Nghena endzeni

Hundzela eka leswi nga endzeni

Mahlo Ya Mina Ma Pfulekile Loko Ndza Ha Ri Bofu!

Mahlo Ya Mina Ma Pfulekile Loko Ndza Ha Ri Bofu!

 Mhaka Ya Vutomi

Mahlo Ya Mina Ma Pfulekile Loko Ndza Ha Ri Bofu!

HI KU VULA KA EGON HAUSER

Endzhaku ko heta tin’hweti timbirhi ndzi ri bofu, ndzi dyondze tidyondzo ta Bibele leti a ndzi ti ba hi makatla enkarhini lowu hundzeke.

LOKO ndzi anakanya hi malembe ya makume nkombo lama hundzeke, ndzi ni swilo swo tala leswi ndzi endlaka ndzi titwa ndzi enerisekile swinene evuton’wini bya mina. Kambe nchumu wun’we lowu a ndzi ta rhandza ku wu cinca evuton’wini bya mina i nkarhi lowu ndzi tiveke Yehovha Xikwembu ha wona, a ndzi ta tsaka swinene loko a ndzi n’wi tive ndza ha ri ntsongo.

Ndzi velekiwe hi 1927 eUruguay, ku nga xitikwana lexi tikhotlekeke exikarhi ka Argentina na Brazil, lexi nga ni ndhawu yo xonga leyi kokaka tikhilomitara to leha ku lulama ni Ribuwa ra Atlantic. Vunyingi bya vaaki va kona i vana va valuveri va Mantariyana ni va Mapaniya. Kambe, vatswari va mina a va ri valuveri lava humaka eHungary naswona loko ndza ha ri ntsongo swinene, a hi tshama emugangeni wa swisiwana, nilokoswiritano a hi tihanyela ku fana ni vanhu lavan’wana. A swi nga kali swi lava leswaku hi lotlela timbanti ta tindlu ta hina kumbe ku hoxa tinsimbi emafasitereni. A hi hanyisana hi vun’we hi nga ri na xihlawuhlawu. Hinkwerhu a hi ri vanghana—vanhu vambe ni vaaka-tiko, vantima ni valungu.

Vatswari va mina a va nghena kereke ya Khatoliki kutani ndzi sungule ku pfuneta ealitarini loko ndzi ri ni malembe ya khume hi vukhale. Loko se ndzi kurile, ndzi tirhe ni un’wana loyi a hi nghena swin’we kereke hi ri vatsundzuxi va mubixopo wa xifundzha lexi a xi lawuriwa hi yena. Leswi a ndzi lava ku dyondza ta vutshunguri, ndzi rhambiwe ku va kona eka seminara leyi a yi hleriwe hi Kereke ya Khatoliki le Venezuela. Leswi ntlawa wa madokodela lowu a ndzi ri eka wona a wu tshungula mavabyi ya vavasati, hi averiwe ku dyondza hi tiphilisi to sivela mbeleko leti a to sungula ku xavisiwa enkarhini wolowo.

 Leswi Ndzi Tsakiseke Loko Ndza Ha Ri Xichudeni Xa Ta Vutshunguri

Loko ndza ha ri xichudeni xa ta vutshunguri ndzi ri karhi ndzi dyondza hi miri wa munhu, ndzi tsakisiwe ngopfu hi vutlhari lebyi vonakaka eka ndlela leyi miri wu endliweke ha yona. Hi xikombiso, ndzi hlamarisiwe hi ndlela leyi miri wu kotaka ku titshungula ha yona ni ndlela leyi timbanga ti pfalekaka ha yona, ku fana niloko xivindzi xi endliwe vuhandzuri kumbe rimbambu ro karhi ri tsemiwile ri kotaka ku tlhela ri kula ri tlhelela exiyin’weni xa rona.

Hi nkarhi lowu fanaka, ndzi vone vanhu vo tala lava a va vaviseke ngopfu, naswona swi ndzi twise ku vava loko va fa hi leswi va pomperiweke ngati. Ninamuntlha a ndzi si yi rivala ndlela leyi a swi tika ha yona ku vulavula ni maxaka ya vavabyi lava feke hikwalaho ka swiphiqo leswi vangiweke hi ku pomperiwa ngati. Minkarhi yo tala maxaka a ma nga byeriwi leswaku varhandziwa va wona va dlayiwe hi ngati leyi va pomperiweke yona. Ku ri na sweswo a va nyikiwa swivangelo leswi nga riki ntiyiso. Hambileswi se ku hundzeke malembe yo tala, a ndzi si yi rivala ndlela leyi mhaka ya ku pomperiwa ka ngati a yi kingindza ripfalo ra mina ha yona, naswona ndzi hetelele ndzi endle xiboho xa leswaku ku fanele ku ri ni lexi hoxeke hi matshungulelo lawa. Ndzi navela onge loko nawu wa Yehovha wa ku kwetsima ka ngati a ndzi wu tive hi nkarhi wolowo! Phela a ndzi ta va ndzi swi tive kahle leswaku ha yini matshungulelo wolawo ma hoxile.—Mintirho 15:19, 20.

