Nghena endzeni

Hundzela eka leswi nga endzeni

Tshama U Tengile Emahanyelweni Hi Ku Hlayisa Mbilu Ya Wena

Tshama U Tengile Emahanyelweni Hi Ku Hlayisa Mbilu Ya Wena

 Tshama U Tengile Emahanyelweni Hi Ku Hlayisa Mbilu Ya Wena

“Hlayisa mbilu ya wena ku tlula hinkwaswo leswi swi faneleke swi hlayisiwa, hikuva swihlovo swa vutomi swi le ka yona.”—SWIVURISO 4:23.

1-3. (a) Hakanyingi vanhu va swi kombisa njhani leswaku a va ma tekeli enhlokweni mahanyelo ya vona lama tengeke? Kombisa. (b) Ha yini ku tlangela mahanyelo lama tengeke swi ri swa nkoka?

KUMBEXANA xifaniso lexi hi nga ta bula ha xona a xi vonaka xi ri xa xikhale. Swi nga ha endleka a xi nga faneli endlwini ya mukhavisi. Mhaka ya xiheri hileswaku n’wini wa xona a a nga xi tirhisi nchumu. Xifaniso lexi xi hetelele xi ri endhawini yo xavisela swilo swa khale, laha a xi xavisiwa hi 29 wa tidolara (ta le U.S.). Kambe endzhaku ka malembenyana xi kumeke xi durha kwalomu ka miliyoni wa tidolara! Ina, xi kumeke xi ri xifaniso xa risima swinene. Anakanya ndlela leyi n’wini wa xona wo sungula a titweke ha yona, hileswi eku sunguleni a xi tekeleke ehansi swinene!

2 Hakanyingi ku endleka nchumu wo lava ku fana ni wolowo hi mahanyelo ya munhu lama tengeke. Vanhu vo tala namuntlha va tekela mahanyelo yo tenga ehansi. Van’wana va anakanya leswaku ku hanya hi ndlela leyi tengeke i mhaka ya xikhale, leyi nga faneliki eminkarhini ya hina. Kutani va fularhela mahanyelo yo tenga kambe va nga vuyeriwi hi nchumu. Van’wana va xavisa mahanyelo ya vona lama tengeke leswaku va titsakisa swa xinkarhana hi vuxaka bya rimbewu. Van’wana va ma xavisa hi ku lava ku tsakisa tintangha ta vona kumbe munhu wa rimbewu leri hambaneke.—Swivuriso 13:20.

3 Van’wana va va va onhakeriwe hi swo tala loko va ya xiya leswaku mahanyelo ya vona lama tengeke i ya nkoka ku fikela kwihi. Hakanyingi va sala va lahlekeriwe hi ndlela leyi tsemaka nhlana. Hilaha Bibele yi swi vekaka hakona, vuyelo bya vutomi bya vudlakuta byi nga fana ni chefu, “byi bava ku fana ni xibaha.” (Swivuriso 5:3, 4) Hikwalaho ka xiyimo xa misava lexi boleke namuntlha, xana u nga endla yini leswaku u tlangela mahanyelo lama tengeke u tlhela u ma namarhela? Hi ta vulavula hi magoza manharhu lama yelanaka, lawa hi nga ma tekaka.

Hlayisa Mbilu Ya Wena

4. Mbilu yo fanekisela i yini, naswona ha yini hi fanele hi yi hlayisa?

4 Nchumu wa nkoka lowu nga hi pfunaka ku namarhela mahanyelo lama tengeke i ku hlayisa timbilu ta hina. Bibele yi ri: “Hlayisa mbilu ya wena ku tlula hinkwaswo leswi swi faneleke swi hlayisiwa, hikuva swihlovo swa vutomi swi le ka yona.” (Swivuriso 4:23) Xana “mbilu ya wena” leyi ku vulavuriwaka ha yona laha i yini? A hi mbilu ya xiviri. Leyi i mbilu yo fanekisela. Yi yimela leswi wena hi wexe u nga xiswona, ku katsa ni mianakanyo ya wena, mintlhaveko ni minsusumeto ya wena. Bibele yi ri: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi matimba ya wena lamakulu hinkwawo.” (Deteronoma 6:5) Yesu u vule leswaku lowu i nawu lowukulu eka hinkwayo. (Marka 12:29, 30) Swi le rivaleni leswaku mbilu yo tano i ya nkoka swinene eka hina. Swi fanerile ku yi hlayisa.

