Nghena endzeni

Hundzela eka leswi nga endzeni

“Hosi, Hi Dyondzise Ndlela Ya Ku Khongela”

“Hosi, Hi Dyondzise Ndlela Ya Ku Khongela”

 “Hosi, Hi Dyondzise Ndlela Ya Ku Khongela”

“Un’wana wa vadyondzisiwa vakwe a ku eka yena: ‘Hosi, hi dyondzise ndlela ya ku khongela.’”—LUKA 11:1.

1. Ha yini mudyondzisiwa un’wana wa Yesu a kombele Yesu leswaku a va dyondzisa ku khongela?

SIKU rin’wana hi 32 C.E., mudyondzisiwa un’wana wa Yesu u N’wi vone a ri karhi a khongela. A a nga swi twi leswi Yesu a a swi byela Tata wakwe, hikuva swi tikomba onge a a khongela hi mbilu. Nilokoswiritano, loko Yesu a hetile, mudyondzisiwa loyi u vule leswi eka yena: “Hosi, hi dyondzise ndlela ya ku khongela.” (Luka 11:1) I yini lexi n’wi susumeteleke ku endla xikombelo lexi? Xikhongelo a ku ri nchumu lowu a wu endliwa nkarhi na nkarhi evuton’wini bya Vayuda ni le vugandzerini bya vona. Matsalwa ya Xiheveru ma ni swikhongelo swo hlaya ebukwini ya Tipisalema ni le tibukwini tin’wana. Kutani mudyondzisiwa loyi a a nga kombeli ku dyondzisiwa nchumu lowu a a nga tivi nchumu hi wona kumbe lowu a a nga si tshama a wu endla. Handle ko kanakana, a a swi toloverile swikhongelo leswi nga humiki embilwini swa varhangeri va vukhongeri va Vayuda. Kambe sweswi u vone Yesu a ri karhi a khongela, naswona a swi kanakanisi leswaku u swi xiyile leswaku a ku ri ni ku hambana lokukulu exikarhi ka swikhongelo swa ku lava ku voniwa swa varabi ni ndlela leyi Yesu a a khongela ha yona.—Matewu 6:5-8.

2. (a) I yini lexi kombisaka leswaku Yesu a a nga lavi leswaku hi phindha rito rin’wana ni rin’wana eka xikhongelo xa xikombiso? (b) Ha yini hi lava ku tiva ndlela yo khongela?

2 EDyondzweni yakwe ya le Ntshaveni kwalomu ka tin’hweti ta 18 emahlweni ka xiendlakalo lexi, Yesu a a nyike vadyondzisiwa vakwe xikombiso xa leswi va faneleke va swi katsa eswikhongelweni swa vona. (Matewu 6:9-13) Swi nga ha endleka leswaku mudyondzisiwa loyi a a nga ri kona enkarhini wolowo, kutani Yesu hi musa u tlhele a phindha tinhla ta nkoka ta xikhongelo xexo xa xikombiso. Lexi xiyekaka hileswaku xikhongelo xexo a xi nga fani hi ku kongoma ni lexo sungula, leswi kombisaka leswaku a a nga va dyondzisi xikhongelo lexi a xi fanele xi nhlokohatiwa. (Luka 11:1-4) Ku fana ni mudyondzisiwa loyi ku nga boxiwangiki vito rakwe, na hina hi lava ku dyondzisiwa ndlela yo khongela leswaku swikhongelo swa hina swi ta hi tshineta ekusuhi na Yehovha. Hikwalaho a hi kambisiseni nhlamuselo leyi naveke ya xikhongelo xa xikombiso, lexi tsariweke hi muapostola Matewu. Eka xona ku ni swikombelo swa nkombo, laha swinharhu swa kona swi khumbaka swikongomelo swa Xikwembu kasi mune wa swona swi khumba swilaveko swa hina swa nyama ni swa moya. Exihlokweni lexi hi ta kambisisa swikombelo swinharhu swo sungula.

Tatana Wa Rirhandzu

3, 4. Xana swi vula yini ku vitana Yehovha tanihi “Tata wa hina”?