Ku Enerisiwa Hi Ku Pfuna Vanhu

Hi ku famba ka nkarhi ndzi ve muhandzuri ni mukongomisi wa tliniki eSanta Lucía. Naswona a ndzi tirha eka Nhlangano wa Tiko wa Sayense ya Ntivo-vutomi. Leswi swi endle leswaku ndzi titwa ndzi enerisekile swinene. Ndzi pfune vanhu emavabyini ya vona, ndzi endla leswaku va titwa va ntshunxekile eku xanisekeni ka vona naswona minkarhi yo tala ndzi ponise vutomi bya vona ndzi tlhela ndzi beburisa vamanana vo tala. Hikwalaho ka leswi ndzi swi voneke enkarhini lowu hundzeke loko vanhu va pomperiwa ngati, ndzi papalate ku tshungula hi ngati naswona ndzi endle vuhandzuri byo tala ndzi nga tirhisanga ni thonsi ni rin’we ra ngati. Eka mina ku mpfempfa ka ngati a ku fana ni bakiti leri pfutaka. A ku na ndlela yin’wana yo siva ku pfuta koloko handle ko pfala laha ri pfutaka kona, ku nga ri ku tshamela ku ri tata hi mati.

Ku Tshungula Vavabyi Lava Nga Timbhoni

Ndzi sungule ku tolovelana ni Timbhoni ta Yehovha hi va-1960 loko ti sungula ku ta etliniki leyi a ndzi tirha eka yona leswaku ti ta endliwa vuhandzuri handle ko pomperiwa ngati. A ndzi nge pfuki ndzi rivale muvabyi un’wana, loyi a a ri phayona (mutirheli wa nkarhi hinkwawo), loyi vito ra yena a ku ri Mercedes Gonzalez. Ngati ya yena a yi ri yitsongo lerova madokodela ya xibedlhele xa yunivhesiti a ma nga swi lavi no ringeta ku n’wi endla vuhandzuri hi ku vona leswaku ana humba yi ta olela nkuma. Hi fike hi n’wi endla vuhandzuri etliniki leyi a ndzi tirhela eka yona hambileswi a a mpfempfa ngati yo tala. Vuhandzuri byebyo byi fambe kahle naswona u hete malembe yo tlula 30 a ha ri phayona ku fikela loko a lova ku nga ri khale, a ri ni malembe ya 86 hi vukhale.

Minkarhi hinkwayo a ndzi tsakisiwa hi ndlela leyi Timbhoni ti rhandzanaka ni ku tsakelana ha yona loko ti endzela vamakwavo lava nga Vakreste exibedlhele. Loko ndzi ri karhi ndzi kambela vavabyi, a ndzi tiphina hi ku ti yingisela loko ti ri karhi ti bula hi leswi ti swi pfumelaka naswona a ndzi yi teka minkandziyiso leyi a ti ndzi nyika yona. A swi nga ti emianakanyweni ya mina leswaku ku nga ri khale a ndzi ta va dokodela tlhelo makwavo wa tona wa moya.

Xin’wana lexi endleke leswaku ndzi tolovelana ngopfu ni Timbhoni hi loko ndzi tekana na Beatriz,  loyi a a ri n’wana wa muvabyi un’wana. Swirho swo tala swa ndyangu wa ka vona ana se a swi hlanganyela ni Timbhoni naswona endzhaku ka loko hi tekanile, na yena u ve Mbhoni leyi hisekaka. Loko ku ri mina, a ndzi nghene hi nhloko entirhweni wa mina naswona a ndzi ri ni xikhundlha xo karhi lexi tlakukeke eka ta vutshunguri. Swilo a swi vonaka swi ndzi fambela kahle. A ndzi nga swi voni nikatsongo leswaku ku nga ri khale ndzi ta funengetiwa hi papa ra ntima.

