Nghena endzeni

Hundzela eka leswi nga endzeni

666—A Hi Xihundla

666—A Hi Xihundla

 666—A Hi Xihundla

“Ku nga vi na munhu la kotaka ku xava kumbe ku xavisa handle ka munhu la nga ni mfungho, ku nga vito ra xivandzana kumbe nhlayo ya vito ra xona. Laha hi lomu vutlhari byi tirhaka kona: Loyi a nga ni ku twisisa a a kumisise nhlayo ya xivandzana, hikuva i nhlayo ya munhu; naswona nhlayo ya xona i 666.”—Nhlavutelo 13:17, 18.

A TI talanga timhaka ta le Bibeleni leti pfuxeke swivutiso swo tala ku fana ni vuprofeta lebyi vulavulaka hi mfungho kumbe vito leri tumbeleke ra “xivandzana”—ku nga nomboro leyi nge 666. Eka thelevhixini ni le ka Internet, hambi ku ri eka tifilimi, tibuku ni timagazini, mfungho wa xivandzana wu mbamberiwe hi tindlela to tala.

Van’wana va anakanya leswaku 666 i mfungho wa mukaneti wa Kreste, loyi ku vulavuriwaka ha yena eBibeleni. Van’wana va vula leswaku i nomboro leyi yimelaka mfungho wo karhi wa xikolokolo, wo tanihi wa ku tlhaveriwa emirini kumbe ku nghenisiwa xinsimbhana xa khompyuta lexi nga ni nomboro leyi kombisaka munhu wa kona a ri mutirheli wa xivandzana. Van’wana vona va anakanya leswaku 666 i mfungho wa vapapa va Khatoliki. Hi ku tirhisa tinomboro ta Xirhoma eka maletere ya xithopo xa ximfumo xa mupapa lexi nge Vicarius Filii Dei (Murhumiwa wa N’wana wa Xikwembu), ni ku cincanyana tinomboro, va fikelela eka nhlayo ya 666. Nakambe ku vuriwa leswaku nomboro yoleyo yi nga kumiwa eka vito ra Xilatini ra Hosi ya Rhoma Diocletian ni loko ku hundzuluxeriwa vito leri nge Nero Khezari ri ya eka Xiheveru. *

Kambe tinhlamuselo teto leti rharhanganeke leti vanhu va tisunguleleke tona ti hambane ngopfu ni leswi Bibele hi yoxe yi vulaka swona malunghana ni mfungho wa xivandzana, hilaha hi nga ta swi vona hakona eka xihloko lexi landzelaka. Bibele yi paluxa leswaku lava va nga ni mfungho wolowo va ta weriwa hi vukari bya Xikwembu loko xi lovisa mafambiselo ya swilo ya namuntlha. (Nhlavutelo 14:9-11; 19:20) Hikwalaho, ku twisisa nhlamuselo ya 666 a swi lavi ku titshuva nhloko ngopfu. Lexi tsakisaka, Yehovha Xikwembu loyi a nga xikombiso xa rirhandzu ni Xihlovo xa ku vonakala ka moya, a nga tshikanga malandza yakwe ma ngwingwa emunyameni malunghana ni mhaka leyi ya nkoka.—2 Timotiya 3:16; 1 Yohane 1:5; 4:8.

[Nhlamuselo ya le hansi]

^ par. 4 Leswaku u kuma nhlamuselo ya tinomboro to karhi, vona Xalamuka! ya September 8, 2002.