5. Swi nga endlekisa ku yini leswaku mbilu yi pfuna yi tlhela yi va ni khombo hi nkarhi lowu fanaka?

5 Hambiswiritano, nakambe Bibele yi vula leswaku “mbilu yi kanganyisa ngopfu ku tlula hinkwaswo naswona yi ni khombo.” (Yeremiya 17:9)  Xana swi nga endlisa ku yini leswaku mbilu yi va leyi kanganyisaka—yi va ni khombo? Hi xikombiso, movha i nchumu wa nkoka swinene, naswona wu nga hi pfuna ku ponisa vutomi bya munhu loyi a nga ekhombyeni. Kambe loko muchayeri a nga wu lawuli ni ku wu kongomisa hi xidirayivhele, movha wolowo wu nga vanga khombo lerikulu. Hilaha ku fanaka, loko u nga hlayisi mbilu ya wena, u ta lawuriwa hi ku navela kun’wana ni kun’wana ka miri, naswona u ta tikuma u khome nyarhi hi timhondzo. Rito ra Xikwembu ri ri: “Loyi a tshembaka mbilu yakwe i xihunguki, kambe loyi a fambaka hi vutlhari u ta pona.” (Swivuriso 28:26) Ina, u nga famba hi vutlhari kutani u papalata ku weriwa hi khombo, ntsena loko u tirhisa Rito ra Xikwembu leswaku ri ku kongomisa, tanihi loko u rhanga hi ku kambisisa mepe u nga si teka riendzo ro ya endhawini yo karhi.—Pisalema 119:105.

6, 7. (a) Ku kwetsima swi vula yini, naswona ha yini swi ri swa nkoka eka malandza ya Yehovha? (b) Hi swi tivisa ku yini leswaku vanhu lava nga hetisekangiki va nga kombisa ku kwetsima ka Yehovha?

6 Timbilu ta hina a ti nge swi pfuketani ti voyamela eku tengeni hi toxe. Hi hina hi faneleke hi ti kongomisa leswaku ti va leti tengeke. Ndlela yin’wana yo endla tano i ku anakanyisisa hi ndlela leyi mahanyelo lama tengeke ma vuyerisaka ha yona. Mfanelo leyi yi fambisana swinene ni ku kwetsima, leswi vulaka ku basa, ku pfumala xivati ni mboyamelo wa vudyoho. Ku kwetsima i mfanelo ya risima leyi Yehovha Xikwembu a nga na yona. Tindzimana ta Bibele leti hlayiwaka hi madzana ti hlanganisa mfanelo yoleyo na Yehovha. Entiyisweni, Bibele yi vula leswaku “Vukwetsimi i bya Yehovha.” (Eksoda 28:36) Kambe ke, xana mfanelo yoleyo yo hlawuleka yi hlangana njhani na hina vanhu lava nga hetisekangiki?

7 ERitweni rakwe, Yehovha wa hi byela a ku: “Mi fanele mi kwetsima, hikuva mina ndza kwetsima.” (1 Petro 1:16) Ina, hi nga tekelela ku kwetsima ka Yehovha; hi nga va vanhu lava baseke emahlweni ka yena, hi tshama hi tengile emahanyelweni. Kutani loko hi papalata swiendlo leswi nga basangiki ni leswi nyamisaka, hi ta va hi ringeta ku fikelela lunghelo leri tlakukeke ni leri tsakisaka ra ku kombisa mfanelo yo xonga ya Xikwembu xa le Henhla-henhla! (Vaefesa 5:1) A hi fanelanga hi anakanya leswaku a hi nge swi koti ku endla sweswo, hikuva Yehovha i Hosi ya vutlhari ni leyi anakanyelaka, kutani a nge hi sindzisi ku endla swilo leswi hi nga riki na vuswikoti bya ku swi endla. (Pisalema 103:13, 14; Yakobo 3:17) Hambiswiritano, ku tshama u tengile emoyeni ni le mahanyelweni swi lava matshalatshala. Kambe muapostola Pawulo u vule leswaku “ku tshembeka ni ku tenga [hi leswi] faneleke Kreste.” (2 Vakorinto 11:3) Xana a swi fanelanga ku endla hinkwaswo leswi hi nga swi kotaka leswaku hi tshama hi tengile emahanyelweni, hileswi hi rhandzaka ku tsakisa Kreste ni Tata wakwe? Phela va hi kombise rirhandzu lerikulu leri swi nga kotekiki ku ri hakela. (Yohane 3:16; 15:13) I lunghelo ku kombisa ku tlangela ka hina hi ku hanya vutomi lebyi baseke ni lebyi amukelekaka. Loko hi anakanya hi ku tenga ka hina hi ndlela leyi, hi ta ku tlangela swinene, kutani hi ta hlayisa timbilu ta hina.