Ku Hlaseriwa Hi Maxangu

A ku na nchumu lowu vavaka ku fana niloko dokodela wa vuhandzuri a va bofu. Swi ve tano eka mina. Ku lo swi pfuketana ku ku dzwii, ndzi nga ha voni nchumu naswona a yi nga ri kona ndlela yo tiva loko ndzi ta tlhela ndzi kota ku vona. Endzhaku ka loko ndzi endliwe vuhandzuri, ndzi etlele emubedweni mahlo ya mina ma bandhichiwile kutani ndzi teriwa hi gome. Ndzi titwe ndzi ri xikangalafula naswona ndzi boleriwe hi mbewu ya ndlala lerova ndzi anakanya ku tisunga. Leswi a ndzi ri eka xithezi xa vumune, ndzi pfuke emubedweni wa mina ndzi famba hi khumbi, ndzi ringeta ku mbambela ndzi lavana ni fasitere. A ndzi lava ku tisunga. Hambiswiritano, ndzi hetelele ndzi ri ephasejini ya xibedlhele kutani muongori a ndzi tlherisela emubedweni wa mina.

A ndza ha tlhelanga ndzi swi ringeta sweswo. Kambe leswi a ndzi nga voni nchumu ndzi hambete ndzi ri ni gome naswona ndzi ri ni ximbilwambilwana. Hi nkarhi lowu a ndza ha ri bofu, ndzi tshembise Xikwembu leswaku loko ndzo tlhela ndzi kota ku vona, ndzi ta hlaya Bibele hinkwayo. Hiloko mahlo ya mina ma hetelela ma pfulekile katsongo kutani ndzi kota ku hlaya. Kambe a ndzi nga ha ta swi kota ku ya emahlweni ndzi ri muhandzuri. Hambiswiritano, eUruguay ku ni marito lama tolovelekeke lama nge “No hay mal que por bien no venga,” “Nchumu hambi wo bihisa ku yini ku ni leswinene leswi nga kumekaka eka wona.” Kunene hi leswi a swi ta endleka eka mina.

Ku Sungula Hi Nenge Wa Ximatsi

A ndzi lava ku xava nkandziyiso wa maletere lamakulu wa The Jerusalem Bible, hiloko ndzi twa leswaku Timbhoni ta Yehovha ti ni Bibele leyi nga durhiki, leyi Mbhoni yin’wana leya ha riki muntshwa yi tshembiseke ku ndzi tisela yona ekaya. Kunene hi xamundzuku xa kona yi tise Bibele yoleyo ekaya. Nkatanga u pfule nyangwa kutani a bula na yona. Ndzi tlatlarhuke ndzi ri hala ndzhaku ka yindlu ndzi byela nkatanga leswaku loko a nyike Mbhoni yoleyo mali ya Bibele, a yi nambe yi famba, kunene yi fambile hi ku tsopeta ka tihlo. A ndzi swi tivanga leswaku Mbhoni leyi a yi ta cinca vutomi bya mina ku nga ri khale.

Siku rin’wana ndzi tshembise nkatanga swo karhi kambe ndzi n’wi khomisa ribye. Kutani leswaku ndzi pfala xikweleti xa mina nileswaku ndzi n’wi tsakisa, ndzi n’wi byele leswaku ndzi ta famba na yena loko a ya eXitsundzuxweni xa rifu ra Kreste, lexi tlangeriwaka lembe ni lembe. Loko siku ra kona ri fika ndzi xi tsundzukile xitshembiso xa mina kutani ndzi famba na yena. Ndzi fike ndzi tsakisiwa hi moya wa vunakulobye lowu a wu ri kona ni ndlela leyi ndzi amukeriweke hi mandla mambirhi ha yona. Loko xivulavuri xi sungula nkulumo ya xona, ndzi hlamarile ku kuma leswaku hi rona jaha leriya ndzi nga ri tlatlarhukela ndzi ri hlongola emutini wa mina. Nkulumo ya rona yi ndzi khumbile swinene naswona ndzi sale ndzi khomiwe hi tingana hi leswi ndzi ri hlongoleke endlwini ya mina. Xana a ndzi ta xi lunghisa njhani xiyimo lexi?

Ndzi kombele nkatanga leswaku a ri rhambela eswakudyeni le kaya, kambe u te: “Xana a swi nga ta va swinene loko ri rhambiwa hi wena? Tshama kwala ri ta ta.” Kunene a a tiyisile. Ri tile ri ta hi pfuxela kutani ri pfumela ku ta dya na hina le kaya.

