Nghena endzeni

Hundzela eka leswi nga endzeni

 XIHLOKO LEXI DYONDZIWAKA 1

“U Nga Languti Ematlhelweni, Hikuva Mina Ndzi Xikwembu Xa Wena”

“U Nga Languti Ematlhelweni, Hikuva Mina Ndzi Xikwembu Xa Wena”

“U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna.”—ESA. 41:10.

RISIMU 7 Yehovha Ntamu Wa Hina

LESWI HI NGA TA SWI DYONDZA *

1-2. (a) Xana rungula leri tsariweke eka Esaya 41:10 ri n’wi khumbe njhani makwerhu wa xisati Yoshiko? (b) Xana Yehovha u ri hlayisele vamani rungula leri nga eka Esaya 41:10?

YOSHIKO, loyi a nga Makwerhu wa xisati u byeriwe mahungu lama tsemaka nhlana. Dokodela wakwe u n’wi byele leswaku u ta hanya tin’hweti ti nga ri tingani ntsena. Xana u angule njhani? Yoshiko u tsundzuke ndzimana ya Bibele leyi a yi rhandzaka, ku nga Esaya 41:10. (Hlaya.) Kutani a rhurile u byele dokodela wakwe leswaku a swi n’wi chavisi sweswo hikuva Yehovha u n’wi khome swi tiya hi voko. * Marito ya ndzimana leyi lama khutazaka ma pfune makwerhu wa hina la rhandzekaka leswaku a tshembela eka Yehovha hi ku helela. Na hina ma nga hi pfuna leswaku hi tshama hi rhurile loko hi langutana ni miringo. Leswaku hi twisisa ndlela leyi ma nga hi pfunaka ha yona, a hi sunguleni hi ku kambisisa leswaku hikwalaho ka yini Xikwembu xi nyike Esaya rungula rolero.

2 Eku sunguleni, Yehovha u byele Esaya ku tsala marito wolawo leswaku a chavelela Vayuda lava a va ta yisiwa eBabilona ku ya va mahlonga. Hambiswiritano, Yehovha u hlayise rungula rero leswaku ri pfuna Vayuda lava a va ri evuhlongeni swin’we ni vanhu va Xikwembu hinkwavo ku katsa na hina namuntlha. (Esa. 40:8; Rhom. 15:4) Namuntlha, hi hanya “[eminkarhini] ya mangava leyi swi nonon’hwaka ku langutana na yona” naswona ku tlula rini na rini hi lava xikhutazo lexi kumekaka ebukwini ya Esaya.—2 Tim. 3:1.

3. (a) Hi swihi switshembiso leswi kumekaka eka Esaya 41:10, leyi nga ndzimana ya lembe ya 2019? (b) Hikwalaho ka yini hi lava switshembiso leswi?

3 Eka xihloko lexi, hi ta tlhuvutsa switshembiso swinharhu swa  Yehovha leswi tiyisaka ripfumelo leswi tsariweke eka Esaya 41:10: (1) Yehovha u ta va na hina, (2) i Xikwembu xa hina naswona (3) u ta hi pfuna. Ha swi lava switshembiso * leswi, hikuva ku fana na Yoshiko, na hina hi langutana ni miringo evuton’wini. Nakambe hi tshikileriwa hi swiyimo swa misava leyi. Van’wana va hina va tiyisela ku xanisiwa hi tihulumendhe leti nga ni matimba. A hi kambisiseni xitshembiso ha xin’we eka leswinharhu.

“NDZI NA WENA”

4. (a) Hi xihi xitshembiso xo sungula lexi hi nga ta xi kambisisa? (Tlhela u vona nhlamuselo ya le hansi.) (b) Yehovha u swi kombisa njhani leswaku wa hi rhandza? (c) Xana marito ya Xikwembu ma ku khumba njhani?

4 Xitshembiso xo sungula xa Yehovha xi sungula hi marito lama nge: “U nga chavi, hikuva ndzi na wena.” * Yehovha u kombisa leswaku u na hina hi ku hi yingisela ni ku hi komba rirhandzu. Xiya marito lama a ma tirhisaka lama kombisaka rirhandzu leri a nga na rona eka hina. Yehovha u ri: “U . . . wa risima ematihlweni ya mina, u tekiwa u ri la xiximekaka, mina ndzi ku rhandzile.” (Esa. 43:4) A ku na nchumu eka vuako hinkwabyo lexi nga endlaka Yehovha a tshika ku rhandza malandza yakwe, wa tshembeka hi ku helela. (Esa. 54:10) Rirhandzu ni xinakulobye xakwe eka hina swi endla leswaku hi va ni xivindzi. U ta hi sirhelela, hilaha a endleke hakona eka munghana wakwe Abrama (kumbe Abrahama). Yehovha u n’wi byele leswi: “U nga chavi Abrama. Ndzi xitlhangu xa wena.”—Gen. 15:1.

