EMISAVENI hinkwayo, vakulu va ri tlangela lunghelo leri va nga na rona evandlheni ra Vukreste. Hakunene vakulu i nkateko eka hina hinkwerhu! Hambiswiritano, ka ha ku endliwa ku cinca ko karhi. Vakulu lava dyuhaleke va komberiwe ku hundzisela vutihlamuleri bya vona lebyikulu eka vakulu lava ha ri ki vantshwa. Hi ndlela yihi?

Lunghiselelo lerintshwa hi leswaku valanguteri va muganga swin’we ni valeteri eka swikolo swa nhlengeletano va fanele va yima ku endla mitirho yoleyo loko va fika eka malembe ya 70. Vakulu lava nga ni malembe ya 80 va fanele va hundzisela swiavelo swa vona eka vakulu lava ha ri ki vantshwa swo tanihi ku va muhlanganisi wa Komiti ya Rhavi kumbe muhlanganisi wa huvo ya vakulu evandlheni. Xana vakulu lava dyuhaleke va angule njhani? Va kombise ku tshembeka eka Yehovha ni le ka nhlengeletano yakwe!

Ken, loyi a tirheke tanihi muhlanganisi wa Komiti ya Rhavi kwalomu ka malembe ya 49 u ri: “Ndzi amukele xiboho xexo hi mandla mambirhi. Entiyisweni hi mixo wolowo, a ndza ha ku khongela eka Yehovha hi xilaveko xa makwerhu la ha ri ki muntshwa la nga tirhaka tanihi muhlanganisi.”  Vakulu lava dyuhaleke emisaveni hinkwayo va titwe hi ndlela leyi Ken a titweke ha yona. Leswi va rhandzaka ku tirhela vamakwerhu, eku sunguleni a swi va hete matimba.

Esperandio, loyi a tirha tanihi muhlanganisi wa huvo ya vakulu evandlheni ra ka vona u te: “Swi ndzi karhatilenyana.” Kambe u swi twisisile u tlhele a ku: “Ku cinca loku ku ndzi nyike nkarhi wo khathalela rihanyo ra mina leri tsaneke.” Esperandio, u hambete a tirhela Yehovha hi ku tshembeka naswona i nkateko evandlheni ra ka vona.

Ku vuriwa yini hi valanguteri va muganga lava tirheke malembe yo tala, lava bohekeke ku tirha eka swiavelo swin’wana? Allan, la tirheke tanihi mulanguteri wa muganga ku ringana malembe ya 38 u ri: “Loko ndzi twa hi ta ku cinca loku a ndzi karhatekile.” Hambiswiritano u vone swi ri swa nkoka ku letela van’wana naswona u hambeta a tirhela Yehovha hi ku tshembeka.

Russell, loyi a tirheke tanihi mulanguteri wa muganga ni muleteri eka swikolo swa nhlengeletano ku ringana malembe ya 40, u vula leswaku yena ni nghamu yakwe a va karhatekile eku sunguleni. U ri: “A hi wu rhandza swinene ntirho wa hina naswona a hi titwa ha ha ri ni matimba yo ya emahlweni.” Russell ni nghamu yakwe va tirhisa ntokoto lowu va nga na wona leswaku va pfuna vahuweleri va le vandlheni ra ka vona.

Hambiloko u nga si tshama u va eka xiyimo xa vamakwerhu lava, rungula leri kumekaka eka 2 Samuwele ri ta ku pfuna leswaku u twisisa ndlela leyi va titwaka ha yona.

Anakanya hi nkarhi lowu Absalomu n’wana wa Hosi Davhida a xandzukeke ha wona. Davhida u baleke ku suka eYerusalema a ya eMahanayimi evuxeni bya Nambu wa Yordani. Davhida ni malandza yakwe a va pfumala swa ku tihanyisa. Xana wa ha tsundzuka leswaku ku humelele yini?

Vavanuna vanharhu va va tisele swo etlela eka swona, swakudya ni swilo swin’wana swa nkoka. Barizilayi a ri un’wana wa vavanuna volavo. (2 Sam. 17:27-29) Loko ku xandzuka ka Absalomu ku herisiwile, Davhida u tlhelele eYerusalema naswona u heleketiwe hi Barizilayi ku ya fika eYordani. Davhida u kombele Barizilayi leswaku a famba na yena eYerusalema. Hosi yi tshembise ku nyika Barizilayi swakudya hambileswi a ri “munhu lonkulu ngopfu [a fuwile]” naswona a nga kayiveli swakudya. (2 Sam. 19:31-33) Kambe leswi Davhida a tsakisiwa hi vumunhu bya Barizilayi a tiyimisele ku yingisa swiringanyeto swakwe. Hakunene a ku ta va ku ve lunghelo eka Barizilayi ku tshama ni ku tirha evuhosini!

Leswi a tiva xiyimo xakwe naswona a titsongahata, Barizilayi u vule leswaku se u ni malembe ya 80. U engete a ku: “Xana ndzi nga hambanisa exikarhi ka leswinene ni swo biha?” A a vula yini? Leswi Barizilayi a kurile swi le rivaleni leswaku a ri na ntokoto. A ha ta swi kota ku nyikela switsundzuxo swa vutlhari hilaha vanhu lava kuleke va endleke  ha kona eka Hosi Rehobuwama. (1 Tih. 12:6, 7; Ps. 92:12-14; Swiv. 16:31) Hikwalaho, loko Barizilayi a vula leswaku a nga ha swi koti ku hambanisa leswinene eka leswo biha, a vula leswaku a nga ha ri na matimba naswona ku ni swilo leswi a nga ha ta kota ku swi endla hikwalaho ka leswi a kuleke. A swi xiya leswaku leswi a ti dya ti ya emagoveni a nga ha nandziheriwi hi swakudya kumbe hi vuyimbeleri. (Ekl. 12:4, 5) Kutani Barizilayi u kombele Davhida leswaku a famba na Kimihama eYerusalema loyi kumbexana a ku ri n’wana wa yena wa jaha.—2 Sam. 19:35-40.