3 Ku sukela eku sunguleni, Yesu u kombise leswaku swikhongelo swa hina swi fanele swi kombisa leswaku hi ni vunghana na Yehovha naswona ha n’wi xixima. Loko a vulavula ngopfu-ngopfu ni vadyondzisiwa vakwe lava a va hlengeletane ekusuhi na yena etlhelo ka ntshava, Yesu u va byele leswaku va vitana Yehovha va ku “Tata wa hina la nge matilweni.” (Matewu 6:9) Hi ku ya hi xidyondzi xin’wana, ku nga khathariseki leswaku Yesu a a vulavula hi Xiheveru kumbe Xiaramu lexi tolovelekeke, rito leri a ri tirhiseke ra ‘Tatana’ ra yelana ni  ndlela leyi n’wana a a ta vulavula ha yona, ‘i rito leri tirhisiwaka hi vana.’ Loko hi vitana Yehovha tanihi “Tata wa hina” swi kombisa leswaku hi ni vuxaka lebyikulu ni lebyinene na yena.

4 Loko hi ku “Tata wa hina,” ha pfumela nakambe leswaku hi xiphemu xa ndyangu lowukulu wa vavanuna ni vavasati lava tekaka Yehovha a ri Munyiki wa Vutomi. (Esaya 64:8; Mintirho 17:24, 28) Vakreste lava totiweke hi moya va amukeriwa tanihi “vana va Xikwembu,” naswona va nga “[huwelela eka xona va] ku: ‘Abba, Tatana!’” (Varhoma 8:14, 15) Vanhu va timiliyoni va hundzuke vanakulobye va vona vo tshembeka. Vanhu lava va nyiketele vutomi bya vona eka Yehovha kutani va kombisa ku tinyiketela ka vona hi ku khuvuriwa ematini. “Tinyimpfu [leti] tin’wana” hinkwato na tona ti nga tshinela eka Yehovha kutani ti N’wi vitana “Tata wa hina,” hi vito ra Yesu. (Yohane 10:16; 14:6) Hi nga ya eka Tata wa hina wa le tilweni nkarhi na nkarhi hi xikhongelo leswaku hi n’wi dzunisa, hi n’wi nkhensa hikwalaho ka tintswalo leti a hi kombisaka tona, hi tlhela hi n’wi byela leswi hi karhataka, hi tiyiseka leswaku wa khathala hi hina.—Vafilipiya 4:6, 7; 1 Petro 5:6, 7.

Ku Rhandza Vito Ra Yehovha

5. Hi xihi xikombelo xo sungula xa xikhongelo xa xikombiso, naswona ha yini xi fanerile?

5 Xikombelo xo sungula xi namba xi teka swilo swo sungula xi swi rhangisa emahlweni. Xi ri: “Vito ra wena a ri kwetsimisiwe.” (Matewu 6:9) Ina, hi fanele hi khathala swinene hi ku kwetsimisiwa ka vito ra Yehovha hikuva ha n’wi rhandza naswona a hi swi tsakeli ku vona ndzhukano hinkwawo lowu fumbiweke ehenhla ka vito rakwe. Leswi Sathana a xandzukeke a tlhela a kucetela mpatswa wo sungula wa vanhu leswaku va nga yingisi Yehovha Xikwembu, u onhe vito ra Yena hi ku endla leswaku ndlela leyi Xikwembu xi lawulaka ha yona vuako hinkwabyo yi kanakaniwa. (Genesa 3:1-6) Ku tlula kwalaho, ku sukela enkarhini wolowo vito ra Yehovha ri sandziwile hi swiendlo leswi nyumisaka ni tidyondzo ta lava va tivulaka vayimeri va yena.