8. (a) Hi nga yi wundla njhani mbilu yo fanekisela? (b) Mabulo ya hina ma nga paluxa yini malunghana na hina?

8 Nakambe hi hlayisa timbilu ta hina hi ndlela leyi hi tiwundlaka ha yona. Hi fanele hi wundla mianakanyo ni timbilu ta hina nkarhi na nkarhi hi swakudya leswinene swa moya, hi tshama hi ri karhi hi anakanya hi mahungu lamanene ya Mfumo wa Xikwembu. (Vakolosa 3:2) Hambi ku ri mabulo ya hina ma fanele ma swi kombisa sweswo. Loko hi tiviwa hi ri vanhu lava vulavulaka hi timhaka ta  swilo swa nyama, leswi humeke endleleni, hi ta va hi kombisa xiyimo xa timbilu ta hina. (Luka 6:45) Ku ri na sweswo, hi fanele hi tiviwa hi ri vanhu lava vulavulaka hi timhaka leti akaka emoyeni. (Vaefesa 5:3) Leswaku hi hlayisa timbilu ta hina, ku ni makhombo lamakulu lawa hi faneleke hi ma papalata. A hi vulavuleni hi mambirhi ntsena.

Balekela Vumbhisa

9-11. (a) Ha yini lava va honisaka xitsundzuxo lexi nga eka 1 Vakorinto 6:18 va tala ku wela eku tikhomeni loko biha? Kombisa. (b) Loko hi balekela vumbhisa, i yini leswi hi faneleke hi swi papalata? (c) Hi xihi xikombiso lexinene lexi hi vekeriweke xona hi wanuna wo tshembeka Yobo?

9 Yehovha u huhutele muapostola Pawulo leswaku a tsala ndzayo leyi pfuneke vo tala ku hlayisa timbilu ta vona, xisweswo va tshama va tengile emahanyelweni. Pawulo u te: “Balekelani vumbhisa.” (1 Vakorinto 6:18) Xiya leswaku marito yakwe ma ni matimba ku tlula ku vula u ku, “Papalatani vuoswi.” Vakreste va fanele va endla leswi engetelekeke. Va fanele va balekela swiendlo swa vudlakuta, hilaha a va ta baleka hakona loko va teriwa hi khombo. Loko hi honisa xitsundzuxo xexo, hi ta va hi tinghenisa ekhombyeni ra ku endla xidyoho lexikulu xa vuoswi, xisweswo hi lahlekeriwa hi vuxaka bya hina na Xikwembu.

10 Hi xikombiso: A hi nge manana u hlambise n’wana wakwe wa mufana a tlhela a n’wi ambexa leswaku va ta ya endhawini yin’wana ya nkoka. N’wana loyi u kombela ku ya tlanga ehandle emahlweni ka ku va ndyangu wu suka, hiloko mana wakwe a n’wi pfumelela—hi xipimelo xin’we. Manana u ri: “U nga tshineli nikatsongo ematini lawaya ya ridaka. Loko wo vuya ni ridaka, u ta hlaya hi xin’we-xin’we.” Kambe swi nga si ya kwihi, manana u vona n’wana loyi a tluntlame ekusuhi ni mati ya ridaka. Ntsena a nga si va ni ridaka. Hambiswiritano, u honise xilemukiso xa mana wakwe xa leswaku a nga tshuki a tshinela ekusuhi ni mati ya ridaka, kutani a tiveka ekhombyeni. (Swivuriso 22:15) Vantshwa vo tala ni vanhu lavakulu lava a va fanele va va ni vukheta va endla xihoxo lexi fanaka. Njhani?