Ku cinca loku fambisanaka na malembe loku boxiweke eku sunguleni ku kombisa langutelo leri fanaka ni leri Barizilayi a ri kombiseke. Ku hambana na Barizilayi, loko ku tekiwa xiboho lexi enkarhini wa hina a ku langutiwanga xiyimo ni vuswikoti bya munhu un’we ntsena. Ku kambisisiwe hi vukheta leswi nga ta vuyerisa vakulu emisaveni hinkwayo.

Vakulu lava dyuhaleke, va swi xiya leswaku loko nhlengeletano ya Yehovha yi ri karhi yi kula, yi ta vuyeriwa loko vutihlamuleri lebyi va nga na byona byo nyikiwa vamakwerhu lava ha riki vantshwa. Hakanyingi vamakwerhu lava dyuhaleke hi vona lava leteleke vamakwerhu lavantshwa, hilaha Barizilayi a nga ha vaka a endle ha kona eka n’wana wakwe na muapostola Pawulo eka Timotiya. (1 Kor. 4:17; Filp. 2:20-22) Vamakwerhu lava, va tikombise va ri “tinyiko [leti nga] vanhu” leswaku va pfuna ku “aka miri wa Kreste.”—Efe. 4:8-12; ringanisa na Tinhlayo 11:16, 17, 29.

Vakulu lava bohekeke ku tshika vutihlamuleri bya vona emisaveni hinkwayo, va tirhisa tindlela tin’wana leti va pfulekeleke entirhweni wa Yehovha leswaku va pfuna van’wana.

Marco, loyi a ri mulanguteri wa muganga ku ringana malembe ya 19 u ri: “Sweswi ndzi kota ku pfuna vavanuna lava nga riki Timbhoni, lava vasati va vona va nga Timbhoni evandlheni ra ka hina.”

Geraldo, loyi a ri mulanguteri wa muganga ku ringana malembe ya 28 u ri: “Sweswi hi tivekele pakani yo pfuna vanhu lava holeke ni ku fambisa tidyondzo to tala ta Bibele.” U vula leswaku yena ni nsati wakwe se va fambisa tidyondzo ta Bibele ta 15 naswona vanhu vo tala lava holeke va va kona eminhlanganweni.

Allan, loyi a boxiweke eku sunguleni u ri: “Se hi ni nkarhi wo tala wo chumayela. Hi tiphina hi ku chumayela etindhawini ta mani na mani, etindhawini ta mabindzu ni ku chumayela vaakelani va hina naswona vambirhi va tshame va ta eminhlanganweni.”

Loko u ri makwerhu loyi a nga ni vuswikoti loyi a kumeke xiavelo lexintshwa, ku ni ndlela yo hlawuleka leyi u nga pfunaka ha yona. U nga seketela ntirho wa Yehovha hi ku byela vantshwa va le vandlheni ra n’wina mintokoto leyi u veke na yona. Russell, loyi a boxiweke eku sunguleni u ri: “Yehovha u letela a tlhela a tirhisa vantshwa lava nga ni vuswikoti. Vamakwerhu va vuyeriwa hikwalaho ka ku hiseka ka vamakwerhu lava, loko va dyondzisa ni ku endla maendzo ya vurisi.”—Vona bokisi leri nge: “ Pfuna Vamakwerhu Lavantshwa Leswaku Va Va Ni Vuswikoti.”

Loko wa ha ku kuma xiavelo lexintshwa tshama u ri ni langutelo lerinene. Ntirho wa wena se wu khumbe vanhu vo tala naswona u nga hambeta u endla tano. Vamakwerhu va ta hambeta va ku rhandza hilaha a va ku rhandza ha kona.

Xa nkoka swinene, Yehovha wa tsaka hi ntirho lowu u wu endleke. ‘Xikwembu a xi nge rivali ntirho wa n’wina ni rirhandzu leri mi ri kombiseke hikwalaho ka vito ra xona, hileswi mi tirheleke vakwetsimi naswona ma ha ya emahlweni mi va tirhela.’ (Hev. 6:10) Marito wolawo lama huhuteriweke, ma tiyisekisa leswaku Xikwembu xi tsundzuka hambi ku ri mitirho leyi hi yi endleke enkarhini lowu hundzuke. U wa risima swinene eka Yehovha, hikwalaho a nge ku rivali swin’we ni mitirho ya  wena ya khale, ku katsa ni matshalatshala lama u ya ka emahlweni u ma endla leswaku u n’wi tsakisa!

Ku vuriwa yini loko u nga si tshama u va eka xiyimo lexi fanaka na lexi hi buleke ha xona? Mhaka leyi hi buleke ha yona yi nga ku pfuna na wena. Njhani?

Loko u tirhisana ni makwerhu la kuleke la amukeleke xiavelo lexintshwa, u ta vuyeriwa eka ntokoto lowu a nga na wona. Kombela switsundzuxo eka yena. Kombela swiringanyeto. Nakambe, xiyisisa leswaku u xi tamela njhani xiavelo xakwe xa sweswi.

Ku nga khathariseki leswaku u makwerhu la kuleke loyi a bohekeke ku cinca xiavelo kumbe u makwerhu wa xinuna kumbe wa xisati loyi a pfunaka van’wana, tsundzuka leswaku Yehovha u ku teka ku ri ka risima, ku tshembeka ka vanhu lava n’wi tirheleke malembe yo tala ni lava va hambetaka va n’wi tirhela.