6. I yini lexi hi nga ta ka hi nga xi endli loko hi khongelela leswaku vito ra Yehovha ri kwetsimisiwa?

6 Loko hi khongelela leswaku vito ra Yehovha ri kwetsimisiwa swi kombisa langutelo leri hi nga na rona malunghana ni mhaka ya vuhosi bya vuako hinkwabyo—leswaku hi yi seketela hi ku hetiseka mfanelo ya Yehovha ya ku fuma vuako hinkwabyo. Yehovha u lava leswaku evuakweni hinkwabyo ku tshama swivumbiwa swo tlhariha leswi titsongahatelaka vuhosi bya yena byo lulama hi ku swi rhandza na hi ntsako, hikwalaho ka leswi swi n’wi rhandzaka swi tlhela swi rhandza hinkwaswo leswi vito rakwe ri yimelaka swona. (1 Tikronika 29:10-13; Pisalema 8:1; 148:13) Loko hi rhandza vito ra Yehovha swi ta hi pfuna leswaku hi tshika ku endla nchumu wihi na wihi lowu nga ha tisaka xisandzu evitweni rolero ro kwetsima. (Ezekiyele 36:20, 21; Varhoma 2:21-24) Tanihi leswi ku rhula ka vuako ni ka vaaki va byona ku titshegeke hi ku kwetsimisiwa ka vito ra Yehovha ni ku titsongahatela vuhosi byakwe hi ku swi rhandza, xikhongelo xa hina lexi nge “vito ra wena a ri kwetsimisiwe” xi kombisa leswaku ha tshemba leswaku xikongomelo xa Yehovha xi ta hetisisiwa hi ndlela leyi nga ta yisa ku dzuneka hinkwako eka yena.—Ezekiyele 38:23.

 Mfumo Lowu Hi Wu Khongelelaka

7, 8. (a) I yini Mfumo lowu Yesu a hi dyondziseke leswaku hi wu khongelela? (b) Hi dyondza yini hi Mfumo lowu ebukwini ya Daniyele ni ya Nhlavutelo?

7 Xikombelo xa vumbirhi exikhongelweni xa xikombiso xi ri: “Mfumo wa wena a wu te.” (Matewu 6:10) Xikombelo lexi xi fambisana swinene ni lexo sungula. Yehovha u ta kwetsimisa vito rakwe lerinene hi ku tirhisa Mfumo wa Mesiya, ku nga hulumendhe yakwe ya le tilweni, leyi rhangeriweke hi N’wana wakwe Yesu Kreste loyi a nga Hosi leyi vekiweke hi mfanelo. (Pisalema 2:1-9) Vuprofeta bya Daniyele byi hlamusela Mfumo wa Mesiya tanihi “ribye” leri phemekaka “entshaveni.” (Daniyele 2:34, 35, 44, 45) Ntshava yi fanekisela vuhosi bya vuako hinkwabyo bya Yehovha, kutani Mfumo lowu yimeriwaka hi ribye i xikombiso lexintshwa xa vulawuri bya vuako hinkwabyo bya Yehovha. Eka vuprofeta lebyi, ribye ri ‘hundzuka ntshava leyikulu kutani ri tata misava hinkwayo,’ leswi kombisaka leswaku Mfumo wa Mesiya wu ta yimela vuhosi bya Xikwembu loko wu fuma misava.

8 Lava va nga ta va va fuma na Kreste eMfun’weni lowu hi lava 144 000, ‘lava xaviweke evanhwini’ leswaku va fuma na yena tanihi tihosi ni vaprista. (Nhlavutelo 5:9, 10; 14:1-4; 20:6) Daniyele u vitana vanhu lava a ku i “vakwetsimi va Loyi a Tlakukeke,” lava swin’we na Kreste Nhloko ya vona va nga ta amukela “mfumo ni ku fuma ni vukulu bya mimfumo leyi nga ehansi ka matilo hinkwawo . . . Mfumo wa vona i mfumo lowu tshamaka hilaha ku nga heriki, naswona ku fuma hinkwako ku ta va tirhela ni ku va yingisa.” (Daniyele 7:13, 14, 18, 27) Leyi i nhlamuselo leyi faneleke ya hulumendhe ya le tilweni leyi Kreste a dyondziseke valandzeri vakwe leswaku va yi khongelela.

Ha Yini Hi Hambeta Hi Khongelela Mfumo Leswaku Wu Ta?

9. Ha yini swi fanerile leswaku hi khongelela Mfumo wa Xikwembu leswaku wu ta?

9 Exikhongelweni xa yena xa xikombiso, Kreste u hi dyondzise ku khongelela Mfumo wa Xikwembu leswaku wu ta. Ku hetiseka ka vuprofeta bya Bibele ku kombisa leswaku Mfumo wa Mesiya wu simekiwe etilweni hi 1914. * Hikwalaho, xana swa ha fanerile leswaku hi wu khongelela Mfumo wolowo leswaku wu ‘ta’? Ina. Hikuva evuprofeteni bya Daniyele, Mfumo wa Mesiya, lowu fanekiseriwaka hi ribye wu jamelane hi ku kongoma ni tihulumendhe ta vanhu ta tipolitiki, leti fanekiseriwaka hi xifaniso lexikulu. Ribye ra ha ta xi faya xifaniso, ri xi pfotlosa xi sala xi ri mapa. Vuprofeta bya Daniyele byi ri: “Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:44.