11 Eminkarhini ya namuntlha, laha vanhu vo tala swinene va tipeteke “eku naveleni loku nyumisaka ka vuxaka bya rimbewu,” ku tangunuke ndlela leyintshwa ya ku endla bindzu hi ku navetisa vuxaka bya rimbewu lebyi nga riki enawini. (Varhoma 1:26, 27) Swilo swo navetisa vuxaka bya rimbewu swi kumeka hi xitalo eka timagazini, etibukwini, eka tivhidiyo ni le ka Internet. Lava va hlawulaka ku dzikisa swilo swo tano emianakanyweni ya vona va ta va va nga balekeli vumbhisa. Va ta va tlanga hi ndzilo hi ku tata-tata milenge ekusuhi ni ndhawu leyi nga ni khombo, xisweswo va honisa xilemukiso xa Bibele. Ematshan’weni ya ku hlayisa timbilu ta vona, va ta va va ti onha hi swilo swo tano leswi nga tekaka malembe leswaku swi suleka emianakanyweni ya vona. (Swivuriso 6:27) A hi dyondzeni eka Yobo la tshembekaka, loyi a endleke ntwanano ni mahlo yakwe, leswaku a nga ma kongomisi eka swilo leswi nga ta n’wi ringa leswaku a endla leswo biha. (Yobo 31:1) Xexo i xikombiso lexi faneleke ku tekeleriwa!

12. Vakreste lava rhandzanaka va nga byi ‘balekela njhani vumbhisa’ hi nkarhi wa ku rhandzana ka vona?

 12 I swa nkoka swinene ku “[balekela] vumbhisa” loko u rhandzana ni munhu. Nkarhi wolowo a wu fanele wu va lowu tsakisaka ni wa ku anakanya hi swa nkarhi lowu taka, kambe vantshwa vo tala va tionhela wona hi ku honisa ku tikhoma hi ndlela leyinene. Hi ku famba ka nkarhi va onha xisekelo xa vukati lebyinene—ku nga vuxaka lebyi sekeriweke erirhandzwini leri nga riki na vutianakanyi, eku tikhomeni ni le ku yingiseni ka Yehovha Xikwembu. Vakreste van’wana lava rhandzanaka va tikhome hi ndlela yo biha loko va nga si tekana. Loko se va tekanile, nsati wa kona u vule leswaku ripfalo ra yena ri ye emahlweni ri n’wi kingindza, ri tlhela ri n’wi onhela ni ntsako hi siku ra mucato. U te: “Ndzi kombele Yehovha ko tala leswaku a ndzi rivalela, kambe hambileswi sweswo swi endlekeke malembe ya nkombo lama hundzeke, ni sweswi ripfalo ra mina ra ha ndzi karhata.” I swa nkoka leswaku lava va endleke swidyoho swo tano va kombela mpfuno wa vakulu lava nga Vakreste. (Yakobo 5:14, 15) Hambiswiritano, Vakreste vo tala lava rhandzanaka va tshama va xalamukile leswaku va papalata makhombo loko va nga si tekana. (Swivuriso 22:3) Va tivekela mindzilikana eka tindlela leti va kombisanaka rirhandzu ha tona. A va fambi va ri voxe naswona va papalata ku va swin’we etindhawini leti fihlekeke.

13. Ha yini swi nga fanelanga leswaku Vakreste va rhandzana ni munhu loyi a nga tirheliki Yehovha?

13 Vakreste lava rhandzanaka ni vanhu lava nga tirheliki Yehovha va tala ku langutana ni swiphiqo swo tala. Hi xikombiso, xana u nga swi kotisa ku yini ku tihlanganisa ni munhu loyi a nga rhandziki Yehovha Xikwembu? I swa nkoka leswaku Vakreste va tekana ni vanhu lava rhandzaka Yehovha va tlhela va xixima milawu ya yena ya ku tenga emahanyelweni. Rito ra Xikwembu ri ri: “Mi nga paniwi ni lava va nga riki vapfumeri. Hikuva ku lulama ni ku kala nawu swi ni xinakulobye xihi? Kumbe ku vonakala ni munyama swi hlangana kwihi?”—2 Vakorinto 6:14.

14, 15. (a) Hi rihi vonelo leri hoxeke leri van’wana va nga na rona malunghana ni nhlamuselo ya “vumbhisa”? (b) Rito leri nge “vumbhisa” ri katsa swiendlo swa muxaka muni, naswona Vakreste va nga “[balekela] vumbhisa” hi ndlela yihi?