Bulo leri hi veke na rona madyambu wolawo ri hi endzeleke ha wona ri cince swilo swo tala evuton’wini bya mina. Ri ndzi kombe buku leyi nge Ntiyiso Lowu Yisaka eVuton’wini Lebyi Nga Heriki, * kutani ndzi ri komba tivholumo ta tsevu ta yona buku yoleyo. A ndzi ti kume eka vavabyi vo hambana-hambana lava nga Timbhoni, loko va te exibedlhele kambe a ndzi nga si tshama ndzi ti hlaya. Swivutiso swa mina a swo na kunene loko hi ri karhi hi dya ni loko hi hetile kukondza byi va vusiku—hinkwaswo ka swona ri swi hlamule hi Bibele. Bulo rero ri kale ri hela hi ma-ta-ku-xa wa siku leri tlhandlamaka. Loko jaha leri ri nga si famba, ri kombele ku dyondza na mina Bibele ri tirhisa buku leyi nge Ntiyiso. Buku yoleyo hi yi hete hi tin’hweti tinharhu kutani hi ya emahlweni ni leyi nge “Babylon the Great Has  Fallen!” God’s Kingdom Rules! * Endzhaku ka sweswo ndzi nyiketele vutomi bya mina eka Yehovha Xikwembu kutani ndzi khuvuriwa.

Ku Titwa Ndzi Ri Na Mpfuno Nakambe

Vubofu bya mina byi endle leswaku ‘mahlo ya mbilu ya mina’ ma vona tidyondzo ta Bibele leti a ndzi nga ri na mhaka na tona ku fikela hi nkarhi wolowo! (Vaefesa 1:18) Ku tiva Yehovha ni swikongomelo swa yena swa rirhandzu swi cince vutomi bya mina hilaha ku heleleke. Ndzi tlhele ndzi titwa ndzi ri munhu naswona ndzi tsakile. Ndzi pfuna vanhu hi tlhelo ra nyama ni ra moya naswona ndzi va komba ndlela leyi va nga hanyaka ha yona nkarhinyana wo leha eka mafambiselo lawa ya swilo ni ku hanya hilaha ku nga heriki emafambiselweni lamantshwa.

Ndzi endle nhluvuko eka ta matshungulelo naswona ndzi endle ndzavisiso wa makhombo lama vangiwaka hi ku tirhisa ngati, ni wa matshungulelo man’wana, swin’we ni hi timfanelo ta muvabyi ni ndzavisiso wa ntivo-vutshunguri. Ndzi ve ni lunghelo ro avelana rungula leri ni va ndzawulo ya vutshunguri ya tiko ra rikwerhu loko ndzi rhambiwe ku ya vulavula hi timhaka leti eka tiseminara ta vutshunguri. Hi 1994 ndzi ve kona eka nhlangano wa ku tshungula handle ko tirhisa ngati eRio de Janeiro, le Brazil kutani ndzi nyikela nkulumo leyi vulavulaka hi ndlela leyi vanhu lava pfempfaka ngati va nga tshunguriwaka ha yona. Rin’wana ra rungula rero ri nghenisiwe eka xihloko lexi ndzi xi tsaleke lexi nge “Una propuesta: Estrategias para el Tratamiento de las Hemorragias” (“A Strategic Proposition for Anti-Hemorrhagic Treatment”), lexi kandziyisiweke eka magazini wa ta vutshunguri lowu vuriwaka Hemoterapia.

Ku Tshama Ndzi Tshembekile Loko Ndzi Tshikilelekile

Leswi a swi ndzi kanakanisa eku sunguleni hi ku pomperiwa ka ngati a swi sekeriwe ngopfu eka vutivi bya sayense. Kambe, loko se ku ri mina la vabyaka exibedlhele, ndzi kume swi tika ku ala ku pomperiwa ngati ni ku tshama ndzi tiyile eripfumelweni loko ndzi langutane ni ntshikilelo lowukulu wa madokodela. Endzhaku ko hlaseriwa hi vuvabyi bya mbilu, ndzi boheke ku heta tiawara timbirhi ndzi ri karhi ndzi hlamusela dokodela leswaku a ndzi nge pfumeli ku pomperiwa ngati. Vatswari va yena a va ri vanghana va mina lavakulu naswona u ndzi byele leswaku a nge ndzi tshiki ndzi fa loko a vona leswaku ndzi nga pona loko o ndzi pompela ngati. Ndzi khongele Yehovha hi mbilu ndzi n’wi kombela leswaku a pfuna dokodela loyi a twisisa a tlhela a xixima xivangelo xa mina xo ala ku pomperiwa ngati hambileswi a a nga pfumelelani na swona. Dokodela loyi u hetelele a tshembisile leswaku u ta xixima xikombelo xa mina.