10. Ha yini hi wu langutele hi mahlo-ngati Mfumo wa Xikwembu?

10 Hi swi navela hi mbilu hinkwayo ku vona Mfumo wa Xikwembu wu lovisa mafambiselo ya swilo yo homboloka ya Sathana, hikuva leswi swi ta vula ku kwetsimisiwa ka vito lerinene ra Yehovha ni ku lovisiwa ka vakaneti hinkwavo va vuhosi bya Xikwembu. Hi khongela hi mbilu hinkwayo hi ku: “Vito ra wena a ri kwetsimisiwe,” naswona hi vula hi rito rin’we ni muapostola Yohane hi ku: “Amen! Tana, Hosi Yesu.” (Nhlavutelo 22:20) Ina, onge Yesu a nga ta a ta kwetsimisa vito ra Yehovha a tlhela a lwela vuhosi bya Yena, leswaku ku ta hetiseka marito ya mupisalema lama nge:  “Leswaku vanhu va ta swi tiva leswaku wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.”—Pisalema 83:18.

“Ku Rhandza Ka Wena A Ku Endleke”

11, 12. (a) Xana hi va hi kombela yini loko hi khongelela leswaku ku rhandza ka Xikwembu “ku [endleka] emisaveni, hilaha ku endlekaka hakona etilweni”? (b) Loko hi khongelela leswaku ku endliwa ku rhandza ka Yehovha hi suka hi khongelela yini swin’wana?

11 Yesu u tlhele a dyondzisa vadyondzisiwa vakwe ku khongela va ku: “Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Vuako lebyi byi ve kona hikwalaho ka ku rhandza ka Yehovha. Swivumbiwa swa le tilweni leswi nga ni matimba swi huwelela swi ku: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” (Nhlavutelo 4:11) Yehovha u ni xikongomelo hi “swilo swa le tilweni ni swilo swa le misaveni.” (Vaefesa 1:8-10) Loko hi khongelela ku rhandza ka Xikwembu leswaku ku endleka, entiyisweni hi kombela Yehovha leswaku a hetisisa xikongomelo xakwe. Ku tlula kwalaho, hi kombisa leswaku hi navela ku vona ku rhandza ka Xikwembu ku endliwa evuakweni hinkwabyo.

12 Loko hi khongela hi ndlela leyi hi kombisa ni leswaku hi tiyimiserile ku hanya hi ku pfumelelana ni ku rhandza ka Yehovha. Yesu u te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yohane 4:34) Tanihi Vakreste lava tinyiketeleke hi tsakela ku endla ku rhandza ka Xikwembu ku fana na Yesu. Leswi hi rhandzaka Yehovha ni N’wana wakwe hi susumeteleka ku “nga ha tlheli [hi] hanyela ku navela ka vanhu nikatsongo, kambe [hi] hanyela ku rhandza ka Xikwembu.” (1 Petro 4:1, 2; 2 Vakorinto 5:14, 15) Hi tikarhatela ku papalata ku endla swilo leswi hi swi tivaka leswaku swi lwisana ni ku rhandza ka Yehovha. (1 Vatesalonika 4:3-5) Loko hi tinyika nkarhi wa ku hlaya Bibele, hi “[hambeta hi] twisisa leswi ku rhandza ka Yehovha ku nga swona,” loku katsaka ku hlanganyela hi ku hiseka eku chumayeleni ka “mahungu lamanene lawa ya mfumo.”—Vaefesa 5:15-17; Matewu 24:14.