Hi ku pfuniwa hi Yehovha, hi ta kota ku tiyisela miringo leyi fanaka na ndhambi kumbe langavi (Vona tindzimana 5-6) *

5-6. (a) Hi swi tiva njhani leswaku Yehovha u lava ku hi pfuna eka miringo leyi hi hlangavetanaka na yona? (b) Hi nga dyondza yini eka xikombiso xa Yoshiko?

5 Ha swi tiva leswaku Yehovha u lava ku hi pfuna eka miringo leyi hi hlangavetanaka na yona hikuva u tshembisa vanhu vakwe a ku: “Loko wo hundza ematini, ndzi ta va na wena; ni loko wo hundza emilambyeni, a yi nge ku khukhuli. Loko wo famba endzilweni, a wu nge vavuriwi, ni langavi a ri nge ku hisi.” (Esa. 43:2) Xana marito lawa ma vula yini?

6 Yehovha a nga hi tshembisi leswaku u ta susa swiphiqo leswi hi tikiselaka vutomi kambe a nge swi pfumeleli swiphiqo leswi fanaka ni ‘milambu’ leswaku swi hi khukhula kumbe miringo leyi fanaka ni “langavi” leswaku yi hi vavisela makumu.  U hi tiyisekisa leswaku u ta va na hina, a hi pfuna hi “hundza” eka swiphiqo swoleswo. Xana Yehovha u ta endla yini? U ta hi pfuna hi hunguta ku chava leswaku hi tshama hi tshembekile eka yena hambiloko hi langutana ni rifu. (Esa. 41:13) Yoshiko, loyi a boxiweke eku sunguleni, u vone ntiyiso wa sweswo. N’wana wakwe wa nhwanyana u ri: “Hi hlamarisiwe hi ndlela leyi Manana a a rhule ha yona. Entiyisweni hi swi vonile leswaku Yehovha u n’wi pfune leswaku a va ni ku rhula ka mianakanyo. Manana u vulavule ni vaongori ni vavabyi hi Yehovha ni switshembiso swakwe ku fikela loko a lova.” Hi dyondza yini eka xikombiso xa Yoshiko? Loko hi tshemba xitshembiso xa Xikwembu lexi nge, “Ndzi ta va na wena,” na hina hi ta va ni xivindzi hi tlhela hi va ni matimba loko hi ri karhi hi tiyisela miringo.

“MINA NDZI XIKWEMBU XA WENA”

7-8. (a) Hi xihi xitshembiso xa vumbirhi lexi hi nga ta xi kambisisa naswona xi vula yini? (b) Hikwalaho ka yini Yehovha a byele Vayuda lava a va ri evuhlongeni a ku: “U nga languti ematlhelweni”? (c) Hi wahi marito lama kumekaka eka Esaya 46:3, 4 lama nga ha vaka ma rhulise timbilu ta vanhu va Xikwembu?

7 Xiya xitshembiso xa vumbirhi lexi tsariweke hi Esaya: “U nga languti ematlhelweni, hikuva mina ndzi Xikwembu xa wena.” Xana marito lama nge u nga languti ematlhelweni ma vula yini? Eka ndzimana leyi, marito ya ririmi ro sungula lama nge “u nga languti ematlhelweni” ma vula “ku tshamela ku languta ematlhelo hi ku chava leswaku munhu kumbe nchumu wo karhi lowu nga ni khombo wu nga ha ku vavisa” kumbe “ku khomiwa hi rhumbyana ku fana ni munhu loyi a nga exiyin’weni lexi chavisaka.”

