya hina na Yehovha i swa nkoka ngopfu. Vusiku byo tala ndzi hlaya Pisalema 23 na 91.”—Olive, la khuvuriweke hi 1930.

“Minkarhi hinkwayo ndza tiyiseka leswaku ndzi va kona enkulumeni yin’wana ni yin’wana ya nkhuvulo kutani ndzi yi yingisela hi vukheta, onge hiloko ku khuvuriwa mina. Ku tshama ndzi ri karhi ndzi anakanya hi ku tinyiketela ka mina swi ndzi pfune leswaku ndzi tshama ndzi tshembekile.”—Harry, la khuvuriweke hi 1946.

“Ku khongela siku na siku i swa nkoka—minkarhi hinkwayo hi kombela mpfuno wa Yehovha, nsirhelelo wakwe ni ku katekisiwa hi yena, ‘hi n’wi tivisa tindlela ta hina hinkwato.’” (Swivuriso 3:5, 6)—Antônio, la khuvuriweke hi 1951.

“Ku yingisa mintokoto ya lava se va nga ni malembe yo tala va tirhela Yehovha hi ku tshembeka swi tiyisa ku tiyimisela ka mina ku tshama ndzi tshembekile eka yena.”—Joan, la khuvuriweke hi 1954.

“I swa nkoka ku nga titeki u ri wa nkoka ngopfu. Hinkwaswo leswi hi nga na swona hi swi kume hikwalaho ka musa lowukulu wa Xikwembu. Ku va ni langutelo leri swi ta hi pfuna leswaku hi ya endhawini leyi faneleke leswaku hi kuma swakudya swa moya leswi nga ta hi pfuna ku tiyisela ku fika emakumu.”—Arlene, la khuvuriweke hi 1954.

[Xifaniso lexi nga eka tluka 11]

Vadyuhari va humesa mihandzu ya nkoka ya Mfumo

[Xifaniso lexi nga eka tluka 14]

Ku tiya emoyeni ka vadyuhari i nchumu wa risima