Ku Rhandza Ka Yehovha eTilweni

13. Xana ku rhandza ka Xikwembu a ku endliwa hi ndlela yihi emahlweni swinene ka ku xandzuka ka Sathana?

13 Ku rhandza ka Yehovha a ku ri karhi ku hetisisiwa ematilweni loko n’wana wa yena un’wana wa moya a nga si xandzuka kutani a va Sathana. Buku ya Swivuriso yi hlamusela N’wana wa mativula wa Xikwembu tanihi vutlhari lebyi munhuhatiweke. Yi kombisa leswaku emalembeni yo tala swinene, N’wana la nga swakwe wa Xikwembu a a “tsakile emahlweni ka yena nkarhi hinkwawo,” a tsakela ku endla ku rhandza ka Tata wakwe. Eku heteleleni u ve “mutirhi la nga ni vuswikoti” wa Yehovha eku tumbuluxeni ka swilo hinkwaswo “ematilweni ni le henhla ka misava, swilo leswi vonakaka ni swilo leswi nga vonakiki.” (Swivuriso 8:22-31; Vakolosa 1:15-17) Yehovha u tirhise Yesu tanihi Rito rakwe, kumbe Muvulavuleri wakwe.—Yohane 1:1-3.

14. Hi nga dyondza yini eka Pisalema 103 malunghana ni ndlela leyi tintsumi ti hetisisaka ku rhandza ka Yehovha ha yona ematilweni?

14 Mupisalema u kombisa leswaku vuhosi bya Yehovha byi tlakuke ku tlula bya swivumbiwa hinkwaswo ni leswaku mavandla ya tintsumi ma yingisa swiletelo ni swileriso swakwe. Ha hlaya: “Yehovha u simeke xiluvelo xakwe xi tiya ematilweni; naswona vuhosi byakwe byi fuma swilo hinkwaswo. Dzunisani Yehovha, N’wina tintsumi takwe leti nga ni matimba lamakulu, leti hetisisaka rito rakwe, hi ku yingisa mpfumawulo wa rito rakwe. Dzunisani Yehovha, n’wina mavuthu yakwe hinkwawo, n’wina vatirheli vakwe, lava endlaka ku rhandza kakwe. Dzunisani Yehovha, n’wina mintirho yakwe hinkwayo, etindhawini takwe hinkwato leti a ti fumaka [kumbe leti a ti lawulaka].”—Pisalema 103:19-22.

15. Xana ku va Yesu a kume matimba ya Mfumo ku ku khumbe njhani ku endliwa ka ku rhandza ka Xikwembu etilweni?

15 Endzhaku ka ku xandzuka ka yena, Sathana a a ha swi kota ku nghena etilweni, hilaha swi kombisiweke hakona ebukwini ya Yobo. (Yobo 1:6-12; 2:1-7) Hambiswiritano, buku ya Nhlavutelo yi profete leswaku ku ta fika nkarhi lowu Sathana ni madimona yakwe va nga ta hlongoriwa etilweni. Swi le rivaleni leswaku nkarhi wolowo wu fike endzhakunyana ka ku va Yesu Kreste a kume  matimba ya Mfumo hi 1914. Ku sukela hi nkarhi wolowo a ka ha vanga na ndhawu ya vaxandzuki volavo etilweni. Va hikeriwe emisaveni ntsena. (Nhlavutelo 12:7-12) Etilweni a nga ha ri kona loyi a lwisanaka ni vuhosi bya le henhla, ko twala ntsena marito lama hlanganyelaka swin’we eku dzuniseni ka “Xinyimpfana,” ku nga Kreste Yesu, ma tlhela ma dzunisa Yehovha hi ku titsongahata. (Nhlavutelo 4:9-11) Ku rhandza ka Yehovha ka endleka hakunene etilweni.

Ku Rhandza Ka Yehovha Hi Misava

16. Xana xikhongelo xa xikombiso xi kanetana njhani ni dyondzo ya Vujagana malunghana ni ntshembo wa vanhu?

16 Tikereke ta Vujagana a ti yi katsi misava eswikongomelweni swa Xikwembu, ti vula leswaku vanhu lavanene hinkwavo va ya etilweni. Kambe Yesu u hi dyondzise ku khongela hi ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Xana ku nga va ku ri ntiyiso ku vula leswaku ku rhandza ka Yehovha ku endliwa hi ku helela namuntlha laha misaveni leyi nga ni madzolonga, vuhomboloki, vuvabyi ni rifu? Nikatsongo! Hikwalaho hi fanele hi khongela hi mbilu hinkwayo leswaku ku rhandza ka Xikwembu ku endliwa emisaveni hi ku pfumelelana ni xitshembiso lexi tsariweke hi muapostola Petro, lexi nge: “Ku ni matilo lamantshwa [Mfumo wa Mesiya laha ku nga ta va ku fuma Kreste] ni misava leyintshwa [vanhu vo lulama] leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.”—2 Petro 3:13.