8 Hikwalaho ka yini Yehovha a byele Vayuda lava a va ta yisiwa evuhlongeni eBabilona leswaku “[va] nga languti ematlhelweni”? Hikuva a a swi tiva leswaku vaaki va Babilona a va ta khomiwa hi rhumbyana. I yini lexi a xi ta endla leswaku va khomiwa hi rhumbyana? Eku heleni ka malembe ya 70 Vayuda va ri evuhlongeni, muti wa Babilona a wu ta hlaseriwa hi mavuthu lama nga ni matimba ya Meda-Peresiya. Yehovha a a ta tirhisa vuthu leri leswaku a ntshunxa vanhu vakwe lava a va ri evuhlongeni eBabilona. (Esa. 41:2-4) Loko Vababilona ni vanhu va matiko man’wana ya le nkarhini wolowo va twa leswaku nala wa vona a a ri ekusuhi, va ringete ku ti tiyisa hi ku byelana va ku: “Tiya nhlana.” Va tlhele va tiendlela swikwembu swo tala swa hava, va ri ni ntshembo wa leswaku swi ta va sirhelela. (Esa. 41:5-7) Hi nkarhi lowu fanaka, Yehovha u rhulise timbilu ta Vayuda lava a va ri evuhlongeni hi ku va byela a ku: “Wena Israyele, [ku hambana ni vaakelani va wena] u nandza wa mina . . . U nga languti ematlhelweni, hikuva mina ndzi Xikwembu xa wena.” (Esa. 41:8-10) Xiya leswaku Yehovha u te: “Mina ndzi Xikwembu xa wena.” Hi marito wolawo, Yehovha u tiyisekise malandza yakwe yo tshembeka leswaku a nga ma rivalanga—a a ha ri Xikwembu xa wona naswona a ma ha ri vanhu vakwe. U va byele a ku: ‘Ndzi ta ku rhwala ni ku ku ponisa.’ A swi kanakanisi leswaku marito wolawo lama khutazaka ma tiyise Vayuda lava a va ri evuhlongeni.—Hlaya Esaya 46:3, 4.

9-10. Hikwalaho ka yini hi nga fanelanga hi chava? Kombisa.

9 Ku tlula rini na rini, vanhu namuntlha va vilerisiwa hi swiyimo swa misava leyi, leswi nyanyaka ku biha. I ntiyiso, swiphiqo leswi fanaka swa hi khumba na hina. Kambe a hi fanelanga hi chava. Yehovha u hi byela a ku: “Mina ndzi Xikwembu xa wena.” Hikwalaho ka yini marito wolawo ma fanele ma hi pfuna leswaku hi tshama hi rhulile?

10 Ehleketa hi xikombiso lexi: Jim na Ben va khandziye xihahampfhuka lexi ndlengandlengisiwaka hi moya wa matimba. Loko xi ri karhi xi ndlengandlenga hi ndlela yoleyo, ku twakale rito eka xikurisampfumawulo ri ku: “Bohani mabandhi. Hikuva hi ta va hi ri karhi hi ndlengandlengisiwa hi moya ku ringana nkarhi wo karhi.” Hiloko Jim a sungula ku chuha. Kutani muhahisi a  engeta a ku: “Mi nga vileli. I muhahisi la vulavulaka.” Hi nkarhi wolowo Jim a hlakahla nhloko kutani a ku: “Xana wa titwa ku u ri yini?” Hambiswiritano, Jim u xiya leswaku Ben a nga chuhanga nikatsongo. Jim u vutisa Ben a ku: “Hikwalaho ka yini wena u nga chuhanga?” Ben wa n’wayitela kutani a ku: “Hikuva ndzi n’wi tiva kahle muhahasi loyi. I tata wa mina!” Hiloko Ben a ku: “I nge ndzi ku chumbutela swo karhi hi Tatana. Ndza tshemba leswaku loko se u n’wi tiva kahle swin’we ni vuswikoti byakwe byo hahisa, na wena u nge he chuhi.”

11. Hi nga dyondza yini eka xikombiso xa Jim na Ben?

11 Hi nga dyondza yini eka xikombiso lexi? Ku fana na Ben, a hi chavi nchumu hikuva hi n’wi tiva kahle Tata wa hina wa le tilweni, Yehovha. Ha swi tiva leswaku u ta hi kongomisa loko hi langutana ni swiphiqo leswi fanaka ni moya wa matimba enkarhini lowu wa makumu. (Esa. 35:4) Leswi hi tshembaka Yehovha hi ta tshama hi rhulile loko hi hala tlhelo misava yi nga ha tikoti hi ku chava. (Esa. 30:15) Nakambe ku fana na Ben, hi byela vaakelani va hina swivangelo leswi hi endlaka hi tshembela eka Xikwembu. Kutani na vona va ta va ni ntshembo wa leswaku ku nga khathariseki swiphiqo leswi va langutanaka na swona, Yehovha u ta va seketela.

“NDZI TA KU NYIKA MATIMBA [NASWONA] NDZI TA KU PFUNA”

12. (a) Hi xihi xitshembiso xa vunharhu lexi hi nga ta xi kambisisa? (b) Ku boxiwa ka “voko” ra Yehovha ku hi tsundzuxa yini?