14 Vutivi na byona i bya nkoka. A hi nge swi koti kahle ku balekela vumbhisa loko hi nga swi tivi leswaku kahle-kahle byi vula yini. Vanhu van’wana va misava namuntlha va ni mianakanyo leyi hoxeke malunghana ni nhlamuselo ya “vumbhisa.” Va anakanya leswaku a swi hoxanga ku enerisa ku navela ka vona ka vuxaka bya rimbewu hi tindlela tin’wana leti nga katsiki malunghiselelo ya vukati, ntsena loko va nga endli vuxaka bya rimbewu hi ku kongoma. Hambi ku ri minhlangano yin’wana leyi xiximiwaka ya rihanyo leyi ringetaka ku hunguta nhlayo ya makhwiri lawa vantshwa va ma kumeke va nga ma kunguhatelanga, yi va khutaze leswaku va hlanganyela evuxakeni bya rimbewu lebyi nga riki enawini hi ndlela leyi nga ta va siya va nga tikanga. Xitsundzuxo xo tano xi hoxile hakunene. Ku sivela ku tika loko u nga tekiwanga a swi vuli ku namarhela mahanyelo lama tengeke, naswona nhlamuselo ya ntiyiso ya “vumbhisa” yi hlanganisa swo tala.

15 Rito ra Xigriki leri nge por·neiʹa, leri hundzuluxeriweke ri va “vumbhisa” ri vula swo tala. Ri fambisana ni vuxaka bya rimbewu lebyi endliwaka hi vanhu lava nga tekanangiki ni ku tirhisa swirho swa rimbewu hi ndlela yo biha. Rito leri nge por·neiʹa ri katsa ku endla vuxaka bya rimbewu hi nomu, hi hala mahosi ni ku tlanga hi swirho swa rimbewu swa munhu un’wana—ku nga mikhuva leyi hakanyingi yi endliwaka etindlwini  ta vunghwavava. Vanhu lava anakanyaka leswaku swiendlo swo tano a hi “vumbhisa” va tikanganyisa naswona va phasiwe hi xin’wana xa swirimbana swa Sathana. (2 Timotiya 2:26) Ku tlula kwalaho, ku tshama u tengile emahanyelweni swi vula swo tala ku tlula ku papalata xiendlo xin’wana ni xin’wana lexi welaka eka swiendlo swa vumbhisa. Leswaku hi “[balekela] vumbhisa,” hi fanele hi papalata swiendlo hinkwaswo leswi thyakeke swa rimbewu leswi nga yisaka eku endleni ka xidyoho lexikulu xa por·neiʹa. (Vaefesa 4:19) Hi ndlela yoleyo hi ta va hi namarhela mahanyelo lama tengeke.

Papalata Makhombo Ya Ku Tlanga Hi Rirhandzu

16. Ku kombana rirhandzu ku fanerile ehansi ka swiyimo swihi, naswona hi yihi mhaka ya le Matsalweni leyi kombisaka sweswo?

16 Leswaku hi tshama hi tengile emahanyelweni, khombo rin’wana leri hi faneleke hi tivonela eka rona i ku tlanga hi rirhandzu. Van’wana va nga vula leswaku ku tlanga hi rirhandzu i ku tihungasela ntsena ni munhu wa rimbewu leri hambaneke. Ina, ku kombana rirhandzu swi ni nkarhi ni ndhawu ya swona. Isaka na Raveka va voniwe va “ri eku titsakiseni” swin’we, naswona vahlaleri va swi vone xikan’we leswaku a va nga ri vamakwavo ntsena. (Genesa 26:7-9) Kambe a va ri nuna ni nsati. Tindlela leti a va kombana rirhandzu ha tona a ti fanerile. Ku tlanga hi rirhandzu i mhaka yin’wana.

17. Ku tlanga hi rirhandzu swi vula yini, naswona xiphiqo xexo xi nga lawuriwa njhani?

17 Ku tlanga hi rirhandzu swi nga hlamuseriwa hi ndlela leyi: i ku endla onge u rhandza munhu kasi a wu na mianakanyo ya ku tekana na yena. Vanhu i swivumbiwa swo hlamarisa, kutani a swi kanakanisi leswaku ku ni tindlela to tala to tlanga hi rirhandzu, naswona tin’wana ta tona ti tumbele ngopfu. (Swivuriso 30:18, 19) Kutani a ku na milawu leyi kongomeke leyi nga tirhisiwaka emhakeni leyi. Kambe ku ni nchumu wa nkoka lowu lavekaka ku tlula milawu—ku nga ku tikambisisa hi ku tshembeka ni ku tirhisa misinya ya milawu ya Bibele hi vukheta.

