Nchavelelo Eka Lava Xanisekaka

LOKO vavanuna ni vavasati vo tshembeka va khale va xanisiwa, a va khongelela nkongomiso wa Xikwembu hi mbilu hinkwayo. Kambe, va tlhele va teka magoza yo karhi leswaku va papalata ku xanisiwa swi nga fanelanga, hi ku tirhisa vutlharhi leswaku va balekela lava va va xanisaka. Hi xikombiso, Davhida u kote ku tiyisela maxangu hileswi a a titshege hi Yehovha nileswi a endleke matshalatshala yo karhi. Ku vuriwa yini hi hina namuntlha?

Loko u langutana ni maxangu, hakanyingi u teka goza ro tlhantlha xiphiqo xexo. Hi xikombiso, loko u nga tirhi, xana a wu endli matshalatshala yo kuma ntirho lowu faneleke lowu nga ta pfuna wena ni ndyangu wa wena? (1 Timotiya 5:8) Kumbe loko u vabya, xana a wu lavi vutshunguri lebyi faneleke? Phela, Yesu loyi a a ri ni matimba yo huma eka Xikwembu yo tshungula mavabyi ya mixaka hinkwayo, u vule leswaku ‘n’anga yi laviwa hi lava va vabyaka.’ (Matewu 9:12) Hambiswiritano, a hi maxangu hinkwawo lama nga herisiwaka; u nga ha boheka ku ma tiyiselela nkarhi wo leha.

Ha yini mhaka yoleyo u nga yi tivisi Yehovha Xikwembu hi xikhongelo? Hi xikombiso, loko hi ri eku laveni ka ntirho, ku khongela ni ku titshega hi Xikwembu swi ta hi pfuna ku ala ndzingo wihi ni wihi wa ku tirha ntirho lowu lwisanaka ni misinya ya milawu ya Bibele. Nakambe hi ta papalata ku ‘lahlekisiwa eripfumelweni’ hikwalaho ka makwanga kumbe ku rhandza mali. (1 Timotiya 6:10) Hakunene, loko hi endla swiboho swa nkoka etimhakeni leti khumbaka ntirho kumbe ndyangu kumbe rihanyo, hi nga landzela xitsundzuxo xa Davhida lexi nge: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.”—Pisalema 55:22.

Xikhongelo lexi humaka embilwini na xona xi ta hi pfuna leswaku hi va lava xalamukeke emianakanyweni leswaku maxangu ya hina ma nga hi tshikileli. Muapostola Pawulo la nga Mukreste wa xiviri u tsale a ku: “Eka hinkwaswo tivisani Xikwembu swikombelo swa n’wina hi xikhongelo ni hi xikombelo swin’we ni ku nkhensa swikombelo swa n’wina.” Xana xikhongelo lexi humaka embilwini xi nga hi chavelela njhani? “Ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”  (Vafilipiya 4:6, 7) Ku rhula ka Xikwembu ‘ku tlula miehleketo hinkwayo.’ Hikwalaho, ku nga hi tiyisa loko swiyimo swi tika. Ku ‘ta rindza timbilu ta hina ni matimba ya hina ya mianakanyo,’ xisweswo ku hi pfuna ku papalata ku endla swilo hi magugu ni hi vuphukuphuku, ku nga swona leswi nga engetelaka ku xaniseka ka hina.

Xikhongelo xi nga ha cinca xiyimo xo karhi. Loko muapostola Pawulo a ri mubohiwa eRhoma, u kombele Vakreste-kulobye leswaku va n’wi khongelela. Ha yini Pawulo a kombele sweswo? U va tsalele a ku: “Ngopfu-ngopfu ndzi mi khongotela ku endla leswi, leswaku ndzi ta vuyisiwa eka n’wina hi ku hatlisa.” (Vaheveru 13:19) Hi marito man’wana, Pawulo a a swi tiva leswaku leswi Yehovha a yingisaka vapfumeri-kulobye loko va phikelela eswikhongelweni, a nga ha endla leswaku a ntshunxiwa endzhaku ka nkarhi wo karhi.—Filemoni 22.

Xana xikhongelo xi ta cinca ndlela leyi hi xanisekaka ha yona? Xi nga yi cinca. Kambe, hi fanele hi swi tiva leswaku Yehovha Xikwembu a nge hlamuli swikhongelo swa hina hi ndlela leyi hi lavaka ha yona. Pawulo u khongele ko tala hi ta “mutwa enyameni,” lowu swi nga endlekaka leswaku a ku ri vuvabyi byo karhi. Kambe, ematshan’weni yo susa maxangu wolawo, Xikwembu xi byele Pawulo xi ku: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.”—2 Vakorinto 12:7-9.

Hikwalaho, ku xaniseka ka hina a ku nge heli xikan’we-kan’we. Kambe, hi ta kota ku kombisa leswaku hi titshege hi Tata wa hina wa le tilweni. (Yakobo 1:2-4) Tiyiseka leswaku hambiloko Yehovha Xikwembu a nga ma susi maxangu ya hina, u ta hi “nyika ndlela yo huma, leswaku [hi] kota ku [ma] tiyisela.” (1 Vakorinto 10:13) Lexi xiyekaka hi leswaku Yehovha u vuriwa “Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Vakorinto 1:3, 4) Xikwembu xi nga hi nyika matimba lawa hi ma lavaka leswaku hi kota ku tiyisela, naswona hi na ntshembo wa vutomi lebyi nga heriki.

Bibele ku nga Rito ra Xikwembu, yi tshembisa leswaku Yehovha u ta “sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” (Nhlavutelo 21:3, 4) Xana swa tika ku kholwa leswaku ku ta va ni misava leyi nga riki na maxangu? Swi nga ha ku tikela loko u tshamela ku xaniseka. Nilokoswiritano, Xikwembu xi tshembisa leswaku xi ta herisa ku chava kun’we ni maxangu, naswona xikongomelo xa xona xi ta humelela hakunene.—Esaya 55:10, 11.

[Swifaniso leswi nga eka tluka 9]

Ku suka egomeni ku ya eku rhuleni