Siku rin’wana a ndzi fanele ndzi handzuriwa ku susiwa tshumba lerikulu eka nhlaribya ya vununa. A ku mpfempfa ngati. Ndzi tlhele ndzi boheka ku hlamusela leswaku ha yini ndzi ala ku pomperiwa ngati, kambe madokodela ma xixime xikombelo xa mina hambileswi ndzi mpfempfeke ngati yo tala.

Ku Cinca Langutelo

Tanihi xirho xa Nhlengeletano ya Misava Hinkwayo ya Ntivo-vutshunguri, swi ndzi tsakisile ku vona madokodela ni valawuri va cinca langutelo ra vona leri a va ri na rona hi timfanelo ta muvabyi. Sweswi madokodela a ma ha tiendli vatswari va muvabyi kutani ma swi xixima leswi vavabyi va ma byelaka swona. Sweswi ma pfumelela vavabyi leswaku va hlawula ndlela leyi va lavaka ku tshunguriwa ha yona. Timbhoni ta Yehovha a ta ha tekiwi tanihi vanhu lava hisekelaka etlhelo lava nga faneriwiki hi ku tshunguriwa. Ku ri na sweswo ti tekiwa ti ri vanhu lava dyondzekeke, lava timfanelo ta vona ti faneleke ti xiximiwa. Eka tiseminara ta vutshunguri ni le ka minongonoko ya thelevhixini, vaprofesa lava dumeke va te: “Matshalatshala lama endliweke hi Timbhoni ta Yehovha ma endle leswaku hi twisisa ta mpompelo wa ngati . . . ” “Hi dyondze swo  karhi eka Timbhoni . . . ” naswona “Ti hi dyondzise leswaku hi antswisa.”

Ku vuriwe leswaku vutomi i bya nkoka ku tlula hinkwaswo hikuva hi kota ku vulavula hi ntshunxeko ni ku va ni xindzhuti hikwalaho ka byona. Sweswi vanhu vo tala va ri amukela vonelo leri tlakukeke ra le nawini, va swi xiya leswaku munhu ha un’we u ni lunghelo ra yena n’wini naswona hi yena ntsena la nga tiendlelaka xiboho xa leswaku hi yihi eka timfanelo ta yena leyi faneleke yi rhangisiwa hi nkarhi wa kona. Hi ndlela yoleyo, ku rhangisiwa xindzhuti xa muvabyi, ntshunxeko wo tihlawulela ni tidyondzo ta yena ta vukhongeri. Muvabyi u ni mfanelo yo hlawula ndlela leyi a lavaka ku tshunguriwa ha yona. Ndzawulo ya Rungula ra Swibedlhele leyi simekiweke hi Timbhoni ta Yehovha yi pfune madokodela yo tala leswaku ma antswisa matwisiselo ya wona etimhakeni leti.

Nseketelo lowu ndyangu wa mina wu hambetaka wu ndzi nyika wona wu endle leswaku ndzi va mpfuno entirhweni wa Yehovha nileswaku ndzi va nkulu evandlheni ra Vukreste. Tanihi laha se ndzi vuleke hakona, lexi ndzi tisolaka ngopfu ha xona hileswi ndzi hlweleke ku dyondza hi Yehovha evuton’wini bya mina. Hambiswiritano, ndza tsaka leswi mahlo ya mina ma ndzi pfuneke leswaku ndzi va ni ntshembo lowu tsakisaka wa ku hanya ehansi ka Mfumo wa Xikwembu, laha ku ‘nga riki na munhu la nga ta ku: “Ndza vabya.”’—Esaya 33:24. *

[Tinhlamuselo ta le hansi]

^ par. 24 Yi kandziyisiwe hi Timbhoni ta Yehovha.

^ par. 24 Yi kandziyisiwe hi Timbhoni ta Yehovha.

^ par. 34 Loko xihloko lexi xa ha tsariwa, Makwerhu Egon Hauser u file. U fe a tshembekile, naswona hi tsaka na yena hikuva ntshembo wakwe wu tiyile.

[Xifaniso lexi nga eka tluka 24]

Ndzi ri karhi ndzi tirha exibedlhele xa Santa Lucía ndza ha ri emalembeni ya va-30

[Xifaniso lexi nga eka tluka 26]

Ndzi ri na nkatanga Beatriz hi 1995