18. I yini leswi susumetelaka van’wana leswaku va tlanga hi rirhandzu, naswona ha yini sweswo swi hoxile?

18 Loko hi tikambisisa hi ku tshembeka, hakanyingi hi ta pfumela leswaku loko hi lemuka munhu wa rimbewu leri hambaneke a kombisa ku tsakela eka hina, hi titwa hi tsakile. Sweswo swi tolovelekile. Kambe, xana hi tlanga hi rirhandzu rakwe hi sungula ku nyunganyungeka leswaku hi n’wi koka rinoko a kala a humela erivaleni? Loko swi ri tano, xana hi kale hi anakanya hi ku karhateka loku hi nga vaka hi n’wi vangela kona? Hi xikombiso, Swivuriso 13:12 yi ri: “Ku langutela loku tlheriseriwaka endzhaku ku vabyisa mbilu.” Loko hi tlanga hi rirhandzu hi vomu, kumbexana a hi yi tivi ndlela leyi munhu loyi hi tlangaka ha yena a khumbekaka ha yona. Swi nga endleka a tshama a langutele siku leri mi nga ta sungula ku rhandzana ha rona ivi eku heteleleni mi tekana. Loko sweswo swi nga humeleli a nga sala a hele mongo. (Swivuriso 18:14) Ku tlanga hi mintlhavelo ya van’wana hi vomu i nsele lowukulu.

19. Ku tlanga hi rirhandzu swi nga nghenisa vukati bya Vakreste ekhombyeni hi ndlela yihi?

19 I swa nkoka swinene ku papalata ku tlanga hi rirhandzu eka vanhu lava ngheneleke vukati. Ku kombisa ku tsakela eka munhu la ngheneleke vukati—kumbe ku va munhu la ngheneleke vukati a kombisa ku tsakela koloko eka munhu la nga tekanangiki na yena—swi hoxile. Lexi vavisaka, Vakreste van’wana va pfumelelane ni mhaka leyi hoxeke ya leswaku a swi bihanga ku kombisa ku tsakela munhu wa rimbewu leri hambaneke loyi u nga tekanangiki na yena. Van’wana va kombisa nkhathalelo lowukulu eka “munghana” wo tano, va kala va phofula timhaka leti dzikeke swinene leti va nga ti vulavuliki ni lava va tekaneke na vona. Hikwalaho, va ve ni mintlhaveko ya rirhandzu leyi pfuxeke vuntswaka evukatini bya vona hambi ku ri ku byi dlaya. Vakreste lava tekaneke va fanele va tsundzuka xilemukiso xa vutlhari xa Yesu xa malunghana ni vuoswi—byi sungula embilwini. (Matewu 5:28) Hikwalaho,  a hi hlayiseni timbilu ta hina kutani hi papalata swiyimo leswi nga hi tiselaka vuyelo byo tano lebyi nga ni khombo.

20. Hi fanele hi tiyimisela ku va ni vonelo rihi hi ku tenga ka hina?

20 Ina, a swi olovi ku tshama u tengile emisaveni ya namuntlha leyi nga riki na mahanyelo. Kambe tsundzuka leswaku swi olova ngopfu ku tshama u tengile emahanyelweni ku ri ni ku tlhela u va ni mahanyelo lama tengeke endzhaku ko tipeta emahanyelweni yo biha. Ina, Yehovha u “rivalela hi ndlela leyikulu” naswona u kota ku tengisa lava hundzukeke hakunene eswidyohweni swa vona. (Esaya 55:7) Kambe Yehovha a nge endli leswaku lava va tikhomeke hi ndlela yo biha va nga kumi vuyelo bya swiendlo swa vona. Vuyelo bya kona byi nga heta malembe, kumbe byi va bya vutomi hinkwabyo. (2 Samuwele 12:9-12) Ringeta hi matimba ku tshama u tengile emahanyelweni hi ku hlayisa mbilu ya wena. Teka xiyimo xa wena lexi tengeke emahlweni ka Yehovha Xikwembu xi ri xa risima swinene—naswona u nga pfumeli ku lahlekeriwa hi xona!

A Wu Ta Hlamurisa Ku Yini?

• Ku tenga emahanyelweni swi vula yini, naswona ha yini swi ri swa nkoka?

• Hi nga ti hlayisa njhani timbilu ta hina?

• Ku balekela vumbhisa swi katsa yini?

• Ha yini hi fanele hi papalata ku tlanga hi rirhandzu?

[Swivutiso Swa Dyondzo]

[Xifaniso lexi nga eka tluka 11]

Movha wu nga va ni khombo loko wu nga chayeriwi hi ndlela ya kona

[Swifaniso leswi nga eka tluka 12]

Ku nga endleka yini loko hi honisa swilemukiso?

[Xifaniso lexi nga eka tluka 13]

Ku rhandzana hi ndlela leyi tengeke swa tsakisa naswona swi nga yisa ku dzuneka eka Xikwembu