12 Ehleketa hi xitshembiso xa vunharhu lexi tsariweke hi Esaya: “Ndzi ta ku nyika matimba. Kunene ndzi ta ku pfuna.” Ana se Esaya a a hlamusele ndlela leyi Yehovha a nga ta pfuna ni ku nyika vanhu vakwe matimba ha yona loko a ku: “Yehovha . . . u ta ta kukota loyi a tiyeke, voko ra yena ri ta n’wi fumela.” (Esa. 40:10) Hakanyingi Bibele yi tirhisa rito “voko” hi ndlela yo fanekisela ku kombisa matimba. Kutani marito lama nge “voko ra Yena ri ta n’wi fumela” ma hi tsundzuxa leswaku Yehovha i Hosi leyi nga ni matimba. U tirhise matimba yakwe lama nga hluriwiki leswaku  a seketela ni ku yimela malandza yakwe ya le nkarhini lowu hundzeke naswona wa ha ya emahlweni a tiyisa ni ku sirhelela lava n’wi tshembaka namuntlha.—Det. 1:30, 31; Esa. 43:10.

A ri kona tlhari leri nga hlulaka voko ra Yehovha ra matimba (Vona tindzimana 12-16) *

13. (a) Hi rini laha ngopfungopfu Yehovha a hetisisaka xitshembiso xakwe xo hi nyika matimba? (b) Hi xihi xitshembiso lexi endlaka hi va ni matimba ni ntshembo?

13 Ngopfungopfu loko valala va hina va hi xanisa, Yehovha u hetisisa xitshembiso xakwe lexi nge: “Ndzi ta ku nyika matimba.” Namuntlha ematikweni man’wana, valala va hina va ringeta hi matimba ku hi tshikisa ku chumayela kumbe ku yirisa vukhongeri bya hina. Hambiswiritano, minhlaselo yo tano a yi hi vilerisi ngopfu. Yehovha u hi tshembise ku hi nyika matimba ni ntshembo. U tshembise a ku: “Tlhari rihi ni rihi leri nga ta endleriwa ku ku hlasela a ri nge humeleli.” (Esa. 54:17) Marito lawa ma hi tsundzuxa swilo swinharhu swa nkoka.

14. Hikwalaho ka yini swi nga hi hlamarisi loko valala va Xikwembu va hi hlasela?

14 Xo sungula, leswi hi nga valandzeri va Kreste, ha swi tiva leswaku hi ta vengiwa. (Mat. 10:22) Yesu u profete leswaku vadyondzisiwa vakwe a va ta xanisiwa hi ndlela ya tihanyi enkarhini wa makumu. (Mat. 24:9; Yoh. 15:20) Xa vumbirhi, vuprofeta bya Esaya byi hi lemukise leswaku valala va hina a va nga ta hi venga ntsena kambe a va ta hi hlasela hi matlhari yo hambanahambana. Matlhari wolawo ma nga ha katsa ku soholota mavunwa leswaku ma vonaka ma ri ntiyiso, va nga ha hi phyarheka mavunwa ya rihlaza kumbe ku hi xanisa hi ndlela ya tihanyi. (Mat. 5:11) Yehovha a nge va siveli valala va hina loko va tirhisa matlhari wolawo ku lwa na hina. (Efe. 6:12; Nhlav. 12:17) Kambe a hi fanelanga hi chava. Hikwalaho ka yini?

15-16. (a) Hi wihi nchumu wa vunharhu lowu hi faneleke hi wu tsundzuka naswona Esaya 25:4, 5 yi wu seketela njhani? (b) Esaya 41:11, 12 yi byi hlamusela njhani vuyelo lebyi nga ta kumiwa hi lava lwaka na hina?

15 Xiya nchumu wa vunharhu lowu hi faneleke hi wu tsundzuka. Yehovha u vule leswaku “tlhari rihi ni rihi” leri nga ta lwa na hina “a ri nge humeleli.” Tanihi leswi khumbi ri hi sirhelelaka eka mpfula ya matimba, Yehovha na yena u hi sirhelela  eka “vukarhi bya lava tihanyi.” (Hlaya Esaya 25:4, 5.) Valala va hina a va nge swi koti ku hi vavisela makumu.—Esa. 65:17.

16 Yehovha u tlhela a hi tiyisa hi ku hi hlamusela hi vuxokoxoko vuyelo lebyi nga ta kumiwa hi ‘lava hi karihelaka.’ (Hlaya Esaya 41:11, 12.) Ku nga khathariseki leswaku valala va hina va tirhisa tindlela tihi ku lwa na hina kumbe nyimpi ya kona yi kule ku fikela kwihi, va ta va ni vuyelo lebyi fanaka: Valala hinkwavo va vanhu va Xikwembu “a va nge pfuni nchumu, va ta lova.”