17. Hi xihi xikongomelo xa Yehovha hi misava?

17 Yehovha u vumbe misava a ri ni xikongomelo. U huhutele muprofeta Esaya ku tsala a ku: “Yehovha, Mutumbuluxi wa matilo, Yena Xikwembu xa ntiyiso, Muvumbi wa misava ni Muendli wa yona, Yena Loyi a yi simekeke yi tiya, loyi a nga yi tumbuluxelangiki swa hava, loyi a yi vumbeke leswaku ku akiwa eka yona, u te: ‘Hi mina Yehovha, a ku na un’wana.’” (Esaya 45:18) Xikwembu xi veke mpatswa wo sungula wa vanhu entangeni wa paradeyisi, kutani xi va lerisa xi ku: “Tswalanani mi andza, mi tata misava, mi yi fuma.” (Genesa 1:27, 28; 2:15) Swi le rivaleni leswaku xikongomelo xa Muvumbi hileswaku emisaveni ku tshama vanhu vo lulama lava hetisekeke lava swi tsakelaka ku titsongahatela vuhosi bya Yehovha kutani va hanya hilaha ku nga heriki eParadeyisini leyi Kreste a yi tshembiseke.—Pisalema 37:11, 29; Luka 23:43.

18, 19. (a) I yini lexi faneleke xi endliwa loko ku rhandza ka Xikwembu ku nga si endleka hi ku helela emisaveni? (b) Hi tihi timhaka tin’wana leti khumbaka xikhongelo xa xikombiso xa Yesu leti nga ta kambisisiwa exihlokweni lexi landzelaka?

18 Ku rhandza ka Yehovha malunghana ni misava ku nge pfuki ku hetisekile hi ku helela loko emisaveni ka ha tshama vavanuna ni vavasati lava delelaka vuhosi byakwe. Xikwembu xi ta tirhisa mavuthu ya matimba ya moya lama lawuriwaka hi Kreste leswaku ma “lovisa lava onhaka misava.” Mafambiselo hinkwawo yo homboloka ya Sathana, swin’we ni vukhongeri bya wona bya mavunwa, tipolitiki leti onhakeke, mabindzu ya makwanga ni lama nga tshembekiki kun’we ni mafambiselo ya nyimpi, swi ta heriseriwa makumu. (Nhlavutelo 11:18; 18:21; 19:1, 2, 11-18) Vuhosi bya Yehovha byi ta va se byi lweriwile ni vito rakwe ri kwetsimisiwile. Hi khongelela swilo leswi hinkwaswo loko hi ku: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:9, 10.

19 Hambiswiritano, exikhongelweni xa yena xa xikombiso Yesu u kombise leswaku hi nga khongela ni hi timhaka ta hina vini. Swileriso swa yena swo khongela hi ndlela yoleyo swi ta kambisisiwa exihlokweni lexi landzelaka.

[Nhlamuselo ya le hansi]

^ par. 9 Vona ndzima 6 ya buku leyi nge Nyikela Nyingiso Eka Vuprofeta Bya Daniyele!, leyi kandziyisiweke hi Timbhoni ta Yehovha.

Mpfuxeto

• Ha yini swi fanerile ku vitana Yehovha tanihi “Tata wa hina”?

• Ha yini swi ri swa nkoka swinene leswaku hi khongelela ku kwetsimisiwa ka vito ra Yehovha?

• Ha yini hi khongelela leswaku Mfumo wa Xikwembu wu ta?

• Loko hi khongelela leswaku ku rhandza ka Xikwembu ku endleka emisaveni hilaha ku endlekaka hakona etilweni hi va hi vula yini?

[Swivutiso Swa Dyondzo]

[Xifaniso lexi nga eka tluka 9]

Swikhongelo swa Yesu a swi hambane swinene ni swikhongelo swa Vafarisi lava a va lava ku voniwa

[Xifaniso lexi nga eka tluka 10]

Vakreste va khongelela leswaku Mfumo wa Xikwembu wu ta, vito ra xona ri kwetsimisiwa ni leswaku ku rhandza ka xona ku endliwa