Nghena endzeni

Hundzela eka leswi nga endzeni

Nkhuvo Lowu U Katsekaka Eka Wona

Nkhuvo Lowu U Katsekaka Eka Wona

 Nkhuvo Lowu U Katsekaka Eka Wona

LOKO a ri laha misaveni, Yesu Kreste u sungule nkhuvo lowu dzunisaka Xikwembu. Lowu hi wona ntsena nkhuvo wa vukhongeri lowu a leriseke valandzeri vakwe hi ku kongoma leswaku va wu tlangela. Nkhuvo lowu a ku ri Xilalelo xa Hosi, lexi nakambe xi tivekaka tanihi Xilalelo xo Hetelela.

A hi nge a wu hlalele u ri ekulenyana loko ku ri karhi ku endliwa malunghiselelo ya nkhuvo wolowo. Yesu ni vaapostola vakwe va hlengeletane ekamareni ra le henhla eYerusalema leswaku va ta tlangela Paseka ya Xiyuda. Va ha ku heta ku dya swakudya leswi tolovelekeke swa Paseka, leswi katsaka nyama leyi oxiweke ya xinyimpfana, matsavu layo bava, xinkwa xo kala comela ni vhinyo yo tshwuka. Muapostola Yudasi Iskariyota la nga tshembekangiki wa ha ku hlongoriwa naswona u ta xenga N’wini wakwe ku nga ri khale. (Matewu 26:17-25; Yohane 13:21, 26-30) Yesu u sale ni vaapostola vakwe vo tshembeka va 11. Matewu hi un’wana wa vona.

Hi ku ya hi rungula ra Matewu loyi a nga mbhoni leyi swi voneke hi mahlo, hi leyi ndlela leyi Yesu a sunguleke Xilalelo xa Hosi ha yona: “Yesu a teka xinkwa [xo kala comela], loko a nkhensile, a xi phema ivi a nyika vadyondzisiwa, a ku: ‘Tekani, mi dya. Leswi swi vula miri wa mina.’ Nakambe, a teka xinwelo [xa vhinyo], loko a nkhensile, a va nyika xona, a ku: ‘Nwanani eka xona, hinkwenu ka n’wina; hikuva leswi swi vula “ngati ya ntwanano” ya mina, leyi nga ta halateriwa vo tala leswaku va rivaleriwa swidyoho.’”—Matewu 26:26-28.

Ha yini Yesu a sungule Xilalelo xa Hosi? Naswona ha yini a tirhise xinkwa xo kala comela ni vhinyo yo tshwuka exilalelweni xexo? Xana valandzeri hinkwavo va Kreste a va fanele va dya swifanekiselo leswi? Xana nkhuvo lowu wu fanele wu tlangeriwa kangani? Xana i wa nkoka hakunene eka wena?