LESWI NGA HI PFUNAKA LESWAKU HI N’WI TSHEMBA SWINENE YEHOVHA

Hi ta n’wi tshemba swinene Yehovha loko hi hlaya Bibele nkarhi na nkarhi (Vona tindzimana 17-18) *

17-18. (a) Ku hlaya Bibele ku nga hi pfuna njhani leswaku hi ya hi xi tshemba swinene Xikwembu? Vula xikombiso. (b) Xana ku anakanyisisa hi ndzimana ya lembe ya 2019 swi nga hi pfuna njhani?

17 Hi ta n’wi tshemba swinene Yehovha loko hi ya hi n’wi tiva kahle. Ndlela yin’we ntsena leyi nga hi pfunaka leswaku hi xi tiva kahle Xikwembu, i ku hlaya Bibele hi vukheta hi tlhela hi anakanyisisa hileswi hi swi hlayeke. Bibele yi tamele rungula ro tshembeka ra ndlela leyi Yehovha a va sirheleleke ha yona vanhu vakwe enkarhini wa khale. Rungula rero ri hi nyika ntshembo wa leswaku na hina u ta hi khathalela.

18 Anakanya hi marito lawa Esaya a ma tirhiseke ku kombisa ndlela leyi Yehovha a nga ta hi sirhelela ha yona. U fanisa Yehovha ni murisi kutani malandza ya Xikwembu a ma fanisa ni swinyimpfana. Esaya u vula leswi hi Yehovha: “Hi voko ra yena u ta hlengeleta swinyimpfana; u ta swi rhwala exifuveni xa yena.” (Esa. 40:11) Loko hi xiya leswaku voko ra Yehovha ra matimba ri hi angarhile, hi titwa hi sirhelelekile hi tlhela hi va ni ku rhula. Leswaku hlonga ro tshembeka ni ro tlhariha ri hi pfuna hi tshama hi ri ni ku rhula hambiloko hi hlangavetana ni swiphiqo, ri hlawule Esaya 41:10 tanihi ndzimana ya lembe ya 2019, yi ri “U nga languti ematlhelweni, hikuva mina ndzi Xikwembu xa wena.” Anakanyisisa hi marito wolawo lama khutazaka. Ma ta ku nyika matimba leswaku u kota ku langutana ni swiphiqo leswi u nga ha hlangavetanaka na swona.

RISIMU 38 Xikwembu Xi Ta Ku Nyika Ntamu

^ par. 5 Ndzimana ya lembe ya 2019 yi hi nyika swivangelo swinharhu leswi nga endlaka leswaku hi tshama hi rhurile hambiloko ku humelela swilo swo biha laha misaveni kumbe evuton’wini bya hina. Xihloko lexi, xi ta kambisisa swivangelo sweswo ni ku tlhela xi hi pfuna leswaku hi nga vileli ngopfu nileswaku hi tshembela eka Yehovha hilaha ku heleleke. Anakanyisisa hi ndzimana ya lembe leri. Loko u swi kota, yi hlokohate. Yi ta ku nyika matimba leswaku u kota ku langutana ni swiphiqo leswi u nga ha hlangavetanaka na swona.

^ par. 3 NHLAMUSELO YA RITO: Xitshembiso i xitiyisekiso xa leswaku marito yo karhi lama vuriweke ma ta hetiseka hakunene. Switshembiso leswi Yehovha a hi tshembisaka swona swi nga endla leswaku hi nga vileli ngopfu hi swiphiqo leswi hi nga ha vaka na swona evuton’wini bya hina.

^ par. 4 Marito lama nge “U nga chavi” ma boxiwe kanharhu eka Esaya 41:10, 13 na 14. Eka tindzimana leti, rito “mina” ri humelela ko tala (ri kombetela eka Yehovha). Hikwalaho ka yini Yehovha a huhutele Esaya ku tirhisa rito “mina” ko tala? Ku kandziyisa yinhla ya nkoka—hi nga hunguta ku chava ntsena loko hi tshembela eka Yehovha.

^ par. 52 NHLAMUSELO YA XIFANISO: Swirho swa ndyangu swi langutana ni miringo entirhweni, eka swa rihanyo, ensin’wini ni le xikolweni.

^ par. 54 NHLAMUSELO YA XIFANISO: Nhlangano wa Timbhoni lowu a wu khomeriwe endlwini ya makwerhu wu kavanyetiwa hi maphorisa, kambe vamakwerhu a va khomiwanga hi rhumbyana.

^ par. 56 NHLAMUSELO YA XIFANISO: Vugandzeri bya Ndyangu bya nkarhi ni nkarhi byi hi pfuna leswaku hi tiyisela.